ന്യൂസ് ഡെസ്ക് മലയാളം യുകെ ന്യൂസ്
ഫെബ്രുവരി ഒന്നിന് ഏകദേശം ഒരു ലക്ഷം സിവിൽ സർവീസ് ഉദ്യോഗസ്ഥർ പണിമുടക്കുമെന്ന് പബ്ലിക് ആൻഡ് കൊമേഴ്സ്യൽ സർവീസസ് യൂണിയൻ അറിയിച്ചു. 124 സർക്കാർ വകുപ്പുകളിലെ ജീവനക്കാർ സമരത്തിൽ പങ്കുചേരും. മെച്ചപ്പെട്ട ശമ്പളത്തിനായി കുറേ നാളായി ജീവനക്കാർ ഉന്നയിക്കുന്ന ആവശ്യങ്ങൾ ഫലപ്രാപ്തിയിൽ എത്താത്തതാണ് സമരത്തിലേയ്ക്ക് എത്തിച്ചിരിക്കുന്നത്.
10 ശതമാനം ശമ്പള വർദ്ധനവ് , കൂടുതൽ മെച്ചപ്പെട്ട പെൻഷൻ ആനുകൂല്യങ്ങൾ, തൊഴിൽ സുരക്ഷ എന്നീ ആവശ്യങ്ങളാണ് പ്രധാനമായും യൂണിയൻ മുന്നോട്ട് വയ്ക്കുന്നത്. എച്ച് എം ആർ സി ഉൾപ്പെടെ 5 സർക്കാർ വകുപ്പുകളിലെ 33,000 യൂണിയൻ അംഗങ്ങൾ പണിമുടക്കിൽ അണിചേരുന്നതിനെ കുറിച്ചുള്ള തീരുമാനത്തിനായി അടുത്ത ആഴ്ച വീണ്ടും അഭിപ്രായ സർവേ നടത്തും. ഫലം അനുകൂലമാണെങ്കിൽ പണിമുടക്കുന്നവരുടെ എണ്ണം ഇനിയും വർദ്ധിക്കാനാണ് സാധ്യത. പണിമുടക്കിന് മുമ്പ് ക്യാബിനറ്റ് ഓഫീസ് മന്ത്രി ജെറമി ക്വിനുമായി കൂടിക്കാഴ്ച നടത്തുമെന്ന് പി സി എസ് ജനറൽ സെക്രട്ടറി മാർക്ക് സെർവോത്ക പറഞ്ഞു.
ഡിപ്പാർട്ട്മെൻറ് ഫോർ വർക്ക് ആൻഡ് പെൻഷൻസ് (ഡിഡബ്ല്യുപി), ഡ്രൈവർ ആൻഡ് വെഹിക്കിൾ ലൈസൻസിംഗ് ഏജൻസി (ഡി വി എൽ എ ) , ഡിപ്പാർട്ട്മെൻറ് ഓഫ് ഹെൽത്ത് ആൻഡ് സോഷ്യൽ കെയർ ( ഡിഎച്ച് എസ് സി ) എന്നിവയുൾപ്പെടെയുള്ള പൊതുമേഖല സ്ഥാപനങ്ങളിലെ ജീവനക്കാരാണ് സമരത്തിൽ പങ്കെടുക്കുന്നത്. ഫെബ്രുവരി ഒന്നിന് നടക്കുന്ന സമരം ബ്രിട്ടനിലെ ഏറ്റവും വലിയ സിവിൽ സർവീസ് പണിമുടക്ക് ആയിരിക്കുമെന്നാണ് യൂണിയനുകൾ അവകാശപ്പെടുന്നത്.
Leave a Reply