കൽപറ്റ ∙ റിപ്പോർട്ടർ ബ്രോഡ്കാസ്റ്റിങ് കമ്പനി എംഡി ആന്റോ അഗസ്റ്റിൻ പ്രതിയായ അബ്കാരി കേസിൽ ഭാര്യാമാതാവ് ലില്ലി ജോസിന്റെ മുൻകൂർ ജാമ്യാപേക്ഷ കൽപറ്റ ജില്ലാ സെഷൻസ് കോടതി തള്ളി. വയനാട് വാഴവറ്റയിലെ മുങ്ങനാനി വീട്ടിൽ അനധികൃതമായി സൂക്ഷിച്ച 67 ലീറ്റർ മദ്യം പിടികൂടിയ സംഭവവുമായി ബന്ധപ്പെട്ടാണ് ലില്ലി ജോസ് മുൻകൂർ ജാമ്യാപേക്ഷ നൽകിയത്.

കേസിൽ നിലവിൽ ലില്ലി ജോസ് പ്രതിയല്ലാത്തതിനാലാണ് കോടതി മുൻകൂർ ജാമ്യാപേക്ഷ തള്ളിയത്. ഭാവിയിൽ അന്വേഷണത്തിന്റെ ഭാഗമായി ഇവരെ പ്രതിപ്പട്ടികയിൽ ഉൾപ്പെടുത്തുകയാണെങ്കിൽ, നോട്ടിസ് നൽകിയ ശേഷമേ അറസ്റ്റ് നടപടികളിലേക്ക് കടക്കാവൂ എന്ന ലില്ലി ജോസിന്റെ അഭിഭാഷകന്റെ ആവശ്യം കോടതി അംഗീകരിച്ചു.

വീട് തന്റെ പേരിലല്ലെന്നും ലില്ലി ജോസിന്റെ പേരിലാണെന്നും ആന്റോ അഗസ്റ്റിൻ വിചാരണ കോടതിയിലും ഹൈക്കോടതിയിലും നേരത്തെ വാദിച്ചിരുന്നു. ജപ്തിയിലായ വീട് ലില്ലി ജോസ് വാങ്ങിയതാണെന്നും ആന്റോ വാദിച്ചിരുന്നു. അന്വേഷണത്തിന്റെ ഭാഗമായി ലില്ലി ജോസിന്റെ മൊഴിയെടുക്കാൻ എക്സൈസ് സംഘം പലതവണ വീട്ടിലെത്തിയെങ്കിലും ഇവരെ കണ്ടെത്താനായിരുന്നില്ല. തുടർന്നാണ് ലില്ലി ജോസ് മുൻകൂർ ജാമ്യം തേടി കൽപറ്റ ജില്ലാ സെഷൻസ് കോടതിയെ സമീപിച്ചത്.

കോഴിക്കോട് ∙ മദ്യപിച്ച് വാഹനമോടിച്ച് അപകടമുണ്ടാക്കിയ കേസിൽ യൂട്യൂബർ അശ്വന്ത് കോക്ക് ഹാജരാക്കിയ ഡ്രൈവിങ് ലൈസൻസ് കാലാവധി കഴിഞ്ഞതാണെന്ന് കണ്ടെത്തി. സംഭവദിവസം ലൈസൻസ് കൈവശമില്ലെന്നായിരുന്നു അശ്വന്ത് നൽകിയ മൊഴി. തുടർന്ന് ഹാജരാക്കിയ ലൈസൻസ് പരിശോധിച്ചപ്പോഴാണ് 2025 ഫെബ്രുവരിയിൽ തന്നെ കാലാവധി അവസാനിച്ചതായി കണ്ടെത്തിയത്. ലൈസൻസില്ലാതെ വാഹനമോടിച്ചതിനും അശ്വന്തിനെതിരെ കേസെടുക്കും.

