ന്യൂസ് ഡെസ്ക്, മലയാളം യുകെ

മെയ് 1 വ്യാഴാഴ്ച യുകെയിൽ മെയ് മാസത്തിലെ ഏറ്റവും ചൂടേറിയ ദിവസങ്ങളിൽ ഒന്നായിരിക്കുമെന്ന് ഗവേഷകർ. ഈ ദിവസം തെക്കുകിഴക്കൻ ഇംഗ്ലണ്ടിൽ താപനില 29°C ൽ എത്താൻ സാധ്യതയുണ്ട്. 1990 ൽ ലോസിമൗത്തിൽ രേഖപ്പെടുത്തിയ 27.4°C എന്ന മുൻ റെക്കോർഡിനെ മറികടന്നുള്ള താപനിലയായിരിക്കും ഇത്. രാജ്യത്തുടനീളം താപനില സാധാരണ രേഖപ്പെടുത്തിയതിനേക്കാൾ 7°C മുതൽ 11°C വരെ കൂടുതലായിരിക്കുമെന്നും ഗവേഷകർ പറയുന്നു. മെയ് 1 നു ശേഷം താപനില ക്രമേണ കുറയുമെന്നും ഗവേഷകർ പറയുന്നു.

ഏറ്റവും ചൂടേറിയ കാലാവസ്ഥ തെക്കുകിഴക്കൻ ഇംഗ്ലണ്ടിലായിരിക്കും. ഇവിടെ താപനില 27C ആയി ഉയരുമെന്നാണ് പ്രതീക്ഷിക്കുന്നത്. സൗത്ത് വെയിൽസിൽ ഏകദേശം 26C താപനില ഉണ്ടാകുമെന്നാണ് പ്രവചനം. യുകെയിലെ മിക്ക ഭാഗങ്ങളിലും അൾട്രാവയലറ്റ് വികിരണത്തിന്റെ അളവ് ഉയർന്നതായിരിക്കും. എന്നാൽ സ്കോട്ട്ലൻഡിന്റെ ചില ഭാഗങ്ങളിൽ ഇത് കുറവാണ്. UV (അൾട്രാവയലറ്റ്) അളവ് സൂര്യന്റെ അൾട്രാവയലറ്റ് വികിരണത്തിന്റെ ശക്തിയെ സൂചിപ്പിക്കുന്നു. ഉയർന്ന അൾട്രാവയലറ്റ് അളവ് സൂര്യതാപം, ചർമ്മത്തിന് കേടുപാടുകൾ, ചർമ്മ കാൻസർ പോലുള്ള ദീർഘകാല ആരോഗ്യ പ്രശ്നങ്ങൾക്ക് കാരണമാകും.

ഈ ചൂടേറിയ കാലാവസ്ഥയിൽ ഉയർന്ന SPF ഉള്ള സൺസ്ക്രീൻ ധരിക്കുക, പരമാവധി സൂര്യപ്രകാശമുള്ള സമയങ്ങളിൽ (സാധാരണയായി രാവിലെ 11 മുതൽ ഉച്ചകഴിഞ്ഞ് 3 വരെ) തണലിൽ തുടരുക, സൺഗ്ലാസുകൾ ധരിക്കുക, തൊപ്പിയും ഇളം വസ്ത്രവും ധരിക്കുക തുടങ്ങിയ നിർദ്ദേശങ്ങൾ ഇതിനോടകം തന്നെ പൊതുജനങ്ങളിലേയ്ക്ക് എത്തിച്ചിട്ടുണ്ട്. ഇംഗ്ലണ്ടിനും വെയിൽസിനും വിപരീതമായി സ്കോട്ട്ലൻഡിലും നോർത്തേൺ അയർലൻഡിലും താരതമ്യേനെ തണുത്ത കാലാവസ്ഥയായിരിക്കും അനുഭവപ്പെടുക.

ന്യൂസ് ഡെസ്ക്, മലയാളം യുകെ

ഇന്ത്യയും യുകെയും തമ്മിലുള്ള സ്വതന്ത്ര വ്യാപാര കരാർ അന്തിമഘട്ടത്തിലാണെന്ന റിപ്പോർട്ടുകൾ പുറത്തുവന്നു. ഇതിൻറെ ഭാഗമായി ഓരോ വർഷവും യുകെ ഇന്ത്യക്കാർക്കായി 100 പുതിയ വിസകൾ പുറത്തിറക്കാൻ സാധ്യതയുണ്ടെന്ന സൂചനകൾ പുറത്തുവന്നു. ഇന്ത്യക്കാർക്കുള്ള വിസ നിയന്ത്രണങ്ങളിൽ നിന്ന് നിലവിലുള്ള നടപടിക്രമങ്ങളിലേക്കുള്ള മാറ്റങ്ങൾ സ്വതന്ത്ര വ്യാപാര ചർച്ചകളിലെ പ്രധാന വിഷയമാണ്.

യുകെയുടെ ഹോം ഓഫീസ് വിസ നടപടിക്രമങ്ങളിൽ ഇളവു നൽകാൻ വിമുഖത കാണിക്കുന്നതാണ് സ്വതന്ത്ര വ്യാപാരങ്ങൾ അന്തിമഘട്ടത്തിലെത്തുന്നതിന് തടസമായി നിന്നത്. യുകെയുടെ നെറ്റ് മൈഗ്രേഷൻ ഉയരുമെന്നതാണ് ഹോം ഓഫീസ് ഇതിനെ എതിർക്കുന്നതിന് പ്രധാന കാരണമായി ചൂണ്ടി കാണിക്കപ്പെടുന്നത്. എന്നാൽ ഈ മാറ്റങ്ങൾക്ക് വിവിധ കോണുകളിൽ നിന്ന് പച്ച കൊടി കിട്ടിയതായാണ് ഏറ്റവും പുതിയതായി പുറത്തുവരുന്ന വിവരങ്ങൾ സൂചിപ്പിക്കുന്നത്.

