ചെന്നൈ: തമിഴ്‌നാട്ടിലെ മധുരയിൽ തനിഷ്ക് ജൂവലറി ഷോറൂമിൽ വൻ കവർച്ച. ഏകദേശം 500 പവനോളം സ്വർണാഭരണങ്ങൾ മോഷണം പോയതായാണ് പ്രാഥമിക വിവരം. കവർച്ച നടന്ന ഷോറൂം 15 ദിവസം മുമ്പ് മാത്രമാണ് പ്രവർത്തനം ആരംഭിച്ചത്. ഔദ്യോഗിക ഉദ്ഘാടനം നടക്കാനിരിക്കെയാണ് മോഷണം നടന്നത്.

വ്യാഴാഴ്ച പുലർച്ചെ മൂന്നുമണിയോടെയാണ് സംഭവം. മുഖംമൂടി ധരിച്ചെത്തിയ അജ്ഞാതൻ ഷോറൂമിന്റെ പിൻവാതിലിലൂടെ അകത്തുകടന്ന് സ്വർണാഭരണങ്ങളുമായി കടന്നുകളയുകയായിരുന്നുവെന്നാണ് പ്രാഥമിക നിഗമനം. മോഷണം ശ്രദ്ധയിൽപ്പെട്ടതിനെ തുടർന്ന് പോലീസും ഫോറൻസിക് വിദഗ്ധരും സ്ഥലത്തെത്തി പരിശോധന നടത്തി.

ഷോറൂമിൽ സൂക്ഷിച്ചിരുന്ന ആകെ സ്വർണാഭരണങ്ങളുടെ ഏകദേശം 30 ശതമാനവും മോഷണം പോയതായി മധുര സിറ്റി പോലീസ് കമ്മിഷണർ രാജേന്ദ്രൻ അറിയിച്ചു. മോഷ്ടിക്കപ്പെട്ട ആഭരണങ്ങളുടെ കൃത്യമായ അളവും മൂല്യവും കണ്ടെത്താൻ പരിശോധന തുടരുകയാണ്. പ്രതിയെ കണ്ടെത്തുന്നതിനും മോഷണം പോയ സ്വർണം വീണ്ടെടുക്കുന്നതിനുമായി മൂന്ന് പ്രത്യേക അന്വേഷണ സംഘങ്ങളെ പോലീസ് നിയോഗിച്ചിട്ടുണ്ട്.

കൊച്ചി: അനധികൃത സ്വത്ത് സമ്പാദനക്കേസിൽ ജാമ്യത്തിൽ കഴിയുന്ന മുൻ ഡിജിപി ടോമിൻ ജെ. തച്ചങ്കരിക്കെതിരെ രൂക്ഷവിമർശനവുമായി ഹൈക്കോടതി. വിദേശയാത്ര നടത്താൻ ജാമ്യവ്യവസ്ഥയിൽ ഇളവ് തേടിയുള്ള ഹർജി പരിഗണിക്കവെയാണ് കോടതിയുടെ വിമർശനം. ശ്വാസംമുട്ടൽ അനുഭവപ്പെടുന്ന ഒരാൾ ദുബായിൽ പോയിട്ട് എന്താണ് ചെയ്യാനെന്നും കോടതി ചോദിച്ചു.

തച്ചങ്കരിയെ ആശുപത്രിയിൽ പ്രവേശിപ്പിച്ചതിന് പിന്നിൽ ഗൂഢാലോചനയുണ്ടോയെന്ന് പരിശോധിക്കേണ്ടതുണ്ടെന്ന് ജസ്റ്റിസ് എ. ബദറുദ്ദീൻ നിരീക്ഷിച്ചു. അദ്ദേഹത്തിന്റെ അസുഖത്തെക്കുറിച്ച് പരിശോധിക്കാൻ മെഡിക്കൽ ബോർഡ് രൂപീകരിക്കാൻ ഹർജി പിൻവലിച്ചാലും സ്വമേധയാ ഉത്തരവിടുമെന്നും കോടതി വ്യക്തമാക്കി. ഇത് കോടതിയുടെ മാത്രം ചോദ്യമല്ലെന്നും ഇന്ത്യയിലെ ഒരു സാധാരണ പൗരൻ പോലും ചോദിക്കുന്ന കാര്യമാണെന്നും ജസ്റ്റിസ് പറഞ്ഞു.

