ന്യൂസ് ഡെസ്ക്, മലയാളം യുകെ
സെർവിക്കൽ സ്‌ക്രീനിംഗിന് വരാൻ വൈകിയ സ്ത്രീകൾക്ക് വീട്ടിൽ തന്നെ പരിശോധന നടത്താനുള്ള സൗകര്യം നൽകാൻ ഒരുങ്ങി എൻഎച്ച്എസ് ഇംഗ്ലണ്ട്. ജനുവരി മുതൽ ലഭ്യമാകുന്ന DIY ടെസ്റ്റ് കിറ്റുകളിൽ യോനിയിലെ ആവരണം തുടയ്ക്കാൻ നീളമുള്ള ഒരു കോട്ടൺ ബഡ് അടങ്ങിയതാണ്. മിക്ക സെർവിക്കൽ ക്യാൻസറുകൾക്കും കാരണമാകുന്ന ഹ്യൂമൻ പാപ്പിലോമ വൈറസിനെ തിരിച്ചറിയാനാണ് ഈ പരിശോധന നടത്തുക. 25 നും 64 നും ഇടയിൽ പ്രായമുള്ള സ്ത്രീകൾക്ക് ഏതാനും വർഷങ്ങൾ കൂടുമ്പോൾ ഇത് നൽകാറുണ്ട്. എന്നാൽ അഞ്ച് ദശലക്ഷത്തിലധികം സ്ത്രീകൾ കൃത്യ സമയത്ത് ഈ ടെസ്റ്റ് ചെയ്യുന്നില്ലെന്ന് സർക്കാരിൻെറ കണക്കുകൾ സൂചിപ്പിക്കുന്നു.
ഇംഗ്ലണ്ടിലെ ആരോഗ്യ-സാമൂഹിക പരിപാലന വകുപ്പ്, ഗർഭാശയ പരിശോധനയിൽ സ്ത്രീകൾ പങ്കെടുക്കുന്നതിൽ തടസങ്ങൾ നേരിടാതിരിക്കാനാണ് ഇത്തരത്തിലുള്ള നടപടിയുമായി മുന്നോട്ട് വന്നിരിക്കുന്നത്. പലപ്പോഴും അസ്വസ്ഥത, സമയക്കുറവ്, മതപരമോ സാംസ്കാരികമോ ആയ വിശ്വാസങ്ങൾ തുടങ്ങിയ ഘടകങ്ങൾ സ്ത്രീകളെ ഈ പരിശോധന നടത്തുന്നതിൽ നിന്ന് പിന്തിരിപ്പിക്കുന്നു. നിലവിൽ, യോഗ്യരായ സ്ത്രീകളിൽ 68.8% പേർ മാത്രമാണ് സെർവിക്കൽ ക്യാൻസർ സ്‌ക്രീനിംഗ് ഓഫർ സ്വീകരിക്കുന്നത്.
പ്രീ-പെയ്ഡ് റിട്ടേൺ പോസ്റ്റേജുമായി പായ്ക്ക് ചെയ്തിരിക്കുന്ന ഈ കിറ്റുകൾ, സ്ത്രീകൾക്ക് വീട്ടിൽ തന്നെ സാമ്പിൾ ശേഖരിക്കാൻ അനുവദിക്കുന്നു. HPV കണ്ടെത്തിയാൽ, ക്യാൻസറിനെ സൂചിപ്പിക്കുന്ന ഏതെങ്കിലും കോശ മാറ്റങ്ങൾ ഉണ്ടോ എന്ന് പരിശോധിക്കുന്നതിനായി ഇത്തരക്കാരെ കൂടുതൽ പരിശോധനകൾക്കായി റഫർ ചെയ്യും. അടുത്തിടെ നടത്തിയ ഒരു പരീക്ഷണത്തിൽ, മൂന്ന് വർഷത്തിനുള്ളിൽ ഹോം കിറ്റുകൾ ഉപയോഗിക്കുന്നത് സ്‌ക്രീനിംഗ് സ്വീകാര്യത 77% ആയി ഉയർത്തുമെന്ന് കണ്ടെത്തി. അതിജീവന നിരക്ക് മെച്ചപ്പെടുത്തുന്നതിൽ നേരത്തെയുള്ള രോഗനിർണ്ണയത്തിന്റെ പ്രാധാന്യം ആരോഗ്യ സെക്രട്ടറി വെസ് സ്ട്രീറ്റിംഗ് എടുത്ത് കാട്ടി. വീട്ടിൽ തന്നെ പരിശോധന നടത്തുന്നത് സെർവിക്കൽ ക്യാൻസറിൻെറ നിരക്ക് കുറയ്ക്കുന്നതിൽ സുപ്രധാന പങ്ക് വഹിക്കുമെന്ന് ക്യാൻസർ റിസർച്ച് യുകെ മേധാവി മിഷേൽ മിച്ചൽ പറഞ്ഞു.
Leave a Reply