ന്യൂസ് ഡെസ്ക്, മലയാളം യുകെ

രക്തത്തിൽ ഹീമോഗ്ലോബിന്റെ അളവ് കുറയുന്ന രോഗാവസ്ഥയാണ് ബീറ്റാ തലസീമിയ . രക്തത്തിലെ ജീനിന്റെ വ്യതിയാനം മൂലമാണ് ഇത് സംഭവിക്കുന്നത്. പാരമ്പര്യജന്യമായാണ് ഈ രോഗം പ്രധാനമായും വരുന്നത്. ലോകമെങ്ങും നിരവധി പേരാണ് ഈ രോഗം മൂലം വിഷമത അനുഭവിക്കുന്നത്.

ബീറ്റാ തലസീമിയ ചികിത്സയിൽ ഫലപ്രദമായ മുന്നേറ്റമാണ് എൻഎച്ച്എസ് നടത്തിയിരിക്കുന്നത് . ജീൻ എഡിറ്റിംഗ് ചികിത്സയാണ് ബീറ്റാ തലസീമിയ ബാധിതർക്ക് എൻഎച്ച്എസ് നൽകുന്നത്. മൂന്ന് വയസ്സ് പ്രായമുള്ളപ്പോൾ ബീറ്റാ തലസീമിയ രോഗം ബാധിച്ചതായി കണ്ടെത്തിയ കീർത്തന ബാലചന്ദ്രന് ഈ ചികിത്സയിലൂടെയാണ് രോഗം സുഖമായത്. മൂന്ന് വയസ്സുള്ളപ്പോഴാണ് കീർത്തന ബാലചന്ദ്രന് രോഗം തിരിച്ചറിഞ്ഞത്. ഇപ്പോൾ അവൾ ഡോക്ടർ ആകാൻ പഠിക്കുകയാണ്.

രക്തം ഉണ്ടാക്കുന്ന സ്റ്റെം സെല്ലുകളെ വേർതിരിച്ചെടുക്കുകയും ജീൻ എഡിറ്റിങ്ങിലൂടെ റീ പ്രോഗ്രാം ചെയ്ത് രോഗികളുടെ ശരീരത്തിലൂടെ കടത്തിവിടുകയുമാണ് ഈ ചികിത്സാരീതിയിൽ ചെയ്യുന്നത്. ഹീമോഗ്ലോബിൻ ഉത്പാദിപ്പിക്കാനുള്ള ശരീരത്തിന്റെ പ്രശ്നങ്ങൾ മൂലമുള്ള ഈ രോഗം പാരമ്പര്യമായി വരുന്നതാണ്. ഇത് വരുന്ന ആളുകൾക്ക് കഠിനമായ ക്ഷീണവും ശ്വാസതടസ്സവും അനുഭവപ്പെടും. ജീവിതകാലം മുഴുവൻ രക്തം മാറ്റിവച്ചാണ് ബീറ്റാ തലസീമിയ വരുന്നവർ ജീവിക്കുന്നത്. എന്നാൽ ഒറ്റ തവണ ജീൻ എഡിറ്റിംഗ് നടത്തുന്നതിലൂടെ ഈ രോഗത്തെ സുഖപ്പെടുത്താനുള്ള പ്രതിവിധിയാണ് എൻഎച്ച്എസ് കണ്ടെത്തിയിരിക്കുന്നത്. ചികിത്സയുടെ വിവിധ വശങ്ങളെ പരിഗണിച്ചതിനുശേഷം എസിറ്റിങ്ങ് നാഷണൽ ഇൻസ്റ്റിറ്റ്യൂട്ട് ഓഫ് ഹെൽത്ത് ആൻഡ് കെയർ എക്സലൻസ് മെഡിസിൻ വാച്ച്ഡോഗ് ജീൻ തെറാപ്പിക്ക് അംഗീകാരം നൽകി കഴിഞ്ഞു.

ന്യൂസ് ഡെസ്ക്, മലയാളം യുകെ

ഒരാഴ്ചത്തെ കുടിയേറ്റ വിരുദ്ധ കലാപം വലിയ ആശങ്കയാണ് യുകെയിലേയ്ക്ക് കുടിയേറിയ അന്യ രാജ്യക്കാർക്ക് പ്രത്യേകിച്ച് ഏഷ്യൻ വംശജർക്ക് സമ്മാനിച്ചിരിക്കുന്നത്. സ്കൂൾ അവധി കാലമായതിനാൽ പല മലയാളികളും കുടുംബമായി കേരളത്തിലാണ് ഉള്ളത്. യുകെയിൽ നടക്കുന്ന സംഭവവികാസങ്ങളിൽ കടുത്ത ആശങ്ക ഉണ്ടെന്നാണ് പലരും പ്രതികരിച്ചത്. മിക്കവരും നിലവിൽ യുകെയിലുള്ളവരുമായി ബന്ധപ്പെടുകയും സ്ഥിതിഗതികൾ വിലയിരുത്തുകയും ചെയ്യുന്നുണ്ട്. കലാപകാരികൾ ഏഷ്യൻ ന്യൂനപക്ഷങ്ങളെ ലക്ഷ്യം വച്ച് നടത്തുന്ന ആക്രമണങ്ങൾ മലയാളി കുട്ടികളിലും ഭീതി വിതച്ചിട്ടുണ്ട് . പല സ്ഥലങ്ങളിലും വൈകിട്ട് 6 മണി കഴിഞ്ഞ് പുറത്തിറങ്ങരുതെന്ന നിർദേശം നൽകപ്പെട്ടതായുള്ള റിപ്പോർട്ടുകളും പ്രചരിക്കുന്നുണ്ട്.

ഇതിനിടെ കുടിയേറ്റ വിരുദ്ധ കലാപത്തിനെതിരെ ആയിരങ്ങൾ തെരുവിലിറങ്ങി പ്രതിഷേധിച്ചു . “റഫ്യൂജിസ് ആർ വെൽക്കം ഹിയർ” എന്ന മുദ്രാവാക്യം വിളിച്ച് ചേർന്ന ഒത്തുചേരലുകൾ സമാധാനപരമായിരുന്നു എന്നാണ് പൊതുവെ പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. വിവിധ സ്ഥലങ്ങളിൽ നടന്ന പ്രതിഷേധങ്ങളെ നേരിടാൻ ആയിരക്കണക്കിന് പോലീസ് ഉദ്യോഗസ്ഥരെ വിന്യസിച്ചിരുന്നു. ഇന്നലെ ഇംഗ്ലണ്ടിൽ ഉടനീളം ആക്രമങ്ങൾ ഉണ്ടാകുമെന്ന പേടിയിൽ കട ഉടമകൾ നേരത്തെ കടകൾ അടച്ചിരുന്നു. ആക്രമങ്ങളുടെ പശ്ചാത്തലത്തിൽ പലസ്ഥലങ്ങളിലും വർക്ക് ഫ്രം ഹോമിന് അനുവാദം നൽകിയിരുന്നു . കഴിഞ്ഞ ആഴ്ച കലാപവുമായി ബന്ധപ്പെട്ട് 400 ലധികം അറസ്റ്റ് നടന്നതായാണ് റിപ്പോർട്ടുകൾ. പ്രതിഷേധത്തിന്റെ ഭാഗമായി പല സ്ഥലങ്ങളിലും പോലീസിനെ ആക്രമിക്കുന്ന സംഭവങ്ങളും ഉണ്ടായിട്ടുണ്ട്.