കോടതിയുടെ രൂക്ഷമായ നിലപാടിന് പിന്നാലെ ജാമ്യവ്യവസ്ഥയിൽ ഇളവ് തേടിയുള്ള അപേക്ഷ പിൻവലിക്കാൻ തച്ചങ്കരി അനുമതി തേടി. എന്നാൽ ഹർജി പിൻവലിച്ചാലും തന്നെ ഈ വിഷയത്തിൽ നിന്ന് ഒഴിവാക്കാനാകില്ലെന്ന് കോടതി മുന്നറിയിപ്പ് നൽകി. അനധികൃത സ്വത്ത് സമ്പാദനക്കേസിൽ കോട്ടയം വിജിലൻസ് കോടതി തച്ചങ്കരിക്ക് നാല് വർഷം തടവും പിഴയും വിധിച്ചിരുന്നു. പിന്നീട് ഹൈക്കോടതി ശിക്ഷ താൽക്കാലികമായി മരവിപ്പിക്കുകയും ജാമ്യം അനുവദിക്കുകയും ചെയ്തിരുന്നു.

മലയാളി യുവതാരം അനശ്വര രാജൻ തെലുങ്ക് സിനിമാലോകത്തും ആരാധകരുടെ പ്രിയതാരമായി മാറുന്നു. അനശ്വര നായികയായെത്തുന്ന പുതിയ തെലുങ്ക് ചിത്രം ‘ഇട്‌ലു അർജുന’യുടെ പ്രമോഷൻ ചിത്രങ്ങളാണ് ഇപ്പോൾ സമൂഹമാധ്യമങ്ങളിൽ തരംഗമാകുന്നത്. താരത്തിന്റെ ഓരോ പുതിയ ലുക്കും ആരാധകർ ഏറ്റെടുക്കുകയാണ്. ‘ഈശ്വരാ, പരമേശ്വരാ, അനശ്വരാ’ എന്ന ടാഗ്‌ലൈനോടെയാണ് ആരാധകർ താരത്തെ വാഴ്ത്തുന്നത്. 24കാരിയായ അനശ്വര ദക്ഷിണേന്ത്യയുടെ പുതിയ ക്രഷായി മാറിയെന്നാണ് സമൂഹമാധ്യമങ്ങളിലെ പ്രതികരണം.

സാരിയിലും ആധുനിക വസ്ത്രങ്ങളിലുമുള്ള അനശ്വരയുടെ വ്യത്യസ്ത ലുക്കുകൾ തെലുങ്ക് പ്രേക്ഷകരുടെ ശ്രദ്ധ നേടുന്നുണ്ട്. ഈ വർഷം അനശ്വരയുടേതായി മലയാള സിനിമകളൊന്നും തിയറ്ററുകളിലെത്തിയില്ലെങ്കിലും തമിഴ്, തെലുങ്ക് സിനിമകളിലൂടെ താരം ശ്രദ്ധേയമായ നേട്ടമാണ് സ്വന്തമാക്കിയത്. അബിഷൻ ജീവിന്ത് നായകനായ തമിഴ് ചിത്രം ‘വിത്ത് ലവ്’ എന്ന സിനിമയിൽ മോനിഷ എന്ന കഥാപാത്രത്തെയാണ് അനശ്വര അവതരിപ്പിച്ചത്. ഈ ചിത്രത്തിലൂടെ തമിഴ്‌നാട്ടിലും വലിയ ആരാധകപിന്തുണ നേടാൻ താരത്തിന് കഴിഞ്ഞു.

