സഖറിയ പുത്തന്‍കളം
ചെല്‍ട്ടണ്‍ഹാം: ക്നാനായ സമുദായത്തിന്റെ പ്രൗഢിയും ആഢ്യത്വവും വിളിച്ചോതുന്ന പടുകൂറ്റന്‍ സമുദായ റാലിയ്ക്കായി യൂണിറ്റുകള്‍ വാശിയോടെ ഒരുങ്ങുന്നു. മൂന്ന് കാറ്റഗറിയിലായി റാലി മത്സരം നടക്കുമ്പോള്‍ ഓരോ കാറ്റഗറിയിലും ഒന്നാം സ്ഥാനം നേടുവാന്‍ വേണ്ടി യൂണിറ്റുകള്‍ വാശിയോടെ ഒരുങ്ങുകയാണ്. ഒട്ടുമിക്ക യൂണിറ്റുകളും യൂണിഫോം വേഷവിധാനങ്ങള്‍ ഓര്‍ഡര്‍ ചെയ്തു കഴിഞ്ഞു. ”സഭാ-സമുദായ സ്നേഹം ആത്മാവില്‍ അഗ്‌നിയായി ക്നാനായ ജനത എന്ന ആപ്ത വാക്യത്തിലധിഷ്ഠിതമായി നിരവധി ഫ്‌ളോട്ടുകളും നിശ്ചല ദൃശ്യങ്ങളും റാലിയ്ക്ക് മിഴിവേകും.
റാലിയുടെ ഏറ്റവും മുന്നിലായി അഭിവന്ദ്യ മാര്‍ ജോസഫ് പണ്ടാരശ്ശേരി പിതാവും വൈദികരും യു.കെ.കെ.സി.എ സെന്‍ട്രല്‍ കമ്മിറ്റി അംഗങ്ങളും അണിനിരക്കും. യു.കെ, ഇന്ത്യ, യു.കെ.കെ.സി.എ പതാകകളുടെ പിന്നിലായി എല്ലാ നാഷണല്‍ കൗണ്‍സില്‍ മെമ്പേഴ്‌സ് അണിനിരക്കും. ക്നാനായ വിമന്‍സ് ഫോറം ഭാരവാഹികള്‍, യു.കെ.കെ.സി.എ.വൈ.എല്‍ ഭാരവാഹികള്‍ എന്നിവര്‍ പതാകയേന്തി അണിനിരക്കും. തുടര്‍ന്ന് അക്ഷരമാലാ ക്രമത്തില്‍ യൂണിറ്റുകള്‍ അണിനിരക്കും. ദൃശ്യഭംഗിയ്ക്ക് 25, കണ്‍വെന്‍ഷന്‍ തീം 25, വസ്ത്രവിധാനം 20, അംഗങ്ങളുടെ പങ്കാളിത്തം 20 യൂണിറ്റിന്റെ ലേഖനം 10 എന്നിങ്ങനെയാണ് റാലിയ്ക്ക് മാര്‍ക്ക് കൂട്ടുന്നത്.
രാജകീയ പ്രൗഢിയാര്‍ന്ന ചെല്‍ട്ടണ്‍ഹാമിലെ ജോക്കി ക്ലബ്ബില്‍ യു.കെ.കെ.സി.എ കണ്‍വെന്‍ഷന്‍ നടത്തുവാന്‍ സാധിച്ചത് ആത്മാഭിമാനം നല്‍കുകയാണ്. അതിബൃഹത്തായ കണ്‍വെന്‍ഷന്‍ വേദി വര്‍ണ മനോഹരമായി പ്രകാശിക്കും. യു.കെ.കെ.സി.എ പ്രസിഡന്റ് ബിജു മടക്കക്കുഴി, ജനറല്‍ സെക്രട്ടറി ജോസി നെടുംതുരുത്തി പുത്തന്‍പുര, ട്രഷറര്‍ബാബു തോട്ടം, വൈസ് പ്രസിഡന്റ് ജോസ് മുഖച്ചിറ, ജോ. സെക്രട്ടറി സഖറിയ പുത്തന്‍കളം, ജോ. ട്രഷറര്‍ ഫിനില്‍ കളത്തില്‍കോട്ട് ഉപദേശക സമിതി അംഗങ്ങളായ ബെന്നി മാവേലില്‍, റോയി സ്റ്റീഫന്‍ എന്നിവരുടെ നേതൃത്വത്തില്‍ പ്രവര്‍ത്തനങ്ങള്‍ നടന്നുവരുന്നു.
Leave a Reply