2007ലും 2011ലും നടത്തിയ കിലുക്കം (ഓൾ യുകെ മലയാളി ഡാൻസ് കോമ്പറ്റീഷൻസ് )
പ്രോഗ്രാമുകളോടെ യുകെ- യിലെ മുഴുവൻ മലയാളി സമൂഹത്തിന്റെയും ശ്രദ്ധയാകർഷിച്ചുകൊണ്ടു മുൻനിരയിൽ സ്ഥാനം പിടിച്ച മലയാളി അസോസിയേഷൻ പ്രസ്റ്റൻ (MAP)വീണ്ടുമിതാ മറ്റൊരു സംരംഭത്തിന് കളമൊരുക്കുന്നു.
മലയാളി അസോസിയേഷൻ പ്രസ്റ്റണിന്റെ പതിനാറാം വാര്ഷികാഘോഷത്തിന്റെ ഭാഗമായി യുകെ മലയാളി ബാഡ്മിന്റൺ പ്രേമികൾക്കായി ”ഓൾ യുകെ മലയാളി മെൻസ് ഇന്റെർമീഡിയറ്റ് ബാഡ്മിന്റൺ ഡബിൾ‍സ്‌ ടൂർണമെന്റ് – പൂരം 2019 ”സംഘടിപ്പിക്കുന്നു.
വടക്കൻ യുകെയിലെ ഈ മാസ്മരിക പോരാട്ടത്തിന് അത്യാധുനിക മികവോടു കൂടിയുള്ള പ്രസ്റ്റൻ കോളേജ്‌ ഇൻഡോർ കോർട്ട് കൾ 2019 ഒക്ടോബർ 5- ആം തീയതി രാവിലെ ഒൻപതുമണിയോട് സജ്ജമാകുമ്പോൾ നിരവധി പ്രാദേശിക ബാഡ്മിന്റൺ മത്സരങ്ങൾ നടത്തി പ്രാഗത്ഭ്യം തെളിയിച്ച MAP യുടെ സ്പോർട്സ് കമ്മറ്റി ടൂർണമെന്റിനു മേൽനോട്ടം വഹിക്കുന്നു.
32 ടീമുകൾ മാറ്റുരക്കുന്ന ഈ ടൂർണമെന്റിന്റെ ആദ്യപാദം 4 ഗ്രൂപ്പുകളിലായി round-robin ശൈലിയിൽ നടത്തപ്പെടുന്നു! വിശാലമായ സൗജന്യ പാർക്കിംഗ് സൗകര്യങ്ങളും, കേറ്ററിംഗ് ക്രമീകരണങ്ങളും സംഘാടകർ ഇതിനോടകം ഒരുക്കിക്കഴിഞ്ഞു. സമ്മാനാർഹരാകുന്നവർക്ക് യഥാക്രമം വിജയികൾക്ക് £250 + ട്രോഫി, റണ്ണേഴ്‌സ് അപ്പ് £150 + ട്രോഫി, മൂന്നാം സ്ഥാനം £100 + ട്രോഫി, നാലാം സ്ഥാനം £50 + ട്രോഫി കാത്തിരിക്കുന്ന ഈ ടൂർണമെന്റിന്റെ എൻട്രി ഫീ ഒരു ടീമിന് £30 ആയിരിക്കും
പരിചയസമ്പന്നതയും, അർപ്പണബോധവും മുതൽക്കൂട്ടായുള്ള മലയാളി അസോസിയേഷൻ പ്രെസ്റ്റന്റെ (MAP)നേതൃത്വത്തിൽ നടത്തപ്പെടുന്ന ഈ മാമാങ്കത്തിലേക്കു എല്ലാ ബാഡ്മിന്റൺ പ്രേമികളെയും സഹർഷം സ്വാഗതം ചെയ്യുന്നു.

ടൂർണമെന്റിന്റെ വിശദ വിവരങ്ങൾക്ക് ബന്ധപ്പെടുക (ഷൈൻ ജോർജ് : 07727258403 , ബിനു സോമരാജ് :07828303288 , പ്രിയൻ പീറ്റർ:07725989295).

ടൂർണമെന്റ് വേദി:
Preston college
St Vincents Road,
Fulwood,
Preston PR2 8UR

ഇടുക്കി ചാരിറ്റി ഗ്രൂപ്പ്‌ യു കെ പ്രളയ സഹായമായി യു കെ മലയാളികളില്‍നിന്നും ശേഖരിച്ച 3174 പൗണ്ട് ( 2,78000 രൂപ) യില്‍ 125000 രൂപ മലപ്പുറം ,കവളപ്പാറയിലും, ,125000 രൂപ വയനാട്ടിലും 28000 രൂപ ഇടുക്കിയിലും നല്‍കാനാണ് ഇടുക്കി ചാരിറ്റി ഗ്രൂപ്പ്‌ കമ്മറ്റി തീരുമാനിച്ചിരുന്നത് . അതില്‍ കവളപ്പാറയിലെയും ഇടുക്കിയിലെയും ശനിയാഴ്ച സാമൂഹിക പ്രവര്‍ത്തകരുടെ സാനൃതൃത്തില്‍ തുകകള്‍ വിതരണം ചെയ്തു .വയനാട്ടിലെ ഉടന്‍ നല്‍കുമെന്നു അറിയിക്കുന്നു . .
കവളപ്പാറയില്‍ നല്‍കിയ സഹായം മൂന്ന് കുടുംബങ്ങള്‍ക്ക് വീതിച്ചു ബഹുമാനപ്പെട്ട പോത്തുകല്‍ പഞ്ചായത്ത് പ്രസിഡണ്ട്‌ കരുണാകരന്‍ പിള്ള കൈമാറി . വസന്ത 50000 രൂപ ,സീന 50000 രൂപ,അല്ലി ജെനിഷ് 25000 എന്നിങ്ങനെയാണ് സഹായം നല്‍കിയത്. പഞ്ചായത്ത് പ്രസിഡണ്ടുമായി ആലോചിച്ചാണ് അര്‍ഹതപ്പെട്ടവരെ കണ്ടെത്തിയത് .അവിടെ പണം എത്തിച്ചുകൊടുക്കുവാന്‍ സഹായിച്ചത് ബെര്‍മിങ്ങമില്‍ താമസിക്കുന്ന സുനില്‍ മേനോന്റെ ഭാരൃപിതാവ് നിലബൂര്‍ സ്വദേശി വാസുദേവന്‍‌ നായരാണ് ,അദേഹവും പരിപാടിയില്‍ പങ്കെടുത്തു. ഇടുക്കിയില്‍ കഴിഞ്ഞ പ്രളയത്തില്‍ വീട് നഷ്ട്ടപ്പെട്ട ഇടുക്കി, മഞ്ഞപ്പാറ സ്വദേശി മാനുവല്‍ ആക്കതോട്ടിയില്‍ , കൃാന്‍സര്‍ രോഗിയായ തടിയംമ്പാട്് സ്വദേശി ബേബി പുളിക്കല്‍ എന്നിവര്‍ക്ക് 14000 രൂപ വീതം സാമൂഹിക പ്രവര്‍ത്തകരുടെ സാനൃതൃത്തില്‍ ഇന്നലെ കൈമാറി . പ്രളയവുമായി ബന്ധപ്പെട്ടു ഇടുക്കി ചാരിറ്റി ഗ്രൂപ്പിന്‍റെ സഹായം ഇതുവരെ ആവശൃപ്പെട്ട എല്ലാവര്ക്കും ചെറുതെങ്കിലും സഹായം ചെയ്യാന്‍ ഞങ്ങള്‍ക്ക് കഴിഞ്ഞിട്ടുണ്ട് എന്നതില്‍ സന്തോഷമുണ്ട് .ഈ എളിയ പ്രവര്‍ത്തനത്തില്‍ ഞങളെ സഹായിച്ച എല്ലാവരോടും ഒരിക്കല്‍ കൂടി നന്ദി അറിയിക്കുന്നു.

ഇതില്‍ ഞങ്ങള്‍ ഏറ്റവുകൂടുതല്‍ കടപ്പെട്ടിരിക്കുന്നത് കേറ്ററിങ്ങിലെ വാരിയെഴ്സ് ക്ലബ് ഭാരവാഹികളായ പ്രസിഡന്റ്‌ സിബു ജോസഫ്‌, സെക്രെട്ടെറി ജോം മാക്കില്‍ ,ട്രെഷര്‍ ലെനോ ജോസഫ്‌ മനോജ്‌ മാത്യു ,അബു വടക്കന്‍ ,എന്നിവരോടാണ് . . അവര്‍ സ്വിറ്റ്സര്‍ലന്‍ഡിലേക്ക് ഹോളിഡെ പോകാന്‍ സ്വരുകൂട്ടിയ 800 പൗണ്ടാണ് നാട്ടില്‍ വേദന അനുഭവിക്കുന്ന മനുഷൃരെ സഹായിക്കുന്നതിനു ഇടുക്കി ചാരിറ്റി ഗ്രൂപ്പ്‌ യു കെ യ്ക്കു നല്‍കിയത്. .