2025ൽ പുറത്തിറങ്ങിയ ‘ചാമ്പ്യൻ’ എന്ന ചിത്രത്തിലൂടെയാണ് അനശ്വര തെലുങ്കിൽ അരങ്ങേറ്റം കുറിച്ചത്. തുടർന്ന് ‘വിത്ത് ലവ്’, ‘7/G റെയിൻബോ കോളനി 2’, ‘അന്ത രാമുലൊരു ചൂസ്‌കുണ്ടാരു’ തുടങ്ങിയ ചിത്രങ്ങളിലും അഭിനയിച്ചു. ‘ചാമ്പ്യൻ’ ബോക്സ് ഓഫിസിൽ പ്രതീക്ഷിച്ച വിജയം നേടിയില്ലെങ്കിലും അനശ്വരയുടെ പ്രകടനം ശ്രദ്ധിക്കപ്പെട്ടു. ഇനി ചിരഞ്ജീവിക്കൊപ്പമുള്ള ‘കാക്ക’ ഉൾപ്പെടെ ശ്രദ്ധേയമായ പ്രോജക്ടുകളാണ് താരത്തെ കാത്തിരിക്കുന്നത്. മമിത ബൈജുവിന് പിന്നാലെ മലയാളത്തിൽനിന്ന് തെന്നിന്ത്യൻ സിനിമാലോകത്ത് കൂടുതൽ ശ്രദ്ധ നേടുന്ന യുവതാരമായി അനശ്വര രാജനും മാറുകയാണ്.

തിരുവനന്തപുരം: എൽപിഎസ്ടി ഉദ്യോഗാർഥികളുടെ സമരപ്പന്തൽ പൊലീസ് പൊളിച്ചുനീക്കിയതിനു പിന്നാലെ അതേ സ്ഥലത്ത് പുതിയ പന്തൽ സ്ഥാപിച്ച് ഡിവൈഎഫ്ഐ. നേരത്തെ സമരപ്പന്തൽ ഉണ്ടായിരുന്ന സ്ഥലത്ത് രണ്ട് കമ്പുകൾ നാട്ടി ടാർപോളിൻ വലിച്ചുകെട്ടിയാണ് താൽക്കാലിക പന്തൽ പുനഃസ്ഥാപിച്ചത്. പന്തൽ വീണ്ടും സ്ഥാപിക്കാനുള്ള ശ്രമം പൊലീസ് തടഞ്ഞത് സ്ഥലത്ത് സംഘർഷാവസ്ഥ സൃഷ്ടിച്ചു. പിന്നീട് മുതിർന്ന പൊലീസ് ഉദ്യോഗസ്ഥർ ഇടപെട്ടതോടെ പൊലീസ് പിൻവാങ്ങി. നിലവിൽ സെക്രട്ടേറിയറ്റിലെ സമരഗേറ്റിന് സമീപം പൊലീസ് നിലയുറപ്പിച്ചിട്ടുണ്ട്.

പുനഃസ്ഥാപിച്ച സമരപ്പന്തലിൽ റാങ്ക് ഹോൾഡർമാർ വീണ്ടും നിരാഹാരസമരം ആരംഭിച്ചു. സമരത്തിന് നേതൃത്വം നൽകിയ വളർമതിയെ പൊലീസ് അറസ്റ്റ് ചെയ്തതിനു പിന്നാലെ ഉദ്യോഗാർഥിയായ ജയകൃഷ്ണന്റെ നേതൃത്വത്തിലാണ് സമരം തുടരുന്നത്. റാങ്ക് പട്ടികയിൽ 10 മുതൽ 15 വരെ സ്ഥാനങ്ങളിലുള്ള ഉദ്യോഗാർഥികളാണ് സമരത്തിൽ പങ്കെടുക്കുന്നത്. സമരത്തിന് പിന്തുണ പ്രഖ്യാപിച്ച് നിരവധി ഡിവൈഎഫ്ഐ പ്രവർത്തകരും സ്ഥലത്തെത്തി. നേതാക്കളായ സി.എസ്. സുജാത, പി.കെ. ബിജു എന്നിവരും സമരപ്പന്തലിലെത്തി ഐക്യദാർഢ്യം അറിയിച്ചു.