ഇന്ത്യയുടെ സ്വതന്ത്ര വ്യാപാര കരാർ നിലവിൽ വരുന്നത് എത്ര ഇന്ത്യൻ തൊഴിലാളികൾക്ക് പ്രയോജനപ്രദമാകുമെന്ന ചോദ്യം പല കോണുകളിൽ നിന്നും ഉയർന്നു വരുന്നുണ്ട്. നിലവിൽ ഒരു കണക്ക് പുറത്തുവിടാൻ സാധിക്കില്ലെന്നാണ് ഔദ്യോഗിക വൃത്തങ്ങൾ വിശദമാക്കിയത്. വിസ നടപടിക്രമങ്ങളിൽ യുകെയുടെ ഭാഗത്തുനിന്ന് കൂടുതൽ ഇളവുകൾ ലഭിക്കും. ഇന്ത്യൻ തൊഴിലാളികൾക്ക് പെൻഷൻ ഉൾപ്പെടെയുള്ള കാര്യങ്ങൾ നേടിയെടുക്കാനായി ഇന്ത്യയുടെ ചീഫ് ട്രേഡ് നെഗോഷ്യേറ്റർ പിയൂഷ് ഗോയൽ ഈ ആഴ്ച ലണ്ടനിൽ എത്തിയിട്ടുണ്ട് . ഇന്ത്യയുമായി കരാറിൽ ഏർപ്പെടാൻ കെയർ സ്റ്റാർമറിൻ്റെ നേതൃത്വത്തിലുള്ള സർക്കാർ പ്രതിജ്ഞാബദ്ധമാണെന്നും ഇത് യുകെ ബിസിനസുകൾക്കുള്ള അവസരങ്ങൾ മെച്ചപ്പെടുത്തുകയും താരിഫ് കുറയ്ക്കുകയും വ്യാപാരം വിലകുറയ്ക്കുകയും ചെയ്യുമെന്നും യുകെയുടെ ബിസിനസ് ആൻ്റ് ട്രേഡ് ഡിപ്പാർട്ട്‌മെൻ്റ് വക്താവ് പറഞ്ഞു. നിലവിലെ ആഗോള വ്യാപാര അന്തരീക്ഷം ഉയർത്തുന്ന വെല്ലുവിളികളെ മറികടക്കാൻ ഇന്ത്യയ്ക്കും യുകെയ്ക്കും കഴിയുമെന്ന് ഉറപ്പുവരുത്തുന്നതിനുള്ള ഒരു ചുവടുവയ്പ്പാണ് ഇപ്പോൾ നടക്കുന്ന ചർച്ചകൾ. ഞങ്ങളുടെ വ്യാപാര ബന്ധം വിപുലീകരിക്കുന്നതിനും ഇരു രാജ്യങ്ങളിലെയും ബിസിനസുകൾക്ക് പുതിയ അവസരങ്ങൾ സൃഷ്ടിക്കുന്നതിനും സ്വതന്ത്ര വ്യാപാര കരാർ ചർച്ചകൾ നിർണ്ണായകമാണെന്ന് എക്‌സിലെ സോഷ്യൽ മീഡിയ പോസ്റ്റിൽ പിയൂഷ് ഗോയൽ പറഞ്ഞു.

ന്യൂസ് ഡെസ്ക്, മലയാളം യുകെ

ഓട്ട്‌ലി റൺ ക്രോസ്ബോ ആക്രമണക്കേസിലെ പ്രതി മരിച്ചതായുള്ള റിപ്പോർട്ടുകൾ പുറത്തുവന്നു. ശനിയാഴ്ച ഹെഡിംഗ്‌ലിയിലെ പ്രശസ്തമായ ഓട്ട്‌ലി റൺ പബ് ക്രോൾ ആക്രമണത്തെ തുടർന്ന് ഓവൻ ലോറൻസിനെ (38) അറസ്റ്റ് ചെയ്ത് ആശുപത്രിയിൽ പ്രവേശിപ്പിച്ചിരുന്നു . ഇയാൾ സ്വയം മുറിവേൽപ്പിച്ചതാണ് മരണകാരണമായത് എന്ന് പോലീസ് നേരത്തെ അറിയിച്ചിരുന്നു.

ആക്രമണം നടത്തുന്നതിന് മണിക്കൂറുകൾക്ക് മുൻപ് ഇയാൾ കടുത്ത വിദ്വേഷം നിറഞ്ഞ മെസ്സേജുകൾ ഫെയ്സ്ബുക്കിൽ പോസ്റ്റ് ചെയ്തതായുള്ള വിവരങ്ങൾ പുറത്തു വന്നിട്ടുണ്ട്. ഒരു കൂട്ട കൊല നടത്താനാണ് ഇയാൾ പദ്ധതി ഇട്ടിരുന്നതെന്നാണ് പ്രതിയുടെ സമൂഹമാധ്യമ അക്കൗണ്ടുകളിൽ പരിശോധിക്കുമ്പോൾ മനസ്സിലാകുന്നത്. വിദ്യാർഥികളെയും പോലീസിനെയും നൈറ്റ് ക്ലബ്ബിൽ പോകുന്നവരെയുമായിരുന്നു ഇയാൾ ലക്ഷ്യം വെച്ചിരുന്നത് . സംഭവം പ്രാദേശിക സമൂഹത്തിൽ സൃഷ്ടിച്ച ഞെട്ടലും ആശങ്കയും തങ്ങൾ പൂർണമായും മനസ്സിലാക്കുന്നതായി ആവശ്യമായതായും തുടർനടപടികൾ സ്വീകരിക്കുമെന്നും വെസ്റ്റ് യോർക്ക്ഷെയർ പോലീസിൻ്റെ സിഎച്ച് സൂപ്പ് സ്റ്റീവ് ഡോഡ്സ് പറഞ്ഞു.

