ന്യൂസ് ഡെസ്ക്, മലയാളം യുകെ

ഇന്ത്യയും പാക്കിസ്ഥാനും തമ്മിലുള്ള സംഘർഷം ലോകമെങ്ങുമുള്ള വ്യോമയാനാ ഗതാഗതത്തെയും സാരമായി ബാധിച്ചിട്ടുണ്ട്. യുദ്ധസമാനമായ സാഹചര്യങ്ങളെ തുടർന്ന് പല വിമാനങ്ങളും റദ്ദാക്കപ്പെട്ടിരുന്നു. പല വിമാനങ്ങളും വഴിതിരിച്ചുവിടുന്നതിനും അതോടൊപ്പം പല ദീർഘദൂര യാത്രകൾ വൈകുകയും ചെയ്യുന്നുണ്ട്. പ്രസ്തുത സാഹചര്യത്തിൽ ഇന്ത്യയിലേക്കും പാക്കിസ്ഥാനിലേക്കും യാത്ര ചെയ്യുന്ന പൗരന്മാർക്ക് യുകെ സർക്കാർ മുന്നറിയിപ്പ് പുറപ്പെടുവിച്ചു.

പ്രധാനമായും ഇന്ത്യ-പാകിസ്ഥാൻ അതിർത്തിയിൽ നിന്ന് 10 കിലോമീറ്റർ ചുറ്റളവിലുള്ള എല്ലാ യാത്രകളും ഒഴിവാക്കണമെന്ന് ആണ് അറിയിപ്പിൽ പറയുന്നത് . യുകെ സർക്കാരിൻറെ കോമൺവെൽത്ത് ആൻഡ് ഡെവലപ്മെന്റ് ഓഫീസ് ആണ് മുന്നറിയിപ്പ് നൽകിയിരിക്കുന്നത്. ഇത് കൂടാതെ പാകിസ്ഥാനും ഇന്ത്യയും തമ്മിലുള്ള അന്താരാഷ്ട്ര അതിർത്തിയിൽ നിന്ന് അഞ്ച് മൈലിനുള്ളിൽ അത്യാവശ്യമല്ലാത്ത എല്ലാ യാത്രകളും പാകിസ്ഥാൻ ഭരിക്കുന്ന കശ്മീരിൽ നിയന്ത്രണ രേഖയുടെ 10 മൈലിനുള്ളിലെ എല്ലാ യാത്രകളും ഒഴിവാക്കണമെന്നും അറിയിപ്പിൽ പറയുന്നുണ്ട്. ബ്രിട്ടീഷ് പൗരന്മാർ ഏറ്റവും പുതിയ വിവരങ്ങൾക്ക് അവരുടെ എയർലൈനുമായി ബന്ധപ്പെടണം.

ഇതോടൊപ്പം ജമ്മു കശ്മീർ മേഖലയിലേക്കുള്ള എല്ലാ യാത്രകളും മണിപ്പൂർ സംസ്ഥാനത്തേക്കുള്ള യാത്രകളും ഒഴിവാക്കണമെന്ന് വിദേശകാര്യ ഓഫീസ് അതിന്റെ ഇന്ത്യ യാത്രാ മുന്നറിയിപ്പിൽ പറയുന്നു. സംഘർഷം രൂക്ഷമായതോടെ വ്യോമാതിർത്തി ഒഴിവാക്കാൻ വിമാനക്കമ്പനികൾ വിമാനങ്ങൾ വഴിതിരിച്ചുവിട്ടതിനാൽ വിമാനങ്ങൾ ഇതിനകം തന്നെ റദ്ദാക്കലുകളുടെയും കൂട്ട വഴിതിരിച്ചുവിടലുകളുടെയും ഒരു പരമ്പര തന്നെ ഉണ്ടായിട്ടുണ്ട്. മെയ് 8 വ്യാഴാഴ്ച, ഇന്ത്യൻ വിമാനക്കമ്പനികൾ 430 വിമാനങ്ങൾ ആണ് റദ്ദാക്കിയത്. ഇത് രാജ്യത്തിന്റെ വിമാന ഷെഡ്യൂളിന്റെ മൂന്ന് ശതമാനമാണ്. അതേസമയം പാകിസ്ഥാനിലെ വിമാനക്കമ്പനികൾ 147 ലധികം വിമാനങ്ങൾ റദ്ദാക്കി. ഇത് ദൈനംദിന ഷെഡ്യൂളുകളുടെ 17 ശതമാനത്തിന് തുല്യമാണെന്ന് ദി ഇക്കണോമിക് ടൈംസ് റിപ്പോർട്ട് ചെയ്തു. ശ്രീനഗർ, ലേ, ജമ്മു, ധർമ്മശാല, അമൃത്സർ എന്നിവയുൾപ്പെടെ നിരവധി വടക്കൻ വിമാനത്താവളങ്ങൾ അടച്ചുപൂട്ടാൻ ഇന്ത്യയുടെ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ ഉത്തരവിട്ടു. ഇൻഡിഗോ, സ്‌പൈസ് ജെറ്റ്, എയർ ഇന്ത്യ തുടങ്ങിയ ആഭ്യന്തര വിമാനക്കമ്പനികൾ ഈ സ്ഥലങ്ങളിലേക്കുള്ള സർവീസുകൾ നിർത്തിവച്ചു.