ഇടുക്കി ചാരിറ്റി ഗ്രൂപ്പ്‌ എന്നത് കേരളത്തില്‍ നിന്നും യു കെ യില്‍ കുടിയേറിയ കഷ്ട്ടപ്പാടും ബുദ്ധിമുട്ടും അറിഞ്ഞു ജീവിച്ചവരുടെ ഒരു കൂട്ടായ്മയാണ് .ഞങ്ങള്‍ ജാതി ,മത ,വര്‍ഗ്ഗ,വര്‍ണ്ണ, സ്ഥലകാല വൃതൃാസമില്ലാതെയാണ് ആളുകളെ സഹായിച്ചുകൊണ്ടിരിക്കുന്നത് .

കഴിഞ്ഞ പ്രളയത്തില്‍ ഞങ്ങളുടെ ശ്രമഫലമായി 7 ലക്ഷത്തോളം രൂപ പല സംഘടനകളില്‍ നിന്നും ശേഖരിച്ചു നാട്ടിലെ ആളുകള്‍ക്ക് വിതരണം ചെയ്യാന്‍ കഴിഞ്ഞു . ഞങ്ങൾ ഇതു വരെ ഏകദേശം 75 ലക്ഷം രൂപ നാട്ടിലെ ആളുകള്‍ക്ക് നല്‍കി സഹായിച്ചിട്ടുണ്ട് ,ഞങള്‍ സുതാര്യവും സത്യസന്ധവുമായി നടത്തിയ പ്രവര്‍ത്തനങ്ങള്‍ക്ക് നിങള്‍ നല്‍കിയ അംഗികാരമായി ഞങള്‍ ഇതിനെ കാണുന്നു.

ഇടുക്കി ചാരിറ്റി ഗ്രൂപ്പ്‌ യു കെ യ്ക്ക് നേതൃത്വംകൊടുക്കുന്നത് സാബു ഫിലിപ്പ് ,ടോം ജോസ് തടിയംപാട്, സജി തോമസ്‌ എന്നിവരാണ്‌, ഞങ്ങളുടെ രക്ഷാധികാരി ബഹുമാനപ്പെട്ട തമ്പി ജോസാണ്., ഞങ്ങള്‍ നടത്തിയ എല്ലാ പ്രവര്‍ത്തനങ്ങളും ഇടുക്കി ചരിറ്റി ഗ്രൂപ്പ്‌ എന്ന ഫേസ് ബുക്ക്‌ പേജില്‍ പ്രസിദ്ധീകരിച്ചിട്ടുണ്ട്. ഭാവിയിലും ഞങ്ങള്‍ നടത്തുന്ന എളിയ പ്രവര്‍ത്തനത്തിന് നിങ്ങളുടെ സഹായങ്ങള്‍ നല്‍കണമെന്ന് അപേക്ഷിക്കുന്നു.
ടോം ജോസ് തടിയംമ്പാട്

ലിയോസ് പോൾ

കഴിഞ്ഞ പത്തു വർഷക്കാലമായി യുകെ മലയാളികളുടെ സാമൂഹ്യ ജീവിതത്തിനകത്ത് പുരോഗമന ചിന്തയുടെയും, ജനാധിപത്യ ബോധത്തിന്റെയും പുത്തൻ ഉണർവ്വ് സമ്മാനിച്ചുകൊണ്ട് സമാനതകളില്ലാത്ത സാംസ്‌ക്കാരിക പ്രവർത്തനം കാഴ്ച വെക്കുന്ന ചേതന യുകെ, 2019ൽ അതിന്റെ പത്താമത് പ്രവർത്തന വർഷത്തിലേക്ക് കടക്കുകയാണ്. ഒരു വർഷം നീണ്ടു നിൽക്കുന്ന വിപുലമായ പരിപാടികളോട് കൂടി പത്താം വാർഷികം കൊണ്ടാടാനാണ് ചേതന UK എക്സിക്യൂട്ടീവ് കമ്മിറ്റി തീരുമാനിച്ചിരിക്കുന്നത്.

ആദ്യ ഘട്ടം എന്ന നിലയിൽ, വരുന്ന സെപ്റ്റംബർ 21 ശനിയാഴ്ച വൈകിട്ട് നാലിന് ഓക്സ്‌ഫോഡിലെ നോർത്തവേ ചർച്ച് ഹാളിൽ (12 Sutton Road, Marston,Oxford,OX3 9RB) ചേതന യുകെ പ്രസിഡന്റ് ശ്രീ. സുജൂ ജോസഫിന്റെ അദ്ധ്യക്ഷതയിൽ ചേരുന്ന പൊതു സമ്മേളനത്തിൽ വച്ച് പത്താം വാർഷിക ആഘോഷങ്ങളുടെ ഔപചാരികമായ ഉത്ഘാടനം അസോസിയേഷൻ ഓഫ് ഇന്ത്യൻ കമ്മ്യൂണിസ്റ്റിന്റെ ജനറൽ സെക്രട്ടറി ഹർസേവ്‌ ബൈൻസ് നിർവഹിക്കും. തുടർന്ന് നടക്കുന്ന സാംസ്കാരിക സമ്മേളനത്തിൽ കേരളത്തിലെ മികച്ച പ്രഭാഷകനും , ചിന്തകനും, ഗ്രന്ഥകാരനും, അദ്ധ്യാപകനുമായ ഡോ.സുനിൽ പി ഇളയിടം “ജനാധിപത്യം,അകവും പുറവും”എന്ന വിഷയത്തിൽ മുഖ്യ പ്രഭാഷണം നടത്തും.വൈജ്ഞാനികമായ ഉള്ളടക്കത്തോട് കൂടിയ സാംസ്‌കാരിക സമ്മേളനത്തിന് ശേഷം ഓക്‌സ്‌ഫോർഡിലെ മിടുക്കരായ കലാകാരന്മാരും കലാകാരികളും അണി നിരക്കുന്ന കലാ പ്രകടനങ്ങൾ അരങ്ങേറും.തുടർന്ന്, സ്നേഹവിരുന്നോടു കൂടി പത്താം വാർഷിക ആഘോഷത്തിൻ്റെ ഉത്‌ഘാടന പരിപാടി രാത്രി 9.30 ന് സമാപിക്കും.

വിഞ്ജാനപ്രദമായ സാംസ്‌കാരിക സമ്മേളനത്തിലേക്കും തുടർന്നുള്ള കലാസന്ധ്യയിലേക്കും എല്ലാ നല്ലവരായ നാട്ടുകാരെയും,സുഹൃത്തുക്കളെയും, സഹോദരീസഹോദരന്മാരെയും ചേതന യുകെ സർവ്വാത്മനാ സ്വാഗതം ചെയ്യുന്നു,ക്ഷണിക്കുന്നു.
വേദിയുടെ വിലാസം:
North Way Church Hall
12 Sutton Road
Marston,Oxford

OX3 9RB.

എടത്വ: ഒരുകാലത്ത് കലാലയ രാഷ്ട്രീയത്തിന്റെ ചൂടും ചൂരുമറിഞ്ഞവർ വീണ്ടും ഒന്നിച്ചു .പല നിറങ്ങളിലുള്ള കൊടികൾ പാറിക്കളിച്ച കലാലയം വീണ്ടും അപൂർവമായ സംഗമത്തിന് വേദിയായി. മുഷ്ടി ചുരുട്ടി മുദ്രാവാക്യം വിളിച്ചവരും വിളിപ്പിച്ചവരും  വീണ്ടും ഒന്നിച്ചപ്പോൾ  കലാലയ അങ്കണം മറ്റൊരു  ചരിത്ര സംഭവത്തിന്  കൂടി സാക്ഷിയായി .

എടത്വ സെന്റ് അലോഷ്യസ് കോളേജ് ഫോര്‍മര്‍ യൂണിയന്‍ മെംബേര്‍സ് ഫോറത്തിന്റെ ആഭിമുഖ്യത്തിൽ ആണ് കുടുംബ  സംഗമവും ഓണാഘോഷവും  സംഘടിപ്പിച്ചത്.

1965 മുതല്‍ രാഷ്ട്രീയ വ്യത്യാസമില്ലാതെ ഉള്ള എടത്വ സെന്റ് അലോഷ്യസ് കോളേജിലെ സ്റ്റുഡന്റ്‌സ് യൂണിയനുകള്‍ക്ക് നേതൃത്വം കൊടുത്തിരുന്ന പൂര്‍വ്വ വിദ്യാര്‍ത്ഥി നേതാക്കളുടെ പ്രഥമ സംഗമത്തിനൊപ്പം കലാലയത്തില്‍ നിന്ന് വിരമിച്ച അധ്യാപകരും അനധ്യാപകരും സംഗമത്തില്‍ പങ്കെടുത്തു. എഫ്.യു.എം.എഫ്. പ്രസിഡന്റ് ടോമി ജോര്‍ജ്ജ് അധ്യക്ഷത വഹിച്ചു.പ്രമുഖ സംവിധായകന്‍ പ്രൊഫ.ശിവപ്രസാദ് കവിയൂര്‍ പ്രവര്‍ത്തനോദ്ഘാടനം നിര്‍വ്വഹിച്ചു. കുടുംബ സംഗമത്തിന്റെ ഉത്ഘാടനം സംവിധായകന്‍ വിജി തമ്പിയും, ലോഗോ പ്രകാശനം ഡോ.സാം കടമ്മനിട്ടയും  നിര്‍വ്വഹിച്ചു.