അശ്വന്തിന് അഞ്ച് വർഷത്തേക്ക് ഡ്രൈവിങ് ലൈസൻസ് പുതുക്കിനൽകില്ലെന്ന് മോട്ടോർ വാഹന വകുപ്പ് അറിയിച്ചു. കഴിഞ്ഞ ദിവസമാണ് കോഴിക്കോട് നടക്കാവിൽ അശ്വന്ത് ഓടിച്ച വാഹനം കാറിലും ബൈക്കിലും ഇടിച്ച് അപകടമുണ്ടാക്കിയത്. അപകടത്തെ തുടർന്ന് ഓടിക്കൂടിയ നാട്ടുകാരോട് അശ്വന്ത് തട്ടിക്കയറുന്ന ദൃശ്യങ്ങളും പുറത്തുവന്നിരുന്നു.

മദ്യലഹരിയിലായിരുന്ന അശ്വന്തിനെ പൊലീസ് കസ്റ്റഡിയിലെടുത്ത ശേഷം പിന്നീട് ജാമ്യത്തിൽ വിട്ടിരുന്നു. അശ്വന്ത് ഓടിച്ച വാഹനത്തിൽനിന്ന് മദ്യവും എയർഗണ്ണും കണ്ടെത്തിയിരുന്നു. സംഭവത്തിൽ വാഹനമോടിച്ചത് ഉൾപ്പെടെയുള്ള നിയമലംഘനങ്ങളിൽ കൂടുതൽ നടപടികൾ സ്വീകരിക്കുമെന്ന് അധികൃതർ വ്യക്തമാക്കി.

കൊച്ചി ∙ സാമ്പത്തിക തട്ടിപ്പും കള്ളപ്പണം വെളുപ്പിക്കലും സംബന്ധിച്ച അന്വേഷണത്തിന്റെ ഭാഗമായി സംസ്ഥാനത്തെ മൂന്നു സഹകരണ ബാങ്കുകളിലും വിവിധ സ്ഥലങ്ങളിലും എൻഫോഴ്സ്മെന്റ് ഡയറക്ടറേറ്റ് (ഇഡി) പരിശോധന നടത്തി. എറണാകുളം അങ്കമാലി അർബൻ സർവീസ് സഹകരണ ബാങ്ക്, മലപ്പുറം തെന്നല സർവീസ് സഹകരണ ബാങ്ക്, തൃശൂർ കുട്ടനെല്ലൂർ സർവീസ് സഹകരണ ബാങ്ക് എന്നിവയുമായി ബന്ധപ്പെട്ടാണ് ബുധനാഴ്ച പരിശോധന നടന്നത്.

അങ്കമാലി അർബൻ സർവീസ് സഹകരണ ബാങ്കിലെ ക്രമക്കേടുകളുമായി ബന്ധപ്പെട്ട് കൊച്ചിയിലെ ഇഡി സോണൽ ഓഫിസിലെ മൂന്ന് സംഘങ്ങളാണ് പരിശോധന നടത്തിയത്. വ്യാജ അപേക്ഷകളും ആവശ്യമായ രേഖകളില്ലാത്ത അപേക്ഷകളും ഉപയോഗിച്ച്, അംഗങ്ങളല്ലാത്തവരുടെ പേരിലും വായ്പ അനുവദിച്ചതായാണ് ആരോപണം. 2002 ജൂലൈ 7 മുതൽ നടന്നതായി പറയുന്ന തട്ടിപ്പിലൂടെ ഏകദേശം 55 കോടി രൂപയുടെ നഷ്ടമുണ്ടായെന്നാണ് കേസ്. മുൻകാലത്തെയും നിലവിലെയും 14 ഭരണസമിതി അംഗങ്ങൾക്കും ആറ് ജീവനക്കാർക്കുമെതിരെ കേരള പൊലീസ് കേസെടുത്തിട്ടുണ്ട്.