ന്യൂസ് ഡെസ്ക്, മലയാളം യുകെ

യുകെയിലേയ്ക്കുള്ള വിദ്യാർത്ഥി വിസകളുടെ കാര്യത്തിൽ ലേബർ സർക്കാർ കടുത്ത നടപടികൾക്ക് ഒരുങ്ങുന്നതായുള്ള വാർത്ത മലയാളം യുകെ ന്യൂസ് നേരത്തെ റിപ്പോർട്ട് ചെയ്തിരുന്നു. ബിരുദതലത്തിന് താഴെയുള്ള വിദഗ്ധ വിദേശ തൊഴിലാളികൾക്കുള്ള വിസകൾ സമയബന്ധിതമായി പരിമിതപ്പെടുത്തുമെന്ന് ഹോം ഓഫീസ് പ്രഖ്യാപിച്ചു. യുകെയിലേക്കുള്ള നെറ്റ് മൈഗ്രേഷൻ കുറയ്ക്കുന്നതിനായി രൂപകൽപ്പന ചെയ്തിട്ടുള്ള വിശാലമായ പദ്ധതികളുടെ ഭാഗമായാണ് ഈ നടപടി. ഇതോടെ ബിരുദ തലത്തിന് താഴെയുള്ള കോഴ്സുകളിൽ പഠിച്ച യുകെയിൽ ജോലിക്കായി ശ്രമിക്കുന്ന വിദേശ വിദ്യാർഥികളുടെ ഭാവി കടുത്ത അനശ്ചിതത്വത്തിലാവും.

പുതിയ നിർദ്ദേശങ്ങൾ നടപ്പിലാക്കുന്നതോടെ സ്റ്റാൻഡേർഡ് സ്കിൽഡ് വിസകളിൽ കടുത്ത നിയന്ത്രണങ്ങൾ ആണ് നിലവിൽ വരുന്നത്. ഇത്തരം ജോലികൾക്ക് നേരത്തെ അനുവദനീയമായ വിഭാഗങ്ങളുടെ എണ്ണത്തിലും കാര്യമായ കുറവ് വരുത്താൻ സർക്കാർ പദ്ധതിയിടുന്നതായാണ് പുറത്തുവരുന്ന വിവരങ്ങൾ സൂചിപ്പിക്കുന്നത്. അതായത് റഗുലേറ്റഡ് ക്വാളിഫിക്കേഷൻ ഫ്രെയിം വർക്കിലും കാര്യമായ മാറ്റങ്ങൾ വരുത്താനാണ് സർക്കാർ പദ്ധതിയിടുന്നത് . ഈ വിഭാഗത്തിൽ ജോലിക്കായി എത്തുന്നവരെ വളരെ കുറഞ്ഞ ഒരു കാലയളവിൽ മാത്രമെ രാജ്യത്ത് തുടരാൻ അനുവദിക്കുകയുള്ളൂ.

ഇനിമുതൽ വിദേശ ജീവനക്കാരെ കൊണ്ടുവരുന്ന മേഖലയിലെ തൊഴിലുടമകൾ ആഭ്യന്തര റിക്രൂട്ട്മെൻ്റും നിശ്ചിത മാനദണ്ഡങ്ങളും പാലിക്കുന്നവരാണെന്ന് കർശനമായ പരിശോധനകൾക്ക് വിധേയമാക്കപ്പെടും. ഇമിഗ്രേഷൻ സംവിധാനത്തിൽ നിയന്ത്രണവും ക്രമവും പുനഃസ്ഥാപിക്കുന്നതിനും, ആഭ്യന്തര പരിശീലനവും വൈദഗ്ധ്യവും വർദ്ധിപ്പിക്കുന്നതിനും, സാമ്പത്തിക വളർച്ചയെ പ്രോത്സാഹിപ്പിക്കുന്നതിനൊപ്പം നെറ്റ് മൈഗ്രേഷൻ കുറയ്ക്കുന്നതിനുമുള്ള നിർണായക നടപടി എന്നാണ് ആഭ്യന്തര സെക്രട്ടറി യെവെറ്റ് കൂപ്പർ ഈ പദ്ധതിയെ പ്രശംസിച്ചത്. പുതിയ മാറ്റങ്ങൾ മലയാളികൾ ഉൾപ്പെടെ സ്കിൽഡ് വിസയിൽ യുകെയിൽ എത്താൻ ആഗ്രഹിക്കുന്നവർക്ക് കടുത്ത തിരിച്ചടിയാകുമെന്നാണ് കരുതപ്പെടുന്നത്.

റീഫോം യുകെയുടെ തിരഞ്ഞെടുപ്പ് വിജയത്തെ തുടർന്ന് കടുത്ത കുടിയേറ്റ വിരുദ്ധ നയങ്ങൾ നടപ്പിലാക്കാൻ ലേബർ പാർട്ടി സർക്കാർ തുനിയുന്നതായുള്ള റിപ്പോർട്ടുകൾ പുറത്തു വന്നിരുന്നു. തദ്ദേശ തിരഞ്ഞെടുപ്പിലെ റീഫോം യുകെയുടെ വിജയം ഭരണപക്ഷത്തെയും അതുപോലെതന്നെ മുഖ്യ പ്രതിപക്ഷമായ കൺസർവേറ്റീവ് പാർട്ടിയെയും കടുത്ത ആശങ്കയിലാക്കിയിരിക്കുകയാണ്. കാലിനടിയിലെ മണ്ണ് ഇളകി ഒലിക്കുന്നതിന്റെ അങ്കലാപ്പിലാണ് മുഖ്യധാര രാഷ്ട്രീയ പാർട്ടികൾ. റീഫോം യുകെ നേടുന്ന ജനസമ്മതി യുകെയിലേയ്ക്ക് കുടിയേറിയവരെയും കടുത്ത ആശങ്കയിലാക്കിയിട്ടുണ്ട്. വിദ്യാർത്ഥി വിസയിൽ എത്തിയ മലയാളികളും കടുത്ത ആശങ്കയിലാണ്. റീഫോം യുകെയുടെ മുന്നേറ്റത്തെ തടയിടാൻ കുടിയേറ്റ നയം രൂപീകരിക്കുന്ന ഘട്ടത്തിൽ ഏറ്റവും കൂടുതൽ തിരിച്ചടികൾ അഭിമുഖീകരിക്കുന്നത് മലയാളികൾ ഉൾപ്പെടെയുള്ള വിദ്യാർത്ഥി വിസയിൽ എത്തിയവരാണെന്ന വാർത്ത മലയാളം യുകെ ന്യൂസ് റിപ്പോർട്ട് ചെയ്തിരുന്നു.