മുൻ പ്രിൻസിപ്പാൾ പ്രൊഫ.ഫാദർ ചെറിയാൻ തലക്കുളം മുഖ്യ സന്ദേശം നല്കി.ചങ്ങനാശേരി ഗുഡ് സമരിറ്റൻ ഹോസ്പിറ്റലിന്റെ സഹകരണത്തോടെ നടപ്പിലാക്കുന്ന ജീവകാരുണ്യ പ്രവർത്തനങ്ങളുടെ ഉദ്ഘാടനം പ്രിൻസിപ്പാൾ ഡോ.ജോച്ചൻ ജോസഫ് നിർവഹിച്ചു.ആനന്ദൻ നമ്പൂതിരി പട്ടമന , വി.ഗോപകമാർ, അജയി കുറുപ്പ് , പ്രശാന്ത് പുതുക്കരി, സെബാസ്റ്റ്യൻ കട്ടപ്പുറം ,സുനിൽ മാത്യൂ, ടോം കോട്ടയ്ക്കകം, ഫാൻസിമോൾ ബാബു, കെ.ആർ.ഗോപകുമാർ., അലൈവി പി .ടി ,റിബി വർഗ്ഗീസ് എന്നിവരെ ആദരിച്ചു. ജില്ലാ പഞ്ചായത്ത് അംഗം ബിനു ഐസക്ക് രാജു, ബ്ലോക്ക് പഞ്ചായത്ത് വൈസ് പ്രസിഡന്റ് മോൻസി സോണി,പ്രൊഫ. അന്ത്രയോസ് ജോസഫ്,മുൻ പ്രിൻസിപ്പാൾ ജോർജ് ജോസഫ്, പ്രൊഫ.ജോസഫ് കുര്യൻ  പ്രൊഫ. റോസമ്മ തോമസ്, പ്രൊഫ.പി.വി. ജറോം,അലൻ കുര്യാക്കോസ് ,ഷൈനി തോമസ്, റാംസെ ജെ.ടി, സോണൽ നെറോണാ,ജയൻ ജോസഫ് , തോമസ്കുട്ടി മാത്യൂ,സന്തോഷ് തോമസ്, എം.ജെ. വർഗീസ്, അസ്ഗർ അലി, ബി.രമേശ് കുമാർ,ഡോ.ജോൺസൺ വി. ഇടിക്കുള, മോഹനന്‍ തമ്പി, ടിജിൻ ജോസഫ്,അജോ ആന്റണി  എന്നിവർ പ്രസംഗിച്ചു.

പിന്നണി ഗായകന്‍ പ്രശാന്ത് പുതുക്കരിയും സംഘവും  ഗാനമേളയും മിമിക്‌സ് പരേഡും അവതരിപ്പിച്ചു.കലാലയത്തിലെ പൂര്‍വ്വ വിദ്യാര്‍ത്ഥികളുടെ നേതൃത്വത്തിൽ അത്തപൂക്കളം ഒരുക്കി.വള്ള സദ്യയും നടന്നു.

പൂര്‍വ്വ വിദ്യാര്‍ത്ഥികൾ, പ്രിന്‍സിപ്പല്‍മാർ, അധ്യാപക-അനദ്ധ്യാപക സ്ഥാനങ്ങളില്‍ പ്രവര്‍ത്തിച്ചവര്‍, ഗ്ലോബല്‍ അലുമ്‌നി അസോസിയേഷന്‍ പ്രവര്‍ത്തകര്‍, കോളേജ് മാനേജ്‌മെന്റ് പ്രതിനിധികള്‍ എന്നിവരെ ഉള്‍പ്പെടുത്തി വിപുലമായ സമ്മേളനം 2020 ല്‍ നടത്തുമെന്ന് സംഘാടകർ പറഞ്ഞു.

സ്റ്റോക്ക് ഓൺ ട്രെന്റ്:  സ്റ്റാഫ്‌ഫോർഡ്ഷയർ മലയാളി അസോസിയേഷൻ (SMA) സ്റ്റോക്ക് ഓൺ ട്രെന്റ് ഓണനിലാവ് 2019 എന്ന തങ്ങളുടെ ഓണാഘോഷ പരിപാടി സ്റ്റേജ് ഷോയുടെ അകമ്പടിയോടെ ഗംഭീരമാക്കുവാനുള്ള തയ്യാറെടുപ്പിലാണ്. സെപ്റ്റംബർ 22 ഞായറാഴ്ച രാവിലെ 11 മണി മുതൽ ബ്രാഡ്‌വെൽ കമ്മ്യൂണിറ്റി ഹാളിൽ വെച്ചു നടത്തപ്പെടുന്ന എസ് എം എ ഓണനിലാവിന്റെ ഏറ്റവും ആകർഷകമായ ഇനം.

“മലയാള ടെലിവിഷൻ കോമഡി ഷോകളായ കോമഡി ഉത്സവം, കോമഡി സർക്കസ് തുടങ്ങിയ പരിപാടികളിലൂടെ പ്രശസ്തനായ ശ്രീ അനൂപ് പാലാ, ഏഷ്യാനെറ്റിലെ മ്യൂസിക്‌ ഇന്ത്യ, സ്കൂൾ ബസ് തുടങ്ങിയ പരിപാടികളിലൂടെ പ്രശസ്തനായ ഷിനോ പോൾ, അമൃതാ ടിവി യുടെ ട്രൂപ്പ് വിന്നർ ആയ അറാഫത് കടവിൽ തുടങ്ങിയവർ പങ്കെടുക്കുന്ന `ഓണം പൊന്നോണം´ സ്റ്റേജ് പ്രോഗ്രാം ആണ്.

അതോടൊപ്പം എസ് എം എ ഡാൻസ് സ്കൂൾ കലാകാരികളുടെ നയന മനോഹരമായ നൃത്ത പരിപാടികളും എസ് എം എ കലാകാരൻ മാരുടെ കലാപരിപാടികളും ഓണത്തിന്റെ സാംസകാരിക തനിമ ഉയർത്തി പിടിക്കുന്ന തിരുവാതിര, പുലികളി, ചെണ്ട മേളം, മാവേലിയെ സ്വീകരിക്കൽ തുടങ്ങി അനവധി പരിപാടികളോടെ നടക്കുന്ന എസ് എം എ ഓണനിലാവിനായുള്ള കാത്തിരിപ്പിലാണ് സ്റ്റോക്ക് ഓൺ ട്രെന്റിലെ മലയാളികൾ ഒന്നടക്കം.

കൂടുതൽ വിവരങ്ങൾക്ക് ബന്ധപ്പെടുക:
സിറിൽ മാഞ്ഞൂരാൻ 07958675140
ദേവസ്യ ജോൺ 07583881770
ജിജോ ജോസഫ് 07809740138

മോളി ക്ളീറ്റസ്സ്

ലണ്ടൻ: ഗിൽഫോർഡിലെ അമ്മമാർ ചേർന്ന് രൂപം നൽകിയ അയൽക്കൂട്ടം എന്ന കൂട്ടായ്മയുടെ ആഭിമുഖ്യത്തിൽ സംഘടിപ്പിച്ച ഓണാഘോഷം വൈവിദ്ധ്യമാർന്ന പരിപാടികളോടെ ആഘോഷിച്ചു. ഇക്കഴിഞ്ഞ ശനിയാഴ്ച കുട്ടികളും മുതിർന്നവരും ഉൾപ്പെടെ നൂറുകണക്കിന് ആളുകൾ പങ്കെടുത്ത വർണ്ണ ശബളിമയാർന്ന പരിപാടികൾ കൊണ്ട് സമ്പന്നമായ ആഘോഷം സംഘടിപ്പിച്ചത് ജേക്കബ്‌സ് വെൽ ഹാളിലായിരുന്നു. മീര രാജനും ജിഷ ബോബിയും ചേർന്ന് മനോഹരമായ പൂക്കളമൊരുക്കി ആരവങ്ങളും ആർപ്പുവിളികളുമായി മാവേലി തമ്പുരാന് ഊഷ്മളമായ വരവേൽപ്പ് നൽകി ആരംഭിച്ച ആഘോഷപരിപാടികളുടെ ഉദ്ഘാടനസമ്മേളനത്തിൽ യുക്മ സാംസ്കാരിക വേദി രക്ഷാധികാരിയും കേരള ഗവൺമെൻറ് മലയാളം മിഷൻ യുകെ ചാപ്റ്റർ ജോയിന്റ് സെക്രട്ടറിയും ഗിൽഫോർഡ് നിവാസിയുമായ സി എ ജോസഫ് മുഖ്യാതിഥിയായിരുന്നു.