അതേസമയം, സമാധാനപരമായി സമരം ചെയ്യുന്നവരെ പൊലീസിനെ ഉപയോഗിച്ച് ബലപ്രയോഗത്തിലൂടെ നേരിടുന്ന സമീപനമാണ് സർക്കാർ സ്വീകരിക്കുന്നതെന്ന് പ്രതിപക്ഷ നേതാവ് വിമർശിച്ചു. സമരപ്പന്തൽ പൊളിച്ചുനീക്കിയതും സമരനേതാവിനെ അറസ്റ്റ് ചെയ്തതും ഉദ്യോഗാർഥികൾക്കിടയിൽ പ്രതിഷേധം ശക്തമാക്കിയിട്ടുണ്ട്. സെക്രട്ടേറിയറ്റിന് മുന്നിലെ സമരസ്ഥലത്ത് സംഘർഷസാധ്യത നിലനിൽക്കുന്നതിനാൽ പൊലീസ് നിരീക്ഷണവും തുടരുകയാണ്.

തിരുവനന്തപുരം: കോവളത്തെ സ്പായിൽ പ്രായപൂർത്തിയാകാത്ത പെൺകുട്ടിയെ നിരവധി തവണ പീഡിപ്പിച്ചെന്ന കേസിൽ തമിഴ്നാട് സ്വദേശിയായ യുവാവ് കൂടി അറസ്റ്റിൽ. കന്യാകുമാരി ഉദയമാർത്താണ്ഡം സ്വദേശി ജമിലിൻ (24) ആണ് അറസ്റ്റിലായത്. പ്രത്യേക അന്വേഷണസംഘം കന്യാകുമാരിയിലെ കരിങ്കൽ ഭാഗത്തുനിന്നാണ് ഇയാളെ പിടികൂടിയത്. സ്പായിലെത്തിയ പ്രതി പെൺകുട്ടിയെ പലതവണ പീഡിപ്പിച്ചെന്നാണ് പൊലീസിന്റെ കണ്ടെത്തൽ.

സിസിടിവി ദൃശ്യങ്ങളും സ്പായിലെ സന്ദർശക രജിസ്റ്ററും പരിശോധിച്ചാണ് അന്വേഷണസംഘം ജമിലിനിലേക്ക് എത്തിയത്. പെൺകുട്ടിയുടെ മൊഴിയുടെ അടിസ്ഥാനത്തിൽ കേസിൽ കൂടുതൽ പേർക്ക് പങ്കുണ്ടെന്നാണ് പൊലീസിന്റെ സംശയം. സംഭവവുമായി ബന്ധപ്പെട്ട് കൂടുതൽ വിവരങ്ങൾ ശേഖരിച്ചുവരികയാണ് അന്വേഷണസംഘം.

പുതിയ അറസ്റ്റോടെ കേസിൽ പിടിയിലായവരുടെ എണ്ണം ഒൻപതായി. പീഡനത്തിൽ കൂടുതൽ പേർ ഉൾപ്പെട്ടിട്ടുണ്ടെന്ന സംശയത്തിന്റെ അടിസ്ഥാനത്തിൽ അന്വേഷണം വ്യാപിപ്പിച്ചിട്ടുണ്ട്. വരും ദിവസങ്ങളിൽ കൂടുതൽ അറസ്റ്റുകൾ ഉണ്ടാകുമെന്നാണ് പൊലീസ് നൽകുന്ന സൂചന.

കൊല്ലം: പരിപ്പുവടയ്ക്ക് ഉപ്പില്ലെന്ന് പറഞ്ഞ് തർക്കമുണ്ടാക്കിയ സംഘം കൊട്ടിയത്ത് തട്ടുകട അടിച്ചുതകർത്തു. കടയിലെ തൊഴിലാളിയുടെ ദേഹത്ത് തിളച്ച എണ്ണ ഒഴിക്കുകയും ആക്രമണം തടയാൻ ശ്രമിച്ച കടയുടമയെ ഹെൽമറ്റ് കൊണ്ട് തലയ്ക്കടിച്ച് പരുക്കേൽപിക്കുകയും ചെയ്തു. പെരുമ്പുഴയ്ക്ക് സമീപം ആലുംമൂട് ജംക്‌ഷനിൽ ഇന്നലെ വൈകിട്ട് 5.30നായിരുന്നു സംഭവം. കൊല്ലം പള്ളിമുക്ക് സ്വദേശി കടയുടമ ജെ. നാസിം, തൊഴിലാളി മോഹനൻ എന്നിവർക്കാണ് പരുക്കേറ്റത്. ഇരുവരും ആശുപത്രിയിൽ ചികിത്സ തേടി.