ന്യൂസ് ഡെസ്ക്, മലയാളം യുകെ

സമൂഹമാധ്യമങ്ങളിൽ ജനാധിപത്യവിരുദ്ധ ആശയങ്ങൾ പങ്കിട്ടതിന്റെ പേരിൽ പുതിയതായി തിരഞ്ഞെടുക്കപ്പെട്ട റീഫോം യുകെയുടെ കൗൺസിലർമാർ കടുത്ത ആരോപണങ്ങൾ നേരിടുന്നതായുള്ള റിപ്പോർട്ടുകൾ പുറത്തുവന്നു. പുതിയതായി തിരഞ്ഞെടുക്കപ്പെട്ട 12 കൗൺസിലർമാരാണ് തീവ്ര വലതുപക്ഷ, ഇസ്ലാമോഫോബിക് ആശയങ്ങൾ സോഷ്യൽ മീഡിയയിൽ പോസ്റ്റ് ചെയ്തതിന്റെ പേരിൽ ആരോപണങ്ങൾ നേരിടുന്നത്. നേരത്തെ സമാനമായ ആരോപണങ്ങൾ നേരിട്ട മൂന്ന് കൗൺസിലർമാരും ഇതിൽ ഉൾപ്പെടുന്നുണ്ടെന്നാണ് അറിയാൻ കഴിഞ്ഞത്.

കഴിഞ്ഞ തദേശീയ തിരഞ്ഞെടുപ്പിൽ മത്സരിച്ച 1600 ലധികം സീറ്റുകളിൽ 677എണ്ണം നേടി റീഫോം യുകെ മറ്റ് മുഖ്യധാരാ രാഷ്ട്രീയ പാർട്ടികളെ ഞെട്ടിച്ചിരുന്നു. റീഫോം യുകെയുടെ ബാനറിൽ വിജയിച്ച മിക്ക കൗൺസിലർമാരുടെയും പൂർവ്വകാല ചെയ്തികളെ കുറിച്ചും പശ്ചാത്തലങ്ങളെ കുറിച്ചും സൂക്ഷ്മ പരിശോധനകൾ നടക്കുകയാണ്. കടുത്ത വലതുപക്ഷ ആശയങ്ങളുടെ പ്രചാരകരായാണ് റീഫോം യുകെ കഴിഞ്ഞ തിരഞ്ഞെടുപ്പിൽ കളം പിടിച്ചത്.

റീഫോം യുകെയുടെ തിരഞ്ഞെടുപ്പ് വിജയത്തെ തുടർന്ന് കടുത്ത കുടിയേറ്റ വിരുദ്ധ നയങ്ങൾ നടപ്പിലാക്കാൻ ലേബർ പാർട്ടി സർക്കാർ തുനിയുന്നതായുള്ള റിപ്പോർട്ടുകൾ പുറത്തു വന്നിരുന്നു. തദ്ദേശ തിരഞ്ഞെടുപ്പിലെ റീഫോം യുകെയുടെ വിജയം ഭരണപക്ഷത്തെയും അതുപോലെതന്നെ മുഖ്യ പ്രതിപക്ഷമായ കൺസർവേറ്റീവ് പാർട്ടിയെയും കടുത്ത ആശങ്കയിലാക്കിയിരിക്കുകയാണ്. കാലിനടിയിലെ മണ്ണ് ഇളകി ഒലിക്കുന്നതിന്റെ അങ്കലാപ്പിലാണ് മുഖ്യധാര രാഷ്ട്രീയ പാർട്ടികൾ. റീഫോം യുകെ നേടുന്ന ജനസമ്മതി യുകെയിലേയ്ക്ക് കുടിയേറിയവരെയും കടുത്ത ആശങ്കയിലാക്കിയിട്ടുണ്ട്. വിദ്യാർത്ഥി വിസയിൽ എത്തിയ മലയാളികളും കടുത്ത ആശങ്കയിലാണ്. റീഫോം യുകെയുടെ മുന്നേറ്റത്തെ തടയിടാൻ കുടിയേറ്റ നയം രൂപീകരിക്കുന്ന ഘട്ടത്തിൽ ഏറ്റവും കൂടുതൽ തിരിച്ചടികൾ അഭിമുഖീകരിക്കുന്നത് മലയാളികൾ ഉൾപ്പെടെയുള്ള വിദ്യാർത്ഥി വിസയിൽ എത്തിയവരാണെന്ന വാർത്ത മലയാളം യുകെ ന്യൂസ് റിപ്പോർട്ട് ചെയ്തിരുന്നു.