സി എ ജോസഫിനൊപ്പം അയൽക്കൂട്ടത്തിന്റെ സംഘാടകരും ചേർന്ന് ഭദ്രദീപം തെളിച്ച് ആഘോഷ പരിപാടികളുടെ ഉദ്ഘാടനം നിർവഹിച്ചു. സ്നേഹവും സമാധാനവും ഉണ്ടായിരുന്ന സമത്വസുന്ദരമായ ഒരു കാലഘട്ടത്തെ ഓർമ്മപ്പെടുത്തുന്നതിനായി പ്രവാസി മലയാളികൾ സംഘടിപ്പിക്കുന്ന ഓണാഘോഷങ്ങളിൽ പോലും പല ആളുകളിൽ നിന്നും എതിർപ്പുകളും നിസ്സഹകരണവും ഉണ്ടാകുന്നത് ദൗർഭാഗ്യകരമാണെന്നും അയൽക്കൂട്ടത്തിന്റെ സംഘാടകർ കഴിഞ്ഞ ഒരു വർഷമായി ഗിൽഫോർഡിലെ കുട്ടികൾക്കായി നടത്തിവന്നിരുന്ന മലയാളം ക്ലാസ്സ് മാതൃകാപരമാണെന്നും കെട്ടുറപ്പുള്ള ഒരു സംഘടന സംവിധാനമായി സാമൂഹികപ്രതിബദ്ധതയോടെ കൂടുതൽ നല്ല കാര്യങ്ങൾ സമൂഹത്തിൽ ചെയ്യുവാനും അയൽക്കൂട്ടം എന്ന ഈ കൂട്ടായ്മക്ക് കഴിയട്ടെയെന്നും സി എ ജോസഫ് തന്റെ ആശംസ പ്രസംഗത്തിൽ സൂചിപ്പിച്ചു. ഫാൻസി നിക്‌സൺ സ്വാഗതം ആശംസിച്ചു.

മാവേലിയായി പ്രത്യക്ഷപ്പെട്ട ബിനോദ് ജോസഫ് തന്റെ പ്രജകൾക്കായി അനുഗ്രഹ പ്രഭാഷണം നടത്തിയതിനോടൊപ്പം ഗിൽഫോർഡിലെ റോയൽ സാറേ ഹോസ്പിറ്റലിലേക്ക് നവാഗതരായി കടന്നുവന്ന നഴ്സുമാർക്ക് പൂക്കൾ നൽകി സ്വാഗതമേകി.

മോളി ക്ലീറ്റസ് , ഫാൻസി നിക്സൺ എന്നിവരുടെ നേതൃത്വത്തിൽ എട്ട് വനിതകൾ ചേർന്ന് അവതരിപ്പിച്ച തിരുവാതിര വേറിട്ട മികവ് പുലർത്തി. നിമിഷ എബിൻ,ആതിര സനു എന്നിവരുടെ നേതൃത്വത്തിൽ അവതരിപ്പിച്ച ഓണം തീം ഡാൻസും ഏറെ ആകർഷണീയം ആയിരുന്നു. ഇസ്സ ആൻറണി, എലിസബത്ത് വിനോദ്, കിങ്ങിണി ബോബി എന്നിവർ ചേർന്ന് അവതരിപ്പിച്ച നാടോടി നൃത്തം തിരുവോണത്തിന്റെ ഓർമ്മകൾ എല്ലാവർക്കും സമ്മാനിച്ചു. കെവിൻ ക്ലീറ്റസ് ,ജേക്കബ് വിനോദ് , ഗീവർ ഷിജു എന്നിവർ ചേർന്ന ടീം നയിച്ച വള്ളംകളിയും കാണികൾക്ക് മനോഹരമായ ദ്രശ്യാനുഭവമാണ് നൽകിയത്.

തുടർന്ന് വനിതകൾക്കും പുരുഷന്മാർക്കും ആയി പ്രത്യേകമായി സംഘടിപ്പിച്ച വടംവലി മത്സരത്തിൽ എല്ലാവരും ആവേശപൂർവ്വമാണ് പങ്കെടുത്തത് . വാശിയേറിയ വനിതകളുടെ വടംവലി മത്സരത്തിൽ ആതിര സനു നയിച്ച ടീം ആണ് വിജയിച്ചത് . അത്യധികം വാശിയേറിയ പുരുഷന്മാർ പങ്കെടുത്ത വടം വലി മത്സരത്തിൽ ജോയൽ ജോസഫ് നയിച്ച ടീമിനെ പരാജയപ്പെടുത്തി ജെസ് വിൻ ജോസഫ് നേതൃത്വം നൽകിയ ടീം ജേതാക്കളായി.

വിനോദകരമായ കസേരകളി മത്സരങ്ങളിലും കുട്ടികളും വനിതകളും ആഹ്ലാദത്തോടും സന്തോഷത്തോടെയൂമാണ് പങ്കെടുത്തത് . കുട്ടികളുടെ മത്സരത്തിൽ കെവിൻ ക്ലീറ്റസ് വിജയിച്ചപ്പോൾ വനിതകളുടെ കസേരകളി മത്സരത്തിൽ സിംന വിജയിയായി.തുടർന്ന് നടന്ന പരമ്പരാഗതരീതിയിലുള്ള ഇരുപത്തിയാറ് ഇനങ്ങളോടുകൂടിയ വിഭവസമൃദ്ധമായ ഓണസദ്യ എല്ലാവരിലും ഗൃഹാതുരത്വമുണർത്തി.

ഭക്ഷണത്തിനുശേഷം കുട്ടികളും മുതിർന്നവരും ചേർന്ന് അവതരിപ്പിച്ച വൈവിദ്ധ്യമാർന്ന കലാപരിപാടികൾ എല്ലാം വേറിട്ട മികവു പുലർത്തി. ഫാൻസി നിക്‌സൺ, ലക്ഷ്മി ഗോപി എന്നിവരുടെ നേതൃത്വത്തിൽ അവതരിപ്പിച്ച ബോളിവുഡ് ഡാൻസ് സദസ്സ് ഒന്നടങ്കം നിറഞ്ഞ കൈയടിയോടെ സ്വീകരിച്ചപ്പോൾ ഗായകരായ നിക്‌സൺ ആൻറണി , സജി ജേക്കബ്, ജിൻസി ഷിജു, ചിന്നു ജോർജ്ജ് എന്നിവരുടെ ഹൃദ്യമായ ഗാനാലാപനങ്ങളും ഏവരുടെയും ശ്രദ്ധപിടിച്ചുപറ്റി. കൊച്ചു നർത്തകരായ ഇവ ആൻറണി,ജോണി ബോബി, കിങ്ങിണി ബോബി, സ്റ്റീഫൻ നിക്‌സൺ, കെവിൻ ക്‌ളീറ്റസ് , എലിസബത്ത് ബിനോദ് തുടങ്ങിയവർ അവതരിപ്പിച്ച നൃത്തങ്ങൾ ഏവരുടെയും ഹർഷാരവം ഏറ്റുവാങ്ങിയപ്പോൾ കൊച്ചു ഗായകൻ ബേസിൽ ഷിജു ആലപിച്ച ഗാനം ഏറെ ആസ്വാദ്യകരവും ആയിരുന്നു.

യുകെ മലയാളികൾ അഞ്ചുവർഷം മുൻപ് പുറത്തിറക്കിയ ‘ഓർമ്മയിൽ ഒരു ഓണം’എന്ന ആൽബത്തിനു വേണ്ടി സി എ ജോസഫ് രചിച്ച് കനേഷ്യസ് അത്തിപ്പൊഴി സംഗീതം നൽകി ഹരീഷ് പാല ആലപിച്ച് യൂട്യൂബിൽ ഏറെ ശ്രദ്ധിക്കപ്പെട്ട ഒരു ഓണപ്പാട്ടും മുഖ്യ അതിഥിയായി എത്തിയ സി എ ജോസഫ് ആലപിച്ചപ്പോൾ എല്ലാവരും നാട്ടിൽ കുടുംബാംഗങ്ങളോടൊപ്പം പങ്കുചേർന്ന് ആഘോഷിച്ച തിരുവോണദിനത്തിന്റെ ഓർമ്മയുണർത്തി.

യുവനർത്തകരായ ആൻറണി എബ്രഹാം,ഗോപി ശ്രീറാം, പാസ്‌ക്കൽ ഫെർണാണ്ടസ് എന്നിവരുടെ നേതൃത്വത്തിൽ അവതരിപ്പിച്ച അടിപൊളി നൃത്തം കാണികളെ വിസ്മയ ഭരിതരാക്കി. ജിൻസി ഷിജു, ജിനി വിനോദ് എന്നിവരുടെ നേതൃത്വത്തിൽ അവതരിപ്പിച്ച ഫ്യൂഷൻ ഡാൻസ് സദസ്സിനെ ഇളക്കിമറിച്ചു. ആഘോഷങ്ങളിൽ പങ്കെടുത്തമുഴുവനാളുകളെയും ഉൾപ്പെടുത്തി അവതരിപ്പിച്ച സുംബാ ഡാൻസും ചാച്ചാ ഡാൻസും ഏവർക്കും നവ്യമായ അനുഭവമായിരുന്നു. ദേശഭക്തി നിറവിൽ ചിട്ടപ്പെടുത്തി ഗീവർ ഷിജു, ജോയൽ ബോബി, സാറാ സജി എന്നിവരുടെ നേതൃത്വത്തിൽ കുട്ടികൾ അവതരിപ്പിച്ച നൃത്തം കാണികൾ മുഴുവൻ ആദരവോടെ എഴുന്നേറ്റുനിന്നാണ് ആസ്വദിച്ചത്.