തെന്നല സർവീസ് സഹകരണ ബാങ്കിലെ ഏകദേശം 10 കോടി രൂപയുടെ തട്ടിപ്പുമായി ബന്ധപ്പെട്ട് കോഴിക്കോട്, മലപ്പുറം ജില്ലകളിലെ ഏഴ് സ്ഥലങ്ങളിലും ഇഡി പരിശോധന നടത്തി. വായ്പ അനുവദിച്ചതിലെ ക്രമക്കേടുകളും ഫണ്ട് തിരിമറിയുമാണ് ഇവിടെ അന്വേഷിക്കുന്നത്. കുട്ടനെല്ലൂർ സർവീസ് സഹകരണ ബാങ്കിലെ ഏകദേശം 27 കോടി രൂപയുടെ തട്ടിപ്പുമായി ബന്ധപ്പെട്ട് ആറ് സ്ഥലങ്ങളിലും പരിശോധന നടന്നു. ഉടമകളുടെയും നിക്ഷേപകരുടെയും അനുമതിയില്ലാതെ പണയപ്പെടുത്തിയ സ്വത്തുക്കൾ കൈമാറ്റം ചെയ്തതിലൂടെ ബാങ്ക് ഭാരവാഹികൾ തട്ടിപ്പ് നടത്തിയെന്നാണ് കേസ്.

കളമശ്ശേരി: യുവതിയെ ഇടപ്പള്ളിയിലെ ലോഡ്ജിലെത്തിച്ച് ബലാത്സംഗം ചെയ്ത കേസിൽ ഒളിവിലായിരുന്ന രണ്ടുപേരെ കൂടി കളമശ്ശേരി പൊലീസ് പിടികൂടി. വയനാട് സ്വദേശിനിയായ യുവതിയും സഞ്ജു എന്ന യുവാവുമാണ് പിടിയിലായത്. കേസിൽ നേരത്തെ സ്പാ ഉടമയായ ശ്രീരാജിനെയും ജിത്ത് മാർട്ടിനെയും പൊലീസ് അറസ്റ്റ് ചെയ്തിരുന്നു.

സ്പായിൽ ജോലി നൽകാമെന്ന് പറഞ്ഞ് അഭിമുഖത്തിനായി വിളിച്ച യുവതിക്ക് ലോഡ്ജിൽവച്ച് ബലമായി മദ്യവും മയക്കുമരുന്നും നൽകിയശേഷം ശ്രീരാജും ജിത്ത് മാർട്ടിനും ലൈംഗിക അതിക്രമത്തിനിരയാക്കിയെന്നാണ് പൊലീസ് പറയുന്നത്. പിറ്റേന്ന് രാവിലെ വയനാട് സ്വദേശിനിയും യുവതിയെ ലൈംഗികമായി അതിക്രമിച്ചെന്നും സഞ്ജു ഇവർക്ക് സഹായം നൽകിയെന്നുമാണ് അന്വേഷണത്തിലെ കണ്ടെത്തൽ. ഒക്ടോബർ മൂന്നിന് വൈകിട്ട് ലോഡ്ജിൽനിന്ന് രക്ഷപ്പെട്ട് വീട്ടിലെത്തിയ യുവതി ഭർത്താവിനോട് വിവരം പറഞ്ഞതിനെ തുടർന്ന് പൊലീസിൽ പരാതി നൽകുകയായിരുന്നു. യുവതി ചികിത്സയിലാണ്.

അതിജീവിതയ്ക്ക് ആവശ്യമായ എല്ലാ സഹായവും ഉറപ്പാക്കുമെന്ന് മന്ത്രി വി.ഇ. അബ്ദുൽ ഗഫൂർ അറിയിച്ചു. യുവതിയുടെ ഭർത്താവുമായി ഫോണിൽ സംസാരിച്ച മന്ത്രി നിലവിലെ സ്ഥിതിഗതികൾ അന്വേഷിച്ചു. ആവശ്യമായ ചികിത്സ, നിയമസഹായം ഉൾപ്പെടെയുള്ള സർക്കാർ പിന്തുണ ഉറപ്പാക്കുമെന്നും മന്ത്രി വ്യക്തമാക്കി.