ന്യൂസ് ഡെസ്ക്, മലയാളം യുകെ

റോയൽ നേവിയുടെ തലവനായ അഡ്മിറൽ സർ ബെൻ കീയെ സസ്‌പെൻഡ് ചെയ്‌തു. ഇതിന് പുറമെ, ഫസ്റ്റ് സീ ലോർഡ് എന്ന പദവിയിൽ നിന്ന് പിന്മാറാൻ അദ്ദേഹത്തോട് ആവശ്യപ്പെട്ടതായും പ്രതിരോധ മന്ത്രാലയം അറിയിച്ചു. തിങ്കളാഴ്ച നടന്ന VE ദിനത്തിന്റെ 80-ാം വാർഷികാഘോഷങ്ങളിൽ അദ്ദേഹം പങ്കെടുക്കാതിരുന്നത് പിന്നാലെയാണ് വാർത്ത പുറത്ത് വന്നത്. ഈ കാലയളവിൽ സെക്കൻഡ് സീ ലോർഡായ വൈസ് അഡ്മിറൽ മാർട്ടിൻ കോണൽ ആണ് തൽക്കാലികമായി നേതൃത്വം ഏറ്റെടുത്തിരിക്കുന്നത്. നേരത്തെ വ്യക്തിപരമായ കാരണങ്ങളാലാണ് അദ്ദേഹം പരിപാടിയിൽ നിന്ന് മാറി നിന്നതെന്ന് പ്രതിരോധ മന്ത്രാലയം അറിയിച്ചിരുന്നു.

ലണ്ടൻ സർവകലാശാലയിലെ റോയൽ ഹോളോവേയിൽ നിന്ന് ബിരുദം നേടിയ ശേഷം 1984 ൽ യൂണിവേഴ്സിറ്റി കേഡറ്റായി റോയൽ നേവിയിൽ ചേർന്ന അഡ്മിറൽ സർ ബെൻ കീ ഹെലികോപ്റ്റർ എയർക്രൂ, പ്രിൻസിപ്പൽ വാർഫെയർ ഓഫീസർ എന്നീ മേഖലകളിൽ സേവനം അനുഷ്ഠിച്ചിട്ടുണ്ട്. 2016 ഫെബ്രുവരിയിൽ വൈസ് അഡ്മിറലായി അദ്ദേഹം തൻെറ സേവനം ആരംഭിച്ചു. തുടർന്ന് റോയൽ നേവിയുടെ ഫ്ലീറ്റ് കമാൻഡറായും പിന്നീട് സംയുക്ത പ്രവർത്തനങ്ങളുടെ മേധാവിയായും സേവനമനുഷ്ഠിച്ചു. 2021 ൽ ഫസ്റ്റ് സീ ലോർഡ് ആയി നിയമിതനായി. എച്ച്എംഎസ് സാൻഡൗൺ, എച്ച്എംഎസ് അയൺ ഡ്യൂക്ക്, എച്ച്എംഎസ് ലങ്കാസ്റ്റർ, എച്ച്എംഎസ് ഇല്ലസ്ട്രിയസ് എന്നീ നാല് കപ്പലുകളെ നയിച്ചിട്ടുണ്ട്.

അഡ്മിറൽ സർ ബെൻ കീക്കെതിരെ റോയൽ നേവിയിൽ, പ്രത്യേകിച്ച് സബ്മറൈൻ സർവീസിൽ, നിന്ന് വ്യാപകമായ സ്ത്രീവിരുദ്ധത, ലൈംഗിക പീഡനം, ഭീഷണിപ്പെടുത്തൽ, ആക്രമണം എന്നിവ പുറത്തുവന്നതിനെ തുടർന്ന് കഴിഞ്ഞ വർഷം അദ്ദേഹം പരസ്യ ക്ഷമാപണം നടത്തിയിരുന്നു. സംഭവത്തിൽ അന്വേഷണം പുരോഗമിക്കുകയാണെന്ന് പ്രതിരോധ മന്ത്രാലയം സ്ഥിരീകരിച്ചു.

ന്യൂസ് ഡെസ്ക്, മലയാളം യുകെ

ലണ്ടനിൽ ഇസ്രയേൽ എംബസിയ്ക്കെതിരെ ഭീകരാക്രമണത്തിന് പദ്ധതിയിട്ടെന്ന കുറ്റത്തിന് ഒരു ഇറാനിയൻ പൗരൻ കൂടി അറസ്റ്റിലായി. ഇതോടെ അടുത്തകാലത്ത് ഭീകര പ്രവർത്തന കുറ്റത്തിന് അറസ്റ്റിലായ ഇറാനിയൻ വംശജരുടെ എണ്ണം എട്ടായി . രണ്ട് വ്യത്യസ്ത സംഭവങ്ങളിലായാണ് പോലീസ് അടുത്തിടെ ഇവരെ അറസ്റ്റ് ചെയ്തത്. ആദ്യത്തെ സംഘത്തിൽ 4 ഇറാനിയൻ പൗരന്മാരും അഞ്ചാമനായി ഒരാളും ഉൾപ്പെട്ടിരുന്നു. ഇയാളെ കുറിച്ചുള്ള കൂടുതൽ വിവരങ്ങൾ പോലീസ് വെളിപ്പെടുത്തിയിട്ടില്ല .

