ന്യൂസ് ഡെസ്ക് മലയാളം യുകെ

ലണ്ടൻ : ഇന്നും നാളെയും രാജ്യത്ത് ശക്തമായ കാറ്റും മഴയും ഉണ്ടാകുമെന്ന് മെറ്റ് ഓഫീസ്. 70 മൈൽ വേഗതയിൽ കാറ്റ് വീശുമെന്ന് മെറ്റ് ഓഫീസ് മുന്നറിയിപ്പ് നൽകി. രാജ്യത്ത് ഇന്നും നാളെയും യെല്ലോ വാണിംഗ് നൽകിയിട്ടുണ്ട്. സൗത്ത് വെസ്റ്റ് മേഖലയിലാണ് ഇന്ന് കാറ്റും മഴയും ശക്തമാകുക. നാളെ ഇത് രാജ്യത്തുടനീളം വ്യാപിക്കും. എന്നാൽ അടുത്ത ആഴ്ച താപനില 18° സെൽഷ്യസ് വരെ ഉയരുമെന്ന വാർത്ത ബ്രിട്ടീഷുകാർക്ക് വലിയ ആശ്വാസം പകരുന്നു.

ശക്തമായ കാറ്റും മഴയും യാത്രാ തടസ്സത്തിന് കാരണമാകുമെന്ന് മെറ്റ് ഓഫീസ് അറിയിച്ചു. മോശം കാലാവസ്ഥ ബസ്, ട്രെയിൻ സർവീസുകളെ ബാധിച്ചേക്കാമെന്നും കാലതാമസം നേരിട്ടേക്കാമെന്നും അവർ വ്യക്തമാക്കി. വാഹനങ്ങൾക്കും വീടുകൾക്കും മുകളിലേക്ക് മരം വീഴാനുള്ള സാധ്യതയുണ്ട്. വൈദ്യുതി വിതരണവും തടസ്സപ്പെടും.

രാജ്യത്തെ വിറപ്പിച്ചാണ് യൂനിസ് കൊടുങ്കാറ്റ് മടങ്ങിയത്. കനത്ത നാശനഷ്ടമാണ് അന്ന് ഉണ്ടായത്. അതിനുശേഷം കാറ്റും മഴയും ശക്തമാകുമെന്ന വാർത്ത ജനങ്ങളിൽ ആശങ്ക സൃഷ്ടിക്കുന്നുണ്ട്. തീരപ്രദേശത്ത് കാറ്റ് ശക്തിപ്പെടുമെന്നതിനാൽ ആളുകൾ ജാഗ്രത പാലിക്കണമെന്ന് മെറ്റ് ഓഫീസ് അറിയിച്ചു.