സുതീഷ് തോമസ്
സ്റ്റോക്ക് ഓൺ ട്രെന്റിലെ സീറോമലബാർ നസ്രാണി കുടുംബങ്ങൾ ഒരുമിച്ചുകൂടി ഭക്ത്യാദരപൂര്‍വ്വം പ്രാർത്ഥനയോടെ ഇടവമധ്യസ്ഥയായ നിത്യസഹായ മാതാവിന്റെയും, ഭാരത അപ്പസ്‌തോലന്‍മാര്‍ തോമാസ്ലീഹായുടെയും , ഭാരതത്തിന്റെ പ്രഥമ വിശുദ്ധ അല്‍ഫോന്‍സാമ്മയുടെയും വിശുദ്ധ സെബസ്റ്റ്യാനോസിന്റെയുംസംയുക്ത തിരുനാള്‍ ആഘോഷപൂര്‍വം കൊണ്ടാടി.
ജൂണ്‍ 29 ന് മിഷന്‍ വികാരി റെവ . ഫാ. ജോര്‍ജ്ജ് എട്ടുപാറയില്‍ കൊടിയേറ്റതോടുകൂടി ഈ വര്‍ഷത്തെ തിരുനാള്‍ തിരുക്കര്‍മ്മങ്ങള്‍ക്ക് തുടക്കം കുറിച്ചു. തുടര്‍ന്ന് എല്ലാ ദിവസവും യാമ പ്രാർത്ഥനയും കുർബാനയും നൊവേനയും.
തിരുന്നാള്‍ ദിവസമായ ജൂലൈ 6 ഞായറാഴ്ച രാവിലെ 9:30ന് നിത്യസഹായ മാതാവിൻറെ തിരുസ്വരൂപ പ്രതിഷ്ഠയോടെ തിരുനാൾ ആഘോഷങ്ങൾക്ക് തുടക്കമായി. 10 മണിക്ക് ഗായകനും, വാഗ്മിയും, ധ്യാന ഗുരുവും ആയ റെവ . ഫാ.ജോസ് അഞ്ചാനിക്കലിന്റെ, മുഖ്യകാര്‍മ്മികത്വത്തിലും റെവ . ഫാ . ജോര്‍ജ്ജ് എട്ടുപറയിലിന്റെ സഹകാര്‍മ്മികത്വത്തിലും ആത്മീയ അനുഭവത്തിന്റെ ആഘോഷപൂർവ്വമായ തിരുന്നാൾ പാട്ടു കുർബാനയും ലദീഞ്ഞും.
കൊടിതോരണങ്ങളാല്‍ അലംകൃതമായി, ഭംഗിപ്പെടുത്തിയ പള്ളിപ്പരിസരവും, മുണ്ടും ജുബ്ബയും അണിഞ്ഞ് എത്തിയ പുരുഷന്മാരാലും, സാരിയും പട്ടുപാവാടയും അണിഞ്ഞ് എത്തിയ സ്ത്രീകളാലും ദേവാലയവും പരിസരവും നിറഞ്ഞതോടെ ദൈവാലയ മുറ്റത്തെ കൊടി മരച്ചുവട്ടിൽ നിന്ന് , എൻറെ കർത്താവേ എൻറെ ദൈവമേ എന്ന വിശ്വാസം ഉറക്കെ പ്രഖ്യാപിക്കുന്ന പ്രവാസ മണ്ണിലെ വിശ്വാസ പ്രഘോഷണമായി തിരുന്നാള്‍ പ്രദക്ഷിണത്തിന് ആകർഷകമായ തുടക്കമായി.
സെന്റ് തോമസ് കുരിശുമേന്തി പ്രാർത്ഥനാപൂർവ്വം കൈക്കാരകാരനും തിരുന്നാൾ ജനറൽ കൺവീനർമാരായ ഫിനിഷ് വില്‍സണ്‍ മുൻപിൽ, തുടർന്ന് കൊടികൾ ഏന്തിയ കോയർ കുട്ടികൾ, മരക്കുരിശ്, പൊന്‍ കുരിശ്, വെള്ളിക്കുരിശ് ഏന്തി ഇടവക അംഗങ്ങൾ.
കൊടിതോരണങ്ങള്‍ക്കൊപ്പം വിശുദ്ധ തോമാശ്ലീഹായുടെ പാരമ്പര്യവും പൈതൃകവും പേറുന്ന പിന്മുറക്കാരാണ് തങ്ങളെന്ന വിശ്വാസവെളിച്ചവുമായി ഇടവമധ്യസ്ഥയായ നിത്യസഹായ മാതാവിന്റെ തിരുസ്വരൂപം ഏന്തിയ ഇടവകയിലെ യുവാക്കൾ,
വിശുദ്ധരുടെ തിരുസ്വരൂപങ്ങള്‍ വിശുദ്ധ യൗസേപ്പ് പിതാവിൻറെയും , വിശുദ്ധ അല്‍ഫോന്‍സാമ്മയുടെയും , വിശുദ്ധ തോമാശ്ലീഹായുടെയും, വിശുദ്ധ സെബസ്റ്റ്യാനോസിന്റെയും തിരുസ്വരൂപങ്ങള്‍. ആഘോഷമായി കോ-ഓപ്പറേറ്റീവ് അക്കാദമിയിലേക്ക്.