ദേശീയ സുരക്ഷാ നിയമപ്രകാരം വെള്ളിയാഴ്ച രാവിലെ വടക്കുപടിഞ്ഞാറൻ ലണ്ടനിൽ നിന്നാണ് 31 കാരനെ കസ്റ്റഡിയിലെടുത്തതായി മെട്രോപൊളിറ്റൻ പോലീസ് പറഞ്ഞു. ഈ സംഘത്തിൽ പെട്ട 39, 44, 55 വരെ വയസ്സുള്ള മറ്റ് മൂന്നു പേരെ മെയ് 3-ാം തീയതി പോലീസ് അറസ്റ്റ് ചെയ്തിരുന്നു. മെയ് 17 വരെ ഇവരെ കസ്റ്റഡിയിൽ വെക്കാൻ പോലീസിന് വാറണ്ട് ലഭിച്ചിട്ടുണ്ട്.

സമീപ വർഷത്തിൽ നമ്മൾ കണ്ട ഏറ്റവും വലിയ ഭീഷണിയാണ് പോലീസ് സമർത്ഥമായി നേരിട്ടതെന്നാണ് ആഭ്യന്തര സെക്രട്ടറി യെവെറ്റ് കൂപ്പർ വിശേഷിപ്പിച്ചത്. ദേശീയ സുരക്ഷാ ഭീഷണികളോട് കരുതലോടെ പ്രതികരിക്കേണ്ടതിൻ്റെ ആവശ്യകതയിലേയ്ക്കാണ് പ്രസ്തുത സംഭവങ്ങൾ വിരൽ ചൂണ്ടുന്നതെന്ന് ആഭ്യന്തര സെക്രട്ടറി പറഞ്ഞു. അന്വേഷണം ഇപ്പോഴും പ്രാരംഭ ദശയിലാണെന്നും ഈ വിഷയവുമായി ബന്ധപ്പെട്ട് പൊതുജനങ്ങൾക്ക് എന്തെങ്കിലും അപകടസാധ്യത ഉണ്ടോ എന്ന് തിരിച്ചറിയുന്നതിന് സാധ്യമായ അന്വേഷണം പുരോഗമിക്കുകയാണെന്നും മെറ്റ്സ് കൗണ്ടർ ടെററിസം കമാൻഡിന്റെ തലവൻ കമാൻഡർ ഡൊമിനിക് മർഫി പറഞ്ഞു.

ന്യൂസ് ഡെസ്ക്, മലയാളം യുകെ

ഒട്ടേറെ സ്വപ്നങ്ങളുമായി യുകെയിലെത്തി രണ്ടുവർഷം തികയും മുമ്പ് മലയാളി നേഴ്സ് മരണമടഞ്ഞു. ഗ്ലോസ്റ്ററിലെ സ്ട്രൗഡില്‍ താമസിക്കുന്ന മലയാളി നേഴ്‌സ് വിന്‍സി കാഞ്ഞിരപറമ്പില്‍ വര്‍ഗീസ് (39) ആണ് മരണത്തിന് കീഴടങ്ങിയത്. ക്യാൻസർ രോഗം അധികരിച്ചതിനെ തുടർന്ന് വിൻസി നാട്ടിലേക്ക് തിരിച്ചെത്തിയിരുന്നു. നാട്ടിൽ ചികിത്സയിലിരിക്കെയാണ് വിൻസി മരണത്തിന് കീഴടങ്ങിയത്.

മുക്കാട്ടുകര കണ്ണനായ്ക്കൽ കാഞ്ഞിരപറമ്പിൽ വറതുണ്ണിയുടെയും റോസിയുടെയും മകളാണ്. കുമ്പളങ്ങാട് മേലിട്ട് റിജു മോൻ ആണ് വിൻസിയുടെ ഭർത്താവ്. 9 , 8, 6 ക്ലാസുകളിൽ പഠിക്കുന്ന അന്ന മരിയ, ഏഞ്ചല്‍ മരിയ, ആഗ്‌ന മരിയ എന്നിവരാണ് മക്കൾ.

സ്ട്രൗഡ് ആശുപത്രിയില്‍ നേഴ്സായി ജോലി ചെയ്യുകയായിരുന്ന വിന്‍സി. ഇതിനിടെ ക്യാൻസർ രോഗം തിരിച്ചറിയുകയായിരുന്നു . തുടർ ചികിത്സയ്ക്കായി ഏപ്രിൽ അവസാനത്തോടെ ആണ് വിൻസി നാട്ടിൽ എത്തിയത് .

മരണ വിവരം അറിഞ്ഞ് ഭർത്താവ് റിജോയും മക്കളും യുകെയിൽ നിന്ന് നാട്ടിൽ എത്തിയിട്ടുണ്ട് . സംസ്കാരം ഇന്ന് 11 – ന് അത്താണി പരിശുദ്ധ വ്യാകുലമാതാവിൻ പള്ളിയിൽ.

വിൻസിയുടെ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

ഇംഗ്ലണ്ടിലെ മിക്ക സർവകലാശാലകളും കടുത്ത സാമ്പത്തിക പ്രതിസന്ധി അഭിമുഖീകരിക്കുന്നതായുള്ള റിപ്പോർട്ടുകൾ പുറത്തുവന്നു. സർവകലാശാലകളുടെ വരുമാനത്തിൽ തുടർച്ചയായ മൂന്നാം വർഷവും ഇടിവ് നേരിട്ടതായി ഉന്നത വിദ്യാഭ്യാസ റെഗുലേറ്റർ ആണ് അറിയിച്ചത്. മലയാളികൾ ഉൾപ്പെടെയുള്ള അന്താരാഷ്ട്ര വിദ്യാർഥികളുടെ എണ്ണം കുറയുന്നതാണ് വരുമാനം കുത്തനെ ഇടിയുന്നതിന്റെ പ്രധാന കാരണമായി ചൂണ്ടി കാണിക്കപ്പെടുന്നത്.

