ന്യൂസ് ഡെസ്ക്, മലയാളം യുകെ
ബ്രിട്ടന്റെ ഭക്ഷ്യവിതരണ ശൃംഖല സൈബർ ആക്രമണങ്ങൾ, അതിതീവ്ര കാലാവസ്ഥാ സംഭവങ്ങൾ, യുദ്ധസാഹചര്യങ്ങൾ എന്നിവ മൂലം കൂടുതൽ അപകടസാധ്യത നേരിടുന്നതായി നാഷണൽ ഓഡിറ്റ് ഓഫീസ് (എൻഎഒ) റിപ്പോർട്ട്. ഇത്തരം “വിപത്തുസമാന” സംഭവങ്ങൾ ഉണ്ടായാൽ സൂപ്പർമാർക്കറ്റുകളിലെ ഷെൽഫുകൾ ശൂന്യമാകാൻ വരെ സാധ്യതയുണ്ടെന്നും സർക്കാർ കൂടുതൽ തയ്യാറെടുപ്പുകൾ നടത്തണമെന്നും റിപ്പോർട്ട് മുന്നറിയിപ്പ് നൽകുന്നു.
ഭക്ഷ്യവിതരണ സംവിധാനത്തിന്റെ പൂർണ തകരാർ ഉണ്ടാക്കുന്ന തരത്തിലുള്ള വലിയ പ്രതിസന്ധി നേരിടാൻ പരിസ്ഥിതി, ഭക്ഷ്യകാര്യ, ഗ്രാമവികസന വകുപ്പ് (ഡെഫ്ര) മതിയായ രീതിയിൽ പരീക്ഷിക്കപ്പെട്ടിട്ടില്ലെന്ന് റിപ്പോർട്ട് ചൂണ്ടിക്കാട്ടുന്നു. അടിയന്തിര പ്രവർത്തന പദ്ധതികളിൽ ആവശ്യമായ വ്യക്തതയില്ലെന്നും അവ ബിസിനസ് സ്ഥാപനങ്ങളുമായി പങ്കുവച്ചിട്ടില്ലെന്നും സ്വതന്ത്രമായി വിലയിരുത്തിയിട്ടില്ലെന്നും എൻഎഒ കണ്ടെത്തി.
2022-ൽ ഉക്രൈൻ യുദ്ധത്തെ തുടർന്നുണ്ടായ വിതരണ തടസ്സങ്ങൾ കാരണം ചില ഭക്ഷ്യവസ്തുക്കൾക്ക് ക്ഷാമം നേരിട്ടതും സൂപ്പർമാർക്കറ്റുകളിൽ ഷെൽഫുകൾ ശൂന്യമായതും റിപ്പോർട്ട് ഓർമിപ്പിക്കുന്നു. ഭക്ഷ്യസുരക്ഷ ദേശീയ സുരക്ഷയുടെ ഭാഗമാണെന്ന് ചൂണ്ടിക്കാട്ടിയ എൻഎഒ, ഭാവിയിലെ പ്രതിസന്ധികളെ നേരിടാൻ കൂടുതൽ ശക്തമായ തയ്യാറെടുപ്പുകളും നിയമപരമായ സംവിധാനങ്ങളും അടിയന്തിരമായി രൂപപ്പെടുത്തണമെന്ന് ശുപാർശ ചെയ്തു.
Leave a Reply