ആക്രമണത്തിൽ പരിക്കേറ്റ 19 ഉം 31 ഉം വയസ്സുള്ള രണ്ട് സ്ത്രീകളെ ആശുപത്രിയിൽ പ്രവേശിപ്പിച്ചിരുന്നു . ഇതിൽ ഗുരുതരമായ പരിക്കേറ്റ 19 വയസ്സുകാരി അടിയന്തിര ശസ്ത്രക്രിയയ്ക്ക് വിധേയയായി ആശുപത്രിയിൽ തന്നെ തുടരുകയാണ്. മുതിർന്ന സ്ത്രീയെ നേരത്തെ ഡിസ്ചാർജ് ചെയ്തിരുന്നു. ധാരാളം കാൽനടയാത്രക്കാരുള്ള പ്രത്യേകിച്ച് ശനിയാഴ്ചകളിൽ തിരക്കേറിയ സമയത്ത് നടന്ന സംഭവത്തെ ഭയാനകം എന്നാണ് ഹെഡിംഗ്‌ലി കൗൺസിലർ അബ്ദുൾ ഹന്നാൻ വിശേഷിപ്പിച്ചത്. ഇംഗ്ലണ്ടിലെ വെസ്റ്റ് യോർക്ക് ഷെയറിലെ ഒട്ടേറെ മലയാളികൾ തിങ്ങി പാർക്കുന്ന സ്ഥലമാണ് ലീഡ്സ്. ലീഡ്സ് ജനറൽ ഇൻഫർമറി (LGI) , സെൻ്റ് ജെയിംസ് യൂണിവേഴ്സിറ്റി ഹോസ്പിറ്റൽ ഉൾപ്പെടെ പത്തോളം ഹോസ്പിറ്റലുകൾ ആണ് ഇവിടെയുള്ളത്. അതുകൊണ്ട് ആരോഗ്യ മേഖലയിൽ ജോലിചെയ്യുന്ന ഒട്ടേറെ മലയാളികളും ലീഡ്സിൽ ഉണ്ട്.

ന്യൂസ് ഡെസ്ക്, മലയാളം യുകെ

യുകെ മലയാളികളിൽ ഭൂരിഭാഗവും ആരോഗ്യ മേഖലയുമായി ബന്ധപ്പെട്ട് പ്രവർത്തിക്കുന്നവരാണ്. അതിൽ തന്നെ മിക്കവരും നേഴ്സിങ് ഫീൽഡിൽ ആണ് ജോലി ചെയ്യുന്നത്. എന്നാൽ നേഴ്സിങ് മേഖലയല്ലാതെ നിരവധി ജോലി സാധ്യതകളാണ് എൻഎച്ച് എസിൽ ഉള്ളത്

പുതിയതായി 36 കോഴ്സുകൾക്ക് എൻഎച്ച്എസ് ഔപചാരിക അനുമതി നൽകി. ഫിസിഷ്യൻ അസോസിയേറ്റ്‌സിനെയും അനസ്‌തേഷ്യ അസോസിയേറ്റ്‌സിനെയും ഉൾപ്പെടെയുള്ളവരെ പരിശീലിപ്പിക്കാനായിട്ടാണ് പുതിയ കോഴ്സുകൾ രൂപകൽപന ചെയ്തിരിക്കുന്നത് . ഓരോ വർഷവും എൻഎച്ച്എസിൽ 1000 – ലധികം ഫിസിഷ്യൻ അസോസിയേറ്റ്‌സിനെ (പിഎ) നിയമിക്കുമെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. ഇതിന് സമാനമായി അനസ്‌തേഷ്യ അസോസിയേറ്റ്‌സായും എൻഎച്ച്എസിൽ അവസരം ലഭിക്കും . ഇതിനായുള്ള പുതിയ കോഴ്സുകൾ ആരംഭിച്ചതായി ജനറൽ മെഡിക്കൽ കൗൺസിൽ (ജിഎംസി) ആണ് അറിയിച്ചത്.

എൻഎച്ച്എസ് തന്നെ പരിശീലനം നൽകുന്നതുവഴി ഉദ്യോഗാർത്ഥികൾക്ക് ശരിയായ യോഗ്യത ഉണ്ടെന്ന് ഉറപ്പുവരുത്താൻ സാധിക്കുമെന്ന് ജിഎംസി അറിയിച്ചു. ഹെൽത്ത് അല്ലെങ്കിൽ ലൈഫ് സയൻസ് ബിരുദമുള്ളവരാണ് PA മാർ. ഇതുകൂടാതെ രണ്ടു വർഷത്തെ ബിരുദാനന്തര പരിശീലനവും ഇവർ നേടിയിട്ടുണ്ടായിരിക്കണം. എൻ എച്ച്സിലെ നടപടിക്രമം അനുസരിച്ച് PA-കൾ ഒരു ഡോക്ടറുടെ മേൽനോട്ടത്തിൽ ആണ് പ്രവർത്തിക്കുന്നത് . ആളുകളെ രോഗനിർണ്ണയം നടത്താനും മെഡിക്കൽ ചരിത്രങ്ങൾ എടുക്കാനും ശാരീരിക പരിശോധന നടത്താനും ദീർഘകാല രോഗങ്ങളുള്ള രോഗികളെ കാണാനും പരിശോധനാ ഫലങ്ങൾ വിശകലനം ചെയ്യാനും മാനേജ്മെൻ്റ് പ്ലാനുകൾ വികസിപ്പിക്കാനും ഇവർക്ക് കഴിയും. ഇനിമുതൽ മലയാളികൾ ഉൾപ്പെടെ മേൽപ്പറഞ്ഞ പോസ്റ്റുകളിൽ ജോലി ചെയ്യണമെങ്കിൽ എൻഎച്ച്എസ് അംഗീകരിച്ച ഇത്തരം കോഴ്സുകൾ പഠിക്കണമെന്നാണ് പുറത്തുവരുന്ന വിവരങ്ങൾ സൂചിപ്പിക്കുന്നത്.

