ന്യൂസ് ഡെസ്ക്, മലയാളം യുകെ

71 വയസ്സുകാരിയായ ബ്രിട്ടീഷ് വയോധികയെ മസാജ് കേന്ദ്രത്തിൽ ക്രൂരമായി ബലാത്സംഗം ചെയ്തു. പോർച്ചുഗലിലെ മസാജ് കേന്ദ്രത്തിൽ വച്ചാണ് ഇവർക്ക് ക്രൂരമായ പീഡനം ഏറ്റുവാങ്ങേണ്ടതായി വന്നത് . സംഭവത്തെ തുടർന്ന് മസാജ് ചെയ്യുന്ന ജീവനക്കാരനെ പോർച്ചുഗീസ് പോലീസ് അറസ്റ്റ് ചെയ്തു.

പീഡനത്തിനിരയായ ബ്രിട്ടീഷുകാരി പോർച്ചുഗലിൽ താമസിക്കുന്നയാളാണോ അതോ പ്രദേശത്ത് അവധി ആഘോഷിക്കാൻ എത്തിയ ആളാണോ എന്നതിനെ കുറിച്ച് കൂടുതൽ വിവരങ്ങൾ പുറത്തുവന്നിട്ടില്ല . 47 കാരനായ പ്രതി കിഴക്കൻ യൂറോപ്പിൽ നിന്നുള്ള ആളാണ്. പോർചുഗലിലെ ക്വാർട്ടൈറയിലെ അൽഗാർവ് പട്ടണത്തിൽ ഒരു മസാജ് സെഷനുശേഷം ലൈംഗികാതിക്രമത്തിന് ഇരയായതായി പറഞ്ഞാണ് ഇവർ പോലീസിനെ സമീപിച്ചത്.

സംഭവത്തെക്കുറിച്ച് കൂടുതൽ വ്യക്തത വരുത്താൻ മെഡിക്കൽ റിപ്പോർട്ടുകൾക്കായി കാത്തിരിക്കുകയാണെന്ന് പോലീസ് പറഞ്ഞു. അറസ്റ്റിലായ ആൾ മുമ്പ് സമാനമായ കുറ്റകൃത്യങ്ങളിൽ ഏർപ്പെട്ടിട്ടുണ്ടോ എന്ന് അറിയാൻ ഇയാളുടെ ക്രിമിനൽ പശ്ചാത്തലം പോലീസ് പരിശോധിച്ചു വരുകയാണ്. അതിമനോഹരമായ ബീച്ചുകൾക്കും ഭക്ഷണത്തിനും പേരുകേട്ട പോർച്ചുഗലിലെ പ്രധാനപ്പെട്ട ടൂറിസ്റ്റ് കേന്ദ്രമാണ് ക്വാർട്ടൈറെ