ചെന്നൈ: അഴിമതിക്കും ജനകീയ പ്രശ്‌നങ്ങളും അധികൃതരുടെ ശ്രദ്ധയിലെത്തിക്കാന്‍ പുതിയ ആപ്പ് അവതരിപ്പിച്ച് മക്കള്‍ നീതി മയ്യം നേതാവും നടനുമായ കമല്‍ ഹാസന്‍. മക്കള്‍ നീതി മയ്യം പ്രവര്‍ത്തകര്‍ക്ക് വേണ്ടി പുറത്തിറക്കിയ മിയാം വിസില്‍ എന്ന പുതിയ ആപ്പിലൂടെ അഴിമതിയും മറ്റ് പ്രശ്‌നങ്ങളും അധികൃതരുടെ ശ്രദ്ധയില്‍ കൊണ്ടുവരാനാവുമെന്നാണ് കമല്‍ അവകാശപ്പെടുന്നത്.
എന്നാല്‍ ആപ്പ് പ്രശ്‌നങ്ങള്‍ പരിഹരിക്കാനുള്ള മന്ത്രവടിയല്ലെന്നും. പൊലീസിനും ഉദ്യോഗസ്ഥര്‍ക്കും പകരമല്ലെന്നും അഴിമതിക്കെതിരെയുള്ള ആദ്യ പടി മാത്രമാണെന്നും കമല്‍ ഹാസന്‍ പറഞ്ഞു. ഒരു ഇടനിലക്കാരനെ പോലെ, പരിഹരിക്കപ്പെടാത്ത പ്രശ്‌നങ്ങളില്‍ അധികാരികളുടെ ശ്രദ്ധ ക്ഷണിക്കാനാണ് ഈ ആപ്പെന്നും കമല്‍ അറിയിച്ചു.
അഴിമതി, പരിസ്ഥിതി പ്രശ്‌നങ്ങള്‍, കുറ്റകൃത്യങ്ങള്‍ തുടങ്ങിയ പ്രശ്‌നങ്ങള്‍ ശ്രദ്ധയില്‍ കൊണ്ടുവരുന്നതിന് ആപ്പ് ഉപയോഗിക്കാം. വീഡിയോ, ഫോട്ടോ തുടങ്ങിയ തെളിവുകളും പരാതിയില്‍ ഉപയോഗിക്കാം. ശേഷം സംഘടനയുടെ വളണ്ടിയല്‍ സ്ഥലം സന്ദര്‍ശിച്ച് പരാതി സ്വീകരിക്കുകയോ തള്ളുകയോ ചെയ്യും.
മൂന്നു പേരുടെ പരിശോധനകള്‍ക്ക് ശേഷമായിരിക്കും ഒരു പരാതി അംഗീകരിക്കപ്പെടുക. ശേഷം അഡ്മിന്‍ കൂടെ അംഗീകരിച്ചാല്‍ പരാതി എല്ലാവര്‍ക്കുമായി കാണാന്‍ സാധിക്കും. മൊബൈല്‍ ആപ്പ് എന്ന ആശയം മുമ്പേ ഉണ്ടായിരുന്നെങ്കിലും ഇപ്പോഴാണ് അത് യാഥാര്‍ത്ഥ്യമായതെന്ന് കമല്‍ പറയുന്നു.
Leave a Reply