ട്രെയിനില് യാത്ര ചെയ്തിരുന്ന മകളെ കാണാനില്ലെന്നും വിവരം ലഭിക്കുന്നവര് അറിയിക്കണമെന്നും അഭ്യര്ത്ഥിച്ച് പിതാവിന്റെ ഫേസ്ബുക്ക് കുറിപ്പ്.ശിവാജി എന്നയാളാണ് ഷൊര്ണൂര് വഴി മംഗലാപുരം പോകുന്ന ട്രെയിനില് യാത്ര ചെയ്തിരുന്ന മകളെ കാണാതായതായും സഹായിക്കണമെന്നും അഭ്യർത്ഥിച്ച് ഫേസ്ബുക്കിൽ കുറിപ്പ് പങ്കുവെച്ചിരിക്കുന്നത്.
പതിനേഴുകാരിയായ വിഷ്ണുപ്രിയയെയാണ് കാണാതായത്.
ഷൊര്ണൂര് വഴി മംഗലാപുരം പോകുന്ന ട്രെയിനില് യാത്ര ചെയ്തിരുന്ന പെണ്കുട്ടി ആറ് മണിക്ക് കോഴിക്കോട് എത്തേണ്ടതായിരുന്നു. നീല ചുരിദാറാണ് പെണ്കുട്ടി ധരിച്ചിരിക്കുന്നത്. വിഷ്ണുപ്രിയയെക്കുറിച്ച് എന്തെങ്കിലും വിവരം ലഭിക്കുന്നവര് ബന്ധപ്പെടണമെന്നും അതിനായി നമ്പറും പോസ്റ്റില് കൊടുത്തിട്ടുണ്ട്.
ശിവാജിയുടെ ഫേസ്ബുക്ക് പോസ്റ്റ്
എന്റെ മകൾ വിഷ്ണുപ്രിയ 17വയസ്സ് ;ഷൊർണുർ വഴി മംഗലാപുരം പോകുന്ന ട്രെയിനിൽ ഉണ്ടായിരുന്നു 6മണിക്ക് കോഴിക്കോട് എത്തേണ്ട ട്രെയിൻ ആണ് അവൾ വീട്ടിൽ എത്തിയിട്ടില്ല സ്റ്റേഷനിൽ പരാതി പെട്ടിട്ടുണ്ട് നീല ചുരിദാർ ആണ് ധരിചിരിക്കുന്നത്… വിവരം കിട്ടുന്നവർ അറിയിക്കുക phn: sivaji 9605964319..sahre ചെയ്യുക
സ്വർണക്കടത്തുകേസിലെ പ്രതികളായ വിഷ്ണുവിനും പ്രകാശ് തമ്പിക്കും ബാലഭാസ്ക്കറുമായി അടുപ്പമുണ്ടായിരുന്നതായി പിതാവ് കെ.സി.ഉണ്ണി പറഞ്ഞു. മകന്റെ മരണത്തിന് പിന്നിലും ഇവർക്ക് പങ്കുള്ളതായി സംശയിക്കുന്നതായും അദ്ദേഹം അറിയിച്ചു. ഇവരുടെ പ്രവര്ത്തനങ്ങളില് ദുരൂഹതയുണ്ട്. ഒരു ക്രിമിനല് സംഘത്തിന്റെ രൂപത്തിലാണ് ഇവരുടെ പ്രവര്ത്തനം. പാലക്കാട്ടെ ഡോക്ടറുമായി ബാലഭാസ്കര് നടത്തിയ സാമ്പത്തിക ഇടപാടുകളെക്കുറിച്ചു സംശയമുണ്ടെന്നും ഉണ്ണി പറഞ്ഞു.
ഇപ്പോൾ താമസിക്കുന്ന റോഡിൽ നിന്നും ഉള്ളിലേക്കുള്ള വീടിന് പകരം മറ്റൊന്ന് വാങ്ങണമെന്ന് ആഗ്രഹിച്ചിരുന്നു. എന്നാൽ റോഡരികിലെ വീട് വാങ്ങാൻ പണം തടസമായിരുന്നു. ബാലുവിനോട് സംസാരിച്ചപ്പോൾ പണത്തിനു വിഷമിക്കേണ്ടെന്നും പണം അവന് തരാമെന്നും പറഞ്ഞു. തന്റെ അക്കൗണ്ടില് പണമുണ്ടെന്നും പാലക്കാട്ടെ ഡോക്ടര്ക്ക് നല്ലൊരു തുക കൊടുത്തിട്ടുള്ളതായും ബാലു പറഞ്ഞു. തുക എത്രയെന്നു ബാലു പറഞ്ഞില്ല. ഞാന് ചോദിച്ചതുമില്ല. ബാലഭാസ്കര് കുറേ പണം പാലക്കാട് നിക്ഷേപിച്ചതായി പാലക്കാട്ടെ ആയുര്വേദ ഡോക്ടറുടെ കോണ്ട്രാക്റ്റര് ബാലുവിന്റെ മരണശേഷം തന്നോടു പറഞ്ഞിരുന്നു. കോണ്ട്രാക്റ്റര്ക്ക് കൊടുക്കാനുള്ള പണം നല്കാത്തതിനാല് അയാള് ഡോക്ടര്ക്കെതിരെ ചെറുപ്പളശേരി പൊലീസിനു പരാതി നല്കിയിരുന്നു. പണം നല്കാമെന്നു പറഞ്ഞ് ഡോക്ടര് പറ്റിക്കുകയായിരുന്നെന്നാണ് കോണ്ട്രാക്റ്റര് പറഞ്ഞത്.