കൊച്ചി ∙ ജോലി തേടിയെത്തിയ യുവതിയെ ലഹരി കലർത്തിയ ഐസ്ക്രീം നൽകി ബോധരഹിതയാക്കിയ ശേഷം കൂട്ടബലാത്സംഗം ചെയ്തതായി പരാതി. കളമശേരിയിലെ സ്പായുമായി ബന്ധപ്പെട്ട കേസിൽ യുവതിയെ കൂടുതൽ ഉപദ്രവിച്ചത് സംഘത്തിലുണ്ടായിരുന്ന സ്ത്രീയായ അമ്മുവാണെന്ന് ഭർത്താവ് പറഞ്ഞു. സംഭവത്തിൽ സ്പാ നടത്തിപ്പുകാരൻ ശ്രീരാജ്, ജിത്ത് മാർട്ടിൻ എന്നിവർ അറസ്റ്റിലായി. വയനാട് സ്വദേശിനിയായ അമ്മുവും സഞ്ജുവുമാണ് ഇനി പിടിയിലാകാനുള്ളത്.

ഒഎൽഎക്സിൽ കണ്ട സ്പായിലെ മാനേജർ ജോലി ഒഴിവിന്റെ അടിസ്ഥാനത്തിലാണ് യുവതി അഭിമുഖത്തിനായി എത്തിയത്. അവിടെ ബിയറും ഐസ്ക്രീമും നൽകിയെന്നും ഐസ്ക്രീമിൽ ലഹരി കലർത്തി ബോധം കെടുത്തിയ ശേഷമാണ് പീഡിപ്പിച്ചതെന്നും യുവതിയുടെ മൊഴിയിൽ പറയുന്നു. രക്ഷപ്പെടാൻ ശ്രമിച്ചപ്പോൾ സംഘം തടയുകയും ദൃശ്യങ്ങൾ പകർത്തിയിട്ടുണ്ടെന്നും പുറത്തുപറഞ്ഞാൽ കൊലപ്പെടുത്തുമെന്നും ഭീഷണിപ്പെടുത്തിയതായും പരാതിയുണ്ട്.

ബിയർ കുപ്പി പൊട്ടിച്ച് സ്വയം കുത്തി ആത്മഹത്യ ചെയ്യുമെന്ന് ഭീഷണിപ്പെടുത്തിയതോടെയാണ് യുവതിയെ സംഘം വിട്ടയച്ചതെന്നാണ് വിവരം. വീട്ടിലെത്തിയ യുവതിയെ ഗുരുതര പരുക്കുകളോടെയാണ് ഭർത്താവ് കണ്ടെത്തിയത്. നിലവിൽ കളമശേരി മെഡിക്കൽ കോളജ് ആശുപത്രിയിൽ ചികിത്സയിലാണ്. യുവതിയുടെ പ്രാഥമിക മൊഴി മാത്രമാണ് പൊലീസ് രേഖപ്പെടുത്തിയിട്ടുള്ളത്. ആരോഗ്യനില മെച്ചപ്പെട്ടാൽ കൂടുതൽ വിവരങ്ങൾ ശേഖരിക്കുമെന്നും ഒളിവിലുള്ള പ്രതികളെ ഉടൻ പിടികൂടുമെന്നും പൊലീസ് അറിയിച്ചു.

തിരുവനന്തപുരം ∙ 14കാരിയെ പലതവണ ലൈംഗിക പീഡനത്തിനിരയാക്കിയ കേസിൽ 67കാരനായ വല്യച്ഛന് 10 വർഷം കഠിനതടവും ഒരു ലക്ഷം രൂപ പിഴയും ശിക്ഷ. തിരുവനന്തപുരം അതിവേഗ പ്രത്യേക കോടതിയാണ് ശിക്ഷ വിധിച്ചത്. പിഴ അടച്ചില്ലെങ്കിൽ രണ്ട് വർഷം അധികം തടവ് അനുഭവിക്കണം. 2024 ജൂൺ 12നാണ് കേസിനാസ്പദമായ സംഭവം.

