ന്യൂഡല്‍ഹി: മുഖ്യമന്ത്രി അരവിന്ദ് കേജരിവാള്‍ ജയിലിലേക്ക് പോകാന്‍ ഒരുങ്ങിക്കൊളളാന്‍ ബിജെപി. ഡല്‍ഹി ക്രിക്കറ്റ് ബോഡിയിലെ അഴിമതിയുമായി ബന്ധപ്പെട്ട് കേന്ദ്രസര്‍ക്കാരിനെതിരെ കേജരിവാള്‍ ആരോപണമുന്നയിച്ച സാഹചര്യത്തിലാണിത്. ധനമന്ത്രി അരുണ്‍ ജെയ്റ്റ്‌ലി കേജരിവാളിനെതിരെ മാനനഷ്ടക്കേസ് ഫയല്‍ ചെയ്തിരുന്നു. ഇതിന്റെ പശ്ചാത്തലത്തിലാണ് ബിജെപിയുടെ പരിഹാസം.കേജരിവാളിന്റെ സര്‍ക്കാര്‍ തികഞ്ഞ പരാജയമാണെന്നും ബിജെപി ആരോപിച്ചു. ഒന്നിന് പിന്നാലെ ഒന്നായി ബോധമില്ലാത്ത പ്രവൃത്തികളാണ് കേജരിവാള്‍ ചെയ്യുന്നത്. സ്വന്തം പരാജയം മറച്ച് വയ്ക്കാനായി മുഖ്യമന്ത്രി തങ്ങള്‍ക്കെതിരെ ആരോപണങ്ങള്‍ ഉന്നയിക്കുകയാണെന്നും ബിജെപി പറഞ്ഞു. കേജരിവാളും കൂട്ടാളികളും ജയിലില്‍ പോകാന്‍ തയാറായിക്കൊളളൂവെന്നാണ് ബിജെപി ദേശീയ സെക്രട്ടറി ശ്രീകാന്ത് ശര്‍മ പറഞ്ഞത്.
കോടതിയില്‍ കാണാമെന്നാണ് ഇതിനോട് കേജരിവാള്‍ പ്രതികരിച്ചത്. അരുണ്‍ ജെയ്റ്റ്‌ലിക്കെതിരെ കേജരിവാളും അപകീര്‍ത്തിക്കേസ് നല്‍കിയിട്ടുണ്ട്. ഡല്‍ഹി ക്രിക്കറ്റ് അസോസിയേഷന്‍ തലപ്പത്തിരുന്ന് പതിമൂന്ന് വര്‍ഷം അഴിമതി നടത്തിയെന്നാണ് ജെയ്റ്റ്‌ലിക്കെതിരെ കേജരിവാള്‍ ആരോപിക്കുന്നത്.