കോളജില് പഠിക്കുന്ന കാലം മുതല് വിഷ്ണു ബാലഭാസ്കറിന്റെ കൂടെയുണ്ട്. പ്രകാശ് തമ്പി കൂട്ടുകാരനായിട്ട് 6-7 വര്ഷമാകുന്നതേയുള്ളൂ. നഗരത്തിലെ ഒരു സ്വകാര്യ ആശുപത്രിയില് ഇയാള് കന്റീന് നടത്തിയിരുന്നു. അവിടെവച്ചാണ് ബാലഭാസ്കറുമായി പരിചയത്തിലാകുന്നത്. ബാലുവിനെ ജിമ്മില് കൊണ്ടുപോയത് ഇയാളായിരുന്നു. ജിമ്മില് ട്രെയിനറാണെന്നും പറഞ്ഞിരുന്നു. എന്നാല് തടിച്ച ശരീരമുള്ള പ്രകാശ് തമ്പി ജിം ട്രെയിനറാണെന്ന് വിശ്വസിക്കുന്നില്ല.
ബാലുവിന്റെ മരണത്തിനു മുന്പ് ഇവരെല്ലാം സ്ഥിരമായി വീട്ടില് വരുമായിരുന്നു. ഇപ്പോള് ആരും വരാറില്ല. ബാലുവിന്റെ മരണശേഷം ഫോണില്പോലും വിളിച്ചിട്ടില്ല. ബാലുവിന്റെ ഭാര്യ ഇപ്പോള് അവരുടെ വീട്ടിലാണ്. ഇടയ്ക്ക് അവിടെ പോയപ്പോള് പാലക്കാടുള്ള ഡോക്ടറുടെ ഭാര്യ ആ വീട്ടില്വന്നു താമസിക്കുന്നതായി മനസിലായി. അതു ചോദ്യം ചെയ്തതിനുശേഷം ആ വീട്ടിലേക്ക് പോയിട്ടില്ല. ബാലുവിന്റെ പേര് ഒന്നിലേക്കും വലിച്ചിഴയ്ക്കാന് താല്പര്യമില്ല. പക്ഷേ അപകടത്തിനു പിന്നിലെ വസ്തുതകള് പുറത്തുവരണം.
ബാലഭാസ്കറിന്റെ മരണത്തില് ദുരൂഹതയുണ്ടെന്ന സംശയമുയര്ത്തി പുതിയ വെളിപ്പെടുത്തല്. ബാലഭാസ്കറും കുടുംബവും അപകടത്തില്പ്പെട്ട അതേസമയത്ത് രണ്ടു പേരെ സംശയാസ്പദമായ സാഹചര്യത്തില് കണ്ടെന്നും ഇക്കാര്യം ബാലഭാസ്കറിന്റെ സഹായിയായിരുന്ന പ്രകാശ് തമ്പിയെ അറിയിച്ചിരുന്നെന്നും കൊച്ചിന് കലാഭവനിലെ സൗണ്ട് റെക്കോര്ഡിസ്റ്റായിരുന്ന സോബി ജോര്ജ് െവളിപ്പെടുത്തി. പ്രകാശ് തമ്പി സ്വര്ണക്കടത്തു കേസില് അറസ്റ്റിലായതിനു പിന്നാലെയാണ് വെളിപ്പെടുത്തല്. അതേസമയം സ്വര്ണക്കടത്തു കേസില് അറസ്റ്റിലായ മുഖ്യപ്രതി അഡ്വക്കേറ്റ് എം.ബിജു അന്വേഷണ സംഘവുമായി സഹകരിക്കുന്നില്ല.