അതിജീവിതയുടെ അമ്മയുടെ സഹോദരിയുടെ ഭർത്താവാണ് പ്രതി. ഭാര്യാപിതാവിന് ഭക്ഷണവും മരുന്നും നൽകാനായി വീട്ടിലെത്തിയ പ്രതി സ്കൂളിൽ പോകാൻ ഹാളിൽ നിൽക്കുകയായിരുന്ന പെൺകുട്ടിയെ ലൈംഗികമായി പീഡിപ്പിക്കുകയായിരുന്നു. ഭയന്ന പെൺകുട്ടി വിവരം കൂട്ടുകാരിയോട് പറയുകയും തുടർന്ന് അമ്മയെയും അധ്യാപകരെയും അറിയിക്കുകയുമായിരുന്നു. നേരത്തെയും പലതവണ പീഡിപ്പിച്ചിരുന്നെങ്കിലും കുടുംബത്തിൽ പ്രശ്നമുണ്ടാകുമെന്ന് ഭയന്ന് കുട്ടി വിവരം പുറത്തുപറഞ്ഞിരുന്നില്ലെന്ന് മൊഴിയിൽ പറയുന്നു.

കുട്ടിയുടെ മൊഴിയുടെ അടിസ്ഥാനത്തിൽ ചൈൽഡ് വെൽഫെയർ കമ്മിറ്റിയെയും പൊലീസിനെയും വിവരം അറിയിച്ചു. കരമന പൊലീസ് നടത്തിയ അന്വേഷണത്തിൽ 18 സാക്ഷികളെ വിസ്തരിക്കുകയും 26 രേഖകളും ഒരു തൊണ്ടിമുതലും കോടതിയിൽ ഹാജരാക്കുകയും ചെയ്തു. പ്രോസിക്യൂഷനുവേണ്ടി സ്പെഷ്യൽ പബ്ലിക് പ്രോസിക്യൂട്ടർമാരായ അഡ്വ. ആർ.എസ്. വിജയ് മോഹനും അഡ്വ. സുരഭി പി.യും ഹാജരായി. പിഴത്തുക കുട്ടിക്ക് നൽകാനും സർക്കാർ കുട്ടിക്ക് നഷ്ടപരിഹാരം നൽകാനും കോടതി ഉത്തരവിട്ടു.

തിരുവനന്തപുരം∙ യൂണിവേഴ്സിറ്റി ഹോസ്റ്റൽ സംഘർഷത്തിന് പിന്നാലെ വിവാദത്തിലായ കന്റോൺമെന്റ് സിഐ സതീഷ് കുമാറിനും എസ്ഐ ജി. ഗോകുലിനും കാരണം കാണിക്കൽ നോട്ടീസ്. പൊലീസ് ചട്ടങ്ങൾക്ക് വിരുദ്ധമായി പ്രവർത്തിച്ചെന്ന പ്രാഥമിക അന്വേഷണ റിപ്പോർട്ടിന്റെ അടിസ്ഥാനത്തിലാണ് തിരുവനന്തപുരം സിറ്റി പൊലീസ് കമ്മീഷണർ നോട്ടീസ് നൽകിയത്. നാല് ദിവസത്തിനകം വിശദീകരണം നൽകണമെന്നാണ് നിർദേശം. ഹോസ്റ്റൽ സംഘർഷത്തിനു പിന്നാലെ ഇരുവരുടെയും ഭാഗത്തുനിന്നുണ്ടായ പ്രകോപനപരമായ നടപടികളാണ് അന്വേഷണവിധേയമായത്.

