പോണ്ടിച്ചേരിയിൽ റജിസ്റ്റർ ചെയ്തു ടാക്സ് വെട്ടിച്ചതിനെത്തുടർന്നു മോട്ടോർ വാഹനവകുപ്പ് നോട്ടിസ് നൽകിയ നടൻ ഫഹദ് ഫാസിൽ 17.68 ലക്ഷം രൂപ നികുതിയടച്ചു. ആലപ്പുഴ റീജണൽ ട്രാൻസ്പോർട്ട് ഓഫിസിൽ ദൂതൻ മുഖേനയാണ് ഇന്നു നികുതിയടച്ചത്. പിവൈ 05 9898 റജിസ്ട്രേഷൻ നമ്പരിലുള്ള ബെൻസ് കാർ കേരള റജിസ്ട്രേഷനിലേക്കു മാറ്റുന്നതിനുള്ള നടപടി സ്വീകരിക്കാൻ ഫഹദിന് ആർടിഒ ഒരാഴ്ചത്തെ സമയം അനുവദിച്ചു. 95 ലക്ഷം രൂപയാണു വാഹനവില.

നികുതി വെട്ടിച്ച് പോണ്ടിച്ചേരിയിൽ റജിസ്റ്റർ ചെയ്ത 1500 വാഹനങ്ങൾ 7500 തവണ ട്രാഫിക് നിയമം ലംഘിച്ചതായി മോട്ടോർ വാഹനവകുപ്പ്. നൂറിൽ കൂടുതൽ വാഹനങ്ങൾ പത്തിലേറെ തവണ നിയമലംഘനം നടത്തിയിട്ടുണ്ടെന്ന് പ്രത്യേക അന്വേഷണസംഘം കണ്ടെത്തി. കോഴിക്കോട് സ്വദേശി ഡോ.കെ അലക്സാണ്ടറുടെ ആഡംബര കാറാണ് ഏറ്റവും കൂടുതൽ തവണ , 72 തവണ നിയമലംഘനം നടത്തിയത്.

സുരേഷ് ഗോപിയുടെ കാർ പത്ത് തവണയും ഫഹദ് ഫാസിലിന്റ കാർ ആറ് തവണയും അമിതവേഗത്തിന് പിടിയിലായിട്ടുണ്ട്. എന്നാൽ വാഹനങ്ങൾ പോണ്ടിച്ചേരിയിലെ മേൽവിലാസത്തിൽ ആയതിനാൽ ഇവരിൽ നിന്ന് യഥാസമയം പിഴ ഈടാക്കാനോ, ഡ്രൈവിങ് ലൈസൻസ് റദ്ദാക്കാനോ കഴിഞ്ഞിരുന്നില്ല. യഥാർഥ ഉടമകൾ ആരെന്ന് വ്യക്തമായ സാഹചര്യത്തിൽ എല്ലാവർക്കും നോട്ടീസ് അയച്ചതായി മോട്ടോർവാഹന വകുപ്പ് അറിയിച്ചു.