ബാലഭാസ്കറിന്റെ അപകടം നടന്ന് പത്തു മിനിറ്റിനുളളില് താന് അപകട സ്ഥലത്തു കൂടി കടന്നു പോയിരുന്നെന്നും ഈ സമയം രണ്ടു പേരെ ദുരൂഹ സാഹചര്യത്തില് കണ്ടിരുന്നെന്നുമാണ് സോബി ജോര്ജിന്റെ വെളിപ്പെടുത്തല്. അപകടം നടന്ന സ്ഥലത്തിനു മുന്നിലൂടെ ഒരാള് ഓടി നീങ്ങുന്നതും വലതുവശത്തു കൂടി മറ്റൊരാള് ബൈക്ക് തളളിക്കൊണ്ടു പോകുന്നതും കണ്ടിരുന്നെന്ന് സോബി പറയുന്നു. ഇക്കാര്യം അപ്പോള് തന്നെ ബാലുവിന്റെ അടുത്ത സഹായിയായിരുന്ന പ്രകാശ് തമ്പിയെ വിളിച്ചു പറഞ്ഞിരുന്നു. എന്നാല് പ്രകാശ് പിന്നീട് ഇതിനോട് പ്രതികരിച്ചിരുന്നില്ലെന്നും ഇതില് സംശയമുണ്ടെന്നുമാണ് സോബി പറയുന്നത്.
തിരുവനന്തപുരം വിമാനത്താവളം വഴിയുളള സ്വര്ണക്കടത്ത് കേസില് പ്രകാശ് അറസ്റ്റിലാവുകയും ബാലഭാസ്കറിന്റെ മറ്റൊരു സഹായിയായിരുന്ന വിഷ്ണു ഒളിവില് പോവുകയും ചെയ്ത പശ്ചാത്തലത്തിലാണ് സോബിയുടെ വെളിപ്പെടുത്തല് പ്രസക്തമാകുന്നത്. എന്നാല് സ്വര്ണക്കടത്തു കേസും ബാലഭാസ്കറിന്റെ മരണവും തമ്മില് എന്തെങ്കിലും ബന്ധമുണ്ടോ എന്ന കാര്യത്തില് സോബിക്ക് വ്യക്തതയില്ല താനും.
അതേസമയം സ്വര്ണക്കടത്തു കേസിലെ മുഖ്യപ്രതിയായ അഭിഭാഷകന് എം.ബിജു ചോദ്യം ചെയ്യലില് സഹകരിക്കുന്നില്ലെന്ന് ഡിആര്ഐ കോടതിയില് റിപ്പോര്ട്ട് നല്കി. വിദേശത്തു നിന്ന് കടത്തിയ സ്വര്ണം തിരുവനന്തപുരത്തെ പിപിഎം ജ്വല്ലറിയിലാണ് വിറ്റതെന്നു മാത്രമാണ് ബിജു വെളിപ്പെടുത്തിയിട്ടുളളത്.രണ്ടായിരം ദിര്ഹം വാഗ്ദാനം ചെയ്താണ് ബിജു സ്ത്രീകളടക്കമുളളവരെ ഉപയോഗിച്ച് സ്വര്ണം കടത്തിയിരുന്നതെന്ന് വ്യക്തമാക്കി കേസിലെ മറ്റൊരു പ്രതി സെറീനയും അന്വേഷണ സംഘത്തിന് മൊഴി നല്കി.
ഫ്ലാറ്റ് നിര്മാണം നിയന്ത്രിക്കാന് കേന്ദ്രസര്ക്കാര് കൊണ്ടുവന്ന റിയല് എസ്റ്റേറ്റ് റെഗുലേഷന് ആക്ട് നടപ്പാക്കാതെ സംസ്ഥാന സര്ക്കാര്. ഫ്ലാറ്റ് നിര്മാതാക്കളുടെ സമ്മര്ദത്തിനു വഴങ്ങിയാണ് കേരളം നിയമം നടപ്പാക്കാന് നടപടിയെടുക്കാത്തതെന്നാണ് ആക്ഷേപം. റിയല് എസ്റ്റേറ്റ് തട്ടിപ്പുകള് നിയന്ത്രിക്കാനും ഫ്ലാറ്റ് വാങ്ങുന്നവരുടെ അവകാശങ്ങള് സംരക്ഷിക്കാനും ലക്ഷ്യമിട്ടാണ് 2016ല് റിയല് എസ്റ്റേറ്റ് റഗുലേഷന് ആന്ഡ് ഡെവലപ്മെന്റ് ആക്ട് പാര്ലമെന്റ് പാസാക്കിയത്. നിയമം പാസാക്കി മൂന്നുവര്ഷം കഴിഞ്ഞിട്ടും അതില് നിഷ്കര്ഷിച്ചിട്ടുള്ള റിയല് എസ്റ്റേറ്റ് റെഗുലേറ്ററി അതോറിറ്റി രൂപവല്ക്കരിക്കാന് സംസ്ഥാന സര്ക്കാര് തയാറായിട്ടില്ല. തമിഴ്നാട്, കര്ണാടക ഉള്പ്പെടെയുള്ള അയല് സംസ്ഥാനങ്ങള് നിയമം നടപ്പിലാക്കാന് നടപടിയെടുത്തിട്ടും കേരളം നിസ്സംഗത തുടരുകയാണെന്നാണ് ആക്ഷേപം.