കടയിലെത്തിയ സംഘം പരിപ്പുവടയ്ക്ക് ഉപ്പില്ലെന്ന് പറഞ്ഞ് തർക്കമുണ്ടാക്കുകയായിരുന്നുവെന്ന് നാസിം പൊലീസിന് നൽകിയ പരാതിയിൽ പറയുന്നു. വാക്കേറ്റം രൂക്ഷമായതോടെ കടയിലെ പലഹാരങ്ങൾ വലിച്ചെറിഞ്ഞു. ഇത് തടയാൻ ശ്രമിച്ചപ്പോഴാണ് തൊഴിലാളി മോഹനന്റെ ദേഹത്ത് തിളച്ച എണ്ണ ഒഴിച്ചത്. തുടർന്ന് അക്രമം തടയാനെത്തിയ നാസിമിനെയും സംഘം ആക്രമിച്ചു. വടിവാൾ കൊണ്ട് വെട്ടാൻ ശ്രമിച്ചപ്പോൾ കൈകൊണ്ട് തടയുന്നതിനിടെ പരുക്കേറ്റതായും ഹെൽമറ്റ് ഉപയോഗിച്ച് തലയ്ക്കടിച്ചതായും പരാതിയിലുണ്ട്.

പ്രദേശത്ത് ലഹരിവിൽപനയും ഗുണ്ടാപ്രവർത്തനങ്ങളും നടത്തുന്ന യുവാവും സുഹൃത്തുമാണ് ആക്രമണത്തിന് പിന്നിലെന്നാണ് കടയുടമയുടെയും തൊഴിലാളിയുടെയും ആരോപണം. മാരകായുധങ്ങളുമായി പ്രദേശത്തെത്തി ഭീകരാന്തരീക്ഷം സൃഷ്ടിക്കുകയും ഗുണ്ടാപ്പിരിവ് നടത്തുകയും ചെയ്യുന്നവരാണ് അക്രമികളെന്നും നേരത്തെയും പരാതിയുണ്ടായിരുന്നുവെന്നും ഇവർ പറയുന്നു. സംഭവത്തിൽ കൊട്ടിയം പൊലീസ് അന്വേഷണം ആരംഭിച്ചു.

ഒറ്റപ്പാലം: പാലക്കാട് – കുളപ്പുള്ളി പാതയിൽ തൃക്കങ്ങോട് കാർ നിയന്ത്രണം വിട്ട് പാതയോരത്തെ മരത്തിലേക്ക് ഇടിച്ചുകയറി രണ്ടുപേർ മരിച്ചു. അപകടത്തിൽ മൂന്നുപേർക്ക് ഗുരുതരമായി പരുക്കേറ്റു. പനമണ്ണ കയറാട്ട് വൈശാഖ്, ഈസ്റ്റ് മനിശ്ശേരി പാന്തലിൽ പി.ആർ. അജയ് എന്നിവരാണ് മരിച്ചത്. ഗോവിന്ദ്, ശ്രീജിത്ത്, നിതിൻ എന്നിവർക്കാണ് പരുക്കേറ്റത്.

ബുധനാഴ്ച പുലർച്ചെയാണ് അപകടം നടന്നത്. അഞ്ചുപേരാണ് കാറിലുണ്ടായിരുന്നത്. ഇടിയുടെ ആഘാതത്തിൽ കാർ പൂർണമായും തകർന്നു. കാറിനുള്ളിൽ കുടുങ്ങിയ യാത്രക്കാരെ വാഹനം വെട്ടിപ്പൊളിച്ചാണ് പുറത്തെടുത്തത്. മരിച്ചവരുടെ മൃതദേഹങ്ങൾ വാണിയംകുളത്തെ സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. പരുക്കേറ്റ മൂന്നുപേരെയും ഇതേ ആശുപത്രിയിൽ പ്രവേശിപ്പിച്ച് ചികിത്സ നൽകി വരികയാണ്.