എസ്എഫ്ഐ ജില്ലാ സെക്രട്ടറി നന്ദനെ എസ്ഐ ഗോകുൽ ഫോണിൽ വിളിച്ച് ഭീഷണിപ്പെടുത്തിയെന്ന ആരോപണവുമായി ബന്ധപ്പെട്ട ശബ്ദസന്ദേശം പുറത്തു വന്നിരുന്നു. അതേസമയം, എസ്എഫ്ഐ പ്രവർത്തകരെ വെല്ലുവിളിക്കുന്ന തരത്തിൽ സിഐ സതീഷ് കുമാർ ഫെയ്സ്ബുക്കിൽ പോസ്റ്റിട്ടതും വിവാദമായിരുന്നു. പൊലീസ് ഉദ്യോഗസ്ഥരുടെ പെരുമാറ്റച്ചട്ടത്തിനും സേനയുടെ അച്ചടക്കത്തിനും വിരുദ്ധമായ നടപടികളാണ് ഇരുവരുടെയും ഭാഗത്തുനിന്നുണ്ടായതെന്നാണ് സ്പെഷ്യൽ ബ്രാഞ്ചിന്റെ പ്രാഥമിക അന്വേഷണത്തിലെ കണ്ടെത്തൽ. വിശദീകരണം ലഭിച്ച ശേഷമായിരിക്കും തുടർനടപടിയിൽ അന്തിമ തീരുമാനം.

അതിനിടെ, വിവാദങ്ങൾക്കിടെ അവധിയിൽ പോയ കന്റോൺമെന്റ് എസ്എച്ച്ഒ സതീഷ് കുമാറിനെ ആഭ്യന്തരവകുപ്പ് തിരികെ വിളിപ്പിച്ചു. എസ്എഫ്ഐയും സിപിഎമ്മും ഇരുവരെയും പത്തുദിവസത്തിനകം സ്ഥലം മാറ്റണമെന്ന ആവശ്യം ഉന്നയിച്ചിരിക്കെയാണ് നടപടി. എസ്ഐ ഗോകുൽ നിലവിൽ പരിശീലനത്തിലാണ്. ഉദ്യോഗസ്ഥർക്കെതിരെ ഉടൻ കടുത്ത നടപടി സ്വീകരിച്ചാൽ സേനയ്ക്കുള്ളിൽ അമർഷമുണ്ടാകുമെന്ന വിലയിരുത്തലിലാണ് ആഭ്യന്തരവകുപ്പ്. അതേസമയം, ഇരുവരെയും ഉടൻ മാറ്റില്ലെന്ന നിലപാടാണ് നിലവിൽ സർക്കാരിനുള്ളത്.

കോട്ടയം ∙ എയ്ഡഡ് സ്കൂളുകളിലെ അധ്യാപക നിയമനവുമായി ബന്ധപ്പെട്ട വിവാദം ശക്തമായ സാഹചര്യത്തിൽ വിദ്യാഭ്യാസ മന്ത്രി എൻ. ഷംസുദ്ദീൻ ചങ്ങനാശേരി അതിരൂപത ആർച്ച് ബിഷപ്പ് മാർ തോമസ് തറയിലുമായി കൂടിക്കാഴ്ച നടത്തി. ന്യൂനപക്ഷ വിദ്യാഭ്യാസ മാനേജ്മെന്റുകൾ ഉയർത്തിയ ആശങ്കകൾ പരിഹരിക്കുന്നതിനും തർക്ക വിഷയങ്ങളിൽ സമവായം കണ്ടെത്തുന്നതിനുമാണ് കൂടിക്കാഴ്ച.

ഭിന്നശേഷിക്കാർക്കുള്ള സംവരണ ഒഴിവുകൾ ഉൾപ്പെടെ എയ്ഡഡ് സ്കൂളുകളിലെ അധ്യാപക നിയമനവുമായി ബന്ധപ്പെട്ട് പൊതുവിദ്യാഭ്യാസ ഡയറക്ടർ അഡ്വക്കേറ്റ് ജനറലിന് നൽകിയ നിർദേശങ്ങളാണ് വിവാദത്തിന് വഴിവെച്ചത്. മാനേജ്മെന്റുകളുടെ നിയമനാധികാരത്തെ ബാധിക്കുമെന്ന ആശങ്ക സഭാ നേതൃത്വവും മറ്റു ന്യൂനപക്ഷ വിദ്യാഭ്യാസ ഏജൻസികളും ഉയർത്തിയിരുന്നു.