പുതിയ നിയമപ്രകാരം, പരിസ്ഥിതി ഉള്പ്പെടെ ബന്ധപ്പെട്ട എല്ലാ വകുപ്പുകളില് നിന്നും അനുമതി ലഭിച്ചാല് മാത്രമേ ഫ്ലാറ്റ് നിര്മാണം തുടങ്ങാന് കഴിയൂ. പ്രൊജക്ട് പാതിവഴിയില് ഉപേക്ഷിക്കപ്പെട്ടാല് ഉപഭോക്താക്കള്ക്ക് നഷ്ടപരിഹാരം ലഭിക്കാനും നിയമത്തില് വ്യവസ്ഥയുണ്ട്. മരടിലേതുപോലെയുള്ള വിഷയങ്ങള് ആവര്ത്തിക്കാതിരിക്കാന് റിയല് എസ്റ്റേറ്റ് നിയമം എത്രയും വേഗം കേരളത്തില് നടപ്പിലാക്കണമെന്ന ആവശ്യം ശക്തമാവുകയാണ്.
വിനോദയാത്രയക്ക് പോയ ദമ്പതികൾ സഞ്ചരിച്ച കാര് കര്ണാടകയിലെ മാണ്ഡ്യയ്ക്കടുത്ത് വച്ച് ടാങ്കർ ലോറിയിടിച്ച് കണ്ണൂര് സ്വദേശികളായ നാല് പേര് മരിച്ച സംഭവം ഞെട്ടലോടെയാണ് സഞ്ചാരികളുള്പ്പെടെയുള്ളവര് കേട്ടത്. നിർത്തിയിട്ട ടാങ്കർ ലോറിയുടെ പിന്നിൽ കാർ ഇടിച്ചുകയറിയുണ്ടായ അപകടത്തില് കണ്ണൂര് കൂത്തുപറമ്പ സ്വദേശികളായ ദമ്പതികളാണ് മരിച്ചത്. ഇപ്പോള് സംഭവത്തിന്റെ ഞെട്ടിക്കുന്ന വീഡിയോ ദൃശ്യങ്ങള് പുറത്തുവന്നിരിക്കുന്നു. ഈ ദൃശ്യങ്ങള് സോഷ്യല് മീഡിയയില് വ്യാപകമായി പ്രചരിക്കുകയാണ്.
അപകടത്തില് കൂത്തുപറമ്പ് പൂക്കോട്കുന്നപ്പാടി ഈക്കിലിശ്ശേരി സ്വദേശി ജയദീപ് (31), ഭാര്യ ജ്ഞാന തീർത്ഥ (28), സുഹൃത്തായ വീഡിയോ ഗ്രാഫർ കിരൺ (32), ഭാര്യ ചൊക്ലി യു പി സ്കൂൾ സംസ്കൃതം അധ്യാപിക ജിൻസി (27) എന്നിവരാണ് മരിച്ചത്.
വ്യാഴാഴ്ച പുലർച്ചെ രണ്ടോു മണിയോടെ മാണ്ഡ്യ മദ്ദൂരിലാണ് അപകടം. ചൊവ്വാഴ്ച ബാംഗ്ലൂരിലെത്തി ട്രിപ്പിനു ശേഷം നാട്ടിലേക്ക് മടങ്ങിയ ഇവരുടെ കാർ അപകടത്തിൽപ്പെടുകയായിരുന്നു. റോഡരികിലെ പെട്രോൾ പമ്പിന് സമീപം നിർത്തിയിട്ട പെട്രോൾ ടാങ്കർ ലോറിയുടെ പിന്നിലേക്ക് കാർ ഇടിച്ചുകയറുകയായിരുന്നു. ടാങ്കർലോറിയുടെ അടിയിലേക്കു കയറിപ്പോയ കാർ പൂർണമായും തകർന്നിരുന്നു. മൂന്നുപേർ അപകടസ്ഥലത്തും ഒരാൾ ആശുപത്രിയിലേക്കു കൊണ്ടുപോകും വഴിയുമാണ് മരിച്ചത്. ഡ്രൈവര് ഉറങ്ങിപ്പോയതാണ് അപകടത്തിന് കാരണമെന്നാണ് കരുതുന്നത്.
മിക്ക റോഡുകളിലും പുലര്ച്ചെയുണ്ടാകുന്ന ഇത്തരം അപകടങ്ങള് ഡ്രൈവമാര് ഉറങ്ങിപ്പോകുന്നതു കൊണ്ടാണ് സംഭവിക്കുന്നത്. നിങ്ങള് എത്ര മികച്ച ഡ്രൈവര് ആണെങ്കിലും ഉറക്കത്തെ ഒരു പരിധിക്കപ്പുറം പിടിച്ചുനിര്ത്താന് തലച്ചോറിന് സാധിക്കില്ല. കാറിന്റെ ഗ്ലാസ്സ് താഴ്ത്തിയിടുന്നതോ, ഓഡിയോ ഫുള് സൗണ്ടില് വയ്ക്കുന്നതോ ഒന്നും എല്ലായിപ്പോഴും ഉറക്കത്തെ പ്രതിരോധിക്കാനുള്ള ഉപാധികളല്ല.