മട്ടന്നൂർ: മുൻ അധ്യാപികയായ ജ്യോതിയെയും മകൻ നവീൻകൃഷ്ണയെയും വീട്ടിനുള്ളിൽ വെട്ടേറ്റ് മരിച്ച നിലയിൽ കണ്ടെത്തിയ സംഭവത്തിൽ ദുരൂഹത തുടരുന്നു. രാവിലെ പുറത്തുപോയ ഭർത്താവ് ജയകൃഷ്ണൻ തിരിച്ചെത്തിയപ്പോഴാണ് ഇരുവരെയും രക്തത്തിൽ കുളിച്ച നിലയിൽ കണ്ടത്. വീടിന്റെ മുകൾനിലയിൽ കോണിപ്പടിക്ക് സമീപം അടുത്തടുത്തായി കമിഴ്ന്നു കിടക്കുകയായിരുന്നു മൃതദേഹങ്ങൾ. ഇരുവർക്കുമിടയിൽ വീട്ടിൽ ഉപയോഗിക്കുന്ന സ്റ്റീൽ കത്തിയും കണ്ടെത്തി. ജ്യോതിയുടെ മുഖത്തും ശരീരത്തിന്റെ വിവിധ ഭാഗങ്ങളിലും മാരകമായ മുറിവുകളുണ്ടായിരുന്നു. നവീൻകൃഷ്ണയുടെ കഴുത്തിലും ആഴത്തിലുള്ള മുറിവേറ്റിരുന്നു.

രാവിലെ ഒൻപതുമണിയോടെ വീട്ടിൽനിന്ന് ചെറിയ നിലവിളി കേട്ടിരുന്നതായി അയൽവാസികൾ മൊഴി നൽകിയിട്ടുണ്ട്. എന്നാൽ ശബ്ദം കേട്ട് പരിശോധിച്ചപ്പോൾ അസ്വാഭാവികമായി ഒന്നും ശ്രദ്ധയിൽപ്പെട്ടിരുന്നില്ല. ഏകദേശം ഒരു മണിക്കൂറിനുശേഷമാണ് ജയകൃഷ്ണൻ വീട്ടിലെത്തിയതും സംഭവം പുറത്തറിയുന്നതും. അയൽവാസികൾ ഓടിയെത്തിയാണ് മൃതദേഹങ്ങൾ പുറത്തെടുക്കുന്നതിനും തുടർനടപടികൾക്കും സഹായിച്ചത്. ജയകൃഷ്ണനും ജ്യോതിയും നാട്ടുകാരുമായി നല്ല ബന്ധം പുലർത്തിയിരുന്നെങ്കിലും നവീൻ പൊതുവെ ആരുമായും അധികം ഇടപഴകാതെ വീട്ടിൽ ഒതുങ്ങിക്കഴിയുന്ന പ്രകൃതക്കാരനായിരുന്നുവെന്നാണ് നാട്ടുകാർ പറയുന്നത്.

കഴിഞ്ഞ ദിവസം വീട്ടിൽ വാക്കുതർക്കമുണ്ടായിരുന്നതായും സൂചനയുണ്ട്. നവീൻകൃഷ്ണ വിഷാദരോഗത്തിന് ചികിത്സ തേടിയിരുന്നതായി പൊലീസ് അറിയിച്ചു. അമ്മയുടെ മരണത്തിന് പിന്നിൽ മകന്റെ മാനസികാരോഗ്യ പ്രശ്നങ്ങളാണോ എന്നതുൾപ്പെടെ വിവിധ സാധ്യതകൾ പൊലീസ് പരിശോധിക്കുന്നുണ്ട്. നവീന്റെ സഹോദരൻ നവനീത് കൊച്ചിയിലെ സ്വകാര്യ കമ്പനിയിൽ ജോലി ചെയ്യുകയാണ്. സംഭവത്തിൽ സമഗ്രമായ അന്വേഷണം വേണമെന്ന് സ്ഥലത്തെത്തിയ എം.എൽ.എ വി.കെ. സനോജ് ആവശ്യപ്പെട്ടു. മരണത്തിലേക്ക് നയിച്ച സാഹചര്യങ്ങൾ വ്യക്തമാക്കാൻ പൊലീസ് അന്വേഷണം തുടരുകയാണ്.