ആഘോഷപരിപാടികളുടെ വിജയത്തിന് തിളക്കമാർന്ന പ്രകടനം കാഴ്ചവച്ച ശ്രീലക്ഷ്മി പവൻ, ചിന്നു ജോർജ്, സാറ സജി എന്നിവർ അവതാരകരായി തിളങ്ങി. ഫാൻസി നിക്സൺ, മോളി ക്ലീറ്റസ് എന്നിവർ പ്രോഗ്രാം കോർഡിനേറ്റേഴ്സ് ആയി സംഘടിപ്പിച്ച അവിസ്മരണീയമായ ഈ വർഷത്തെ ഓണാഘോഷ പരിപാടികൾക്ക് നേതൃത്വം നൽകിയത് ബിനി സജി, മാഗി പാസ്ക്കൽ, സ്നേഹ ശോഭൻ, ജിഷ ബോബി, സജി ജേക്കബ് , ക്ലീറ്റസ് സ്റ്റീഫൻ, ബോബി ഫിലിപ്പ് , ഷിജു മത്തായി എന്നിവരാണ്.മോളി ക്ലീറ്റസിന്റെ നന്ദി പ്രകാശനത്തോടെ ഓണാഘോഷ പരിപാടികൾ പര്യവസാനിച്ചു.

ദക്ഷിണേന്ത്യയില്‍ ഭീകരാക്രമണത്തിന് സാധ്യതയെന്ന മുന്നറയിപ്പിനെത്തുടര്‍ന്ന് അതീവ ജാഗ്രത. ഗുജറാത്ത് തീരത്ത് പാക്കിസ്ഥാന്‍ ബോട്ടുകള്‍ ഉപേക്ഷിച്ച നിലയില്‍ കണ്ടെത്തിയതായി കരസേന അറിയിച്ചു. ജയ്ഷെ മുഹമ്മദ് തലവന്‍ മസൂദ് അസഹ്റിനെ പാക്കിസ്ഥാന്‍ ജയില്‍ മോചിതനാക്കിയെന്ന റിപ്പോര്‍ട്ടിന് പിന്നാലെയാണ് സൈന്യത്തിന്‍റെ മുന്നറിയിപ്പ്. അതിനിടെ, എട്ട് ലഷ്ക്കറെ തയിബ ഭീകരര്‍ ജമ്മു കശ്മീരിലെ സോപോറില്‍ പിടിയിലായി. നിയന്ത്രണരേഖയില്‍ നുഴഞ്ഞുകയറ്റ ശ്രമം തകര്‍ത്തതിന്‍റെ ദൃശ്യങ്ങളും പുറത്തുവന്നു.

2008ലെ മുംബൈ ഭീകരാക്രമണത്തിന്‍റെ മാതൃകയില്‍ കടല്‍ കടന്ന് ഭീകരര്‍ എത്തിയുള്ള ആക്രമണത്തിന് സാധ്യതയുണ്ടെന്നാണ് രഹസ്യാന്വേഷണ വിവരം. ദക്ഷിണേന്ത്യയിലും ജമ്മുമേഖലയിലുമാണ് ആക്രമണ സാധ്യതയുള്ളത്. ഗുജറാത്തിലെ സര്‍ ക്രീക്കില്‍ ഉപേക്ഷിക്കപ്പെട്ട നിലയില്‍ ബോട്ടുകള്‍ കണ്ടെത്തിയതായി കരസേന ദക്ഷിണ മേഖല കമാന്‍ഡിങ് ചീഫ്‌ അറിയിച്ചു.

ജമ്മുകശ്മീരിന്‍റെ പ്രത്യേക പദവി എടുത്തുകളഞ്ഞതിനോടുള്ള പ്രതികാരമായി പാക്കിസ്ഥാന്‍ വന്‍നീക്കങ്ങള്‍ക്ക് തയ്യാറെടുക്കുന്നുവെന്നാണ് മുന്നറിയിപ്പ്. ഇതിനിടെയാണ് പുല്‍വാമ ഉള്‍പ്പെടെ ഇന്ത്യയില്‍ നടന്ന നിരവധി ഭീകരാക്രമണങ്ങളുടെ മുഖ്യസൂത്രധാരനായ മസൂദ് അസഹ്റിനെ പാക്കിസ്ഥാന്‍ ജയില്‍ മോചിതനാക്കിയെന്ന റിപ്പോര്‍ട്ടുകള്‍ പുറത്തുവരുന്നത്.

ഭീകരാക്രമണങ്ങള്‍ നടത്തുന്നതിനുള്ള പദ്ധതിയുടെ ഭാഗമായാണ് പാകിസ്ഥാന്‍റെ നടപടിയെന്നാണ് സംശയം. ജമ്മു–സിയാല്‍കോട്ട്, രാജസ്ഥാന്‍ അതിര്‍ത്തികളിലെ പാകിസ്ഥാന്‍റെ അധിക സൈനിക വിന്യാസം ജാഗ്രതയോടെ കാണണമെന്നും ഇന്‍റലിജന്‍സ് മുന്നറിയിപ്പ് നല്‍കി. ഒാഗസ്റ്റ് ആദ്യവാരം കുപ്‍വാരയിലെ കെരന്‍ മേഖലയില്‍ നുഴഞ്ഞകയറ്റത്തിന് പാക് സൈന്യവും ഭീകരരും നടത്തിയ ശ്രം തകര്‍ത്തതിന്‍റെ ദൃശ്യങ്ങളാണ് പുറത്ത് വന്നത്. കൊല്ലപ്പെട്ടവരുടെ മൃതദേഹം ഏറ്റുവാങ്ങാന്‍ പാക്കിസ്ഥാന്‍ തയ്യാറായിട്ടില്ല.

2019 ജനുവരി 26 തീയതി കെന്റിലെ ടോൺബ്രിഡ്ജിൽ തുടക്കം കുറിച്ച ടൺബ്രിഡ്ജ് വെൽസ് കാർഡ്‌സ് ലീഗ് (TCL) 2019 പ്രീമിയർ ഡിവിഷൻ ലീഗ് മത്സരങ്ങൾ തേരോട്ടങ്ങളും, അട്ടിമറികളും, തിരിച്ചു വരവുകളുമായി സംഭവബഹുലമായി മുന്നേറുകയാണ്. ഈ സീസണിലെ പകുതിയോളം മത്സരം അവസാനിക്കുമ്പോൾ ഇരുപ്പത്തിരണ്ടു പോയിന്റുമായി കോട്ടയം അഞ്ഞൂറൻസ് ഒന്നാം സ്ഥാനത്ത് ജൈത്രയാത്ര തുടരുകയാണ്. കളിച്ച പന്ത്രണ്ട് മത്സരങ്ങളിൽ പതിനൊന്നും വിജയിച്ചാണ് ശ്രീ സജിമോൻ ജോസ് ക്യാപ്റ്റനും ശ്രീ ജോമി ജോസഫ് കൂട്ടാളിയുമായ കോട്ടയം അഞ്ഞൂറാൻസ് TCL ലീഗിൽ ഒന്നാം സ്ഥാനത്തു എത്തിയത്. കഴിഞ്ഞ അഴ്ച്ചകളിൽ നടന്ന മത്സരഫലങ്ങൾ ഇപ്രകാരം.

TCL – സ്റ്റാർസ് ടൺബ്രിഡ്ജ് വെൽസ് കുതിക്കുന്നു.

കഴിഞ്ഞ ദിവസം നടന്ന വാശിയേറിയ മത്സരത്തിൽ ആതിഥേയരായ ടെര്മിനേറ്റർസിനെ പരാജയപ്പെടുത്തി സ്റ്റാർസ് ടൺബ്രിഡ്ജ് വെൽസ് പടയോട്ടം തുടരുന്നു. മത്സരത്തിന്റെ അത്യന്തം ഇരു ടീമുകളും ഇഞ്ചോടിച്ചു പോരാടി മുന്നേറി. മത്സരത്തിന്റെ അവസാനം വരെ ഒരു ടീമിനും എതിരാളികൾക്കെതിരെ ഒരു വ്യക്തമായ ലീഡുമായി മുന്നേറാൻ സാധിച്ചില്ല. നഷ്ടപ്പെട്ട ലീഡ് നിമിഷങ്ങൾക്കകം തിരിച്ചു പിടിച്ചു ഇരു ടീമുകളും പരസ്പരം അങ്കം വെട്ടി. 3 – 2 നു മുന്നേറിയ സ്റ്റാർസ് ടൺബ്രിഡ്ജ് വെൽസ് അല്പം സമയത്തിനുള്ളിൽ 7-8 എന്ന നിലയിൽ പിന്നിലായി.പിന്നീട് 10-8 നു മുൻപിലായി. വീണ്ടും നാലു പോയിന്റുകൾ കൂട്ടിച്ചേർക്കാൻ ടെര്മിനേറ്റർസിനെ അനുവദിച്ചു 15 – 12 എന്ന നിലയിൽ വിജയം ഉറപ്പിച്ചു. ഒരു സീനിയർ അടക്കം വിളിച്ച എല്ലാ ലേലവും വിജയിച്ച സ്റ്റാർസ് ടൺബ്രിഡ്ജ് വെയിൽസിന്റെ ശ്രീ ജെയ്സൺ ആലപ്പാട്ടിനെ മാന് ഓഫ് ദി മാച്ച് ആയി പ്രഖ്യാപിച്ചു.