ന്യൂസ് ഡെസ്ക്, മലയാളം യുകെ

സ്റ്റോക്ക് ഓൺ ട്രെന്റിലും കെന്റിലുമായി താമസിക്കുന്ന യുകെ മലയാളികളുടെ പിതാവ് ജെയിംസ് (76) നിര്യാതനായി. മക്കളോടും കുടുംബത്തോടും ഒപ്പം ഈസ്റ്റർ ആഘോഷിക്കാനായാണ് ചാക്കോച്ചൻ എന്നറിയപ്പെടുന്ന ജെയിംസും ഭാര്യ ആനീസും യുകെയിലെത്തിയത്. തൊടുപുഴ ഉടമ്പന്നൂര്‍ നടുക്കുടിയില്‍ കുടുംബാഗമാണ് ജെയിംസും മക്കളും. ഏപ്രില്‍ 12 നാണ് ചാക്കോച്ചനൂം ഭാര്യയും യുകെയില്‍ എത്തിയത്. സ്റ്റോക്ക് ഓണ്‍ ട്രെന്റില്‍ താമസിക്കുന്ന മൂത്തമകൻ റിജോയുടെ വീട്ടിലായിരുന്നു മരണസമയത്ത് അദ്ദേഹം.

ഏപ്രില്‍ 17-ന് കെന്റിലെ ആഷ്ഫൊര്‍ഡില്‍ താമസിക്കുന്ന ഇളയ മകന്‍ സിജോയുടെ അടുത്ത് എത്തിയതായിരുന്നു ഇരുവരും. പുറത്ത് പോയി വീട്ടിലേക്ക് വരുന്ന വഴി കാൽ വഴുതി വീഴുകയായിരുന്നു. അപകടത്തിൽ തലയിടിച്ച് വീണതിനാൽ ബോധം നഷ്ടപ്പെട്ടിരുന്നു. ഉടൻതന്നെ ആഷ്ഫൊര്‍ഡിലുള്ള എന്‍എച്ച്എസ് ആശുപത്രിയില്‍ എത്തിച്ചെങ്കിലും രണ്ടു ദിവസത്തിനുശേഷം തലച്ചോറിലെ അമിതരക്തസ്രാവം കാരണം ആരോഗ്യനില കൂടുതൽ വഷളായി. ഇന്നലെ വൈകുന്നേരത്തോടെ മരണം സംഭവിക്കുകയായിരുന്നു. മൃതദേഹം നാട്ടിലേയ്ക്ക് കൊണ്ടുപോകാനുള്ള നടപടിക്രമങ്ങള്‍ നടന്നുവരുന്നു. നാട്ടിലെ സംസ്കാരവും മറ്റും സംബന്ധിച്ച വിവരങ്ങൾ പിന്നീട് അറിയിക്കും.

ജെയിംസിന്റെയും ആനീസിന്റെയും മൂത്തമകൻ റിജോ ജെയിംസ് യുകെ മിഡ്‌ലാന്‍ഡ് റീജിയണ്‍ മോട്ടര്‍ വെ (മോട്ടോ സർവ്വീസ്) കമ്പനിയുടെ ഓപ്പറേഷൻ മാനേജരായി ജോലിചെയ്യുന്നു. സ്റ്റോക്ക് ഓൺ ട്രെന്റിൽ സ്റ്റാഫ് നേഴ്‌സായ ഭാര്യ ഷിനു റിജോയാണ് ഭാര്യ. ഇളയമകൻ സിജോ ജെയിംസ് കെന്റ് കൗണ്ടിയിൽ സോഷ്യൽ വർക്കറാണ്. സിജോയുടെ ഭാര്യ വീണ കെന്റിൽ നേഴ്‌സാണ്.

റിജോയുടെയും സിജോയുടെയും പിതാവിൻറെ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

യുകെയിൽ ഷുഗർ ടാക്സ് കൂടുതൽ ഭക്ഷണ ഉത്പന്നങ്ങളിലേയ്ക്ക് വ്യാപിപ്പിക്കാൻ സർക്കാർ തീരുമാനിച്ചു. ഇതിൻറെ വെളിച്ചത്തിൽ മിൽക്ക് ഷേക്കുകൾക്കും മറ്റ് പാൽ അടിസ്ഥാനമാക്കിയുള്ള മധുര പാനീയങ്ങൾക്കും ഷുഗർ ടാക്സ് നൽകേണ്ടിവരും. ഡയറി അധിഷ്ഠിത പാനീയങ്ങൾക്കും ഓട്‌സ് അല്ലെങ്കിൽ അരി പോലുള്ള പാൽ ഇതര ഭക്ഷണങ്ങൾക്കും നികുതിയിൽ നിന്നുള്ള ഇളവ് അവസാനിപ്പിക്കുന്നതിനുള്ള നിർദ്ദേശങ്ങൾ സർക്കാർ ആലോചിക്കുന്നു.