കൊച്ചി: ഡോക്ടറെ മർദിച്ച കേസിൽ നിർണായക വെളിപ്പെടുത്തലുമായി അറസ്റ്റിലായ പ്രതികൾ. തങ്ങൾക്കെതിരായ പീഡനക്കേസ് ഒതുക്കിത്തീർക്കാൻ ഡോക്ടർ ജോൺസൺ കെ.എഫ്. വർഗീസ് ഒരു കോടി രൂപ വാഗ്ദാനം ചെയ്തിരുന്നുവെന്നാണ് പ്രതികളുടെ മൊഴി. പണം സംബന്ധിച്ച് പിന്നീട് തർക്കമുണ്ടായതായും ഇവർ പോലീസിനോട് പറഞ്ഞു. സംഭവത്തിൽ അറസ്റ്റിലായ നടൻ വിപിൻ പെരുമ്പള്ളി, നടി അതുല്യ ചന്ദ്ര, വിഷ്ണു എന്നിവരെ ഇന്ന് തെളിവെടുപ്പിന് കൊണ്ടുപോകും. അതേസമയം, ഒളിവിൽ കഴിയുന്ന ഡോക്ടറെ കണ്ടെത്താനുള്ള ശ്രമം പോലീസ് ഊർജിതമാക്കി.

പണം ആവശ്യപ്പെട്ട് തന്നെ മർദിച്ചുവെന്നായിരുന്നു ആദ്യം ഡോക്ടർ പോലീസിൽ പരാതി നൽകിയത്. എന്നാൽ, പിന്നീട് ഡോക്ടർക്കെതിരേ ബലാത്സംഗക്കേസ് രജിസ്റ്റർ ചെയ്തതോടെ ഇയാൾ ഒളിവിൽ പോവുകയായിരുന്നു. മർദനക്കേസിൽ പിടിയിലായ പ്രതികളെ ചോദ്യം ചെയ്തപ്പോഴാണ് പീഡനക്കേസ് ഒതുക്കാൻ ഒരു കോടി രൂപ വാഗ്ദാനം ചെയ്തെന്ന വിവരം പുറത്തുവന്നത്. കേസിൽ 12-ഓളം പേർ പ്രതികളാണെന്നാണ് എഫ്ഐആറിൽ പറയുന്നത്. ഡോക്ടറെ ഫ്ലാറ്റിലേക്ക് വിളിച്ചുവരുത്തിയപ്പോൾ ഇവരെല്ലാവരും അവിടെയുണ്ടായിരുന്നുവെന്നാണ് ഡോക്ടറുടെ നേരത്തെയുള്ള മൊഴി. ഇതിൽ മൂന്നുപേരാണ് നിലവിൽ അറസ്റ്റിലായത്. ഡോക്ടറുടെ പക്കൽനിന്ന് പ്രതികൾ പിടിച്ചെടുത്ത മൊബൈൽ ഫോൺ പീഡനപരാതി നൽകിയ യുവതി പോലീസിന് കൈമാറിയിട്ടുണ്ട്. ഫോണിൽനിന്ന് അശ്ലീല ദൃശ്യങ്ങളും കണ്ടെത്തിയതായി പോലീസ് അറിയിച്ചു.