അരമണിക്കൂറിലേറെ നീണ്ട കൂടിക്കാഴ്ചയിൽ വിഷയവുമായി ബന്ധപ്പെട്ട ആശങ്കകൾ വിശദമായി ചർച്ച ചെയ്തതായി സൂചന. സർക്കാർ– സഭാ ചർച്ചകൾ തുടരുമെന്നും നിയമന വിഷയത്തിൽ എല്ലാവർക്കും സ്വീകാര്യമായ പരിഹാരം കണ്ടെത്താനുള്ള ശ്രമങ്ങൾ ശക്തമാക്കുമെന്നും ബന്ധപ്പെട്ട വൃത്തങ്ങൾ അറിയിച്ചു.

തിരുവനന്തപുരം ∙ ഡിജിറ്റൽ തെളിവുകൾ ഉൾപ്പെടുന്ന ഗുരുതര പരാതിയെ തുടർന്ന് പാലക്കാട് ജില്ലാ സെക്രട്ടറി ഇ.എൻ. സുരേഷ് ബാബുവിനെ സ്ഥാനത്തുനിന്ന് മാറ്റിയതായി റിപ്പോർട്ട്. വനിതാ അഭിഭാഷക നൽകിയ പരാതിയിൽ സിപിഎം നേതാക്കൾ പ്രാഥമിക അന്വേഷണം നടത്തിയതിനു പിന്നാലെയാണ് നടപടി. വ്യക്തിപരമായ കാരണങ്ങളാണ് നേതൃമാറ്റത്തിന് പിന്നിലെന്നാണ് സംസ്ഥാന സെക്രട്ടറി എം.വി. ഗോവിന്ദൻ വിശദീകരിച്ചതെങ്കിലും, പരാതിയിൽ കഴമ്പുണ്ടെന്ന് നേതൃത്വത്തിന് ബോധ്യപ്പെട്ടതായാണ് വിവരം.

സുരേഷ് ബാബുവിനെ മാറ്റുന്നതിൽ പിണറായി വിജയനും എം.ബി. രാജേഷും നിർണായക പങ്കുവഹിച്ചതായാണ് റിപ്പോർട്ട്. പാലക്കാട് പാർട്ടിയിലെ വിഭാഗീയത പരിഹരിക്കുന്നതിലും സുരേഷ് ബാബുവിന് വീഴ്ച സംഭവിച്ചതായി നേതൃത്വം വിലയിരുത്തുന്നു. അതേസമയം, വനിതാ അഭിഭാഷകയുടെ പരാതിയിൽ തുടർ അച്ചടക്കനടപടികൾ ഉണ്ടായേക്കുമെന്നും, മറ്റൊരു നേതാവിനെതിരായ പരാതിയിലും നടപടിക്ക് സാധ്യതയുണ്ടെന്നും റിപ്പോർട്ടിൽ പറയുന്നു.

സുരേഷ് ബാബുവിന്റെ മാറ്റത്തോടെ പാലക്കാട്ടെ സിപിഎമ്മിലെ അധികാരസമവാക്യങ്ങളിലും മാറ്റം പ്രകടമാകുകയാണ്. സുരേഷ് ബാബു–സി.കെ. രാജേന്ദ്രൻ അച്ചുതണ്ടിന് പകരം എം.ബി. രാജേഷ്, വി. ചെന്താമരാക്ഷൻ, എൻ.എൻ. കൃഷ്ണദാസ് എന്നിവരടങ്ങുന്ന പുതിയ നേതൃനിര ശക്തിപ്പെടുന്നതായാണ് പാർട്ടിക്കുള്ളിലെ വിലയിരുത്തൽ. പുതിയ ജില്ലാ സെക്രട്ടറിയായി മുൻ എസ്.എഫ്.ഐ.–ഡി.വൈ.എഫ്.ഐ നേതാവ് വി. ചെന്താമരാക്ഷൻ എത്തിയതും ഈ മാറ്റത്തിന്റെ സൂചനയായാണ് കാണുന്നത്.