ലെവി വർധിപ്പിക്കുന്ന കാര്യം സർക്കാർ പരിഗണിക്കുന്നതായി ചാൻസലർ റേച്ചൽ റീവ്സ് കഴിഞ്ഞ വർഷത്തെ തൻ്റെ ശരത്കാല ബജറ്റിൽ പ്രഖ്യാപിച്ചിരുന്നു. ഔപചാരികമായി സോഫ്റ്റ് ഡ്രിങ്ക്‌സ് ഇൻഡസ്ട്രി ലെവി (എസ്‌ഡിഐഎൽ) എന്നറിയപ്പെടുന്ന പഞ്ചസാര നികുതി അമിതവണ്ണം കൈകാര്യം ചെയ്യുന്നതിനുള്ള ഒരു മാർഗമായി കൺസർവേറ്റീവ് സർക്കാർ 2018 ഏപ്രിലിൽ ആണ് അവതരിപ്പിച്ചത്‌ . പാനീയങ്ങളിൽ അനുവദനീയമായ പരമാവധി പഞ്ചസാരയുടെ അളവ് 100 മില്ലി ലിറ്ററിന് 5 ഗ്രാം മുതൽ 4 ഗ്രാം വരെ കുറയ്ക്കാനുള്ള നിർദ്ദേശങ്ങൾ ട്രഷറി തിങ്കളാഴ്ച സ്ഥിരീകരിച്ചു. നിർദ്ദേശങ്ങൾക്കനുസൃതമായി പഞ്ചസാരയുടെ അളവ് കുറച്ചില്ലെങ്കിൽ ഈ വിഭാഗത്തിലെ വിൽപ്പനയുടെ 93% വരുന്ന വിപണിയിലെ 203 പ്രീ-പാക്ക്ഡ് പാൽ അടിസ്ഥാനമാക്കിയുള്ള പാനീയങ്ങൾക്ക് നികുതി ബാധിക്കുമെന്നാണ് പുറത്തുവരുന്ന വിവരങ്ങൾ സൂചിപ്പിക്കുന്നത്.

കുട്ടികൾക്ക് കാൽസ്യത്തിന്റെ അംശം കൂടുതൽ ലഭിക്കുന്നതിന് അത്തരം പാനീയങ്ങൾക്ക് ഇളവ് ഉൾപ്പെടുത്തണമെന്ന ആവശ്യം ഉയർന്നു വരുന്നുണ്ട്. എന്നാൽ അത്തരം പാനീയങ്ങളിൽ നിന്ന് യുവാക്കൾക്ക് അവരുടെ കാൽസ്യം കഴിക്കുന്നതിൻ്റെ 3.5% മാത്രമേ ലഭിക്കൂ എന്ന് ട്രഷറി പറഞ്ഞു. അതായത് അധികമായ പഞ്ചസാരയുടെ ദോഷങ്ങളെ ആരോഗ്യ ആനുകൂല്യങ്ങൾ ന്യായീകരിക്കുന്നില്ല എന്നാണ് ആരോഗ്യവിദഗ്ധർ അഭിപ്രായപ്പെടുന്നത്. അമിത വണ്ണവും മറ്റ് ശാരീരിക പ്രശ്നങ്ങളും ഒഴിവാക്കാനാണ് ഷുഗർ ടാക്സ് നിലവിൽ വന്നത്. എന്നാൽ ശീതള പാനീയ വ്യവസായം, പബ്ബുകൾ എന്നിവിടങ്ങളിൽ നിന്ന് ലെവിക്കെതിരെ ശക്തമായ എതിർപ്പും ഉയരുന്നുണ്ട്. ലെവി ആനുപാതികമായി താഴ്ന്ന വരുമാനമുള്ള കുടുംബങ്ങളെ ബാധിക്കുന്നുവെന്നും അമിതവണ്ണത്തെ നേരിടാൻ കാര്യമായൊന്നും ചെയ്യുന്നില്ലെന്നും ചിലർ വാദിക്കുന്നുണ്ട്.

ന്യൂസ് ഡെസ്ക്, മലയാളം യുകെ

വിദേശരാജ്യങ്ങളിൽ നിന്നുള്ള ലൈംഗിക കുറ്റവാളികൾ യുകെയിൽ അഭയം തേടുന്നത്തു വിലക്കുമെന്ന് ആഭ്യന്തര മന്ത്രാലയം അറിയിച്ചു. വ്യാഴാഴ്ച നടക്കുന്ന പ്രാദേശിക തിരഞ്ഞെടുപ്പിൽ മുൻകൈ നേടാനാണ് സർക്കാർ പുതിയ തീരുമാനം പെട്ടെന്ന് പ്രഖ്യാപിച്ചത് എന്നാണ് രാഷ്ട്രീയ നിരീക്ഷകർ വിലയിരുത്തുന്നത്. സർക്കാരിൻറെ കുടിയേറ്റ നയത്തെ കുറിച്ച് റീഫോം യുകെ ശക്തമായ വിമർശനം അഴിച്ചു വിട്ടിരുന്നു.

ലൈംഗിക കുറ്റകൃത്യങ്ങളിൽ ശിക്ഷിക്കപ്പെട്ട വിദേശ പൗരന്മാർ യുകെയിൽ അഭയം തേടുന്നത് നിരോധിക്കുമെന്നാണ് യെവെറ്റ് കൂപ്പർപറഞ്ഞത് . തീവ്രവാദികൾ, യുദ്ധക്കുറ്റവാളികൾ, ഒരു വർഷമോ അതിൽ കൂടുതലോ ശിക്ഷ അനുഭവിക്കുന്ന മറ്റേതെങ്കിലും കുറ്റവാളികൾക്ക് നിയമ പ്രകാരം ഇതിനകം തന്നെ അഭയം നിഷേധിക്കാവുന്നതാണ്. പുതിയ മാറ്റങ്ങൾ പ്രകാരം ലൈംഗിക കുറ്റവാളികളുടെ രജിസ്റ്ററിൽ ഉൾപ്പെടുന്ന കുറ്റകൃത്യത്തിന് യുകെയിൽ ശിക്ഷിക്കപ്പെട്ട ആർക്കും അവരുടെ ശിക്ഷയുടെ ദൈർഘ്യം പരിഗണിക്കാതെ തന്നെ ഇത് ബാധകമാകും. ഇത്തരം കുറ്റകൃത്യങ്ങൾ ഗൗരവമായി എടുക്കുന്നുവെന്നും നിയമം നടപ്പാക്കുന്നത് ഉറപ്പാക്കുമെന്നും ആഭ്യന്തര സെക്രട്ടറി പറഞ്ഞു.

