ന്യൂസ് ഡെസ്ക്, മലയാളം യുകെ
മികച്ചസേവനത്തിന് യുകെ മലയാളി നേഴ്സിന് അവാർഡ് ലഭിച്ചു. ബക്കിംഗ്ഹാംഷെയർ ഹെൽത്ത്കെയർ എൻഎച്ച്എസ് ട്രസ്റ്റിലെ ഹെമറ്റോളജിയിൽ അഡ്വാൻസ്ഡ് നേഴ്‌സ് പ്രാക്ടീഷണറായ ആശ മാത്യുവിനാണ് കേരളത്തിൽ നിന്ന് ഏഷ്യാനെറ്റ് ന്യൂസ് ഹെൽത്ത് കെയർ അവാർഡിന് അർഹയായത് . സാധാരണയായി ഈ ബഹുമതി കേരളത്തിൽ ജോലി ചെയ്യുന്ന നേഴ്സുമാർക്ക് ആണ് നൽകുന്നതെന്നും വിദേശത്തുള്ള ഒരു ആരോഗ്യ പ്രവർത്തകയെ അംഗീകരിക്കാൻ തീരുമാനിച്ചതിൽ സന്തോഷമുണ്ടെന്നും അവർ പറഞ്ഞു.
ആശ മാത്യു ട്രസ്റ്റിന്റെ സ്പെഷ്യലിസ്റ്റ് സീനിയർ നേഴ്സിംഗ് ടീമിന്റെയും ക്യാൻസർ കെയർ ആൻഡ് ഹെമറ്റോളജി ടീമിന്റെയും ഭാഗമാണ്. നിലവിൽ ട്രസ്റ്റിലെ കേരളത്തിൽ നിന്നുള്ള നേഴ്സിംഗ് സമൂഹത്തിന്റെ മെന്ററായി ആശ സേവനം അനുഷ്ടിക്കുന്നുണ്ട് . ബ്രെയിൻ ട്യൂമർ ബാധിച്ച് മരിച്ച മകൻ റയാന്റെ സ്മരണയ്ക്കായി 2014 മെയ് മാസത്തിൽ സ്ഥാപിതമായ റയാൻ നൈനാൻസ് ചിൽഡ്രൻസ് ചാരിറ്റിയിലൂടെ മാരകരോഗികളായ കുട്ടികൾക്കും അവരുടെ കുടുംബങ്ങൾക്കും അവർ പിന്തുണ നൽകുന്നുണ്ട് .
ആശ നമുക്കെല്ലാവർക്കും വലിയ പ്രചോദനത്തിന് കാരണമാണെന്ന് ബക്കിംഗ്ഹാംഷെയർ ഹെൽത്ത്കെയർ എൻഎച്ച്എസ് ട്രസ്റ്റിലെ ചീഫ് നേഴ്‌സായ ജെന്നി റിക്കറ്റ്സ് പറഞ്ഞു. രോഗികളുടെ പരിചരണത്തിനും ക്ഷേമത്തിനുമുള്ള അവരുടെ അചഞ്ചലമായ സമർപ്പണവും സഹ നേഴ്‌സുമാരെ പിന്തുണയ്ക്കുന്നതിനുള്ള അവരുടെ ആഴമായ പ്രതിബദ്ധതയും ശരിക്കും പ്രശംസനീയമാണ് എന്ന് ജെന്നി കൂട്ടിച്ചേർത്തു . ആതുര സേവന രംഗത്ത് മികവ് തെളിയിച്ചവർക്ക് ആദരവായാണ് ഏഷ്യാനെറ്റ് ന്യൂസ് ഈ അവാർഡ് ഏർപ്പെടുത്തിയിരിക്കുന്നത് . കേരളത്തിൽ നിലവിൽ ജോലി ചെയ്യുന്ന ഡോക്ടർമാർ, നേഴ്സുമാർ, പാരാമെഡിക്കൽ സ്റ്റാഫ്, സന്നദ്ധ പ്രവർത്തകർ, സിഎസ്ആർ പ്രവർത്തനം നടത്തുന്ന സ്ഥാപനം എന്നിവരിൽ നിന്ന് തെരഞ്ഞെടുക്കുന്നവർക്കാണ് ഏഷ്യാനെറ്റ് ന്യൂസ് ഹെൽത്ത് കെയർ അവാർഡ് സമ്മാനിക്കുക. ഇത് ആദ്യമായാണ് യുകെയിൽ നിന്ന് ഒരു മലയാളി നേഴ്‌സ് ഈ അവാർഡിന് അർഹയാകുന്നത് .
Leave a Reply