ജൂലൈ 29 – ന് അവധിക്കാല നൃത്ത, യോഗ ക്ലാസിൽ 17 വയസ്സുകാരൻ നടത്തിയ ആക്രമണത്തിൽ മൂന്ന് പെൺകുട്ടികൾ ദാരുണമായി കൊല്ലപ്പെട്ട സംഭവമാണ് പ്രശ്നങ്ങൾക്ക് തുടക്കമിട്ടത്. രണ്ട് മുതിർന്നവർ ഉൾപ്പെടെ ഗുരുതരമായി പരിക്കേറ്റ് മെർസി സൈഡിലെ ആശുപത്രികളിൽ പ്രവേശിച്ചിരുന്നവർ സുഖം പ്രാപിച്ച് ഡിസ്ചാർജ് ചെയ്യപ്പെട്ടതായുള്ള റിപ്പോർട്ടുകൾ ഇന്നലെ പുറത്തുവന്നിരുന്നു . അക്‌സൽ മുഗൻവ റുഡകുബാന എന്ന 17 കാരനെതിരെ മൂന്ന് കൊലപാതകങ്ങളും 10 കൊലപാതകശ്രമങ്ങളും ചുമത്തിയിട്ടുണ്ട്. കൊലപാതകം നടത്തിയ 17 വയസ്സുകാരൻ അനധികൃത കുടിയേറ്റക്കാരനാണെന്ന് സമൂഹമാധ്യമങ്ങളിൽ വ്യാപകമായി പ്രചരിച്ച തെറ്റായ വിവരങ്ങളുടെ അടിസ്ഥാനത്തിൽ യുകെയിലൊട്ടാകെ വ്യാപകമായി ആക്രമ സംഭവങ്ങളാണ് അരങ്ങേറി കൊണ്ടിരിക്കുന്നത്. പ്രതി അനധികൃത കുടിയേറ്റം നടത്തിയ മുസ്ലീമാണെന്ന രീതിയിലുള്ള പ്രചാരണങ്ങളെ തുടർന്ന് ആ വിഭാഗത്തിൻറെ ആരാധനാലയങ്ങളിൽ പലതും ആക്രമിക്കുന്ന സംഭവങ്ങളും ഉണ്ടായി.

ന്യൂസ് ഡെസ്ക്, മലയാളം യുകെ

യു കെ :- ബ്രിട്ടനിലെ ആരോഗ്യ മേഖലയെ സംബന്ധിച്ച കടുത്ത വിമർശനങ്ങളും മുന്നറിയിപ്പുമാണ് ജനറൽ മെഡിക്കൽ കൗൺസിൽ ( ജി എം സി ) നൽകിയിരിക്കുന്നത്. എൻഎച്ച്എസിൽ പ്രവർത്തിക്കുന്ന മൂന്നിലൊന്ന് ഡോക്ടർമാരും തങ്ങളുടെ “ബ്രേക്കിംഗ് പോയിന്റിൽ ” ആണ് എത്തിനിൽക്കുന്നതെന്ന് ജിഎംസി മുന്നറിയിപ്പ് നൽകുന്നു. നിലവിലെ പരിചരണ ആവശ്യങ്ങൾ നിറവേറ്റുന്നതിനായി തന്നെ പതിവായി അധിക മണിക്കൂറുകൾ ജോലി ചെയ്യുവാൻ ഡോക്ടർമാർ നിർബന്ധിതരാകുന്നുണ്ട്. യുകെയിലെ ഡോക്ടർമാരുടെ തൊഴിൽ ജീവിതത്തിന്റെ ഭയാനകമായ ചിത്രമാണ് ജിഎംസി മുന്നോട്ടുവയ്ക്കുന്നത്.

അമിത ജോലി മൂലം ക്ഷീണിതരായ ഡോക്ടർമാർ രോഗികളുടെ സുരക്ഷയ്ക്ക് ഭീഷണിയാകുന്നുണ്ടെന്നും ജിഎംസി വ്യക്തമാക്കി. യുകെയിലെ ആരോഗ്യ സേവനങ്ങൾ ഗുരുതരാവസ്ഥയിലാണ് പ്രവർത്തിക്കുന്നതെന്ന് ജിഎംസി ചീഫ് എക്സിക്യൂട്ടീവ് ചാർലി മാസി വ്യക്തമാക്കി. തങ്ങളുടെ ആരോഗ്യവും ക്ഷേമവും സംരക്ഷിക്കുവാൻ ഡോക്ടർമാർ പലപ്പോഴും തങ്ങളുടെ ജോലിസമയം കുറയ്ക്കുവാൻ ശ്രമിക്കുകയും അധിക മണിക്കൂറുകൾ ജോലി ചെയ്യുവാൻ വിസമ്മതിക്കുകയും ചെയ്യുന്ന സാഹചര്യമാണ് ഉള്ളത്. തങ്ങൾക്ക് മേലുള്ള സമ്മർദ്ദം മൂലം അവധി എടുക്കുന്ന ഡോക്ടർമാരുടെ എണ്ണവും കൂടുതലാണ്. യുകെയിലെ 3,80,000 ഡോക്ടർമാരിൽ, 4,288 പേരിൽ നടത്തിയ സർവ്വേയുടെ അടിസ്ഥാനത്തിലാണ് ജിഎംസി റിപ്പോർട്ട് പ്രസിദ്ധീകരിച്ചിരിക്കുന്നത്.

