പരമ്പരാഗത നൃത്തരൂപങ്ങളുടെ അതിർവരമ്പുകൾ ഭേദിച്ച്, പാശ്ചാത്യ താളത്തിന് കേരളീയ ഭാവുകത്വത്തിന്റെ പുതിയ ചുവടുകൾ സമ്മാനിച്ച് ഫ്ലോ ഫാക്ടറിയുടെ (Flow Factory) പുതിയ നൃത്താവിഷ്കാരം ‘ഗ്രൂവ്സ് ഓഫ് സൗത്ത്’ (Grooves of South) യുകെയിൽ ശ്രദ്ധേയമാകുന്നു. ആർട്സ് കൗൺസിൽ ഇംഗ്ലണ്ടിന്റെ (Arts Council England) ധനസഹായത്തോടെ സറേ കൗണ്ടി കൗൺസിലും ആർട്‌സ്‌വർക്കും സംയുക്തമായി നടപ്പിലാക്കുന്ന ‘എസ്കലേറ്റ് ആർട്സ്’ (Escalate Arts) പദ്ധതിയുടെ ഭാഗമായി കഴിഞ്ഞ ദിവസം നടന്ന സറേ ആർട്സ് യൂത്ത് ഫെസ്റ്റിവലാണ് (Surrey Arts Youth Festival) ഈ വേറിട്ട നൃത്തവിരുന്നിന് വേദിയൊരുക്കിയത്. യുവതലമുറയിലെ കലാകാരന്മാർക്ക് അന്താരാഷ്ട്ര നിലവാരമുള്ള വേദികളൊരുക്കുകയും അവരുടെ സർഗ്ഗാത്മക നേതൃത്വപാടവം വളർത്തിയെടുക്കുകയുമാണ് ഈ ഫെസ്റ്റിവലിന്റെ പ്രധാന ലക്ഷ്യങ്ങൾ. കേരളത്തിൽ നിന്നുള്ളവരും ഇപ്പോൾ യുകെയുടെ വിവിധ ഭാഗങ്ങളിൽ ജീവിക്കുന്നവരുമായ യുവകലാകാരന്മാരുടെ കൂട്ടായ്മയാണ് ഫ്ലോ ഫാക്ടറി.
വെറുമൊരു നൃത്താവതരണത്തിനപ്പുറം, ഭൂമിശാസ്ത്രപരമായ അകലങ്ങളെ കലയിലൂടെ മറികടക്കുന്ന ഒരു സാംസ്കാരിക ഒത്തുചേരലിനാണ് ഫെസ്റ്റിവൽ വേദി സാക്ഷ്യം വഹിച്ചത്. ഫ്ലോ ഫാക്ടറിയുടെ ആർട്ടിസ്റ്റിക് ഡയറക്ടർ അജിത് വി.എസിന്റെ നേതൃത്വത്തിൽ, മാത്യു ജോർജ്ജ് , സുമിത എ.എസ് എന്നിവർ നൃത്തസംവിധാനം നിർവഹിച്ച ഈ അവതരണത്തിന് ആൻവിൽ ജോജു, രാമു രാധാകൃഷ്ണ , ക്ലിഫോർഡ് ഡൊമിനിക് എന്നിവർ ആശയവും നിർമ്മാണ പിന്തുണയും നൽകി. പാശ്ചാത്യ സ്ട്രീറ്റ് ഡാൻസ് രൂപമായ ‘ഹിപ് ഹോപ്പ്’ (Hip Hop) കേരളത്തിന്റെ തനത് ശൈലികളുമായി ലയിച്ചുചേരുമ്പോൾ ഉണ്ടാകുന്ന ജൈവികമായ പരിണാമമാണ് ഇതിന്റെ ഇതിവൃത്തം.