രാത്രി യാത്രകളില് ദയവ് ചെയ്ത് ഇക്കാര്യങ്ങല് ശ്രദ്ധിക്കുക
1. കണ്ണുകള്ക്ക് ഭാരം അനുഭവപ്പെടുക
2. തുടര്ച്ചയായി കണ്ണു ചിമ്മി, ചിമ്മി തുറന്നു വയ്ക്കേണ്ടി വരിക
3. ഡ്രൈവിംഗില് നിന്നും ശ്രദ്ധ പതറുക
4. അന്നുണ്ടായതോ അല്ലെങ്കില് അടുത്ത ദിവസങ്ങളില് ഉണ്ടാകാന് പോകുന്നതോ ആയ കാര്യങ്ങള് ചിന്തിക്കുക.
5. ഇനി ഡ്രൈവ് ചെയ്യാനുള്ള ദൂരത്തെ കുറിച്ചു ആശങ്കപ്പെടുക
6. തുടര്ച്ചയായി കോട്ടുവായിടുക, കണ്ണ് തിരുമ്മുക
7. തലയുടെ ബാലന്സ് തെറ്റുന്നത് പോലെ തോന്നുക
8. ശരീരത്തിലാകെ ഒരുതരം അസ്വസ്ഥത അനുഭവപ്പെടുക
ഉറക്കത്തിലേക്ക് പൊടുന്നനേ വഴുതി വീഴും മുമ്പ്, തലച്ചോര് നമുക്ക് നല്ക്കുന്ന അപായസൂചനകളാണ് മേല്പ്പറഞ്ഞവ ഓരോന്നു. ദൂരയാത്രക്ക് ഇറങ്ങും മുമ്പ് ഉറക്കത്തെക്കുറിച്ച് താഴെ പറയുന്ന കാര്യങ്ങള് കൂടി ഓര്മ്മിക്കുക
1. ദൂരയാത്രാ ഡ്രൈവിംഗിന് മുന്പായി നന്നായി ഉറങ്ങുക
2. ദീര്ഘ ഡ്രൈവിംഗിന് മുമ്പ് ഏഴോ എട്ടോ മണിക്കൂര് നിര്ബന്ധമായും ഉറങ്ങുക
3. ഡ്രൈവിംഗ് അറിയുന്ന ഒരാളെ ഇത്തരം യാത്രകളില് ഒപ്പം കൂട്ടുക
4. രാത്രി ഏറെ വൈകിയും പുലര്ച്ചെ 5.30 വരെയും കഴിയുമെങ്കില് വാഹനം ഓടിക്കാതിരിക്കുക. സ്വാഭാവികമായും ഉറങ്ങാനുള്ള ഒരു പ്രവണത ശരീരത്തിനുണ്ടാകുന്ന സമയമാണിത്
5. കഫൈന് അടങ്ങിയ പാനീയങ്ങളോ, പദാര്ത്ഥങ്ങളോ യാത്രയില് ഒപ്പം കരുതുക. തലച്ചോറിനെ ഊര്ജ്ജസ്വലമാക്കാന് കഫൈനിനു കഴിയും.
6. ഡ്രൈവിംഗില് അമിതമായ ആവേശവും ആത്മവിശ്വാസവും ഒഴിവാക്കുക. ശരീരത്തിന് ആവശ്യമായ വിശ്രമം നല്കുക
വയനാട്ടിലെ കര്ഷക ആത്മഹത്യയില് അന്വേഷണം ആവശ്യപ്പെട്ട് കേരള മുഖ്യമന്ത്രി പിണറായി വിജയന് വയനാട് എംപി രാഹുല് ഗാന്ധി നൽകിയ കത്തിൽ നടപടി. സംഭവത്തിൽ വിശദമായ അന്വേഷണം നടത്തി എത്രയും വേഗം റിപ്പോർട്ട് സമർപ്പിക്കാൻ മുഖ്യമന്ത്രി ജില്ല കളക്ടറെ ചുമതലപ്പെടുത്തി. ഇത് അറിയിച്ച് രാഹുൽ ഗാന്ധിക്ക് മുഖ്യമന്ത്രി മറുപടി കത്ത് നൽകുകയും ചെയ്തു.