തീവ്രമായ ജോലി സമ്മർദങ്ങൾ അധിക ചുമതലകൾ ഏറ്റെടുക്കുന്നതിൽ നിന്ന് 41 ശതമാനം ഡോക്ടർമാരെ വിസമ്മതിക്കുവാൻ പ്രേരിപ്പിച്ചതായി റിപ്പോർട്ട് ചൂണ്ടിക്കാട്ടുന്നു. 47 ശതമാനം ഡോക്ടർമാർ അടുത്ത വർഷം തങ്ങളുടെ കരാർ സമയം വെട്ടി കുറയ്ക്കാൻ ആലോചിക്കുന്നുണ്ടെന്നും റിപ്പോർട്ട് വ്യക്തമാക്കുന്നു. ജനറൽ പ്രാക്ടീഷണർ ആയ ഒരു ഡോക്ടർ ജിഎംസിക്ക് നൽകിയ അഭിമുഖത്തിൽ, തന്റെ ജോലിയെ താൻ സ്നേഹിച്ചിരുന്നതായും, എന്നാൽ ഇപ്പോൾ താൻ തീർത്തും വെറുക്കുന്ന ഒരു സാഹചര്യത്തിലേയ്ക്കാണ് എത്തിപ്പെട്ടിരിക്കുന്നതെന്നും വ്യക്തമാക്കി. തനിക്ക് ക്ഷീണം തോന്നുന്നതായും താൻ ജോലി സ്ഥലത്തുനിന്ന് എത്രയും വേഗം തിരിച്ചു പോരാനാണ് ആഗ്രഹിക്കുന്നതെന്നും അദ്ദേഹം പറഞ്ഞു. എൻഎച്ച്എസ്സിന്റെ അവസ്ഥ തീർത്തും മോശമായ സാഹചര്യത്തിലാണ് എത്തിനിൽക്കുന്നതെന്നാണ് ജിഎംസി റിപ്പോർട്ട് സൂചിപ്പിക്കുന്നത്. ഇത്തരമൊരു സാഹചര്യത്തിൽ സർക്കാരിന്റെ ശക്തമായ ഇടപെടലുകൾ ആരോഗ്യ മേഖലയിൽ ആവശ്യമാണ്.

ന്യൂസ് ഡെസ്ക്, മലയാളം യുകെ

മലയാളികൾ ഉൾപ്പെടെ യുകെയിൽ കുടിയേറിയവരെ ഭീതിയിലാക്കി കലാപങ്ങൾ. യുകെയിലെ വിവിധ ഭാഗങ്ങളിൽ തീവ്ര വലതുപക്ഷ കലാപങ്ങളാണ് പൊട്ടി പുറപ്പെട്ടിരിക്കുന്നത്. യുകെയിൽ കുടിയേറിയ മലയാളികളിൽ ഭൂരിഭാഗം പേരും എൻഎച്ച്എസിൽ ജോലി ചെയ്തു വരുന്ന നേഴ്‌സുമാരാണ്. ഇത്തരം വംശീയ പ്രക്ഷോഭങ്ങൾ ജീവനക്കാരെ ബാധിക്കുന്നതായി എൻഎച്ച്എസ് ഇംഗ്ലണ്ടിൻ്റെ ചീഫ് എക്സിക്യൂട്ടീവ് അമൻഡ പ്രിച്ചാർഡ് പറയുന്നു.

തെക്ക്-പടിഞ്ഞാറൻ ഇംഗ്ലണ്ടിൽ നിന്നുള്ള 32 കാരനായ എൻഎച്ച്എസ് ഹോസ്പിറ്റൽ ഡോക്ടറായ സമീർ സുരക്ഷയെയും വർദ്ധിച്ചുവരുന്ന സെനോഫോബിയയെയും കുറിച്ചുള്ള തൻ്റെ ആശങ്കകൾ പങ്കുവെച്ചു. നാല് വർഷം മുമ്പ് ഈജിപ്തിൽ നിന്ന് മാറിയതിന് ശേഷം ഇതുപോലെ ഒരു അവസ്ഥ താൻ നേരിട്ടിട്ടില്ല എന്ന് അദ്ദേഹം പറയുന്നു. രാജ്യത്തെ പല ഭാഗങ്ങളിലായി വർദ്ധിച്ച് വരുന്ന വിദ്വേഷജനകമായ ഓൺലൈൻ കമൻ്റുകളും സമീപത്തുള്ള കുടിയേറ്റ വിരുദ്ധ പ്രകടനങ്ങളും വർദ്ധിച്ചതിൽ മലയാളികൾ ഉൾപ്പെടെ ഉള്ള കുടിയേറ്റക്കാർ കനത്ത ആശങ്കയിലാണ്.

മലയാളികളിൽ ഭൂരിഭഗം ആളുകളും കുടുംബമായാണ് യുകെയിലേക്ക് കുടിയേറുന്നത്. സമൂഹമാധ്യമങ്ങളിലും മറ്റും പ്രചരിക്കുന്ന കലാപത്തിൻെറ വിഡിയോകളും ചിത്രങ്ങളും കുട്ടികൾ ഉൾപ്പെടെയുള്ളവരിൽ കനത്ത ഭീതിയാണ് ഉണ്ടാക്കിയിരിക്കുന്നത്. ഇത്രയും നാൾ അഭിമുകീകരിക്കാത്ത സുരക്ഷാ ഭീഷണികളാണ് ഇപ്പോൾ നേരിടുന്നതെന്ന് പലരും പറയുന്നു. ആക്രമണങ്ങളുമായി ബന്ധപ്പെട്ട തീവ്ര വലതുപക്ഷ വീഡിയോകൾ ഇപ്പോൾ സമൂഹ മാധ്യമങ്ങളിൽ പ്രചരിക്കുന്നുണ്ട്

ന്യൂസ് ഡെസ്ക്, മലയാളം യുകെ

ജൂലൈ 29 – ന് അവധിക്കാല നൃത്ത, യോഗ ക്ലാസുകളിൽ 17 വയസ്സുകാരൻ നടത്തിയ ആക്രമണത്തിൽ മൂന്ന് പെൺകുട്ടികൾ ദാരുണമായി കൊല്ലപ്പെട്ടിരുന്നു. രണ്ട് മുതിർന്നവർ ഉൾപ്പെടെ ഗുരുതരമായി പരിക്കേറ്റ് മെർസി സൈഡിലെ ആശുപത്രികളിൽ പ്രവേശിച്ചിരുന്നവർ സുഖം പ്രാപിച്ച് ഡിസ്ചാർജ് ചെയ്യപ്പെട്ടതായുള്ള റിപ്പോർട്ടുകൾ പുറത്തുവന്നു . എൽസി ഡോട്ട് സ്റ്റാൻകോംബ്, ആലീസ് ഡ സിൽവ അഗ്വിയർ, ബെബെ കിംഗ് എന്നിവരാണ് സൗത്ത്പോർട്ട് ആക്രമണത്തിൽ കൊല്ലപ്പെട്ടത്. അക്‌സൽ മുഗൻവ റുഡകുബാന എന്ന 17 കാരനെതിരെ മൂന്ന് കൊലപാതകങ്ങളും 10 കൊലപാതകശ്രമങ്ങളും ചുമത്തിയിട്ടുണ്ട്.