അതിനിടെ, തനിക്കെതിരായ ബലാത്സംഗ ആരോപണം കെട്ടിച്ചമച്ചതാണെന്ന് ചൂണ്ടിക്കാട്ടി ഡോക്ടർ എറണാകുളം സെഷൻസ് കോടതിയിൽ മുൻകൂർ ജാമ്യാപേക്ഷ നൽകി. സംഭവത്തിൽ കടവന്ത്ര പോലീസും ഇൻഫോപാർക്ക് പോലീസും അന്വേഷണം തുടരുകയാണ്. പ്രതികളുടെ മൊഴികളും ഫോണിൽനിന്ന് ലഭിച്ച വിവരങ്ങളും അന്വേഷണത്തിൽ നിർണായകമാകുമെന്നാണ് വിലയിരുത്തൽ. ഡോക്ടറെ കണ്ടെത്താനുള്ള തിരച്ചിലും തുടരുകയാണ്.

കൊച്ചി: നഗരത്തിൽ പൊലീസുകാർക്കുനേരെ തുടർച്ചയായ ആക്രമണങ്ങൾ. ലഹരി ഉപയോഗിച്ച് അവശനിലയിലായ യുവാവ് പൊലീസുകാരന്റെ കൈ കടിച്ചുമുറിച്ചു. സംഭവത്തിൽ കൊല്ലം ശാസ്താംകോട്ട സ്വദേശി മുഹമ്മദ് ഇക്ബാലിനെ പൊലീസ് പിടികൂടി. കൊച്ചി നോർത്ത് സ്റ്റേഷനിലെ ഡ്രൈവർ അജിത് പോളിനാണ് കടിയേറ്റത്. വൈദ്യപരിശോധനയ്ക്കായി ആശുപത്രിയിലെത്തിച്ചപ്പോഴായിരുന്നു ആക്രമണം. നോർത്ത് പാലത്തിന് സമീപത്തുനിന്നാണ് ഇക്ബാലിനെ പൊലീസ് കസ്റ്റഡിയിലെടുത്തത്.

മറ്റൊരു സംഭവത്തിൽ കൊച്ചിയിലെ ഇന്ദിരാഗാന്ധി ആശുപത്രിയിൽ ബഹളമുണ്ടാക്കിയ കൊല്ലം സ്വദേശി അജ്മൽ, സ്ഥലത്തെത്തിയ എസ്ഐ ഹരികൃഷ്ണനെ ആക്രമിച്ചു. ആശുപത്രിയിൽ ബഹളമുണ്ടാക്കുന്നതായി ലഭിച്ച പരാതിയെ തുടർന്നാണ് പൊലീസ് എത്തിയത്. ഔദ്യോഗിക കൃത്യനിർവഹണം തടസ്സപ്പെടുത്തിയതിനും പൊലീസിനെ ആക്രമിച്ചതിനും അജ്മലിനെതിരെ കേസെടുത്തു. രണ്ട് സംഭവങ്ങളിലുമായി രണ്ടുപേരെയാണ് പൊലീസ് പിടികൂടിയത്.

അതിനിടെ, കൊച്ചിയിൽ കഴിഞ്ഞ ദിവസം സ്വകാര്യ ബസ് ഇടിച്ച് ട്രാഫിക് പൊലീസുകാരന് പരുക്കേറ്റിരുന്നു. ഹൈക്കോടതിക്ക് സമീപം വൈകിട്ട് ഏഴരയോടെയായിരുന്നു സംഭവം. മേനക ഭാഗത്തുനിന്ന് അമിതവേഗത്തിലും അശ്രദ്ധമായും എത്തിയ മഹാത്മ ബസ് ബാനർജി റോഡിലേക്ക് തിരിയുന്നതിനിടെയാണ് സിപിഒ ശ്രീദത്തിനെ ഇടിച്ചിട്ടത്. പരുക്കേറ്റ പൊലീസുകാരൻ ആശുപത്രിയിൽ ചികിത്സ തേടി. അപകടമുണ്ടാക്കിയ ബസ് പൊലീസ് കസ്റ്റഡിയിലെടുത്തു. ഡ്രൈവർ കാക്കനാട് സ്വദേശി അനീഷിനെയും കസ്റ്റഡിയിലെടുത്തിട്ടുണ്ട്.