കെട്ടിടങ്ങൾ ഉൾപ്പെടെയുള്ള അടിസ്ഥാന സൗകര്യങ്ങൾ മാറ്റിവെച്ച് പലരും ബഡ്ജറ്റ് കമ്മിയെ മറികടക്കാൻ ശ്രമിക്കുകയാണ്. ഇതുകൂടാതെ പല യൂണിവേഴ്സിറ്റികളിലും ജീവനക്കാരുടെ എണ്ണം കുറയ്ക്കാനുള്ള നടപടിയും സ്വീകരിക്കുന്നുണ്ട്. ഈ വിഷയത്തിൽ ഓഫീസ് ഫോർ സ്റ്റുഡന്റ്‌സിന്റെ (OfS) വാർഷിക സാമ്പത്തിക പരിശോധന കണ്ടെത്തിയ കാര്യങ്ങൾ അക്ഷരാർത്ഥത്തിൽ യുകെയിലെ ഉന്നത വിദ്യാഭ്യാസ മേഖലയിലെ പ്രശ്നങ്ങളിലേയ്ക്ക് വിരൽ ചൂണ്ടുന്നതാണ്. പിടിച്ചു നിൽക്കുന്നതിനായി പല സർവകലാശാലകളും 400 മില്യണിലധികം വിലമതിക്കുന്ന ഭൂമിയും സ്വത്തുക്കളും വിറ്റഴിക്കാൻ പദ്ധതിയിടുന്നതായുള്ള ഞെട്ടിപ്പിക്കുന്ന വിവരങ്ങളും റിപ്പോർട്ടിൽ ഉണ്ട്.

യുകെയിൽ നിന്നല്ലാതെ വിദ്യാർത്ഥികളെ പ്രതീക്ഷിച്ച രീതിയിൽ ലഭിക്കാത്തതാണ് മിക്ക സർവകലാശാലകളും നേരിടുന്ന പ്രധാന പ്രശ്നം. കഴിഞ്ഞ വർഷത്തെ അപേക്ഷിച്ച് ഈ വർഷം അന്താരാഷ്ട്ര വിദ്യാർത്ഥികളുടെ എണ്ണത്തിൽ 21 ശതമാനം കുറവുണ്ടാകുമെന്നാണ് വിലയിരുത്തപ്പെടുന്നത്. അതിനർത്ഥം ഈ മേഖലയിലെ സാമ്പത്തിക വെല്ലുവിളികൾ വീണ്ടും കൂടും എന്നാണെന്ന് ഒ എഫ് എസിന്റെ റെഗുലേഷൻ ഡയറക്ടർ ഫിലിപ്പ് പിക്ക്ഫോർഡ് പറഞ്ഞു. ട്യൂഷൻ ഫീ കുറവുള്ള യു കെ വിദ്യാർഥികളെ പഠിപ്പിക്കുന്നതിനുള്ള കമ്മി നികത്താൻ ആണ് സർവകലാശാലകൾ പ്രധാനമായും അന്താരാഷ്ട്ര വിദ്യാർഥികളെ ആശ്രയിക്കുന്നത്. എന്നാൽ സമീപകാലത്ത് ഏർപ്പെടുത്തിയ കുടിയേറ്റ വിസ നയങ്ങൾ മൂലം അന്താരാഷ്ട്ര റിക്രൂട്ട്മെൻ്റിൽ കനത്ത ഇടിവാണ് ഉണ്ടായിരിക്കുന്നത്. അടുത്തയിടെ തദ്ദേശീയ തിരഞ്ഞെടുപ്പിൽ റീഫോം യുകെ ഉയർത്തിയ വെല്ലുവിളികളെ നേരിടാൻ സർക്കാർ കുടിയേറ്റ നയം കർശനമാക്കുമെന്നാണ് പൊതുവെ വിലയിരുത്തപ്പെടുന്നത്. ഇത് ഏറ്റവും ആദ്യം പെർമനൻ്റ് വിസയ്ക്കായി അപേക്ഷിക്കുന്ന മലയാളികൾ ഉൾപ്പെടെയുള്ള വിദ്യാർത്ഥികളെ ആണ് ബാധിക്കുക എന്ന വാർത്ത മലയാളം യുകെ ന്യൂസ് റിപ്പോർട്ട് ചെയ്തിരുന്നു