കൊലപാതകം നടത്തിയ 17 വയസ്സുകാരൻ അനധികൃത കുടിയേറ്റക്കാരനാണെന്ന് സമൂഹമാധ്യമങ്ങളിൽ വ്യാപകമായി പ്രചരിച്ച തെറ്റായ വിവരങ്ങളുടെ അടിസ്ഥാനത്തിൽ യുകെയിലൊട്ടാകെ വ്യാപകമായി ആക്രമ സംഭവങ്ങളാണ് അരങ്ങേറി കൊണ്ടിരിക്കുന്നത്. പ്രതി അനധികൃത കുടിയേറ്റം നടത്തിയ മുസ്ലീമാണെന്ന രീതിയിലുള്ള പ്രചാരണങ്ങളെ തുടർന്ന് ആ വിഭാഗത്തിൻറെ ആരാധനാലയങ്ങളിൽ പലതും ആക്രമിക്കുന്ന സംഭവങ്ങളും ഉണ്ടായി. ഈ സാഹചര്യത്തിൽ മതിയായ സുരക്ഷിതത്വം വിവിധ വിഭാഗങ്ങളിൽ പെട്ടവർക്ക് ഉറപ്പാക്കുമെന്ന് പ്രധാനമന്ത്രി കെയർ സ്റ്റാർമർ പറഞ്ഞു. ഒരാഴ്ച മുമ്പ് പ്രശ്നങ്ങൾ ആരംഭിച്ചതിനു ശേഷമുള്ള രണ്ടാമത്തെ കോബ്ര അടിയന്തിര യോഗത്തിൽ അധ്യക്ഷത വഹിച്ചതിനു ശേഷം മാധ്യമങ്ങളുടെ പ്രതികരിക്കുകയായിരുന്നു അദ്ദേഹം.

രാജ്യത്തിൻറെ വിവിധ ഭാഗങ്ങളിൽ നടന്ന കലാപങ്ങളിൽ 400 ലധികം അറസ്റ്റുകൾ ആണ് ഇതുവരെ നടന്നിരിക്കുന്നത്. ഇന്ന് രാജ്യമൊട്ടാകെ ഏകദേശം മുപ്പതോളം പ്രതിഷേധ കൂട്ടായ്മകൾ സംഘടിപ്പിച്ചിട്ടുണ്ടെന്നാണ് പോലീസിന് ലഭിച്ചിരിക്കുന്ന വിവരം. അശാന്തിയും ആക്രമവും അഴിച്ചു വിടുന്നവർക്കെതിരെ ശക്തമായ നടപടികൾ പോലീസ് സ്വീകരിക്കുന്നുണ്ട്. ഗ്രേറ്റർ മാഞ്ചസ്റ്ററിലെ ലഹള നടത്തുന്നതിനിടെ നാശനഷ്ടം ഉണ്ടാക്കിയതിന് 18 കാരനായ ജെയിംസ് നെൽസനെ ജയിലിടച്ചു. ലഹളയിൽ പങ്കെടുത്തതിന് ജയിൽ ശിക്ഷ അനുഭവിക്കുന്ന ആദ്യ വ്യക്തിയാണ് ഇയാൾ.

ഇതിനിടെ കുടിയേറ്റ വിരുദ്ധ സമരത്തിൽ യുകെയിലെ മലയാളികളും ആശങ്കയിലാണ്. ബെൽ ഫാസ്റ്റിൽ താമസിക്കുന്ന മലയാളി യുവാവ് കുടിയേറ്റ വിരുദ്ധ കലാപത്തിന് ഇരയായതായുള്ള റിപ്പോർട്ടുകൾ പുറത്തു വന്നിരുന്നു. രാത്രി ജോലി കഴിഞ്ഞ് വരുന്ന വഴി അക്രമി സംഘം പിന്നില്‍ നിന്നു തല്ലി താഴെയിട്ട ശേഷം കൂട്ടം ചേര്‍ന്ന് നിലത്തിട്ടു മർദിക്കുകയായിരുന്നു. കുറച്ച് ദിവസം മുൻപ് യുവാവിനു നേരെ മുട്ടയേറു നടന്നിരുന്നു. ഇത് ചോദ്യം ചെയ്തതിൻെറ വൈരാഗ്യത്തിലാണ് പ്രതിഷേധക്കാര്‍ സംഘം ചേര്‍ന്ന് എത്തി അക്രമിച്ചതെന്നാണ് പുറത്ത് വരുന്ന വിവരങ്ങൾ സൂചിപ്പിക്കുന്നത്. പരുക്കേറ്റ ഇദ്ദേഹം ചികിത്സ തേടിയതോടെ ആശുപത്രി അധികൃതര്‍ പൊലീസിനെ അറിയിക്കുകയായിരുന്നു. ഇതോടെയാണ് സംഭവം പുറം ലോകമറിഞ്ഞത്. യുവാവിനു ഗുരുതരമായ പരുക്കുകളില്ല. പ്രായപൂര്‍ത്തിയാകാത്തവരാണ് ആക്രമണത്തിനു നേതൃത്വം നല്‍കുന്നവരില്‍ ഭൂരിഭാഗവും. സംഭവത്തിന് പിന്നാലെ പ്രശ്‌നം ഉള്ള മേഖലയിൽ താമസിക്കുന്ന മലയാളികൾ ജാഗ്രത പുലര്‍ത്തണമെന്ന നിർദ്ദേശം വിവിധ മലയാളി വാട്‌സാപ്പ് ഗ്രൂപ്പുകളിൽ പ്രചരിക്കുന്നുണ്ട്.

ന്യൂസ് ഡെസ്ക്, മലയാളം യുകെ

വരും വർഷങ്ങളിൽ രാജ്യത്തിൻറെ സാമ്പത്തിക വളർച്ചയിൽ കുറവ് ഉണ്ടാകുമെന്ന റിപ്പോർട്ടുകൾ പുറത്തുവന്നു. നാഷണൽ ഇൻസ്റ്റിറ്റ്യൂട്ട് ഓഫ് ഇക്കണോമിക് ആൻഡ് സോഷ്യൽ റിസർച്ചിൻ്റെ റിപ്പോർട്ടിലാണ് കണക്കുകൾ പുറത്തുവന്നത്. 2026 മുതൽ 2029 വരെയുള്ള കാലയളവിൽ യുകെയുടെ വളർച്ച 1.2 ശതമാനമായി കുറയുമെന്ന പ്രവചനം കടുത്ത ആശങ്ക ഉളവാക്കുന്നതായാണ് സാമ്പത്തിക വിദഗ്ധർ അഭിപ്രായപ്പെടുന്നത്. സാമ്പത്തിക മാന്ദ്യവും പണപെരുപ്പവും കൂടിയാൽ അത് ബാങ്ക് ഓഫ് ഇംഗ്ലണ്ട് പലിശ നിരക്ക് വീണ്ടും ഉയർത്തുന്നതിന് വഴിവെക്കുമോ എന്നതാണ് ഈ സാഹചര്യത്തിൽ ഉയർന്നുവരുന്ന പ്രധാന ചോദ്യം.

