ഉത്തര്‍പ്രദേശില്‍ എസ്.പി–ബി.എസ്.പി സഖ്യത്തിനായി മണ്ഡലങ്ങള്‍ ഒഴിച്ചിട്ട് കോണ്‍ഗ്രസ്. സഖ്യത്തിലെ പ്രമുഖ നേതാക്കള്‍ മല്‍സരിക്കുന്ന ഏഴ് സീറ്റുകളില്‍ സ്ഥാനാര്‍ഥികളെ നിര്‍ത്തില്ലെന്ന് പ്രദേശ് കോണ്‍ഗ്രസ് കമ്മിറ്റി പ്രസിഡന്റ് രാജ് ബബ്ബര്‍ പറഞ്ഞു.

എസ്.പി നേതാവ് മുലായം സിങ് യാദവ് മല്‍സരിക്കുന്ന മയിന്‍പുരി, അഖിലേഷ് യാദവിന്റെ ഭാര്യ ഡിംപിള്‍ യാദവിന്റെ മണ്ഡലമായ കന്നൂജ് എന്നിവയ്ക്ക് പുറമെ മായാവതി , അജിത് സിങ്, ജയന്ത് ചൗധരി എന്നിവര്‍ മല്‍സരിക്കാനിരിക്കുന്ന മണ്ഡലങ്ങളും പട്ടികയില്‍ ഇടംനേടി. നേരത്തെ കോണ്‍ഗ്രസിന്റെ അമേഠി, റായ്ബറേലി മണ്ഡലങ്ങളില്‍ സ്ഥാനാര്‍ഥികളെ നിര്‍ത്തില്ലെന്ന് എസ്.പി–ബി.എസ്.പി സഖ്യം പ്രഖ്യാപിച്ചിരുന്നു.

ഫലത്തില്‍ ശക്തമായ ത്രികോണ മല്‍സരമാണ് ഈ ഒന്‍പത് മണ്ഡലങ്ങളില്‍ നിന്ന് ഒഴിവാകുന്നത്. എന്‍.ഡി.എ വിട്ട് കോണ്‍ഗ്രസിനൊപ്പം കൂടിയ അപ്നാദളിനും കോണ്‍ഗ്രസ് രണ്ട് സീറ്റുകള്‍ നല്‍കി.