ടെര്മിനേറ്റർസ് മുന്നേറുന്നു

മറ്റൊരു വാശിയേറിയ മത്സരത്തിൽ ആതിഥേയരായ ടെര്മിനേറ്റർസ് എതിരാളികളായ എവർഗ്രീൻ തൊടുപുഴയെ പരാജയപെടുത്തിയത് പതിമൂന്നിനെതിരെ പതിനാറു പോയിന്റുകൾക്കു. മത്സരത്തിന്റെ തുടക്കത്തിൽ ശ്രീ അനീഷ് – സിനിയ സഖ്യം എവർഗ്രീൻ തൊടുപുഴ ടെര്മിനേറ്റെർസ് തന്ത്രങ്ങളെ തച്ചുടച്ചു 7 – 2 എന്ന വ്യകതമായ ലീഡിൽ മുന്നേറി. പക്ഷെ ടെര്മിനേറ്റർസിന്റെ ശ്രീ ജോജോ വര്‍ഗ്ഗീസിന്റെ ഹാട്രിക് ലേല വിജയത്തിന്റെ സഹായത്തോടെ ശ്രീ ബിജു -ജോജോ സഖ്യം ടെര്മിനേറ്റർസ് 6 -7 എന്ന പോയിന്റ് നിലയിൽ എത്തി. തുടർച്ചയായ മൂന്ന് ലേല വിജയത്തോടെ വീണ്ടും എവർഗ്രീൻ തൊടുപുഴ ലീഡ് 10 – 6 ൽ എത്തിച്ചെങ്കിലും ടെര്മിനേറ്റർസ് വിട്ടുകൊടുക്കാൻ തയ്യാറായില്ല. അടുത്ത മൂന്ന് ലേലങ്ങളിൽ നിന്നായി 4 പോയിന്റുകൾ നേടി 10 -10 എന്ന നിലയിൽ ഇരു ടീമുകളും നിലയുറപ്പിച്ചു. പിന്നീട് അടുത്ത രണ്ടു ജയത്തോടെ എവർഗ്രീൻ തൊടുപുഴ 13 -10 എന്ന നിയയിൽ വിജയത്തോടടുത്തു. പക്ഷെ മറ്റൊരു പോയിന്റ് നേടാൻ എവർഗ്രീനെ അനുവദിക്കാതെ തുടർച്ചയായ നാലു വിജയത്തോടെ ടെര്മിനേറ്റർസ് വിജയക്കൊടി പാറിച്ചു. എട്ടിൽ ഏഴു ലേലവും വിജയിച്ച ടെര്മിനേറ്റർസിന്റെ ശ്രീ ജോജോ വര്ഗീസിനെ മാന് ഓഫ് ദി മാച്ച് ആയി പ്രഖ്യാപിച്ചു

TCL – കൊടുങ്കാറ്റായി കണ്ണൂർ ടൈഗേഴ്‌സ്

ആതിഥേയരായ എവർഗ്രീൻ തൊടുപുഴയും കണ്ണൂർ ടൈഗേഴ്‌സും തമ്മിൽ നടന്ന മറ്റൊരു മത്സരത്തിൽ എവർഗ്രീൻ തൊടുപുഴയെ എതിരാളികളായ കണ്ണൂർ ടൈഗേഴ്‌സ് തകർത്തത് ഒന്നിനെതിരെ പതിനഞ്ചു പോയിന്റുകൾക്കാണ്. മത്സരത്തിന്റെ ആദ്യ ലേലത്തിൽ എവർഗ്രീൻ തൊടുപുഴയുടെ ഹോണേഴ്‌സ് വിളി പരാജയപ്പെടുത്തി കുതിച്ച കണ്ണൂർ ടൈഗേഴ്‌സ് 6 1 എന്ന നിലയിൽ മുന്നേറി മറ്റൊരു പോയിന്റ് നേടാൻ അനുവദിക്കാതെ തുടർച്ചയായ 7 ലേല വിജയത്തോടെ 15 – 1 എന്ന നിലയിൽ വിജയം ഉറപ്പിച്ചു. ഒരു കോർട്ട് വിളിയടക്കം വിളിച്ച എല്ലാ ലേലവും വിജയിച്ച കണ്ണൂർ ടൈഗേർസിന്റെ ശ്രീ സെബാസ്റ്റ്യൻ അബ്രാഹത്തെ മാൻ ഓഫ് ദി മാച്ച് ആയി പ്രഖ്യാപിച്ചു.

TCL – വെൽസ് ഗുലൻസിന്റെ തന്ത്രങ്ങളിൽ പതറി റോയൽസ് കോട്ടയം

ഇന്നലെ നടന്ന വാശിയേറിയ മത്സരത്തിൽ ശ്രീ മനോഷ് -തോമസ് സഖ്യം വെൽസ് ഗുലാന്സ് എതിരാളികളായ ശ്രീ ജോഷി-വിജു സഖ്യം റോയൽസ് കോട്ടയത്തെ പരാജയപ്പെടുത്തിയതു പന്ത്രണ്ടിനെതിരെ പതിനഞ്ചു പോയിന്റുകൾക്കു. 7 – 4 എന്ന ആദ്യ മുന്നേറ്റം നടത്തിയ റോയൽ കോട്ടയത്തെ 7 – 7 എന്ന സമനിലയിൽ ആക്കാൻ വെൽസ് ഗുലൻസിനു വെറും രണ്ടു ലേലത്തിന്റെ ആവശ്യമേ ഉണ്ടായിരുന്നുള്ളു. പക്ഷെ റോയൽസ് കോട്ടയം വെൽസ് ഗുലാനേ പിന്തള്ളി മുന്നേറ്റം തുടർന്നു. 12 – 9 നു നിലച്ച റോയൽസ് കോട്ടയത്തിന്റെ തേരോട്ടം പുന്നരാരംഭിക്കുന്നതിനു മുൻപ് തുടർച്ചയായ നാലു ലേല വിജയത്തോടെ വെൽസ് ഗുലാന്സ് 15 -12 നു വിജയം ഉറപ്പിച്ചു. വിളിച്ച എല്ലാ ലേലവും വിജയിച്ച വെൽസ് ഗുലാന്റെ ശ്രീ മനോഷ് ചക്കാലയെ മാൻ ഓഫ് ദി മാച്ച് ആയി പ്രഖ്യാപിച്ചു.

വീണ്ടും അട്ടിമറികളുമായി കണ്ണൂർ ടൈഗേഴ്സ്

മറ്റൊരു വാശിയേറിയ മത്സരത്തിൽ ആതിഥേയരായ തുറുപ്പ്ഗുലാനേ പരാജയപ്പെടുത്തി കണ്ണൂർ ടൈഗേഴ്‌സ് ലീഗ് ടേബിളിൽ മുന്നേറ്റം നടത്തിയത് പത്തിനെതിരെ പതിനഞ്ചു പോയിന്റുകൾക്കു. മത്സരത്തിന്റെ തുടക്കത്തിൽ 9 – 1 എന്ന ശക്തമായ മുന്നേറ്റം നടത്തിയ കണ്ണൂർ ടൈഗേർസിനെ 11 – 8 എന്ന നിലയിൽ അടുത്തെത്താൻ തുറുപ്പുഗുലാണ് അധികം സമയം വേണ്ടിവന്നില്ല . പക്ഷെ കണ്ണൂർ ടൈഗേഴ്‌സ് ആ ലീഡ് പെട്ടന്ന് തന്നെ 14 -8 എന്ന നിലയിലേക്കുയർത്തി. തിരിച്ചു വരാൻ ഒരു അവസരം നോക്കി തുറുപ്പു ഗുലാൻ രണ്ടു പോയിന്റുകൾ കൂടി നേടിയെങ്കിലും കണ്ണൂർ ടൈഗേഴ്‌സ് ക്യാപ്റ്റൻ സാജു മാത്യുവിന്റെ ലേല വിജയത്തോടെ 15 – 10 എന്ന നിലയിൽ കണ്ണൂർ ടൈഗേഴ്‌സ് വിജയം ഉറപ്പിച്ചു. വിളിച്ച എല്ലാ ലേലവും വിജയിച്ച കണ്ണൂർ ടൈഗേഴ്‌സ് ക്യാപ്റ്റൻ ശ്രീ സാജു മാത്യുവിനെ മാൻ ഓഫ് ദി മാച്ച് ആയി പ്രഖ്യാപിച്ചു.