ന്യൂസ് ഡെസ്ക്, മലയാളം യുകെ

ഇന്ത്യ പാകിസ്ഥാൻ സംഘർഷം കനക്കുന്നതിൻ്റെ അലയൊലികൾ യുകെയിലും ദൃശ്യമാകുന്നതിന്റെ റിപ്പോർട്ടുകൾ പലരും മലയാളം യുകെ ന്യൂസുമായി പങ്കുവെച്ചു. പ്രകോപനപരമായ പെരുമാറ്റവുമായി ഇന്ത്യക്കാർക്കെതിരെ പാകിസ്ഥാൻ വംശജർ പെരുമാറുന്നതായുള്ള വിവരങ്ങൾ ആണ് പുറത്തു വന്നത്. വെയ്ക്ക് ഫീൽഡിൽ 18 വയസ്സിനടുത്ത് പ്രായമുള്ള പാക്കിസ്ഥാനികൾ മലയാളി കുട്ടികൾ കളിക്കുന്ന സ്ഥലത്ത് വന്ന് നിന്ന് ഇന്ത്യക്കാരാണോ എന്ന് ചോദിച്ച് ആക്രമിക്കാൻ ശ്രമിച്ചതായാണ് അറിയാൻ സാധിച്ചത്. 11 വയസ്സ് മാത്രം പ്രായമുള്ള കൊച്ചു കുട്ടികളുടെ അടുത്ത് വന്ന് ക്രിക്കറ്റ് ബാറ്റു കൊണ്ട് അടിക്കാൻ ശ്രമിക്കുകയും അവരെ കളിച്ചു കൊണ്ടിരുന്ന സ്ഥലത്തു നിന്ന് ഓടിക്കാൻ ശ്രമിച്ചതായും ഉള്ള ഗുരുതരമായ പരാതികൾ ആണ് ഉയർന്നു വന്നത്.

സമാനമായ ഒരു സംഭവം ഇന്നലെ വെയ്ക്ക് ഫീൽഡിൽ തന്നെ റിപ്പോർട്ട് ചെയ്യപ്പെട്ടിട്ടുണ്ട്. ഇവിടെ ഒരു ഷോപ്പിംഗ് സെൻററിൽ ഇന്ത്യക്കാരനായ ഒരാളെ പാക്കിസ്ഥാനികൾ മർദ്ദിച്ചതായാണ് അറിയാൻ സാധിച്ചത്. ഇങ്ങനെ യുകെയുടെ വിവിധ ഭാഗങ്ങളിൽ പാകിസ്ഥാൻ വംശജർ പ്രകോപനം സൃഷ്ടിക്കുന്നത്തിന്റെ റിപ്പോർട്ടുകൾ പുറത്തുവരുന്നുണ്ട്. ഈ സാഹചര്യത്തിൽ പെൺകുട്ടികളെയും കൊച്ചു കുട്ടികളെയും ഒറ്റയ്ക്ക് പുറത്തേയ്ക്ക് വിടുന്നതിലെ അപകടസാധ്യതകളിലേയ്ക്കാണ് ഈ സംഭവങ്ങൾ വിരൽചൂണ്ടുന്നത്.

ഇതിനിടെ ഇന്ത്യയും പാക്കിസ്ഥാനും തമ്മിലുള്ള സംഘർഷം കൂടുന്നതിന്റെ വാർത്തകളാണ് പുറത്തു വന്നു കൊണ്ടിരിക്കുന്നത്. അതിർത്തിയിൽ തുടർച്ചയായി പ്രകോപനം സൃഷ്ടിച്ച പാക്കിസ്ഥാന് ഇന്ത്യ കനത്ത തിരിച്ചടി നൽകിയിരിക്കുകയാണ്. തലസ്ഥാനമായ ഇസ്ലാമാബാദ്, ലഹോർ, കറാച്ചി, പെഷാവർ, സിയാൽകോട്ട് തുടങ്ങി 12 ഇടങ്ങളിൽ ഇന്ത്യ കനത്ത ആക്രമണം തുടരുകയാണ്. പുലർച്ചെ ജമ്മുവിൽ പാക്ക് പ്രകോപനത്തെ തുടർന്ന് തുടർച്ചയായി അപായ സൈറൺ മുഴങ്ങിയതിനു പിന്നാലെ സമ്പൂർണ ബ്ലാക്ഔട്ട് പ്രഖ്യാപിച്ചു. കറാച്ചി തുറമുഖത്ത് ഇന്ത്യൻ നാവികസേനയുടെ യുദ്ധക്കപ്പലായ ഐഎൻഎസ് വിക്രാന്ത് ആക്രമണം നടത്തിയെന്നാണ് സൂചന.

ന്യൂസ് ഡെസ്ക്, മലയാളം യുകെ

എൻ എച്ച് എസ് കടുത്ത സാമ്പത്തിക പ്രതിസന്ധിയെ നേരിടുന്നതായുള്ള റിപ്പോർട്ടുകൾ പുറത്തുവന്നു. ഇതിന്റെ ഭാഗമായി എൻഎച്ച്എസ് ഇംഗ്ലണ്ടിലെ ആശുപത്രികളിലെ ജീവനക്കാരെയും സേവനങ്ങളെയും വെട്ടി കുറയ്ക്കാനുള്ള നടപടികൾ ആരംഭിച്ചു. ചികിത്സയുടെയും പരിചരണത്തിന്റെയും കാര്യത്തിൽ റേഷൻ സമ്പ്രദായം കൊണ്ടുവരുന്ന കാര്യം പരിഗണനയിലാണെന്നാണ് അറിയാൻ സാധിച്ചത്.

ചിലവ് കുറയ്ക്കലിന്റെ ഭാഗമായി റിഹാബിലിറ്റേഷൻ സെൻററുകൾ അടച്ചുപൂട്ടൽ, ടോക്കിങ് തെറാപ്പി സേവനങ്ങളിൽ കുറവ് വരുത്തുക, പ്രായമാകുന്നവരെ പരിചരിക്കുന്നതിനുള്ള കിടക്കുകളുടെ എണ്ണം കുറയ്ക്കുക തുടങ്ങിയ നടപടികളാണ് സ്വീകരിക്കുന്നത്. 2025 – 26 കാലയളവിൽ നേരിടുന്ന 6.6 ബില്യൺ പൗണ്ടിന്റെ കമ്മിയെ മറികടക്കാൻ കടുത്ത നടപടികൾ സ്വീകരിക്കാൻ എൻ എച്ച് എസ് ഇംഗ്ലണ്ടിന്റെ പുതിയ ചീഫ് എക്സിക്യൂട്ടീവ് സർ ജിം മാക്കി ആശുപത്രികൾക്ക് കർശന നിർദേശം നൽകിയെന്നാണ് വിവിധ മാധ്യമങ്ങൾ റിപ്പോർട്ട് ചെയ്തത്.