ആഗസ്റ്റ് ഒന്നാം തീയതി നടത്തിയ ബാങ്ക് ഓഫ് ഇംഗ്ലണ്ടിന്റെ അവലോകന യോഗത്തിൽ പലിശനിരക്ക് 5.25 ശതമാനത്തിൽ നിന്ന് 5 ശതമാനമായി ബാങ്ക് ഓഫ് ഇംഗ്ലണ്ട് കുറച്ചിരുന്നു. ഇതിനോട് അനുബന്ധമായി മോർട്ട്ഗേജ് നിരക്കുകൾ കുറയുന്നത് ലോണെടുക്കാൻ ആഗ്രഹിക്കുന്നവർക്ക് കടുത്ത ആശ്വാസമാണ് നൽകിയിരിക്കുന്നത്. പണപ്പെരുപ്പവും സാമ്പത്തിക പുരോഗതിയും ശരിയായ ദിശയിലാണെങ്കിൽ പലിശ നിരക്കുകളിൽ വീണ്ടും കുറവ് വരുമെന്നാണ് പൊതുവെ സാമ്പത്തിക വിദഗ്ധർ വിലയിരുത്തുന്നത്. 2025 – ൽ പലിശ നിരക്കുകൾ നിലവിലെ 5 ശതമാനത്തിൽ നിന്ന് 4.6% ആയി കുറയുമെന്നാണ് നേരത്തെ പുറത്തുവന്ന റിപ്പോർട്ടുകളിൽ പല സാമ്പത്തിക വിദഗ്ധരും അഭിപ്രായപ്പെട്ടിട്ടുണ്ട്. തുടർന്ന് 2026 -ൽ 4 ശതമാനമായും 2028 ൽ 3.5 ശതമാനവും ആയി പലിശ നിരക്കുകൾ കുറയുമെന്ന പ്രവചനവും പല സാമ്പത്തിക വിദഗ്ധരും നടത്തിയിരുന്നു .

എന്നാൽ ഈ പ്രവചനങ്ങളെ എല്ലാം കാറ്റിൽ പറത്തുന്ന കണക്കുകൾ ആണ് നാഷണൽ ഇൻസ്റ്റിറ്റ്യൂട്ട് ഓഫ് ഇക്കണോമിക് ആൻഡ് സോഷ്യൽ റിസർച്ച് പുറത്തു വിട്ടിരിക്കുന്നത്. 2026 മുതൽ 2029 വരെയുള്ള കാലയളവിൽ യുകെയുടെ വളർച്ച 1.2 ശതമാനമായി കുറയുമെന്നാണ് നാഷണൽ ഇൻസ്റ്റിറ്റ്യൂട്ട് ഓഫ് ഇക്കണോമിക് ആൻഡ് സോഷ്യൽ റിസർച്ച് പറയുന്നത്. എന്നാൽ യുകെയുടെ വളർച്ച നിരക്ക് 2.5 ശതമാനമായി ഉയർത്തുമെന്ന് ചാൻസിലർ റേച്ചൽ റീവ്സ് പറഞ്ഞു.

ന്യൂസ് ഡെസ്ക്, മലയാളം യുകെ

യു കെ :- മുസ്ലിം പൗരന്മാർക്ക് നേരെയുള്ള തീവ്ര വലതുപക്ഷ പ്രതിഷേധങ്ങൾ മൂലം ഹിജാബ് ധരിച്ച് വീട്ടിൽ നിന്ന് പുറത്തേക്കിറങ്ങാൻ തങ്ങൾക്ക് ഭയമുണ്ടെന്ന് വെളിപ്പെടുത്തിയിരിക്കുകയാണ് മുസ്ലിം സ്ത്രീകൾ. അതോടൊപ്പം തന്നെ വരും ദിവസങ്ങളിൽ കൂടുതൽ കലാപങ്ങൾക്കുള്ള സാധ്യതയുണ്ടെന്ന വാർത്തകളും വ്യാപകമായി പരക്കുന്നുണ്ട്. ആശങ്കാകുലരായ ജീവനക്കാരെ വീട്ടിൽ നിന്ന് ജോലി ചെയ്യുവാൻ പല കമ്പനി ഉടമകളും അനുവദിച്ചു കഴിഞ്ഞു. ആശങ്കാകുലരായ ജനങ്ങൾ തങ്ങളുടെ ഭയവും ആശങ്കയുമെല്ലാം സോഷ്യൽ മീഡിയയിലെ വിവിധ പ്ലാറ്റ് ഫോമുകളിൽ പങ്കുവെക്കുന്നുണ്ട്. ടിക് ടോക് വീഡിയോകളിൽ ഉൾപ്പെടെ തങ്ങൾ നേരിടുന്ന വംശീയ അതിക്രമം ജനങ്ങൾ തുറന്നുകാട്ടുകയാണ്. ബ്രിട്ടനിലെ നഗരങ്ങളിൽ ദിവസങ്ങളോളം നീണ്ടുനിന്ന പ്രതിഷേധങ്ങളും പ്രകടനങ്ങളുമാണ് ഇത്തരത്തിൽ ഒരു ഭയം ആളുകളിൽ ഉണ്ടാക്കുന്നതിന് ഇടയാക്കിയത്. ഇത്തരത്തിൽ പ്രതിഷേധങ്ങൾ നടത്തിയതിന് കുറഞ്ഞത് 400 പേരോളം ഇതുവരെ അറസ്റ്റിലായി കഴിഞ്ഞു. മുസ്ലിം പൗരന്മാർക്ക് നേരെ മാത്രമല്ല, കുടിയേറ്റക്കാർക്ക് നേരെയും വലതുപക്ഷ പ്രവർത്തകർ അതിക്രമങ്ങൾ അഴിച്ചു വിടുന്നുണ്ട്. ഇതിനോട് തീവ്ര വലതുപക്ഷ ഗ്രൂപ്പുകളുടെ ടെലഗ്രാം ചാനലിൽ പെട്രോൾ ബോംബുകൾ എങ്ങനെ നിർമ്മിക്കാം എന്നുള്ള നിർദ്ദേശങ്ങളും, റഷ്യൻ നിയോ- നാസി ഗ്രൂപ്പായ വൈറ്റ് പവർ ക്രൂവിന്റെ ആക്രമണങ്ങളെ കുറിച്ചുള്ള മാനുവലുകളും മറ്റും പങ്കുവയ്ക്കപ്പെട്ടതായും വാർത്തകൾ വ്യക്തമാക്കുന്നു. 14,000-ത്തിലധികം പേരുള്ള ഒരു ടെലിഗ്രാം ഗ്രൂപ്പിൽ ഇമിഗ്രേഷൻ അഭിഭാഷകരുടെയും സോളിസിറ്റർമാരുടെയും അവരുടെ സ്ഥാപനങ്ങളുടെയും ഉപദേശക ഏജൻസികളുടെയും ഒരു ലിസ്റ്റ് പങ്കുവെച്ച്, നാളെ രാത്രി ഒരു നിശ്ചിത സമയത്ത് അവരെ ആക്രമിക്കാനുള്ള ആഹ്വാനങ്ങളും മറ്റും നൽകിയതായും വാർത്തകൾ വ്യക്തമാക്കുന്നു. ഇത്തരം ഒരു സാഹചര്യമാണ് ആളുകളിൽ ഭീതി വളർത്തുന്നതിന് കാരണമായി തീർന്നത്.