തുടർന്ന് സമാപന പ്രാത്ഥനയുടെ ആശിര്‍വാദം, കഴുന്ന് നേർച്ച, സ്നേഹവിരുന്ന്, ലഘുഭക്ഷണം.
ശ്രുതിമധുരമായ സംഗീത വിരുന്ന് ഗായകനയ റെവ . ഫാ.ജോസ് അഞ്ചാനിക്കൽ തന്റെ ഭക്തിനിർഭരമായ പാട്ടിലൂടെ ഉദ്ഘാടനം ചെയ്തു.
തിരുനാൾ ആഘോഷങ്ങൾക്ക് മാറ്റുകൂട്ടിക്കൊണ്ട് മെന്‍സ് ഫോറത്തിന്റെ നേതൃത്വത്തില്‍ കരിമരുന്നു കലാപ്രകടനവും വിമന്‍സ് ഫോറത്തിന്റെ നേതൃത്വത്തിൽ നസ്രാണി പീടിക പലഹാരക്കടയും കൂൾഡ്രിങ്ക്സ് സ്റ്റാൾ എന്നിവയും ഉണ്ടായിരുന്നു.
കഴുന്നെടുത്തും നേര്‍ച്ചകാഴ്ചകള്‍ അര്‍പ്പിച്ചും വിശുദ്ധരുടെ മാധ്യസ്ഥം തേടി ആയിരങ്ങള്‍ തിരുക്കര്‍മ്മങ്ങളില്‍ പങ്കെടുത്തു സായൂജ്യം നേടി.
തിരുന്നാള്‍ കമ്മറ്റിയുടെ പ്രവര്‍ത്തനങ്ങള്‍ ശ്ലാഘനീയം ഇടവക വികാരി റവ. ഫാ .ജോര്‍ജ് എട്ടുപറയലിനൊപ്പം തിരുന്നാള്‍ കണ്‍വീനര്‍ ഫിനിഷ് വില്‍സണ്‍, ജോയിന്റ് കണ്വീനേഴ്സ് റണ്‍സ് മോന്‍ അബ്രഹം , റിന്റോ റോക്കി , ഷിബി ജോണ്‍സന്‍, കൈക്കാരന്മാര്‍ അനൂപ് ജേക്കബ് , സോണി ജോണ്‍ , സജി ജോസഫ് എന്നിവരുടെ നേതൃത്വത്തില്‍ പ്രവര്‍ത്തിച്ച തിരുന്നാള്‍ കമ്മറ്റിക്ക് ഏവരുടെയും പ്രശംസ.
നാളുകള്‍ നീണ്ട കഠിനാധ്വാനത്തിന്റെ ഫലപ്രാപ്തിയാണ് ഉണ്ടായതെന്നും തിരുന്നാള്‍ വിജയത്തിനായി സഹകരിച്ച ഏവര്‍ക്കും തിരുന്നാള്‍ കണ്‍വീനര്‍ ഫിനിഷ് വിൽസണും, റണ്‍സ് മോനും റിന്റോ റോക്കിയും, ഷിബി ജോൺസനും കൃതജ്ഞത അറിയിച്ചു
കൂട്ടായ്മയില്‍ ചിട്ടയോടുകൂടി ഏവര്‍ക്കും അഭിമാനമാകുന്ന തരത്തില്‍ തിരുന്നാള്‍ വിജയപ്രദമാക്കുവാന്‍ പ്രയത്‌നിച്ച വിവിധ കമ്മിറ്റിയംഗങ്ങള്‍ക്കും കൈക്കാരന്മാര്‍ക്കും കണ്വീനേഴ്സ്, അള്‍ത്താര ശുശ്രൂഷകര്‍, ഗായകസംഘങ്ങള്‍, മെന്‍സ് ഫോറം, വിമണ്‍സ് ഫോറം, സണ്‍ഡേ സ്‌കൂള്‍ ടീച്ചേഴ്‌സ്, തിരുന്നാൾ കൂട്ടായ്മയുടെ ആദ്യാവസാനം വരെ എല്ലാ കാര്യങ്ങളിലും സഹായഹസ്തവുമായി പ്രവർത്തിച്ച സിസ്റ്റർ ലിൻസി സിസ്റ്റർ ഷേർലി, ഫാമിലി യൂണിറ്റ്‌സ്, എന്നിവര്‍ക്കും പങ്കെടുത്ത ഓരോ വിശ്വാസികള്‍ക്കും മിഷന്‍ വികാരി ഫാ. ജോര്‍ജ്ജ് എട്ടുപാറയില്‍ പ്രത്യേകം നന്ദികുറിച്ചുകൊണ്ട് വൈകിട്ട് 7 മണിക്ക് പ്രാർത്ഥനകളോടെ കൊടിമരത്തിൽ നിന്ന് തിരുന്നാൾ കൊടി ഇറക്കി തിരുക്കര്‍മ്മങ്ങള്‍ക്ക് സമാപനമായി.
Leave a Reply