ആദ്യം മുതൽ അവസാനം വരെ കാണികളെ ഒരേ താളത്തിൽ നിലനിർത്താൻ ഈ കലാകാരന്മാർക്ക് സാധിച്ചു. ഹിപ് ഹോപ്പിലെ ലോക്കിംഗ് (Locking), ബ്രേക്കിംഗ് (Breaking), ഹൗസ് (House) തുടങ്ങിയ കഠിനമായ ശൈലികൾക്കൊപ്പം ശരീരത്തിന്റെ സവിശേഷമായ ചലനങ്ങളിലൂടെയും ഹസ്തമുദ്രകൾക്ക് സമാനമായ കൈഭാവങ്ങളിലൂടെയും പൗരസ്ത്യ നൃത്ത പാരമ്പര്യത്തിന്റെ ആഴം കൂടി സമന്വയിപ്പിക്കാൻ ഇവർക്ക് കഴിഞ്ഞിട്ടുണ്ട്. ഇത് രണ്ട് സംസ്കാരങ്ങളുടെ വെറുമൊരു കൂട്ടിക്കലർത്തൽ (Fusion) അല്ല; മറിച്ച്, രണ്ട് വ്യത്യസ്ത ശൈലികളെ ഹൃദയപൂർവ്വം ഉൾക്കൊണ്ട് സ്വന്തമാക്കിയ നർത്തകരുടെ സ്വാഭാവികമായ ആത്മപ്രകാശനമാണ്. തുടക്കത്തിൽ നർത്തകർ ഒരൊറ്റ ശരീരം പോലെ ചുവടുവെച്ചപ്പോൾ വേദിയിൽ അനുഭവപ്പെട്ടത് അപൂർവ്വമായ ഒരു ഊർജ്ജമായിരുന്നു. കൃത്യമായ പരിശീലനവും പരസ്പര ധാരണയും ഓരോ ചലനത്തിലും വ്യക്തമായിരുന്നു. ഗ്രൂപ്പ് നൃത്തങ്ങൾക്കിടയിലും ഓരോ കലാകാരനും തങ്ങളുടെ വ്യക്തിഗത കഴിവുകളും വേറിട്ട ശൈലിയും പ്രകടിപ്പിക്കാൻ കൊറിയോഗ്രാഫിയിൽ ഇടം നൽകിയിട്ടുണ്ട്. കേവലം സാങ്കേതിക തികവിനേക്കാൾ, തങ്ങളുടെ സംസ്കാരത്തെയും നാടിനെയും അഭിമാനത്തോടെ അന്താരാഷ്ട്ര വേദിയിൽ അടയാളപ്പെടുത്തുക എന്ന ആത്മാർത്ഥമായ ലക്ഷ്യം ഈ അവതരണത്തിനുണ്ടായിരുന്നു.
ആർട്സ് കൗൺസിൽ ഇംഗ്ലണ്ടിന്റെ പിന്തുണയോടെ നടന്ന ഈ ഫെസ്റ്റിവലിൽ തങ്ങളുടെ അരങ്ങേറ്റം തികഞ്ഞ ആത്മവിശ്വാസത്തോടെയും ഗാംഭീര്യത്തോടെയും കുറിക്കാൻ ഫ്ലോ ഫാക്ടറിക്ക് കഴിഞ്ഞിരിക്കുന്നു. ഈ അവതരണം വരും നാളുകളിൽ അന്താരാഷ്ട്ര നൃത്തവേദികളിൽ വലിയ ചലനങ്ങൾ സൃഷ്ടിക്കാൻ പോകുന്ന ഒരു സംഘത്തിന്റെ മികച്ച തുടക്കമായി മാറിക്കഴിഞ്ഞു. കല ആരുടെയും കുത്തകയല്ലെന്നും, അത് ആഗോളമാണെന്നും സ്വന്തം ശരീര ഭാഷയിലൂടെ തെളിയിച്ച ഈ യുവ കലാകാരന്മാർ തീർച്ചയായും വലിയ കൈയടി അർഹിക്കുന്നു.
Leave a Reply