വയനാട്ടിലെ പനമരം പഞ്ചായത്തില് വി.ദിനേഷ് കുമാര് എന്ന കര്ഷകന് ആത്മഹത്യ ചെയ്ത സംഭവത്തെ കുറിച്ച് അന്വേഷണം വേണമെന്നാണ് രാഹുല് ഗാന്ധിയുടെ ആവശ്യപ്പെട്ടത്. വയനാട്ടിലെ നിയുക്ത എം.പി. എന്ന നിലയിൽ ആദ്യത്തെ ഇടപെടലാണ് രാഹുൽഗാന്ധി നടത്തിയത്.
ദിനേഷ് കുമാറിന്റെ കുടുംബത്തിന് സാമ്പത്തിക സഹായം നൽകുന്നതുൾപ്പടെയുള്ള ജില്ല കളക്ടറുടെ റിപ്പോർട്ടിന്റെ അടിസ്ഥാനത്തിൽ തീരുമാനിക്കാമെന്നും മുഖ്യമന്ത്രി രാഹുൽ ഗാന്ധിയെ മറുപടി കത്തിൽ അറിയിച്ചു. , ജപ്തിനടപടികൾ നിർത്തിവെച്ച് കർഷകരെ സഹായിക്കാനുള്ള നിരന്തരശ്രമത്തിലാണ് കേരളസർക്കാരെന്ന് മുഖ്യമന്ത്രി കൂട്ടിച്ചേർത്തു.
ദിനേഷ് കുമാറിന്റെ വിധവ സുജാതയുമായി താന് ഫോണില് സംസാരിച്ചുവെന്നും, വായ്പ തിരച്ചടക്കാന് കഴിയാത്തത് മൂലമുണ്ടായ സമ്മര്ദ്ദവും, വിഷമവും അതിജീവിക്കാന് കഴിയാതെയാണ് തന്റെ ഭര്ത്താവ് ആത്മഹത്യ ചെയ്തതെന്ന് അവര് പറഞ്ഞതായും രാഹുല് ഗാന്ധി മുഖ്യമന്ത്രിക്ക് അയച്ച കത്തില് പറഞ്ഞിരുന്നു.
കേരള കോണ്ഗ്രസിലെ അധികാരതര്ക്കം തെരുവിലേക്കും വ്യാപിപ്പിച്ച് ജോസഫ്, മാണി വിഭാഗങ്ങളുടെ പോര്വിളി. മാണി വിഭാഗം മോന്സ് ജോസഫിന്റെയും ജോയ് എബ്രഹാമിന്റെയും കോലം കത്തിച്ച് പ്രതിഷേധം അറിയിച്ചപ്പോള് ജോസ്.കെ. മാണിയുടെ കോലം കത്തിച്ച് ജോസഫ് വിഭാഗം തിരിച്ചടിച്ചു. തര്ക്കം തെരുവിലേക്ക് നീണ്ടതോടെ സമവായത്തിന്റെ നേരിയ സാധ്യതകളും ഇല്ലാതായി.
പി.ജെ. ജോസഫിന്റെ നീക്കങ്ങളില് അടിതെറ്റിയതോടെയാണ് മാണി വിഭാഗം അധികാരതര്ക്കം തെരുവിലേക്ക് വലിച്ചിഴച്ചത്. പി.ജെ. ജോസഫിന് ചെയര്മാന്റെ താത്കാലിക ചുമതല നല്കിയതോടെ പാലായില് ജോയ് എബ്രഹാമിന്റെ കോലം കത്തിച്ച് ആദ്യ പ്രതിഷേധം. നിയമസഭയില് കെ.എം.മാണിയുടെ ഇരിപ്പിടം ജോസഫിന് നല്കണമെന്നാവശ്യപ്പെട്ട മോന്സ് ജോസഫ് കത്ത് നല്കിയതോടെ പ്രതിഷേധത്തിന്റെ തീവ്രത കൂടി. കടുതുരുത്തിയില് മോന്സിന്റെ കോലം കത്തിച്ചു മാണി വിഭാഗം.
ഇടുക്കിയില് റോഷി അഗസ്റ്റിന്റെ കോലം കത്തിച്ച് ജോസഫ് വിഭാഗം തിരിച്ചടിച്ചു. ഇതോടെ പരാതിയുമായി റോഷി അഗസ്റ്റിന് രംഗതെത്തി. മോന്സിനെതിരെ പ്രതിഷേധിച്ചതിന് കടുത്തുരുത്തിയില് ജോസ്.കെ. മാണിയുടെ കോലം കത്തിച്ച് വീണ്ടും ജോസഫ് വിഭാഗത്തിന്റെ മറുപടി. അധികാരതര്ക്കം അണികളും ഏറ്റെടുത്തതോടെ യുദ്ധസമാനമായ സാഹചര്യമാണ് കേരള കോണ്ഗ്രസില്.