പുതിയ നയം എത്ര പേരെ ബാധിക്കുമെന്ന് വ്യക്തമല്ല. എന്നിരുന്നാലും, ലൈംഗിക കുറ്റവാളിയായി ശിക്ഷിക്കപ്പെട്ടിട്ടും അഭയം ലഭിച്ച അബ്ദുൾ എസെദിയുടെ പോലുള്ള സംഭവങ്ങൾ കൈകാര്യം ചെയ്യാൻ സർക്കാർ മുൻഗണന നൽകുമെന്ന് ആഭ്യന്തര ഓഫീസ് വൃത്തങ്ങൾ പറഞ്ഞു. 2024 ജനുവരി 31-ന് ലണ്ടനിലെ ക്ലാഫാമിൽ ഗുരുതരമായ രാസായുധ ആക്രമണം നടത്തിയ ആളായിരുന്നു അഫ്ഗാൻകാരനായിരുന്ന അബ്ദുൾ എസെദി. തൻ്റെ മുൻ പങ്കാളിയെയും അവളുടെ രണ്ട് ഇളയ പെൺമക്കളെയും ആസിഡ് ഉപയോഗിച്ച് ആക്രമിക്കുകയും ഇരകൾക്ക് ഗുരുതരമായി പരിക്കേൽക്കുകയും ചെയ്തിരുന്നു . സംഭവത്തിൽ സഹായിക്കാൻ ശ്രമിക്കുന്നതിനിടെ പോലീസുകാരും സമീപത്തുണ്ടായിരുന്നവരും ഉൾപ്പെടെ ഒമ്പത് പേർക്കും പരിക്കേറ്റു. ഇയാൾ പിന്നീട് ആത്മഹത്യ ചെയ്തതായി കണ്ടെത്തിയിരുന്നു. 2018-ൽ ലൈംഗികാതിക്രമത്തിന് എസെദിക്ക് ശിക്ഷ ലഭിച്ചതായുള്ള വിവരങ്ങൾ പിന്നീട് പുറത്തുവന്നിരുന്നു. ഒരു ദശാബ്ദത്തിനുള്ളിൽ സ്ത്രീകൾക്കും പെൺകുട്ടികൾക്കുമെതിരായ അതിക്രമങ്ങൾ പകുതിയായി കുറയ്ക്കുമെന്ന സർക്കാരിൻ്റെ പ്രതിജ്ഞയെ പൂർത്തീകരിക്കുന്നതാണ് നടപടിയെന്ന് സുരക്ഷാ മന്ത്രി ജെസ് ഫിലിപ്പ് പറഞ്ഞു.

ന്യൂസ് ഡെസ്ക്, മലയാളം യുകെ

വിമാന യാത്രയിൽ ബ്രിട്ടീഷുകാർ സ്ഥിരമായി ഉപയോഗിക്കുന്ന പല സാധനങ്ങളും ലഗേജിൽ കൊണ്ടുപോകരുത് എന്ന് കർശന നിർദ്ദേശം നല്കിയതായുള്ള വാർത്തകൾ പുറത്തുവന്നു. യുകെ സിവിൽ ഏവിയേഷൻ അതോറിറ്റി (സിഎഎ) ആണ് മുന്നറിയിപ്പ് നൽയിരിക്കുന്നത്. പോർട്ടബിൾ ചാർജർ ഉൾപ്പെടെയുള്ള പല സാധനങ്ങളും ഈ പട്ടികയിൽ ഉൾപ്പെട്ടിട്ടുണ്ട്.

മോശമായി നിർമ്മിച്ചതും കേടായതുമായ ലിഥിയം ബാറ്ററികൾ നിരോധിക്കപ്പെട്ടവയുടെ പട്ടികയിൽ ഉണ്ട്. ഇത്തരം സാധനങ്ങൾ പെട്ടെന്ന് ചൂടാകുകയും തീ പിടിക്കുകയും ചെയ്യാനുള്ള സാധ്യതയാണ് നിരോധിക്കാനുള്ള നീക്കത്തിന് പിന്നിൽ. അത് ഫ്ലൈറ്റ് ഡെക്കിൽ സംഭവിക്കുകയാണെങ്കിൽ, അത് വിമാനത്തിൻ്റെ പ്രവർത്തനത്തെ കാര്യമായി തടസ്സപ്പെടുത്തുകയും യാത്രക്കാർക്ക് ഗുരുതരമായ പരിക്കേൽക്കുകയും ചെയ്യും എന്ന് സി എ എ മുന്നറിയിപ്പ് നൽകി.