സ്റ്റാർസ് ടൺബ്രിഡ്ജ് വെൽസിന്റ് മുന്നിൽ പതറി കണ്ണൂർ ടൈഗേർസ്

അട്ടിമറി വിജയങ്ങളുമായി ലീഗിലെ കറുത്ത കുതിരകളാക്കാൻ തുനിഞ്ഞിറങ്ങിയ കണ്ണൂർ ടൈഗേർസിന് മൂക്കുകയറിട്ട് സ്റ്റാർ ടൺബ്രിഡ്ജ് വെൽസ്. കഴിഞ്ഞ ദിവസം നടന്ന വാശിയേറിയ മത്സരത്തിൽ ആതിഥേയരായ കണ്ണൂർ ടൈഗേർസിനെ പരാജയപ്പെടുത്തി സ്റ്റാർസ് ടൺബ്രിഡ്ജ് വെൽസ് ടേബിളിൽ മുന്നേറ്റം നടത്തിയത് ഒൻപത്തിനെതിരെ പതിനഞ്ചു പോയിന്റുകൾക്ക്. മത്സരത്തിന്റെ തുടക്കത്തിൽ 5 – 0 എന്ന നിലയിൽ കുതിച്ച സ്റ്റാർസ് ടൺബ്രിഡ്ജ് വെൽസിനെ 8 – 6 എന്ന നിലയിൽ അടുത്തെത്താൻ കണ്ണൂർ ടൈഗേഴ്‌സിന് അധികം സമയം വേണ്ടിവന്നില്ല . പക്ഷെ സ്റ്റാർസ് ടൺബ്രിഡ്ജ് വെൽസ് ആ ലീഡ് പെട്ടന്ന് തന്നെ 10 – 6 എന്ന നിലയിലേക്കുയർത്തി. പക്ഷെ നിമിഷങ്ങൾക്കകം 10 – 8 എന്ന നിലയിൽ കണ്ണൂർ ടൈഗേഴ്‌സ് എത്തി. മറ്റൊരു പോയിന്റ് മാത്രം കൂട്ടിച്ചേർക്കാൻ കണ്ണൂർ ടൈഗേർസിനെ അനുവദിച്ചുകൊണ്ട് സ്റ്റാർസ് ടൺബ്രിഡ്ജ് വെൽസ് 15 – 9 എന്ന നിലയിൽ വിജയം ഉറപ്പിച്ചു. എല്ലാ ലേലവും വിജയിച്ച സ്റ്റാർസ് ടൺബ്രിഡ്ജ് വെൽസ് ക്യാപ്റ്റൻ ശ്രീ ടോമി വർക്കിയെ മാൻ ഓഫ് ദി മാച്ച് ആയി പ്രഖ്യാപിച്ചു.

ടീം തരികിട തോം തകർത്താടി! സ്റ്റാർസ് ടൺബ്രിഡ്ജ് വെൽസ് വിറച്ചു.

മറ്റൊരു മാസ്മരിക മത്സരത്തിൽ ആതിഥേയരായ സ്റ്റാർസ് ടൺബ്രിഡ്ജ് വെൽസിനെ പത്തിനെതിരെ പതിനഞ്ചു പോയിന്റിക്കുകൾക്കു പരാജയപ്പെടുത്തി തരികിട തോം തിരുവല്ല ലീഗ് ടേബിളിലിൽ മുന്നേറ്റം നടത്തി. മത്സരത്തിന്റെ തുടക്കത്തിൽ 5 -1 എന്നു മുന്നിട്ടു നിന്ന സ്റ്റാർസ് ടൺബ്രിഡ്ജ് വെൽസിനെ അൽപ സമയത്തിനുള്ളിൽ 7 – 6 എന്ന നിലക്ക് കടത്തി വെട്ടി മുന്നേറിയ തരികിട തോം തിരുവല്ല വളരെ അനായേസം സ്റ്റാർസ് ടൺബ്രിഡ്ജ് വെൽസിനെ പുറകിലാക്കി മുന്നേറി. 9 – 7 എന്ന നിലയിൽ ഒരിക്കൽ കൂടി മുന്നേറാൻ ശ്രമിച്ച സ്റ്റാർസ് ടൺബ്രിഡ്ജ് വെൽസിനെ മറ്റൊരു പോയിന്റ് മാത്രം കൂട്ടിച്ചേർക്കാൻ അനുവദിച്ചു തരിക്കിട തോം തിരുവല്ല തുടർച്ചയായ ആറു ലേല വിജയത്തിന്റെ അകമ്പടിയോടെ വിജയം കൈവരിച്ചു. വിളിച്ച എല്ലാ ലേലങ്ങളും വിജയിച്ച തരികിട തോം ക്യാപ്റ്റൻ ശ്രീമതി ട്രീസ എമി മാൻ ഓഫ് ദി മാച്ച് കരസ്ഥമാക്കി.

ടെര്മിനേറ്റർസിന്റെ സംഹാരതാണ്ഡവം!

കഴിഞ്ഞ ആഴ്ച്ച നടന്ന മറ്റൊരു മത്സരത്തിൽ ആതിഥേയരായ റോയൽസ് കോട്ടയത്തെ എതിരാളികളായ ടെർമിനറ്റ്സ് തകർത്തത് നാലിനെതിരെ പതിനാറു പോയിന്റുകൾക്കു. മത്സരത്തിന്റെ 7 – 1 എന്ന മികച്ച നിലയിൽ മുന്നേറിയ ടെര്മിനേറ്റർസിനെ പിടിച്ചു കെട്ടാൻ കരുത്തരായ റോയൽസ് കോട്ടയത്തിനു സാധിച്ചില്ല. മത്സരം മുന്നോട്ടു നീങ്ങിയതോടെ ടെര്മിനേറ്റർസ് ക്യാപ്റ്റൻ ശ്രീ ബിജു ചെറിയാന്റെ ഒരു സീനിയർ വിജയത്തോടെ 11 – 3 എന്ന നിലയിൽ ഏകദേശം വിജയത്തോടടുത്തിരുന്നു. ഒരു തിരിച്ചു വരവ് ഏറെ ദുഷ്കരമായിരുന്നിട്ടും റോയൽസ് കോട്ടയം പോരാട്ട വീര്യം നഷ്ടപ്പെടുത്തിയില്ല. റോയൽസ് കോട്ടയം മറ്റൊരു ജയത്തോടെ 4 – 11 എന്നായെങ്കിലും മറ്റൊരവസരം നൽകാതെ ടെര്മിനേറ്റർസ് തുടർച്ചയായ മൂന്ന് ലേല വിജയത്തോടെ 16 – 4 എന്ന നിലയിൽ വിജയം ഉറപ്പിച്ചു. ഒരു സീനിയർ അടക്കം വിളിച്ച എല്ലാ ലേലവും വിജയിച്ച ടെര്മിനേറ്റർസ് ക്യാപ്റ്റൻ ശ്രീ ബിജു ചെറിയാനെ മാന് ഓഫ് ദി മാച്ച് ആയി പ്രഖ്യാപിച്ചു.

ടെർമിനേറ്റർസിന്റെ കുതിപ്പ് തുടരുന്നു…

കഴിഞ്ഞ ദിവസം നടന്ന മറ്റൊരു മത്സരത്തിൽ ആതിഥേയരായ ടെര്മിനേറ്റർസ് എതിരാളികളായ കണ്ണൂർ ടൈഗേർസിനെ പരാജയപ്പെടുത്തിയത് പതിനൊന്നിനെതിരെ പതിനാറു പോയിന്റുകൾക്കു. മത്സരത്തിന്റെ ആദ്യ ലേലത്തിൽ ടെര്മിനേറ്റർസിന്റെ ശ്രീ ജോജോ വര്ഗീസിന്റെ സീനിയർ ലേല വിജയത്തോടെ 6 -0 എന്ന ലീഡിൽ ടെര്മിനേറ്റർസ് കുതിച്ചു. അല്പസമയത്തിനുള്ളിൽ ശ്രീ ജോജോ വര്ഗീസിന്റെ മറ്റൊരു സീനിയർ ലേലം പരാജയപ്പെടുത്തി കണ്ണൂർ ടൈഗേഴ്‌സ് 7 – 4 എന്ന നിലയിൽ ഒരു തിരിച്ചുവരവിനുള്ള ശ്രമം തുടർന്നു. പക്ഷെ ടെര്മിനേറ്റർസിനെ തന്ത്രങ്ങളിൽ കണ്ണൂർ ടൈഗേഴ്‌സിന് പിടിച്ചു നിൽക്കാനായില്ല. 13 – 6 എന്ന നിലയിലേക്ക് കുതിച്ച ടെര്മിനേറ്റർസിനെ തുടർച്ചയായ മൂന്ന് ലേല വിജയത്തോടെ 13 – 10 എന്ന നിലയിൽ കണ്ണൂർ ടൈഗേഴ്‌സ് വൈകാതെ എത്തി. പക്ഷെ മറ്റൊരു പോയിന്റ് കൂടി കൂട്ടിച്ചേർത്തപ്പോളെക്കും ടെര്മിനേറ്റർസ് 16 – 11 എന്ന നിലയിൽ വിജയം ഉറപ്പിച്ചിരുന്നു. ഒരു സീനിയർ വിജയമടക്കം ഏറ്റവും കൂടുതൽ പോയിന്റ് നേടിയ ടെര്മിനേറ്റർസ് ക്യാപ്റ്റൻ ശ്രീ ബിജു ചെറിയാനെ മാന് ഓഫ് ദി മാച്ച് ആയി പ്രഖ്യാപിച്ചു.

TCL അതിന്റെ ആദ്യ പകുതി മത്സരങ്ങൾ

പിന്നിടുമ്പോൾ ടീമുകളുടെ പോയിന്റ് നില ഇപ്രകാരമാണ്.