തിരുവനന്തപുരം: അമ്പതാമത് വയലാർ അവാർഡിന് എഴുത്തുകാരി ആർ. രാജശ്രീ അർഹയായി. രാജശ്രീയുടെ ആത്രേവിയകം എന്ന നോവലാണ് പുരസ്‌കാരത്തിനായി തിരഞ്ഞെടുക്കപ്പെട്ടത്. ഒരു ലക്ഷം രൂപയും ശിൽപി കാനായി കുഞ്ഞിരാമൻ രൂപകൽപന ചെയ്ത വെങ്കലശിൽപവും പ്രശസ്തിപത്രവും ഉൾപ്പെടുന്നതാണ് പുരസ്‌കാരം. മലയാള സാഹിത്യരംഗത്തെ ശ്രദ്ധേയ ബഹുമതികളിലൊന്നായ വയലാർ അവാർഡിന്റെ 50-ാം പതിപ്പിലാണ് ആത്രേയകം തിരഞ്ഞെടുക്കപ്പെട്ടത്.

1977 ജൂലൈ 22ന് കണ്ണൂർ ജില്ലയിലെ പറശ്ശിനിക്കടവിൽ ജനിച്ച രാജശ്രീ, പി.എൻ. രാജപ്പൻ മാസ്റ്ററുടെയും ആർ. രാജമ്മയുടെയും മകളാണ്. വിവിധ ആനുകാലികങ്ങളിൽ കഥകളും ലേഖനങ്ങളും പ്രസിദ്ധീകരിച്ചിട്ടുണ്ട്. നായികാനിർമിതി: വഴിയും പൊരുളും, അപസർപ്പകാഖ്യാനങ്ങൾ: ഭാവനയും രാഷ്ട്രീയവും എന്നിവയാണ് മറ്റ് പ്രധാന കൃതികൾ. കല്യാണിയെന്നും ദാക്ഷായണിയെന്നും പേരായ രണ്ടു സ്ത്രീകളുടെ കഥ എന്ന കൃതിക്ക് 2021ലെ കേരള സാഹിത്യ അക്കാദമി അവാർഡ് ലഭിച്ചിരുന്നു. കമലാലക്ഷണം എന്ന നോവൽ നിലവിൽ ഒരു ആഴ്ചപ്പതിപ്പിൽ പ്രസിദ്ധീകരിച്ചുവരികയാണ്.

തലശ്ശേരി ഗവ. ബ്രണ്ണൻ കോളേജിലെ മലയാള വിഭാഗം ഗവേഷണകേന്ദ്രത്തിൽ അധ്യാപികയായ രാജശ്രീ സാഹിത്യരചനയ്‌ക്കൊപ്പം അധ്യാപനരംഗത്തും സജീവമാണ്. നന്ദ ശ്രീപാർവതിയും നിരഞ്ജൻ ശ്രീപതിയുമാണ് മക്കൾ. ഒ.വി. ഉഷ, സുഭാഷ് ചന്ദ്രൻ, വി. വിജയകുമാർ എന്നിവർ അംഗങ്ങളായ സമിതിയാണ് പുരസ്‌കാരജേതാവിനെ തിരഞ്ഞെടുത്തത്. വയലാർ രാമവർമയുടെ ചരമദിനമായ ഒക്ടോബർ 27ന് വൈകിട്ട് 5.30ന് തിരുവനന്തപുരത്തെ നിശാഗന്ധി ഓഡിറ്റോറിയത്തിൽ പുരസ്‌കാര സമർപ്പണം നടക്കും.