ഇംഗ്ലീഷ് ഡിഫൻസ് ലീഗ് എന്ന സംഘടന ഈ കലാപങ്ങൾക്ക് പുറകിൽ ഉണ്ടെന്ന് പുതിയ തെളിവുകൾ സൂചിപ്പിക്കുന്നു. കുടിയേറ്റക്കാരെ പാർപ്പിച്ചിരിക്കുന്ന ഹോട്ടലുകൾക്ക് നേരെയും മുസ്ലിം പള്ളികൾക്ക് നേരെയും ആക്രമണങ്ങൾ ശക്തമായിരിക്കുകയാണ്. വിദ്വേഷ പ്രചരണങ്ങളും വ്യാജ വാർത്തകളും പ്രചരിപ്പിക്കുവാൻ സോഷ്യൽ മീഡിയ കാരണമായതായി ക്യാബിനറ്റ് മന്ത്രിമാർ കുറ്റപ്പെടുത്തി. സൗത്ത്പോർട്ടിൽ പെൺകുട്ടികളെ കുത്തി കൊലപ്പെടുത്തിയത് മുസ്ലിം കുടിയേറ്റക്കാരനാണെന്ന വ്യാജവാർത്ത രാജ്യത്തുടനീളം ആക്രമണങ്ങൾക്ക് വഴിതെളിച്ചു. ഇത്തരം ആക്രമണങ്ങളെ ചെറുക്കാനുള്ള എല്ലാവിധ നടപടികളും ശക്തമായി ഉണ്ടാകുമെന്ന് പ്രധാനമന്ത്രി കെയർ സ്റ്റാർമർ വ്യക്തമാക്കി.

ന്യൂസ് ഡെസ്ക്, മലയാളം യുകെ

യു കെ :- മലിനജലം കൈകാര്യം ചെയ്യുന്നതിൽ പരാജയപ്പെട്ടുവെന്ന് കണ്ടെത്തിയതിനെ തുടർന്ന് ഇൻഡസ്‌ട്രി റെഗുലേറ്ററായ ഓഫ്‌ വാട്ട് ഇംഗ്ലണ്ടിലെ മൂന്ന് വൻകിട ജല കമ്പനികൾക്ക് 168 മില്യൺ പൗണ്ട് പിഴ ചുമത്തുവാൻ നിർദ്ദേശിച്ചിരിക്കുകയാണ്. തെംസ് വാട്ടർ, യോർക്ക്ഷയർ വാട്ടർ, നോർത്തംബ്രിയൻ വാട്ടർ എന്നീ കമ്പനികൾക്കാണ് പിഴ ചുമത്തുവാൻ തീരുമാനിച്ചിരിക്കുന്നത്. ഓഫ്‌ വാട്ടിന്റെ ഈ നിർദ്ദേശം ഇനി പബ്ലിക് കൺസൾട്ടേഷന് വിധേയമാകും. വാട്ടർ കമ്പനികളുടെ പ്രകടനത്തെ കുറിച്ചുള്ള ഓഫ്‌വാട്ടിൻ്റെ എക്കാലത്തെയും വലിയ അന്വേഷണത്തിൻ്റെ ഭാഗമായാണ് ഈ പിഴ ചുമത്തൽ. ഭൂരിഭാഗം ജല കമ്പനികളും തങ്ങളുടെ മലിനജലം നദിയിലേക്കും കടലിലേക്കും മറ്റും ഒഴുക്കിവിടുന്നുണ്ടെന്നാണ് അന്വേഷണത്തിൽ കണ്ടെത്തിയിരിക്കുന്നത്. ഇത് പ്രകൃതിക്കും മനുഷ്യനും ഉണ്ടാക്കുന്ന ദോഷങ്ങൾ അനവധിയാണ്. ഇംഗ്ലണ്ടിലെ നദികളിലേക്കും കടലുകളിലേക്കും മലിനജലം ഒഴുകുന്നത് കഴിഞ്ഞ വർഷം ഇരട്ടിയിലേറെയായതായി ഓഫ്‌ വാട്ട് കണ്ടെത്തി. മൂന്ന് കമ്പനികളും നിയമപ്രകാരം ഉപഭോക്താക്കൾക്ക് അർഹമായ സേവനം നൽകുന്നുണ്ടോയെന്ന് ഓഫ്‌ വാട്ടിൻ്റെ അന്വേഷണം പരിശോധിച്ചു. എന്നാൽ തങ്ങളുടെ പൈപ്പ് നെറ്റ്‌വർക്കുകൾ സംരക്ഷിക്കുന്നതിൽ വേണ്ടത്ര നിക്ഷേപം ഇവർ നടത്തുന്നില്ലെന്നും, ഇതുമൂലം അസംസ്കൃത മലിനജലം ജലാശയങ്ങളിലേക്ക് ഒഴുകുന്നതിന് കാരണമാകുന്നുവെന്നും ഓഫ്‌ വാട്ട് തങ്ങളുടെ അന്വേഷണത്തിൽ കണ്ടെത്തി.

ചൊവ്വാഴ്ച യോർക്ക്ഷയർ വാട്ടറിന് 47 മില്യൺ പൗണ്ടും നോർത്തംബ്രിയൻ വാട്ടറിന് 17 മില്യൺ പൗണ്ടും പിഴ ചുമത്താൻ നിർദ്ദേശിച്ചു. തേംസ് വാട്ടറിന് 104 മില്യൺ പൗണ്ട് എന്ന റെക്കോർഡ് തുകയാണ് പിഴയായി ഓഫ്‌ വാട്ട് നിർദ്ദേശിച്ചിരിക്കുന്നത്. 2022-ൽ ഇംഗ്ലണ്ടിലെ വാട്ടർ കമ്പനികൾ അവരുടെ പെർമിറ്റ് ലംഘിച്ച് 6,000 തവണ മലിനജലം അനധികൃതമായി പുറന്തള്ളിയതായി ഈ വർഷമാദ്യം ബിബിസി നടത്തിയ അന്വേഷണത്തിൽ കണ്ടെത്തിയതിനെ തുടർന്നാണ് ഓഫ്‌ വാട്ട് തങ്ങളുടെ അന്വേഷണം ആരംഭിച്ചത്. ഓഫ്‌വാട്ടിന് കമ്പനികളുടെ വാർഷിക വിൽപ്പനയുടെ 10 ശതമാനം വരെ പിഴ ചുമത്താം. തെംസ് വാട്ടർ എന്ന കമ്പനിയുടെ കാര്യത്തിൽ വാർഷിക വിൽപ്പനയുടെ ഒൻപത് ശതമാനമാണ് പിഴയായി ചുമത്തപ്പെട്ടിരിക്കുന്നത്. ഇത് കുറ്റകൃത്യത്തിന്റെ തീവ്രത പ്രതിഫലിപ്പിക്കുന്നതാണെന്ന് ഓഫ്‌ വാട്ട് ചീഫ് എക്‌സിക്യൂട്ടീവ് ഡേവിഡ് ബ്ലാക്ക് പറഞ്ഞു.