2019 ജനുവരി 26 തീയതി കെന്റിലെ ടോൺബ്രിഡ്ജ് ഫിഷർ ഹാളിൽ വച്ച് സഹൃദയ ദി വെസ്റ്റ് കെന്റ് കേരളൈറ്റ്സ് മുൻ പ്രസിഡന്റ് ശ്രീ സണ്ണി ചാക്കോ ഔദ്യോഗികമായി ഉൽഘാടനം ചെയ്ത TCL ( ടൺ ബ്രിഡ്ജ് വെൽസ് കാർഡ് ലീഗ്)- പ്രീമിയർ ഡിവിഷൻ കാർഡ് മത്സരത്തിൽ കെന്റിലെ പ്രമുഖരായ പന്ത്രണ്ടു ടീമുകളാണ് മാറ്റുരക്കുന്നത്. ഒരു വര്‍ഷം നീണ്ടുനിൽക്കുന്ന ഈ ലീഗ് മത്സരത്തിൽ ഓരോ ടീമും മറ്റു 11 ടീമുകളുമായി രണ്ടു മത്സരങ്ങളാണ് കളിക്കേണ്ടത്. ലീഗിൽ ഏറ്റവും കൂടുത്തൽ പോയിന്റ് എടുക്കുന്ന നാലു ടീമുകൾ സെമി ഫൈനലിൽ മത്സരിക്കും.

2019 ലെ പ്രീമിയർ ഡിവിഷനിൽ പങ്കെടുക്കുന്ന ടീമുകൾ ഇപ്രകാരമാണ്. ശ്രീ ജോഷി സിറിയക് ക്യാപറ്റനായ റോയൽസ് കോട്ടയം, ശ്രീ സാജു മാത്യു ക്യാപ്റ്റനായ കണ്ണൂർ ടൈഗേഴ്‌സ്, ശ്രീ മനോഷ് ചക്കാല ക്യാപറ്റനായ വെൽസ് ഗുലാൻസ്, ശ്രീ സജിമോൻ ജോസ് ക്യാപറ്റനായ കോട്ടയം അഞ്ഞൂറാൻസ്, ശ്രീ ട്രീസ ജുബിൻ ക്യാപ്റ്റനായ തരികിട തോം തിരുവല്ല, ശ്രീ ബിജു ചെറിയാൻ ക്യാപറ്റനായ ടെർമിനേറ്റ്സ്, ശ്രീ ടോമി വർക്കി ക്യാപ്റ്റനായ സ്റ്റാർസ് ടൺബ്രിഡ്ജ് വെൽസ്, ശ്രീ അനീഷ് കുര്യൻ ക്യാപ്റ്റനായ എവർഗ്രീൻ തൊടുപുഴ, ശ്രീ സുരേഷ് ജോൺ ക്യാപ്റ്റൻ ആയ തുറുപ്പുഗുലാൻ, ശ്രീ ബിജോയ് തോമസ് ക്യാപ്റ്റനായ പുണ്യാളൻസ്, ശ്രീ സുജിത് മുരളി ക്യാപ്റ്റനായ ഹണിബീസ് യുകെ, ശ്രീ സുജ ജോഷി ക്യാപ്റ്റനായ സ്റ്റാർ ചലഞ്ചേഴ്‌സ് എന്നീ ടീമുകളാണ് മത്സരിക്കുന്നത്. വിജയികളെ കാത്തിരിക്കുന്നത് ആകർഷമായ ക്യാഷ് പ്രൈസും എവർ റോളിങ്ങ് ട്രോഫിയുമാണ്. ലീഗിലെ അവസാന നാലു ടീമുകൾ അടുത്തവർഷത്തെ പ്രീമിയർ ഡിവിഷനിൽ നിന്നും റെലിഗെറ്റ് ചെയ്യപ്പെടും. യുകെയിൽ ആദ്യമായി നടത്തപ്പെടുന്ന ഈ ലീഗ് മത്സരങ്ങൾ അടുത്ത വർഷം മുതൽ യു.കെയിലെ മറ്റു പ്രദേശത്തേക്കും വ്യാപിപ്പിക്കാൻ ഉദ്ദേശിക്കുന്നതായി TCL കോർഡിനേറ്റർ ശ്രീ സെബാസ്റ്റ്യൻ എബ്രഹാം അറിയിച്ചു.

കാലവർഷ കെടുതിയിൽ നിന്നും മലയാളക്കര പൊന്നോണത്തിൻ്റെ പുത്തനുണർവിലേക്ക് ചേക്കേറുമ്പോൾ, ലോകമെങ്ങും മലയാളക്കരയോടൊപ്പം ഓണം ആഘോഷിക്കാനൊരുങ്ങുകയാണ്. ഓണം എന്ന ദേശീയോത്സവത്തെ ആഗോള ഉത്സവമാക്കി മാറ്റുകയാണ് ലോകമെമ്പാടുമുള്ള പ്രവാസി കൂട്ടായ്‌മകൾ. ലണ്ടനിൽ ഒരു ഗുരുവായൂരപ്പ ക്ഷേത്രസാക്ഷാത്കാരം ലക്ഷ്യമാക്കി പ്രവൃത്തിക്കുന്ന കൂട്ടായ്‌മയാണ്‌ ലണ്ടൻ ഹിന്ദു ഐക്യവേദി (LHA). മാസം തോറും തനതു കലാരൂപങ്ങൾ ഉൾപ്പെടുത്തി വൈവിധ്യങ്ങളാർന്ന ആഘോഷ പരിപാടികൾ സംഘടിപ്പിക്കുന്ന LHA-യുടെ ഇക്കൊല്ലത്തെ ഓണാഘോഷവും വൈവിധ്യം നിറഞ്ഞതാണ്.

ക്രോയ്ഡോണിലേ വെസ്റ്റ് തൊൺടൻ കമ്മ്യൂണിറ്റി ഹാളിൽ സെപ്റ്റംബർ 28 നു നടക്കുന്ന ആഘോഷ പരിപാടികൾ വ്യത്യസ്തത കൊണ്ടും മലയാള തനിമ കൊണ്ടും വേറിട്ട് നിൽക്കുന്നു. മഹാബലിയെ എതിരേറ്റുകൊണ്ടു തുടങ്ങുന്ന ആഘോഷ പരിപാടികൾ, കുട്ടികളുടെ കോൽക്കളി, പുലികളി, ബാസില്ഡൺ ലാസ്യ അവതരിപ്പിക്കുന്ന നൃത്തശില്പം, അനുഗ്രഹീത വാദ്യ കലാകാരൻ വിനോദ് നവധാരയുടെ നേതൃത്വത്തിൽ ചെണ്ടമേളം, കഥകളിയുടെ സമ്പൂർണത അനായാസമായി ആവാഹിക്കുന്ന അനുഗ്രഹീത കലാകാരൻ വിനീത് പിള്ള അവതരിപ്പിക്കുന്ന കഥകളി, LHA വനിതാ വിഭാഗം അവതരിപ്പിക്കുന്ന മെഗാ തിരുവാതിര തുടങ്ങി തനതു മലയാളിത്തം നിറഞ്ഞ കലാ ശില്പ്പങ്ങളാൽ ശ്രദ്ധ നേടുന്നു. ദീപാരാധനയും തുടർന്ന് ഐക്യവേദി അംഗങ്ങൾ തന്നെ തയ്യാറാക്കിയ സാമ്പ്രദായിക ഓണസദ്യയും ആഘോഷപരിപാടികളുടെ മറ്റൊരു പ്രത്യേകതയാണ്. സഹൃദയരായ കൂട്ടായ്മ അംഗങ്ങളുടെ സംഭാവനകൾ കൊണ്ടാണ് കഴിഞ്ഞ ഏഴു വർഷമായി എല്ലാ മാസവും സൗജന്യമായി പരിപാടികൾ സംഘടിപ്പിക്കുന്നത്. പതിവുപോലെ ഇക്കൊല്ലത്തെ ഓണാഘോഷവും ഓണസദ്യയും സൗജന്യമായാണ് ആഘോഷിക്കുന്നത്. ഏവർക്കും സമൃദ്ധിയും സന്തോഷവും നിറഞ്ഞ ഓണാശംസകൾ നേരുന്നതോടൊപ്പം, വിവിധ സാമൂഹിക സാംസ്കാരിക പ്രമുഖർ പങ്കെടുക്കുന്ന ആഘോഷ പരിപാടിയിലേക്ക് ലണ്ടൻ ഹിന്ദു ഐക്യവേദി ചെയർമാനായ ശ്രീ തെക്കുംമുറി ഹരിദാസ് ഏവരെയും സ്വാഗതം ചെയ്യുന്നു.

കൂടുതൽ വിവരങ്ങൾക്കായി ദയവായി സംഘാടകരെ സമീപിക്കുക:

Suresh Babu: ‪07828137478, Subhash Sarkara: ‪07519135993, Jayakumar: ‪07515918523, Geetha Hari: ‪07789776536, Diana Anilkumar: ‪07414553601

Venue: West Thornton Community Centre, 731-735, London Road, Thornton Heath, Croydon CR7 6AU