ഉണ്ണികൃഷ്ണൻ ബാലൻ
യുകെയിലെ ഇടതുപക്ഷ കലാസാംസ്കാരിക സംഘടനയായ സമീക്ഷ യുകെയുടെ അഞ്ചാം ദേശീയസമ്മേളനം 2022 ജനുവരി 22 നു നടത്താൻ കഴിഞ്ഞ ദിവസം (31 -10 -21 ) നു ചേർന്ന സമീക്ഷ യുകെ നാഷണൽ കമ്മിറ്റി തീരുമാനിച്ചു. കൊവെൻട്രിയിൽ വച്ചാകും സമ്മേളനം നടക്കുക. സമ്മേളന വേദിയ്ക്ക്‌ 2020 ൽ നമ്മെ വിട്ടു പിരിഞ്ഞ സംസ്ഥാന യുവജന ക്ഷേമ കമ്മീഷൻ വൈസ് ചെയർമാനും ഇടതുപക്ഷ വിദ്യാർത്ഥി യുവജന പ്രസ്ഥാനങ്ങളുടെ മുന്നണി പോരാളിയുമായിരുന്ന സഖാവ് പി ബിജുവിൻറെ പേര് നൽകുവാനും നാഷണൽ കമ്മിറ്റി തീരുമാനിച്ചു. യുകെയിൽ കോവിഡ് മഹാമാരിയുടെ ഭീതി ഇപ്പോഴും നില നിൽക്കുന്നതിനാൽ മുൻവർഷങ്ങളിൽ നിന്നും വ്യത്യസ്തമായി പൊതുസമ്മേളനവും പ്രതിനിധി സമ്മേളനവും കൂടി ഒരു ദിവസമായി ചുരുക്കും. വിവിധ കലാപരിപാടികളോടുകൂടി ആകും പൊതുസമ്മേളനം അരങ്ങേറുക. സമീക്ഷ യുകെയുടെ 23 ബ്രാഞ്ചുകളിൽ നിന്നും ഉള്ള പ്രതിനിധികളും ഒപ്പം യുകെ മലയാളികളിലെ പുരോഗമനപരമായ ആശയഗതിയുള്‍ക്കൊള്ളുന്നവരും സമ്മേളനത്തിൽ പങ്കെടുക്കും.
ദേശീയ സമ്മേളനത്തിന് മുന്നോടിയായി സമീക്ഷ യുകെ യുടെ ബ്രാഞ്ച് സമ്മേളനങ്ങൾ നടന്നു വരികയാണ് . 15 ഓളം ബ്രാഞ്ചുകളുടെ സമ്മേളനങ്ങൾ ഇതിനകം പൂർത്തിയായിക്കഴിഞ്ഞു. നവംബർ അവസാനത്തോടെ ബ്രാഞ്ച് സമ്മേളനങ്ങൾ പൂർത്തിയാക്കും. തികഞ്ഞ ആവേശത്തോടെ ബ്രാഞ്ചുസമ്മേളനങ്ങൾ പൂർത്തീകരിച്ചുകൊണ്ടു സമീക്ഷ യുകെ ദേശീയ സമ്മേളനത്തിലേയ്ക്ക് കടക്കുമ്പോൾ യുകെ മലയാളികളിലെ പുരോഗമനപരമായ ആശയഗതിയുള്‍ക്കൊള്ളുന്ന ഏവരുടെയും സഹായ സഹകരണങ്ങൾ പ്രതീക്ഷിക്കുന്നതായി സമീക്ഷ യുകെ നാഷണൽ സെക്രട്ടറി ദിനേശ് വെള്ളാപ്പള്ളി, നാഷണൽ പ്രസിഡന്റ് സ്വപ്ന പ്രവീൺ എന്നിവർ പറഞ്ഞു .
Leave a Reply