2022 ജനുവരിയിൽ പോർട്ടബിൾ ബാറ്ററിയിൽ നിന്ന് തീ പിടിച്ച ഒരു സംഭവം റിപ്പോർട്ട് ചെയ്തിരുന്നു. ഇതിനെ തുടർന്ന് കർശന നടപടികൾ സ്വീകരിക്കാൻ വിവിധ എയർലൈനുകൾ തീരുമാനം കൈകൊണ്ടത് . യാത്ര തുടങ്ങുന്നതിനു മുൻപ് സാധനകൾ പാക്ക് ചെയ്യുമ്പോൾ എയർലൈൻ വെബ്സൈറ്റിൽ നിന്ന് ഉള്ള നിർദ്ദേശങ്ങൾ പരിശോധിക്കുന്നത് എയർപോർട്ടിൽ അനാവശ്യ കാലതാമസം നേരിടുന്നത് ഒഴിവാക്കാൻ സഹായിക്കും. ഫ്ലൈറ്റിനായി ബാഗുകൾ പാക്ക് ചെയ്യുമ്പോൾ സാധാരണയായി നമ്മൾ ദിവസേന ഉപയോഗിക്കുന്ന എല്ലാ സാധനങ്ങളും അധികം ആലോചിക്കാതെ ഉൾപ്പെടുത്തും. എന്നാൽ ചില സാധനങ്ങൾ വിമാന യാത്രയിൽ നിരോധിച്ചിട്ടുണ്ടെന്നറിയുന്നത് പല യാത്രക്കാരും വിമാനത്താവളത്തിൽ എത്തുമ്പോൾ ആയിരിക്കും.

ന്യൂസ് ഡെസ്ക്, മലയാളം യുകെ

കുട്ടികളുടെ നഗ്നചിത്രങ്ങളും ലൈംഗികതയും സൃഷ്ടിക്കാൻ ഉപയോഗിക്കുന്ന ആപ്പുകൾ നിരോധിക്കണമെന്ന ആവശ്യം ശക്തമാകുന്നു. ആർട്ടിഫിഷൽ ഇന്റലിജൻസിന്റെ സഹായത്തോടെ ഉള്ള ഇത്തരം ആപ്ലിക്കേഷനുകൾ നിരോധിക്കണമെന്ന് ചിൽഡ്രൻ കമ്മീഷൻ ആണ് സർക്കാരിനോട് ആവശ്യപ്പെട്ടിരിക്കുന്നത്. “നഗ്നത” അനുവദിക്കുന്ന ആപ്പുകൾക്ക് സമ്പൂർണ നിരോധനം ആവശ്യമാണെന്ന് ഡാം റേച്ചൽ ഡിസൂസ പറഞ്ഞു.

യഥാർത്ഥ ആളുകളുടെ ഫോട്ടോകൾ Al ഉപയോഗിച്ച് എഡിറ്റ് ചെയ്ത് നഗ്നരായി കാണിക്കുകയാണ് ചെയ്യുന്നത്. സ്ത്രീ ശരീരത്തിന്റെ നഗ്നത സൃഷ്ടിക്കാൻ മാത്രമായി നിരവധി ആപ്ലിക്കേഷൻ വികസിപ്പിച്ചിട്ടുള്ളതായി തിങ്കളാഴ്ച പ്രസിദ്ധീകരിച്ച ഒരു റിപ്പോർട്ടിൽ ഡാം റേച്ചൽ പറഞ്ഞു. ഇത്തരം ആപ്ലിക്കേഷനുകൾ വ്യാപകമായി പ്രചരിക്കുന്നതായും സമൂഹത്തിന് ആപത്കരമായി പരിണമിക്കുന്നതായും റിപ്പോർട്ടിൽ പറയുന്നുണ്ട്. കുട്ടികളെ ലൈംഗികമായി ദുരുപയോഗം ചെയ്യുന്ന ചിത്രങ്ങൾ Al ഉപയോഗിച്ച് നിർമ്മിക്കുന്നതായുള്ള റിപ്പോർട്ടുകൾ നേരത്തെ പുറത്തു വന്നിരുന്നു. എന്നാൽ ഇത്തരത്തിൽ നിർമ്മിക്കുന്ന ചിത്രങ്ങൾ ആർട്ടിഫിഷ്യലായി നിർമ്മിക്കുന്നതാണെന്ന് തിരിച്ചറിയാനാവാത്ത വിധം സാങ്കേതികവിദ്യ വളർന്നതാണ് നിലവിൽ അമ്പരപ്പ് ഉളവാക്കുന്നത്. ഇത്തരം ചിത്രങ്ങളുടെ നിർമ്മിതി കൂടുതൽ വ്യാപകമായി നടക്കുന്നതായി ഇൻറർനെറ്റ് വാച്ച് ഫൗണ്ടേഷൻ നേരത്തെ മുന്നറിയിപ്പ് നൽകിയിരുന്നു.

കുട്ടികളെ ലൈംഗികമായി ദുരുപയോഗം ചെയ്യുന്ന വസ്തുക്കൾ സൃഷ്ടിക്കുന്നതിനായി രൂപകൽപ്പന ചെയ്ത AI ഉപകരണങ്ങൾ കൈവശം വയ്ക്കുന്നതും സൃഷ്ടിക്കുന്നതും വിതരണം ചെയ്യുന്നതും നിയമവിരുദ്ധമായി മാറുമെന്ന് ഫെബ്രുവരിയിൽ സർക്കാർ പ്രഖ്യാപിച്ചിരുന്നു. ദുരുപയോഗം ചെയ്യുന്ന ചിത്രങ്ങൾ നിർമ്മിക്കുന്നതിനോ കുട്ടികളെ ദുരുപയോഗം ചെയ്യാൻ അവരെ സഹായിക്കുന്നതിനോ AI ഉപകരണങ്ങൾ എങ്ങനെ ഉപയോഗിക്കണമെന്ന് ആളുകളെ പഠിപ്പിക്കുന്ന മാനുവലുകൾ ആരെങ്കിലും കൈവശം വയ്ക്കുന്നത് നിയമവിരുദ്ധമാകും. 2024-ൽ കുട്ടികളെ ലൈംഗികമായി ദുരുപയോഗം ചെയ്യുന്ന ചിത്രങ്ങൾ പോസ്റ്റുചെയ്യുന്ന വെബ്‌പേജുകളുടെ എണ്ണത്തിലെ വർദ്ധനവും വാച്ച്‌ഡോഗിൻ്റെ വാർഷിക റിപ്പോർട്ടിൽ എടുത്ത് പറയുന്നുണ്ട്. കഴിഞ്ഞ വർഷം 291,273 കുട്ടികളെ ലൈംഗികമായി ദുരുപയോഗം ചെയ്യുന്ന ചിത്രങ്ങൾ റിപ്പോർട്ട് ചെയ്യപ്പെട്ടതായി IWF പറഞ്ഞു, അതിനു മുമ്പുള്ള വർഷവുമായി താരതമ്യം ചെയ്യുമ്പോൾ ഇത് 6% വർധിച്ചു. റിപ്പോർട്ടുകളിൽ ഇരയായവരിൽ ഭൂരിഭാഗവും പെൺകുട്ടികളായിരുന്നു.