കൊച്ചി ചെറായ് പാടത്ത് വൈകിട്ടുണ്ടായ വാഹനാപകടത്തില് രണ്ട് യുവാക്കള് മരണപ്പെട്ടു. ചെറായിയില് നിന്ന് പറവൂരേക്ക് ബൈക്കില് യാത്ര ചെയ്യുന്നതിനിടെ ചെറായ് പാടത്തു വച്ച് ബസ്സുമായി കൂട്ടിയിടിക്കുകയായിരുന്നു. അപകടത്തില്പെട്ടവര് രണ്ടു പേരും എടവനക്കാട് സ്വദേശികളാണ്.
എടവനക്കാട് പഴങ്ങാട് പടിഞ്ഞാറ് താമസിക്കുന്ന കോട്ടുവള്ളിത്തറ അജിത്ത് മകന് അനുജിത്ത്(20), മരകാപ്പറമ്പില് പ്രസാദ് മകന് പ്രജിത്ത് (19) എന്നിവരാണ് അപകടത്തില് മരണപ്പെട്ടത്.
രാജ്യത്തെ ആഭ്യന്തര വളര്ച്ചാ നിരക്ക് അഞ്ച് വര്ഷത്തെ ഏറ്റവും കുറഞ്ഞ നിലയിലേയ്ക്ക് കൂപ്പ് കുത്തി. നാലാം പാദത്തിലെ കണക്കുകള് പ്രകാരം ജിഡിപി 5.8 മാത്രം. തിരഞ്ഞെടുപ്പ് മുന്നില് കണ്ട് ഒന്നാം മോദി സര്ക്കാര് പിടിച്ച് വച്ചിരുന്ന തൊഴില് ഇല്ലായ്മ റിപ്പോര്ട്ടും പരസ്യപ്പെടുത്തി. നാല്പ്പത്തിയാറ് വര്ഷത്തെ ഏറ്റവും ഉയര്ന്ന തൊഴില് ഇല്ലായ്മയില് രാജ്യം വലയുന്നു. 2017-2018 സാമ്പത്തിക വര്ഷം ഇന്ത്യയിലെ തൊഴില് ഇല്ലായ്മ നിരക്ക് 6.1 ആയി ഉയര്ന്നു.
രണ്ടാം നരേന്ദ്രമോദി സര്ക്കാരിന്റെ ആദ്യ മന്ത്രിസഭായോഗം നടക്കുമ്പോള് പുറത്ത് വരുന്ന കണക്കുകള് രാജ്യത്തെ ഭയപ്പെടുത്തുന്നതാണ്.കേന്ദ്ര സ്റ്റാറ്റിസ്റ്റിക്സ് വിഭാഗം പുറത്ത് വിട്ട 2018-19 സാമ്പത്തിക വര്ഷത്തെ നാലാം പാദമായ ജനുവരി-മാര്ച്ച് മാസങ്ങളിലെ ആഭ്യന്തര വളര്ച്ച നിരക്കിലാണ് ക്രമാതീതമായ കുറവ് കാണുന്നത്. കൃഷി, വ്യവസായം,നിര്മ്മാണം എന്നീ മേഖലകളില് കഴിഞ്ഞ 9 മാസത്തിനിടെ ഉണ്ടായ തകര്ച്ച ആഭ്യന്തരവളര്ച്ചാ നിരക്കിനെ പിന്നോട്ടടിച്ചു.
ഒന്നാം മോദി സര്ക്കാരിന്റെ അവസാന കാലത്താണ് രാജ്യം ആഭ്യന്തര വളര്ച്ചാ നിരക്കില് ഏറെ പിന്നോട്ട് പോയത് എന്നതും ശ്രദ്ധേയം. തിരഞ്ഞെടുപ്പ് മുന്നില് കണ്ട് കേന്ദ്ര സര്ക്കാര് തടഞ്ഞ് വച്ചിരുന്ന കഴിഞ്ഞ സാമ്പത്തിക വര്ഷത്തെ തൊഴില് ഇല്ലായ്മ കണക്ക് രണ്ടാം മോദി സര്ക്കാരിന്റെ സത്യപ്രതിജ്ഞയ്ക്ക് പിന്നാലെ പരസ്യപ്പെടുത്തി. ഇത് പ്രകാരം 1972-73 വര്ഷത്തിന് ശേഷം ഉണ്ടായ ഏറ്റവും വലിയ തൊഴില് ഇല്ലായ്മ നിരക്കിലാണ് രാജ്യം. 6.1 ശതമാനം.
ഈരാട്ടുപേട്ട: ഫോണിലൂടെ മുസ്ലീം വിരുദ്ധ പാരാമര്ശം നടത്തിയ പി സി ജോര്ജ്ജിനെതിരെ പുത്തന്പള്ളി ഇമാം നാദിര് മൗലവി.’ പി സി ജോര്ജ് എംഎല്എ രാജിവെക്കുക. അതാണ് നമ്മുടെ ആവശ്യം എന്ന് പറഞ്ഞാണ് മൗലവിയുടെ വീഡിയോ തുടങ്ങുന്നത്.
