ന്യൂസ് ഡെസ്ക്, മലയാളം യുകെ
യുകെയിലെ ഏറ്റവും തിരക്കേറിയ മോട്ടോർ വേ M 25 അറ്റകുറ്റ പണികൾക്കായി അടച്ചിടും. ജംഗ്ഷൻ 10 നും 11 നും ഇടയിലാണ് അറ്റകുറ്റ പണികൾ നടക്കുന്നത്. ഈ വാരാന്ത്യത്തിലാണ് മോട്ടോർ വേയിലെ ഗതാഗതം തടസ്സപ്പെടുന്നത്. തിരക്ക് കുറയ്ക്കുന്നതിനും സുരക്ഷ മെച്ചപ്പെടുത്തുന്നതിനുമായി സറേയിലെ ജംഗ്ഷൻ 10 ന് സമീപം ഒരു പുതിയ പാലം നിർമ്മിക്കുന്നതിന് വേണ്ടിയാണ് ഈ നടപടി.
M 25 -ലെ വാരാന്ത്യത്തിലെ അടച്ചിടൽ ഈ വർഷം ഇതുവരെ മൂന്നാമത്തേതാണ്. അവധിക്കാലം ആഘോഷിക്കാൻ പോകുന്നവർ M 25 – ലെ ബ്ലോക്ക് മുൻകൂട്ടി കണ്ട് വേണം യാത്ര ക്രമീകരിക്കാൻ. യൂറോയുടെ ഫൈനൽ മത്സരങ്ങൾ തുടങ്ങിയ ഉൾപ്പെടെ ഈ ഞായറാഴ്ച പതിവിൽ കൂടുതൽ വാഹനങ്ങൾ നിരത്തിലിറങ്ങുമെന്നാണ് കരുതപ്പെടുന്നത്.
ജംഗ്ഷൻ 10 നും 11നും ഇടയിലുള്ള സമാന്തര പാതകളിലൂടെ ഗതാഗതം വഴി തിരിച്ചു വിടുമെന്നാണ് അറിയാൻ സാധിച്ചത് . ഇന്ന് ജൂലൈ 12 വെള്ളിയാഴ്ച രാത്രി 9 മണി മുതൽ ജൂലൈ 15 തിങ്കളാഴ്ച രാവിലെ 6 മണി വരെയാണ് ഗതാഗത തടസ്സം നേരിടുന്നത്. 117 മൈൽ ദൈർഘ്യമുള്ള M 25 യു കെ യിലെ ഏറ്റവും പ്രധാനപ്പെട്ട പാതയാണ്. വിവിധ സ്ഥലങ്ങളിൽ നിന്ന് ഹീത്രു എയർപോർട്ടിലേക്ക് വരുന്ന യാത്രക്കാർ പ്രധാനമായും M 25 മോട്ടോർ വേയാണ് ആശ്രയിക്കുന്നത് .
Leave a Reply