ഹരികുമാർ പി.കെ.

മാഞ്ചസ്റ്റർ:- യുകെയിലെ പ്രമുഖ മലയാളി അസോസിയേഷനുകളിലൊന്നായ മാഞ്ചസ്റ്റർ മലയാളി കൾച്ചറൽ അസോസിയേഷന്റെ (MMCA) ഓണാഘോഷവും പതിനഞ്ചാം വാർഷികാഘോഷങ്ങളുടെ സമാപനവും വിവിധ പരിപാടികളോടെ സമുചിതം ആഘോഷിച്ചു. മാഞ്ചസ്റ്റർ വിഥിൻഷോ ഫോറം സെന്ററിൽ രാവിലെ 11ന് പൂക്കളമിട്ട് ആരംഭിച്ച പരിപാടികൾ യുക്മ ദേശീയ ഉപാദ്ധ്യക്ഷൻ അഡ്വ.എബി സെബാസ്റ്റ്യൻ ഉദ്ഘാടനം ചെയ്തു. എം.എം.സി.എ പ്രസിഡന്റ് അലക്സ് വർഗ്ഗീസ് അദ്ധ്യക്ഷത വഹിച്ചു. ബിജു. പി. മാണി സ്വാഗതം ആശംസിച്ച ചടങ്ങിൽ മുൻ യുക്മ പ്രസിഡന്റ് മാമ്മൻ ഫിലിപ്പ്, മുൻ എം.എം.സി.എ പ്രസിഡന്റുമാരായ റെജി മഠത്തിലേട്ട്, കെ.കെ. ഉതുപ്പ്, ജോബി മാത്യു എന്നിവർ ആശംസകൾ അർപ്പിച്ച് സംസാരിച്ചു. കഴിഞ്ഞ രണ്ട് വർഷക്കാലയളവിലെ പ്രവർത്ത റിപ്പോർട്ട് സെക്രട്ടറി ജനീഷ് കുരുവിളയും, വരവ് ചിലവു കണക്കുകൾ ട്രഷറർ സാബു ചാക്കോയും അവതരിപ്പിച്ചു, പൊതുയോഗത്തിന്റെ അംഗീകാരം വാങ്ങി.

യുകെയിൽ നിന്നും യുഎസിലേക്ക് കുടിയേറുന്ന മുൻ എം.എം.സി.എ പ്രസിഡൻറ് റെജി മഠത്തിലേട്ടിനെയും കുടുംബത്തിനെയും അവർ എം.എം.സി.എയ്ക്ക് നൽകിയ സംഭാവനകളുടെ പേരിൽ എം.എം.സി.എ കുടുംബാംഗങ്ങൾ ആദരിച്ചു.

രാവിലെ കുട്ടികളുടെയും മുതിർന്നവരുടേയും ഇൻഡോർ മത്സരങ്ങൾ നടന്നിരുന്നു. തുടർന്ന് പരമ്പരാഗത രീതിയിൽ നടന്ന വിഭവ സമൃദ്ധമായ ഓണസദ്യയിൽ ഏകദേശം മുന്നൂറ്റി അൻപതോളം പേർ പങ്കുചേർന്നു. ടീം എം.എം.സി.എ കമ്മിറ്റിയംഗങ്ങളുടെ നേതൃത്വത്തിലുള്ള വാളണ്ടിയർമാരായിരുന്നു സദ്യയ്ക്ക് നേതൃത്വം നല്കിയത്.

തുടർന്ന് നടന്ന കലാപരിപാടികൾക്ക് അനേഖാ അലക്സ്, ആഷ്ലി ജോസ് തുടങ്ങിയവർ അവതാരകരായി തിളങ്ങി. കൾച്ചറൽ കോഡിനേറ്റർ ലിസി എബ്രഹാമിന്റെ നേതൃത്വത്തിൽ കുട്ടികളുടെയും മുതിർന്നവരുടെയും ആട്ടവും പാട്ടുമായി വിവിധ കലാപരിപാടികൾ ഇടതടവില്ലാതെ വേദിയിൽ നിറഞ്ഞാടി. തിരുവാതിരയും, എം.എം.സി.എ ഡാൻസ് സ്കൂളിലേയും മറ്റ് കുട്ടികളുടെയും മുതിർന്നവരുടേയും പരിപാടികൾക്കൊടുവിൽ V4U മ്യൂസിക് ബാൻറിലെ ഷിബു, ഷാജു ഉതുപ്പ്, അനൂപ് തുടങ്ങിയവർ നേതൃത്വം കൊടുത്ത ഗാനമേളയ്ക്ക് ശേഷം രാത്രി 9 മണിയോടെ പരിപാടികൾ അവസാനിച്ചു.

എം.എം.സി.എയുടെ ഓണാഘോഷ പരിപാടികൾക്ക് ടീം എം.എം.സി.എ കമ്മിറ്റിയംഗങ്ങളായ ഹരികുമാർ പി.കെ., ആഷൻ പോൾ, മോനച്ചൻ ആന്റണി, റോയ് ജോർജ്, ജോബി മാത്യു, ജോബി രാജു എന്നിവർ നേതൃത്വം നൽകി. എം.എം.സി.എയുടെ ഓണാഘോഷ പരിപാടികൾ വിജയമാക്കുവാൻ സഹായിച്ച എല്ലാവർക്കും ടീം എം.എം.സി.എയ്ക്ക് വേണ്ടി സെക്രട്ടറി ജനീഷ് കുരുവിള നന്ദി രേഖപ്പെടുത്തി.