ന്യൂസ് ഡെസ്ക്, മലയാളം യുകെ
യൂറോപ്പിലെ ആദ്യത്തെ യൂണിവേഴ്സൽ തീം പാർക്ക് യുകെയിൽ വരുന്നു. ബെഡ് ഫോര്‍ഡിന് സമീപം ഉടൻ നിർമ്മാണം ആരംഭിക്കുന്ന പാർക്ക് 2031 ഓടു കൂടി പ്രവർത്തനം ആരംഭിക്കുമെന്നാണ് പുറത്തു വരുന്ന റിപ്പോർട്ടുകൾ സൂചിപ്പിക്കുന്നത്. പാർക്കിന്റെ നിർമ്മാണത്തിലൂടെ ഏകദേശം 28,000 തൊഴിൽ അവസരങ്ങൾ ആണ് സൃഷ്ടിക്കപ്പെടുന്നത്. 476 ഏക്കർ വിസ്തൃതിയുള്ള ഈ സമുച്ചയത്തിന് ആദ്യ വർഷം തന്നെ 8.5 ദശലക്ഷം സന്ദർശകരെ ആകർഷിക്കാനാകുമെന്ന് യൂണിവേഴ്സൽ കണക്കാക്കി . യൂണിവേഴ്സൽ കമ്പനി നടത്തുന്ന നിക്ഷേപം ബേർഡ്ഫോർഡിനെ ആഗോളതലത്തിൽ തന്നെ വിനോദസഞ്ചാര കേന്ദ്രമാക്കി മാറ്റുമെന്ന് സർ കെയർ സ്റ്റാർമർ പറഞ്ഞു.
കെയർ സ്റ്റാർമർ, റേച്ചൽ റീവ്സ്, കോംകാസ്റ്റ് കോർപ്പറേഷൻ്റെ പ്രസിഡൻ്റ് മൈക്കൽ കവാനി, ബെഡ്‌ഫോർഡ് ബറോ കൗൺസിൽ ലോറ ചർച്ചിൻ്റെ ചീഫ് എക്‌സിക്യൂട്ടീവ്, യൂണിവേഴ്സൽ ഡെസ്റ്റിനേഷൻസ് ആൻഡ് എക്‌സ്പീരിയൻസ് ചെയർമാനും സിഇഒ മാർക്ക് വുഡ്‌ബറി എന്നിവരും പ്രഖ്യാപന സമയത്ത് സന്നിഹിതരായിരുന്നു. മിനിയൻസ് ആൻഡ് വിക്കഡ് ഉൾപ്പെടെയുള്ള സിനിമകൾ നിർമ്മിച്ച യൂണിവേഴ്സലിന് യുഎസിലെ ഒർലാൻഡോയിലും ലോസ് ആഞ്ചൽസിലും ജപ്പാൻ, സിംഗപ്പൂർ, ചൈന എന്നിവിടങ്ങളിലും തീം പാർക്കുകളുണ്ട്.
ഈ സൈറ്റ് പൂർത്തിയാകുമ്പോൾ ഭൂഖണ്ഡത്തിലെ ഏറ്റവും വലുതും നൂതനവുമായ തീം പാർക്കുകളിൽ ഒന്നായിരിക്കും എന്നാണ് പുറത്തുവരുന്ന റിപോർട്ടുകൾ സൂചിപ്പിക്കുന്നത് . ഇവിടെ ജോലി ലഭിക്കുന്നവരിൽ 80% പേരും ബെഡ്‌ഫോർഡ്, സെൻട്രൽ ബെഡ്‌ഫോർഡ്‌ഷെയർ, ലൂട്ടൺ, മിൽട്ടൺ കെയ്ൻസ് എന്നിവിടങ്ങളിൽ നിന്നുള്ളവരായിരിക്കുമെന്ന് യൂണിവേഴ്സൽ ഡെസ്റ്റിനേഷൻസ് ആൻഡ് എക്‌സ്പീരിയൻസ് പറഞ്ഞു. പദ്ധതി നിലവിൽ വരുന്നത് യുകെയുടെ നിർമ്മാണ മേഖലകൾക്കും പുത്തനുണർവ് നൽകുമെന്നാണ് പുറത്തുവരുന്ന വിവരങ്ങൾ സൂചിപ്പിക്കുന്നത്. പദ്ധതിയുടെ നിർമ്മാണ സമയത്ത് ബ്രിട്ടീഷ് നിർമ്മിത സ്റ്റീൽ ഉപയോഗിക്കാനുള്ള ധാരണ നിർമ്മാണ കമ്പനികളും സർക്കാരും തമ്മിൽ ഉണ്ടായതായി ചാൻസിലർ റേച്ചൽ റീവ്സ് പറഞ്ഞു. തീം പാർക്കിൽ 500 മുറികളുള്ള പഞ്ചനക്ഷത്ര ഹോട്ടലും ഉൾപ്പെടുന്നുണ്ട്. പദ്ധതിക്കായി യൂണിവേഴ്സൽ ഇതിനകം 476 ഏക്കർ വാങ്ങിയിട്ടുണ്ട്.
Leave a Reply