ലണ്ടന്‍: പുതുതായി ലൈസന്‍സ് എടുത്ത 24 വയസ് വരെ പ്രായമുള്ളവര്‍ക്ക് രാത്രിയില്‍ വാഹനമോടിക്കുന്നതിന് വിലക്ക്. യുകെയിലെ പുതിയ ലൈസന്‍സ് നിബന്ധനകളിലാണ് ഇക്കാര്യം വ്യക്തമാക്കിയിരിക്കുന്നത്. 17 മുതല്‍ 24 വയസ് വരെ പ്രായമുള്ളവരാണ് യുകെ റോഡുകളിലുണ്ടാകുന്ന അപകടങ്ങളില്‍ 25 ശതമാനത്തിനും ഉത്തരവാദികളെന്ന കണക്കുകളുടെ അടിസ്ഥാനത്തിലാണ് ഈ നിയന്ത്രണം. ചെറുപ്പക്കാരുടെ ജീവന്‍ റോഡുകളില്‍ പൊലിയുന്നത് ഒഴിവാക്കാന്‍ പുതിയ ലൈസന്‍സുകളുടെ പ്രൊബേഷനറി കാലാവധി വര്‍ദ്ധിപ്പിക്കുമെന്ന് പ്രധാനമന്ത്രി തെരേസ മേയ് സൂചന നല്‍കിയിരുന്നു.

രണ്ടു വര്‍ഷത്തേക്കാണ് ഈ കാലാവധി വര്‍ദ്ധിപ്പിക്കുന്നത്. അതിനുള്ളില്‍ ആവശ്യമായ ഡ്രൈവിംഗ് പരിചയം ആര്‍ജ്ജിക്കാനാകും. ഓസ്‌ട്രേലിയ, ന്യൂഡിലാന്‍ഡ്, അമേരിക്ക എന്നീ രാജ്യങ്ങളിലുള്ള രീതികള്‍ക്ക് സമാനമാണ് ഇത്. പുതുതായി ലൈസന്‍സ് ലഭിക്കുന്നവര്‍ക്ക് ഈ രാജ്യങ്ങളില്‍ സൂര്യാസ്തമനത്തിനു ശേഷം വാഹനമോടിക്കാന്‍ അനുവാദമില്ല. 25 വയസില്‍ താഴെ പ്രായമുള്ളവരെ വാനഹത്തിലിരുത്തി ഡ്രൈവ് ചെയ്യണമെങ്കില്‍ പോലും മുതിര്‍ന്നവരുടെ മേല്‍നോട്ടം വേണമെന്നും നിബന്ധനയുണ്ട്.

പ്രായം കുറഞ്ഞ ഡ്രൈവര്‍മാര്‍ റോഡില്‍ മത്സരഓട്ടം നടത്താതിരിക്കാന്‍ ഇവര്‍ക്ക് ഓടിക്കാന്‍ കഴിയുന്ന വാഹനങ്ങളുടെ എന്‍ജിന്‍ കപ്പാസിറ്റിയിലും പരിധി നിര്‍ദേശിച്ചിട്ടുണ്ട്. പ്രൊബേഷണറി പീരിയഡിനു ശേഷം രണ്ടാമത് ഒരു ടെസ്റ്റിനു കൂടി നിര്‍ദേശിക്കപ്പെട്ടേക്കും. പുതിയ നിയമമനുസരിച്ച് ആറ് പെനാല്‍റ്റി പോയിന്റുകള്‍ ലഭിച്ചാല്‍ പുതിയ ലൈസന്‍സ് ഉടമകള്‍ക്ക് അത് നഷ്ടമാകാനിടയുണ്ടെന്നും ചൂണ്ടിക്കാണിക്കപ്പെടുന്നു.