ന്യൂസ് ഡെസ്ക്, മലയാളം യുകെ
17 വയസ്സുകാരിയുമായി ലൈംഗിക ബന്ധത്തിൽ ഏർപ്പെട്ടതിന് ദുബായിൽ ജയിലിലായ കൗമാരക്കാരനായ ബ്രിട്ടീഷുകാരനെ മോചിപ്പിച്ചു. യുണൈറ്റഡ് അറബ് എമിറേറ്റ്‌സിൽ (യുഎഇ) അവധിക്കാലം ആഘോഷിക്കുന്നതിനിടെ ബ്രിട്ടീഷുകാരിയായ പെൺകുട്ടിയുമായി ഉഭയസമ്മതത്തോടെയുള്ള ബന്ധത്തിൽ ഏർപ്പെട്ടതിനെ തുടർന്നാണ് ഇപ്പോൾ 19 വയസ്സുകാരനായ മാർക്കസ് ഫക്കാനയെ ഒരു വർഷത്തെ ജയിൽ ശിക്ഷയ്ക്ക് വിധിച്ചത്. യുഎഇയിൽ ഉഭയ സമ്മത പ്രകാരം ബന്ധപ്പെടുന്നതിനുള്ള പ്രായപരുധി 18 വയസ്സ് ആണ്.
വടക്കൻ ലണ്ടനിലെ ടോട്ടൻഹാമിൽ നിന്നുള്ള മാർക്കസൈനു ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂമിൽ നിന്ന് രാജകീയ മാപ്പ് ലഭിച്ചതാണ് ശിക്ഷാ കാലാവധിക്ക് മുൻപ് ജയിൽ മോചനം സാധ്യമാക്കിയത്. മാർക്കസ് ഫക്കാനയുടെ കേസ് ലോകമെമ്പാടും വൻ വാർത്താ പ്രാധാന്യം നേടിയിരുന്നു. വിനോദസഞ്ചാരത്തിനായി എത്തിയ കൗമാരക്കാരന്റെ മേൽ യുഎഇയുടെ നിയമങ്ങൾ ചുമത്തിയതിനെതിരെ വൻ വിമർശനങ്ങൾ ഉയർന്നുവന്നിരുന്നു. പെൺകുട്ടിക്ക് 18 വയസ്സിന് താഴെയാണെന്ന് മാർക്കസിന് അറിയില്ലായിരുന്നു എന്നാണ് കൗമാരക്കാരനെ പിന്തുണച്ചവർ വാദിച്ചത് . മാർക്കസും പെൺകുട്ടിയും യുകെയിൽ തിരിച്ചെത്തിയതിന് ശേഷം ഇരുവരും തമ്മിലുള്ള സന്ദേശങ്ങൾ കണ്ട പെൺകുട്ടിയുടെ അമ്മ യുഎഇ അധികാരികൾക്ക് പരാതി നൽകിയതിനെ തുടർന്നാണ് കേസ് ഉടലെടുത്തത്.
Leave a Reply