തെംസ് വാട്ടറിൻ്റെ മലിനജല ശുദ്ധീകരണ പ്രവർത്തനങ്ങളിൽ മൂന്നിൽ രണ്ട് ഭാഗത്തിനും പ്രവർത്തന പ്രശ്‌നങ്ങളുണ്ടെന്ന് റെഗുലേറ്ററി ബോർഡ്‌ കണ്ടെത്തി. കൂടാതെ യോർക്ക്ഷയർ വാട്ടറിൻ്റെ മിക്ക മലിനജല ശുദ്ധീകരണ പ്രവർത്തനങ്ങളും 2018 മുതൽ തന്നെ മലിനജലം നദിയിലേക്ക് ഒഴുക്കിവിടുന്നതായും കണ്ടെത്തിയിട്ടുണ്ട്. അടിസ്ഥാന സൗകര്യങ്ങൾ മെച്ചപ്പെടുത്തുന്നതിനായി അടുത്ത അഞ്ച് വർഷത്തിനുള്ളിൽ ഉപഭോക്തൃ ബില്ലുകൾ 44% വർദ്ധിപ്പിക്കാനുള്ള നിർദ്ദേശമാണ് വാട്ടർ കമ്പനികൾ മുന്നോട്ടുവയ്ക്കുന്നത്. എന്നാൽ ഉപഭോക്ത ബില്ലുകളിൽ നിന്ന് ലഭിക്കുന്ന പണം കാര്യക്ഷമമായ രീതിയിൽ നവീകരണ പ്രവർത്തനങ്ങൾക്ക് വാട്ടർ കമ്പനികൾ ഉപയോഗിക്കുന്നില്ല എന്നാണ് പരിസ്ഥിതി പ്രവർത്തകർ ആരോപിക്കുന്നത്. ഓഫ്വാട്ടിൻ്റെ നടപടികളെ സ്വാഗതം ചെയ്യുന്നതായും, നമ്മുടെ ജലാശയങ്ങൾ മലിനീകരിക്കപ്പെടുവാൻ ഒരിക്കലും അനുവദിക്കില്ലെന്നും പരിസ്ഥിതി സെക്രട്ടറി സ്റ്റീവ് റീഡ് വ്യക്തമാക്കി. ഈ സർക്കാർ ജലമേഖലയെ അടിസ്ഥാനപരമായി പരിഷ്കരിക്കുമെന്നുള്ള ഉറപ്പും അദ്ദേഹം നൽകി.

ന്യൂസ് ഡെസ്ക്, മലയാളം യുകെ

യു കെ :- രാജ്യത്തുടനീളമുള്ള അക്രമാസക്തമായ പ്രതിഷേധങ്ങൾ വീണ്ടും ഇംഗ്ലീഷ് ഡിഫെൻസ് ലീഗ് ( ഇ ഡി എൽ ) എന്ന സംഘടനയെ സംബന്ധിച്ചുള്ള ചർച്ചകൾക്ക് തുടക്കം കുറിക്കാൻ കാരണമായിരിക്കുകയാണ്. തീവ്ര വലതുപക്ഷ സംഘടനയായ ഇ ഡി എല്ലിനെ ഭീകരവാദ നിയമ പ്രകാരം നിരോധിക്കണമോ എന്ന ചർച്ചകൾ വീണ്ടും സജീവമായിരിക്കുകയാണ്. ബ്രിട്ടനിലെ നിയമങ്ങൾ പ്രകാരം ഇംഗ്ലീഷ് ഡിഫൻസ് ലീഗിനെ നിരോധിക്കണമോ വേണ്ടയോ എന്നുള്ള തീരുമാനത്തിൽ ആഭ്യന്തര സെക്രട്ടറി യെവെറ്റ് കൂപ്പർ കൂടുതൽ ചർച്ചകൾ നടത്തുകയാണെന്ന് ബ്രിട്ടീഷ് ഡെപ്യൂട്ടി പ്രധാനമന്ത്രി ആംഗല റെയ്‌നർ കഴിഞ്ഞദിവസം വ്യക്തമാക്കിയിരുന്നു.

കഴിഞ്ഞ ആഴ്‌ച, ഇംഗ്ലണ്ടിലെ സൗത്ത്‌പോർട്ടിലെ ഒരു കമ്മ്യൂണിറ്റി സെൻ്ററിൽ ടെയ്‌ലർ സ്വിഫ്റ്റ് പ്രമേയമുള്ള നൃത്ത-യോഗ വർക്ക്‌ഷോപ്പിനിടെ, 17 വയസ്സുള്ള മൂന്ന് പെൺകുട്ടികളെ ആക്‌സൽ റുഡ്കുബാന എന്ന വ്യക്തി കുത്തിക്കൊലപ്പെടുത്തിയിരുന്നു. എന്നാൽ സോഷ്യൽ മീഡിയയിൽ പ്രതി മുസ്ലിം കുടിയേറ്റക്കാരനാണെന്ന തെറ്റായ വിവരങ്ങൾ പ്രചരിപ്പിക്കപ്പെടുകയും, ഇതേ തുടർന്ന് സണ്ടർലാൻഡിൽ മുസ്ലിം വിരുദ്ധ പ്രതിഷേധക്കാർ കലാപസമാനമായ അന്തരീക്ഷം സൃഷ്ടിക്കുകയും ചെയ്തു. തീവ്ര വലതുപക്ഷ സംഘടനയായ ഇംഗ്ലീഷ് ഡിഫൻസ് ലീഗ്, മുസ്ലിം വംശജരെയും അതേപോലെതന്നെ കുടിയേറ്റക്കാരെയും ശക്തമായി എതിർക്കുന്നവരാണ്. 2009ൽ ലണ്ടനിൽ ലൂട്ടണിലെ ഒരു ഇസ്ലാമിക ഗ്രൂപ്പിനെതിരെയുള്ള പ്രതിഷേധത്തിന്റെ ഭാഗമായാണ് ഈ സംഘടന സ്ഥാപിക്കപ്പെട്ടത്.

