ന്യൂസ് ഡെസ്ക് മലയാളം യുകെ

യു കെ :- യുകെയിൽ തൊഴിലാളിക്ഷാമം അതിരൂക്ഷമായിരിക്കുകയാണ്. കർഷകർ പച്ചക്കറികളും മറ്റും വിളവെടുക്കാൻ തൊഴിലാളികളില്ലാതെ ബുദ്ധിമുട്ട് അനുഭവിക്കുകയാണ്. ഇതേതുടർന്ന് തങ്ങളുടെ പച്ചക്കറികളും പഴങ്ങളും നശിച്ചു പോകാതിരിക്കാനായി പലയിടങ്ങളിലും കർഷകർ സൗജന്യമായി ഇവ നൽകുകയാണ്. യോർക്കിലുള്ള ഒരു റാസ്പ്ബെറി കർഷകനായ റിച്ചർഡ് മോറിറ്റ് വിളവെടുക്കാൻ തൊഴിലാളികളെ ലഭിക്കാത്തതിനെ തുടർന്ന്, തന്റെ ഫാം ഗേറ്റ് ജനങ്ങൾക്കായി തുറന്നു നൽകിയതായി വാർത്തകൾ പുറത്തുവന്നിരിക്കുകയാണ്. മറ്റു കർഷകരും ഇതു തന്നെയാണ് ചെയ്യുന്നതെന്നും, ഗവൺമെന്റ് അടിയന്തരമായി ഇടപെടണമെന്നും നാഷണൽ ഫാർമേഴ്‌സ് യൂണിയൻ ആവശ്യപ്പെട്ടു. രാജ്യത്തിനകത്തു നിന്നു തന്നെ കൂടുതൽ തൊഴിലാളികളെ റിക്രൂട്ട് ചെയ്യാൻ ആവശ്യമായ നടപടികൾ നടന്നുകൊണ്ടിരിക്കുകയാണ് ഗവൺമെന്റ് വക്താവ് അറിയിച്ചു.

മുൻപ് തന്റെ ഫാമിൽ ജോലി ചെയ്തിരുന്ന ഭൂരിഭാഗം തൊഴിലാളികളും കിഴക്കൻ യൂറോപ്യൻ രാജ്യങ്ങളിൽ നിന്നാണ് എത്തിയതെന്ന് റിച്ചാർഡ് മോറിറ്റ് പറഞ്ഞു. തന്റെ കൃഷി ഫലങ്ങൾ നശിച്ചുപോകാതിരിക്കാനാണ് അത് സൗജന്യമായി ജനങ്ങൾക്ക് നൽകിയതെന്നും അദ്ദേഹം വ്യക്തമാക്കി. മറ്റൊരു ക്യാബേജ് കർഷകനായ സൈമൺ നെയ് ലർ ഇതേ അവസ്ഥയിൽ കൂടിയാണ് താനും കടന്നു പോകുന്നതെന്ന് വ്യക്തമാക്കി. രാജ്യത്തിനകത്തുള്ള തൊഴിലാളികളെ റൂറൽ ഏരിയകളിലേക്ക് എത്തിക്കുവാൻ വളരെ ബുദ്ധിമുട്ടാണെന്നും, ഇരട്ടി തുക വേതനമായി നൽകുവാൻ ശ്രമിച്ചാലും തൊഴിലാളികളെ ലഭിക്കുന്നില്ലെന്നും അദ്ദേഹം പറഞ്ഞു.

2020ൽ 11 ശതമാനം പേർ മാത്രമാണ് രാജ്യത്തിനകത്ത് നിന്നുള്ള തൊഴിലാളികളായി ഉണ്ടായിരുന്നത്. മറ്റു രാജ്യങ്ങളിൽ നിന്നും തൊഴിലാളികളെ ബ്രിട്ടനിലേയ്ക്ക് എത്തിക്കുന്നതിനായി, ഗവൺമെന്റ് ഇരുപതിനായിരം അധിക വിസകൾ കൂടി സീസൺ വർക്കർ പൈലറ്റ് വിഭാഗത്തിൽ പുതിയതായി ഉൾപ്പെടുത്തിയിട്ടുണ്ട്. ബ്രെക്സിറ്റ് മൂലമാണ് ഈ ബുദ്ധിമുട്ടുകൾ ഉണ്ടാകുന്നതെന്ന് മറ്റൊരു നാഷണൽ ഫാർമേഴ്സ് യൂണിയൻ വക്താവ് റോബർട്ട്‌ ന്യൂബെറി ആരോപിച്ചു. മുൻപ് യൂറോപ്യൻ യൂണിയനിലെ രാജ്യങ്ങളിൽ ഉടനീളം യാത്രകൾ സുഗമമായിരുന്നെങ്കിൽ, ഇന്ന് ബ്രെക്സിറ്റ് മൂലം യാത്രകൾക്ക് തടസ്സങ്ങൾ ഉണ്ടാകുന്നുണ്ടെന്ന് അദ്ദേഹം പറഞ്ഞു. ഗവൺമെന്റിൻെറ ഭാഗത്തുനിന്നും ആവശ്യമായ എല്ലാ സഹായങ്ങളും ഉണ്ടാകുമെന്ന് ഗവൺമെന്റ് വ്യക്താവ് അറിയിച്ചു.