ന്യൂസ് ഡെസ്ക് മലയാളം യുകെ
ലണ്ടൻ : പാർട്ടിഗേറ്റ് വിവാദത്തിൽ ബോറിസ് ജോൺസൻ സർക്കാരിന് അടിപതറുന്നു. കോവിഡ് ചട്ടം ലംഘിച്ചതിന്റെ പേരിൽ നീതിന്യായ വകുപ്പ് മന്ത്രി മന്ത്രി ലോർഡ് ഡേവിഡ് വുൾഫ്‌സൺ രാജിവെച്ചു. കോവിഡ് പ്രോട്ടോകോൾ ലംഘിച്ചു നടന്ന പാർട്ടിയിൽ പങ്കെടുത്തതിന് പ്രധാനമന്ത്രി ബോറിസ് ജോൺസണും ചാൻസലർ ഋഷി സുനക്കിനും പിഴ ചുമത്തിയതിന് പിന്നാലെയാണിത്. ലോക്ക്ഡൗൺ പാർട്ടികളുടെ റിപ്പോർട്ടുകൾ പുറത്തുവന്നതിന് ശേഷം സർക്കാർ നിന്ന് രാജി വെക്കുന്ന ആദ്യ വ്യക്തിയാണ് വുൾഫ്‌സൺ. നിയമലംഘനം നടത്തിയതിനോടുള്ള ഔദ്യോഗിക പ്രതികരണമെന്ന നിലയിലാണ് അദ്ദേഹം രാജി സമർപ്പിച്ചത്.
ലോർഡ് വുൾഫ്‌സന്റെ രാജി സ്വീകരിക്കുന്നതിൽ സങ്കടമുണ്ടെന്നും നിയമ പരിഷ്‌കാരങ്ങളിൽ അദ്ദേഹം നൽകിയ സംഭാവനകളെ പ്രശംസിക്കുന്നതായും ജോൺസൺ പറഞ്ഞു. സർക്കാർ തന്നെ കോവിഡ് ചട്ടം ലംഘിച്ചത് തെറ്റാണെന്നും വുൾഫ്‌സൺ രാജിക്കത്തിൽ പരാമർശിച്ചു. രാജിവെക്കുകയല്ലാതെ മറ്റൊരു മാർഗവുമില്ലെന്നാണ് അദ്ദേഹം പറഞ്ഞത്. വുൾഫ്‌സന്റെ രാജിയോടെ സർക്കാരിനുള്ളിൽ ആശങ്കകൾ ഉടലെടുത്തിട്ടുണ്ട്.
ജോൺസനും സുനക്കും രാജിവയ്ക്കണമെന്ന് പ്രതിപക്ഷം ആവശ്യപ്പെട്ടു. പ്രധാനമന്ത്രിയുടെ ഓഫിസിലും വസതിയിലും 10 ഡൗണിങ് സ്ട്രീറ്റിലെ മറ്റ് സർക്കാർ ഓഫിസുകളിലുമായി ലോക‍്ഡൗൺ കാലത്ത് 12 വിരുന്നുകൾ നടന്നതായി അന്വേഷണത്തിൽ വ്യക്തമായിരുന്നു.
Leave a Reply