ബ്രിട്ടീഷ് നാഷണൽ പാർട്ടി മുൻ അംഗമായിരുന്ന സ്റ്റീഫൻ ക്രിസ്റ്റഫർ ലെനൻ എന്ന വ്യക്തി പിന്നീട് സംഘടനയുടെ നേതാവായി മാറി. ഇസ്ലാം യൂറോപ്യൻ മൂല്യങ്ങൾക്ക് ഭീഷണിയാണെന്ന് ചിന്തയാണ് ഇവർ പ്രോത്സാഹിപ്പിക്കുന്നത്. ഉയർന്ന തോതിലുള്ള കുടിയേറ്റങ്ങൾ മൂലം നഷ്ടമാകുന്ന ഇംഗ്ലീഷ് സംസ്കാരത്തെയാണ് ഇവർ ഉയർത്തിപ്പിടിക്കുന്നത്. എന്നാൽ യാഥാസ്ഥിതികമായ വലതുപക്ഷ ചിന്തകളിൽ നിന്ന് വ്യത്യസ്തമായി, ഇവർ യഹൂദ വിരുദ്ധത, സ്വവർഗ ബന്ധങ്ങളിലുള്ള വിരോധം എന്നിവ ഒന്നും തന്നെ അംഗീകരിക്കുന്നില്ല. വംശീയത പ്രോത്സാഹിപ്പിക്കുന്നില്ല എന്ന വ്യക്തമാക്കുന്നതോടൊപ്പം തന്നെ, പലപ്പോഴും വംശീയപരമായ മുദ്രാവാക്യങ്ങൾ സംഘടനയുടെ പ്രതിഷേധത്തിൽ നിഴലിക്കുന്നതായി അധികൃതർ വ്യക്തമാക്കുന്നു. സംഘടനയെ തീവ്രവാദ നിയമങ്ങൾ പ്രകാരം നിരോധിക്കണമോ വേണ്ടയോ എന്ന് ചർച്ചകൾ ശക്തമായി കൊണ്ടിരിക്കുകയാണ്.

ന്യൂസ് ഡെസ്ക്, മലയാളം യുകെ

എൻഎച്ച്എസിൻെറ ഒരു ദിവസം 900 കലോറിയുള്ള ലിക്വിഡ് ഡയറ്റിലൂടെ ടൈപ്പ് 2 പ്രമേഹം മാറ്റാനാവുമെന്ന് വിദഗ്ദ്ധർ. ദ ലാൻസെറ്റ് ഡയബറ്റിസ് & എൻഡോക്രൈനോളജി ജേണലിൽ പ്രസിദ്ധീകരിച്ച പഠന റിപ്പോർട്ട് അനുസരിച്ച് പഠനത്തിൽ പങ്കെടുത്ത 940 പേരും ഒരു വർഷം നീണ്ടുനിൽക്കുന്ന ഡയറ്റ് പ്രോഗ്രാം പൂർത്തിയാക്കി. ഇതിൻെറ അടിസ്ഥാനത്തിലാണ് റിപ്പോർട്ട് പുറത്ത് വിട്ടിരിക്കുന്നത്. തുടക്കത്തിൽ, ആരോഗ്യകരമായ ഖരഭക്ഷണങ്ങൾ പഠനത്തിൽ പങ്കെടുത്തവർക്ക് നൽകിയത്. പിന്നീട് ഷേക്ക്, സൂപ്പ് തുടങ്ങിയവയിലേക്ക് മാറുകയായിരുന്നു.

ഇംഗ്ലണ്ടിലെ എല്ലാ സ്ഥലങ്ങളിൽ നിന്നുള്ളവർക്കും ഈ പ്രോഗ്രാമിൽ പങ്കുചേരാൻ സാധിക്കും. മരുന്ന്, ഭക്ഷണക്രമത്തിലെ മാറ്റങ്ങൾ, അല്ലെങ്കിൽ ബാരിയാട്രിക് സർജറി തുടങ്ങിയ ചെയ്‌തവരാണെങ്കിലും അവർക്ക് അനുയോജ്യമായ രീതിയിൽ ശരീരഭാരം കുറയ്ക്കാനുള്ള സമീപനമാണ് ഡയബെറ്റിസ് യുകെ സ്വീകരിച്ചിരിക്കുന്നത്. സ്പെഷ്യലിസ്റ്റുകൾ എൻഎച്ച്എസ് വെയ്റ്റ്-ലോസ് മാനേജ്മെൻ്റ് സേവനങ്ങൾ വാഗ്ദാനം ചെയ്യുന്ന വെഗോവി എന്ന വെയ്റ്റ് ലോസ് ജാബിൽ നിന്ന് ഇത് തീർത്തും വ്യത്യസ്തമാണെന്ന് പറയുന്നു.

ഷേക്ക് ആൻഡ് സൂപ്പ് ഡയറ്റ് പ്രോഗ്രാമിന് പൂർണ്ണമായി ധനസഹായം നൽകുന്നത് എൻഎച്ച്എസ് ആണ്. അതുകൊണ്ട് തന്നെ ഈ പ്രോഗ്രാമിൽ പങ്കെടുക്കുന്ന ആർക്കും ചിലവുകൾ വരുന്നില്ല. ഇവർക്ക് നേരിട്ടോ ഓൺലൈനായോ ഡയറ്റ്, വ്യായാമ ഉപദേശ സെഷനുകളിൽ പങ്കെടുക്കാനുള്ള അവസരവും ഉണ്ട്. പ്രോഗ്രാമിൻെറ കീഴിൽ ഉള്ള നിർദ്ദേശങ്ങൾ സ്വീകരിക്കുകയാണെങ്കിൽ നല്ല രീതിയിൽ ഉള്ളൊരു ജീവിതം ഓരോരുത്തർക്കും മുൻപോട്ട് കൊണ്ടുപോകാനാവുമെന്ന് വിദഗ്ദ്ധർ പറയുന്നു. അനിയന്ത്രിതമായ പ്രമേഹം കണ്ണുകൾക്കും ഞരമ്പുകൾക്കും കേടുപാടുകൾ ഉൾപ്പെടെ ഗുരുതരമായ ആരോഗ്യപ്രശ്നങ്ങൾക്ക് ഇടയാക്കും. രാജ്യത്ത് അമിതവണ്ണം ഒരു പ്രതിസന്ധിയായി മാറിയിരിക്കുന്ന സാഹചര്യത്തിൽ എൻഎച്ച്എസിൻെറ ഈ പുതിയ സമീപനം അമിതവണ്ണത്തെ ഫലപ്രദമായി നേരിടാൻ കഴിയുമെന്ന് എൻഎച്ച്എസ് ദേശീയ ക്ലിനിക്കൽ ഡയറക്ടർ ഡോ. ക്ലെയർ ഹാംബ്ലിംഗ് പറഞ്ഞു.