1980 മുതല് മുസ്ലീം സമുദായത്തിന്റെ വോട്ട് വാങ്ങി ഒരു ഭാഗത്ത് നമ്മളെ പിന്തുണയ്ക്കുകയും മറുഭാഗത്ത് പോയി നമ്മളെ കാല് വാരുകയും ഈ സമുദായത്തെ ഒന്നടക്കം വര്ഗ്ഗീയ കാപാലികര്ക്ക് ഒറ്റിക്കൊടുക്കുകയും ചെയ്ത എം എല് എയുമായി ഇനിയൊരു സന്ധിയും ഈ സമുദായത്തിനില്ല എന്നുള്ള ശക്തമായ പ്രഖ്യാപനമാണ് ഈ ഒത്തു ചേരല് എന്ന കാര്യത്തില് തര്ക്കമില്ല. ഈവിടുത്ത ക്രൈസ്തവ സമുദായവും ഹിന്ദു സമുദായവും മുസ്ലീം സമുദായവും ഒന്നിച്ച് നില്ക്കുന്നവരാണ്. ജാതിയും മതവും നോക്കാതെ നില്ക്കുന്നവരാണ് ഈരാട്ടുപേട്ടക്കാര്.
ഈരാട്ടുപേട്ടക്കാര്ക്ക് വിലയിടാന് പൂഞ്ഞാറിന്റെ എംഎല്എ വളര്ന്നിട്ടില്ല. ഇയാളെ പുറത്താക്കാന് ഈ നാട്ടുകാര്ക്ക് കഴിയും. നിങ്ങള് കാണാന് പോകുകയാണ്. ഇനി നിയമസഭയുടെ പടി ഈ പൂഞ്ഞാറ് മണ്ണില് നിന്ന് പി സി ജോര്ജ് കാണില്ല എന്ന് എഴുതിവച്ചോളൂ’ എന്നാണ് പുത്തന്പള്ളി ഇമാം നാദിര് മൗലവി പ്രസംഗിക്കുന്നത്. മൗലവിയുടെ പ്രസംഗം സമൂഹമാധ്യമങ്ങളില് വൈറലായി കഴിഞ്ഞു.
ബിജെപിയുടെ നേതൃത്വത്തിലുള്ള എന്ഡിഎയിലേക്ക് പോകാന് തയ്യാറെടുക്കുന്ന പി സി ജോര്ജിനെ പിന്തിരിപ്പിക്കാനായി ഓസ്ട്രേലിയയില് നിന്ന് വിളിക്കുന്നുവെന്ന് പറഞ്ഞ് വിളിച്ചയാളോട് ഈരാട്ടുപേട്ടയിലെ മുസ്ലീങ്ങള് തനിക്ക് വേണ്ടി ഒന്നും ചെയ്തിട്ടില്ലെന്നും മുസ്ലീങ്ങള് ശ്രീലങ്കയിലടക്കം കത്തോലിക്കാ പള്ളിക്കെതിരെ അക്രമണം നടത്തുകയാണെന്നും പി സി ജോര്ജ് പറഞ്ഞത് ഏറെ വിവാദമായിരുന്നു. തനിക്ക് ജയിക്കാന് മുസ്ലീംങ്ങളുടെ വോട്ട് വേണ്ടെന്നും ജോര്ജ് പറഞ്ഞിരുന്നു. ഇതിനെതിരെ നടത്തിയ പ്രതിഷേധ സംഗമത്തിലാണ് മൗലവി പി സി ജോര്ജിനെ രൂക്ഷമായി വിമര്ശിച്ചത്.
ഈരാട്ടുപേട്ടയിലെ മുസ്ലീങ്ങളെ തീവ്രവാദിയെന്ന് വിളിച്ച് ഈരാട്ടുപേട്ടയിലെ ക്രൈസ്തവരെ തനിക്കൊപ്പം നിര്ത്തി അടുത്തതവണ എംഎല്എയാകാമെന്ന് അയാള് കരുതുന്നിണ്ടാകും. ഇല്ല ജോര്ജ്. ഒരിക്കലും ഇല്ല. ഇനി നിയമസഭയുടെ കവാടം കാണണമെങ്കില് ഈരാട്ടുപേട്ടക്കാരുടെ ഒപ്പില്ലാതെ കഴിയില്ല. ആരെങ്കിലും ഇനി പി സി ജോര്ജ്ജിന് വോട്ട് ചെയ്യുമോ എന്ന് മൗലവി ചോദിക്കുമ്പോള് കൂടിനിന്നവര് ഇല്ലായെന്ന് വിളിച്ചു പറയുന്നതും വീഡിയോയില് കേള്ക്കാം.
