കണ്ണൂര്‍: രാമന്തളിയിലെ ആര്‍എസ്എസ് മുഖ്യകാര്യവാഹക് ചൂരക്കാട്ട് ബിജുവിനെ വെട്ടിക്കൊലപ്പെടുത്തിയ കേസിലെ പ്രധാന പ്രതിയായ ഡിവൈഎഫ്‌എൈ നേതാവിനെ അറസ്റ്റ് ചെയ്തു. കൊലപാതക സംഘത്തിലെ പ്രധാന പ്രതിയായ അനൂപിനെയാണ് പിടികൂടിയത്. ഇന്നലെ രാത്രി 11 മണിയോടെ പയ്യന്നൂര്‍ കെഎസ്ആര്‍ടിസി സ്റ്റാന്‍ഡില്‍ നിന്നാണ് ഇയാളെ പൊലീസ് കസ്റ്റഡിയില്‍ എടുത്തത്. ഇതോടെ കേസില്‍ അഞ്ച് പേര്‍ പൊലീസ് കസ്റ്റഡിയിലായി.
ഏഴംഗ സംഘമാണ് കൊലപാതകത്തിന് പിന്നിലെന്നാണ് പൊലീസ് നല്‍കുന്ന വിവരം. കസ്റ്റഡിയില്‍ ഉള്ളവരും ഇക്കാര്യം മൊഴിയില്‍ വ്യക്തമാക്കിയിട്ടുണ്ട്. കൊലപാതക സംഘത്തിലുണ്ടായിരുന്ന രാമന്തളി പാണത്താന്‍ വീട്ടില്‍ സത്യന്‍, കക്കംപാറ വടക്കുമ്പത്ത് ജിതിന്‍, കക്കംപാറ നടുവിലെ പുരയില്‍ റിനേഷ്, രാമന്തളി കുണ്ടുവളപ്പില്‍ ജ്യോതിഷ് എന്നിവരെയാണ് പൊലീസ് നേരത്തേ പിടികൂടിയത്.
കൊലപാതക സംഘത്തിലുണ്ടായിരുന്ന പ്രതീഷ് എന്ന കുട്ടന്‍ വിദേശത്തേക്ക് കടന്നതായി പൊലീസിന് വിവരം ലഭിച്ചിരുന്നു. കേസിലെ പ്രധാന പ്രതിയായ അനൂപ് പിടിയിലായതോടെ കേസ് സംബന്ധിച്ച കൂടുതല്‍ വിവരങ്ങള്‍ വ്യക്തമാകുമെന്നാണ് പൊലീസ് കരുതുന്നത്.
Leave a Reply