ന്യൂസ് ഡെസ്ക്, മലയാളം യുകെ

ലീഡ്സിൽ നടന്ന ആക്രമണത്തിൽ രണ്ട് സ്ത്രീകൾക്ക് പരുക്കു പറ്റിയ സംഭവം കടുത്ത ഞെട്ടലാണ് രാജ്യമൊട്ടാകെ സൃഷ്ടിച്ചത്. ആക്രമണം നടന്ന് അധികം താമസിയാതെ സംഭവത്തിന്റെ അന്വേഷണം തീവ്രവാദ വിരുദ്ധ പോലീസ് ഏറ്റെടുത്തത് പ്രശ്നത്തിന്റെ ഗൗരവം വർദ്ധിപ്പിക്കുന്നു. സംഭവത്തെ കുറിച്ച് സമൂഹമാധ്യമങ്ങളിൽ പ്രചരിക്കുന്ന പോസ്റ്റുകളെ കുറിച്ച് കൂടി പോലീസ് അന്വേഷണം ആരംഭിച്ചതായുള്ള വിവരങ്ങളാണ് ഇപ്പോൾ പുറത്തു വരുന്നത്.

ആക്രമണത്തിൽ 19 ഉം 31 ഉം വയസ്സുള്ള രണ്ട് സ്ത്രീകൾക്കാണ് പരുക്ക് പറ്റിയത്. ഇതിൽ ഒരാൾ ആശുപത്രിയിൽ നിന്ന് ഡിസ്ചാർജ് ചെയ്യപ്പെട്ടു. എന്നാൽ മറ്റൊരാൾ ഗുരുതരമായ പരുക്കുകളെ തുടർന്ന് ശസ്ത്രക്രിയയ്ക്ക് വിധേയയായി . നിലവിൽ അപകട നില തരണം ചെയ്തതായാണ് പുറത്തുവരുന്ന വിവരങ്ങൾ സൂചിപ്പിക്കുന്നത്. നഗരത്തിൻ്റെ വടക്കുഭാഗത്തുള്ള പ്രശസ്തമായ ഒട്ട്‌ലി റൺ പബ് ക്രോൾ റൂട്ടിൽ ആണ് രാജ്യത്തെ നടുക്കിയ ആക്രമണം അരങ്ങേറിയത്. സംഭവത്തെ തുടർന്ന് ആക്രമണം നടത്തിയ വ്യക്തി സ്വയം മുറിവേൽപ്പിച്ചിരുന്നു. 38 കാരനായ ഇയാൾ ഗുരുതരാവസ്ഥയിൽ ആശുപത്രിയിൽ തുടരുകയാണെന്ന് പോലീസ് അറിയിച്ചു. ഒരു ക്രോസ്ബോയും ഒരു തോക്കും സംഭവസ്ഥലത്ത് നിന്ന് പോലീസ് കണ്ടെടുത്തിരുന്നു.

ലീഡ്സിൽ നടന്ന സംഭവം അതീവ ഗൗരവമുള്ളതാണെന്ന് ആഭ്യന്തര സെക്രട്ടറി യെവെറ്റ് കൂപ്പർ പറഞ്ഞു . അക്രമ സംഭവം നടന്ന ഉടനെ അതിവേഗത്തിൽ ഇടപെട്ട പോലീസിനും അത്യാഹിത വിഭാഗത്തിനും അദ്ദേഹം നന്ദി പറഞ്ഞു. ഇതുവരെ നടത്തിയ അന്വേഷണത്തിൽ സംഭവത്തിൽ മറ്റാരും ഉൾപ്പെട്ടിട്ടില്ലെന്നാണ് കരുതുന്നതെന്ന് പോലീസ് അറിയിച്ചു. ധാരാളം കാൽനടയാത്രക്കാരുള്ള പ്രത്യേകിച്ച് ശനിയാഴ്ചകളിൽ തിരക്കേറിയ സമയത്ത് നടന്ന സംഭവത്തെ ഭയാനകം എന്നാണ് ഹെഡിംഗ്‌ലി കൗൺസിലർ അബ്ദുൾ ഹന്നാൻ വിശേഷിപ്പിച്ചത്. ഇംഗ്ലണ്ടിലെ വെസ്റ്റ് യോർക്ക് ഷെയറിലെ ഒട്ടേറെ മലയാളികൾ തിങ്ങി പാർക്കുന്ന സ്ഥലമാണ് ലീഡ്സ്. ലീഡ്സ് ജനറൽ ഇൻഫർമറി (LGI) , സെൻ്റ് ജെയിംസ് യൂണിവേഴ്സിറ്റി ഹോസ്പിറ്റൽ ഉൾപ്പെടെ പത്തോളം ഹോസ്പിറ്റലുകൾ ആണ് ഇവിടെയുള്ളത്. അതുകൊണ്ട് ആരോഗ്യ മേഖലയിൽ ജോലിചെയ്യുന്ന ഒട്ടേറെ മലയാളികളും ലീഡ്സിൽ ഉണ്ട്.