സിനിമാ ചിത്രീകരണത്തിനിടെ വീണു പരിക്ക് പറ്റിയത് പുതുമുഖനടി ലിന്‍ഡ കുമാറിന്. അപകടത്തിന്റെ വീഡിയോ സാമൂഹിക മാധ്യമങ്ങളില്‍ വൈറലായപ്പോള്‍ പരിക്കേറ്റത് കീര്‍ത്തി സുരേഷിനാണെന്നായിരുന്നു പ്രചരണങ്ങള്‍. തുടര്‍ന്ന് വാര്‍ത്തകള്‍ നിഷേധിച്ച് കീര്‍ത്തിയോടടുത്തുള്ള വൃത്തങ്ങള്‍ രംഗത്തെത്തുകയും ചെയ്തു.
സംവിധായകന്‍ സിദ്ദീഖ് ചേന്ദമംഗലൂരിന്റെ ഏറ്റവും പുതിയ ചിത്രമായ കുഞ്ഞിരാമന്റ കുപ്പായത്തിന്റെ ലൊക്കേഷനിലാണ് അപകടം സംഭവിച്ചത്. ഒരു ഗാനരംഗം ചിത്രീകരിക്കുന്നതിനിടെയാണ് സംഭവം. കോഴിക്കോട് പേരാമ്പ്രക്കടുത്തുള്ള ജാനകി കാടായിരുന്നു ലൊക്കേഷന്‍. നൃത്തം ചെയ്യുന്നതിനിടെ ലിന്‍ഡ കാല്‍ വഴുതി വീഴുകയായിരുന്നു.
നടി വീഴുന്ന ദൃശ്യങ്ങള്‍ പിന്നീട് സാമൂഹിക മാധ്യമങ്ങളില്‍ വ്യാപകമായി പ്രചരിക്കപ്പെട്ടു. വീഴ്ചയുടെ ആഘാതത്തില്‍ നടിയുടെ കയ്യിനും കാലിനും ചെറിയ പരിക്കുകളുണ്ടെന്ന് സംവിധായകന്‍ സിദ്ദീഖ് ചേന്ദമംഗല്ലൂര്‍ മാതൃഭൂമി ഡോട്ട്‌കോമിനോട് പറഞ്ഞു. സിനിമയുടെ ചിത്രീകരണം പുരോഗമിച്ചു കൊണ്ടിരിക്കുകയാണ്. പത്തു ദിവസങ്ങള്‍ക്ക് ശേഷം നടി ഷൂട്ടിങ്ങിനെത്തുമെന്നും സംവിധായകന്‍ വ്യക്തമാക്കി.
Leave a Reply