കഴിഞ്ഞ വർഷവും ഇത്തവണയും എൻഎച്ച്എസിന് സർക്കാർ 22 ബില്യൺ പൗണ്ട് അധികമായി നൽകിയിരുന്നു. എന്നാലും എൻഎച്ച്എസിലെ വിവിധ ട്രസ്റ്റുകൾ കടുത്ത സാമ്പത്തിക പ്രശ്നത്തിൽ കൂടി കടന്നു പോകുന്നതായാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. സർക്കാർ പരിചരണങ്ങളെയും ചികിത്സയുടെ ഗുണനിലവാരത്തിനെയും ബാധിക്കാൻ സാധ്യതയുള്ള 1500 തസ്തികകൾ വരെ വെട്ടി കുറയ്ക്കാൻ ചില ട്രസ്റ്റുകൾ പദ്ധതിയിടുന്നതായാണ് അറിയാൻ സാധിച്ചത്.

ന്യൂസ് ഡെസ്ക്, മലയാളം യുകെ

യുകെയും യുഎസുമായി വ്യാപാര കരാർ യാഥാർത്ഥ്യമായി. കരാർ നിലവിൽ വരുന്നതോടെ കാറുകൾ, അലൂമിനിയം, സ്റ്റീൽ എന്നിവയ്ക്ക് ഏർപ്പെടുത്തിയ താരിഫുകൾ വെട്ടി കുറയ്ക്കും എന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. ആയിരക്കണക്കിന് ബ്രിട്ടീഷ് തൊഴിലുകൾ സംരക്ഷിക്കപ്പെടുമെന്ന് പ്രധാനമന്ത്രി കെയർ സ്റ്റാർമർ പറഞ്ഞു.

ചരിത്രപരമായ നേട്ടമെന്നാണ് പ്രസ്തുത കരാറിനെ പ്രധാനമന്ത്രി കെയർ സ്റ്റാർമർ വിശേഷിപ്പിച്ചത്. ബ്രിട്ടീഷ് സ്റ്റീൽ, അലുമിനിയം കയറ്റുമതിയിൽ ഏർപ്പെടുത്തിയ 25 ശതമാനം താരിഫ് പൂർണ്ണമായും ഒഴിവാക്കാൻ യു എസ് സമ്മതിച്ചു. തകർച്ചയിൽ മുങ്ങി താഴുന്ന ബ്രിട്ടനിലെ സ്റ്റീൽ വ്യവസായത്തിന് ഇത് ഒരു പിടിവള്ളിയാണെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. ഇത് കൂടാതെ ബ്രിട്ടനിൽ നിർമ്മിക്കുന്ന കാറുകൾക്ക് യുഎസ് ആദ്യം പ്രഖ്യാപിച്ച 27.5 ശതമാനം താരിഫ് 10 ശതമാനമായി കുറയ്ക്കുകയും ചെയ്തു. 9 ബില്യൺ പൗണ്ടിലധികം വിലമതിക്കുന്ന ബ്രിട്ടീഷ് കാറുകളുടെ പ്രധാന കയറ്റുമതി വിപണിയാണ് യുഎസ്.

യുകെയിലെ ഫാർമസ്യൂട്ടിക്കൽ വ്യവസായത്തിന് കൂടുതൽ പരിഗണന നൽകുമെന്ന് യുഎസ് വാഗ്ദാനം ചെയ്തിട്ടുണ്ട്. കരാർ നിലവിൽ വരുന്നത് യുകെയിലെ ഇന്ത്യൻ കമ്പനികൾക്കും ആശ്വാസകരമാണ്. ടാറ്റാ സ്റ്റീൽ, ജാഗ്വാർ എന്നീ ടാറ്റാ ഗ്രൂപ്പ് കമ്പനികൾക്ക് കരാർ വലിയതോതിൽ പ്രയോജനം ചെയ്യും. കഴിഞ്ഞ ദിവസങ്ങളിൽ ഇന്ത്യയുമായി സ്വതന്ത്ര വ്യാപാര കരാറിൽ യുകെ ഏർപ്പെട്ടത് വൻ വാർത്താ പ്രാധാന്യം നേടിയിരുന്നു . ഇതിനു പിന്നാലെയാണ് ഇരട്ട നേട്ടമായി യുഎസുമായും രാജ്യം വ്യാപാര കരാറിൽ എത്തിയത്. യു കെ ഇന്ത്യ വ്യാപാര കരാർ നിലവിൽ വന്നത് യുഎസിനെ സമ്മർദ്ദത്തിലാക്കിയതായാണ് രാഷ്ട്രീയ നിരീക്ഷകർ വിലയിരുത്തുന്നത്. ട്രംപിന്റെ താരിഫ് ഏർപ്പെടുത്തലിലെ കടുംപിടുത്തം ഒഴിവാക്കാൻ ഇത് ഒരു കാരണമായി വിലയിരുത്തപ്പെടുന്നുണ്ട്.