ന്യൂസ് ഡെസ്ക്, മലയാളം യുകെ

യുകെയിൽ പെൺകുട്ടികൾക്ക് ആർത്തവം ആരംഭിക്കുന്ന ശരാശരി പ്രായം 12 ആണെങ്കിലും പലർക്കും പത്ത് വയസ്സിൽ തന്നെ ആർത്തവം വരുന്നതായി റിപ്പോർട്ട്. ഇത്തരം കുട്ടികൾക്ക് അസഹനീയമായ വയറുവേദന തുടങ്ങിയ പ്രശ്‌നങ്ങൾ നേരിടുന്നതായും റിപ്പോർട്ടിൽ പറയുന്നു. പലപ്പോഴും സ്കൂളിൽ തനിക്ക് അമിത രക്തസ്രാവത്തെ കുറിച്ചുള്ള ഉത്കണഠ കാരണം പഠനത്തിൽ ശ്രദ്ധിക്കാൻ കഴിഞ്ഞിട്ടില്ലെന്ന് ഒരു പെൺകുട്ടി പറയുന്നു. കുട്ടികളിൽ ഇത്തരം അനുഭവങ്ങൾ കൂടുതൽ സാധാരണമായി കൊണ്ടിരിക്കുകയാണ്.

ഗവേഷണമനുസരിച്ച്, പെൺകുട്ടികളിൽ മുമ്പത്തേക്കാൾ ചെറുപ്പത്തിൽ തന്നെ ആർത്തവം ആരംഭിക്കുന്നു. 1950 നും 1969 നും ഇടയിൽ ജനിച്ച സ്ത്രീകൾക്ക് ആർത്തവം ആരംഭിച്ചത് ശരാശരി 12 വയസ്സിൽ ആണെങ്കിൽ 2000 നും 2005 നും ഇടയിൽ ജനിച്ചവരുടെ ശരാശരി പ്രായം 11 വയസ്സായി മാറിയതായി മെയ് മാസം പ്രസിദ്ധീകരിച്ച ഒരു പഠനം കണ്ടെത്തിയതായി ജേണൽ ജമാ നെറ്റ്‌വർക്ക് ഓപ്പൺ റിപ്പോർട്ട് ചെയ്‌തു.

11 വയസ്സിന് മുമ്പ് ആർത്തവം ആരംഭിക്കുന്ന പെൺകുട്ടികളുടെ അനുപാതം 8.6 ശതമാനത്തിൽ നിന്ന് 15.5 ശതമാനമായി വർദ്ധിച്ചതായി പഠനം നടത്തിയ ഹാർവാർഡ് സർവകലാശാലയിലെ ഗവേഷകർ പറയുന്നു. യുഎസിന് സമാനമായി യുകെയിലും കുട്ടികളുടെ ഇടയിൽ പൊണ്ണത്തടി വർദ്ധിച്ച് വരുന്നുണ്ട്. ഇതിനോടനുബന്ധിച്ച് കുട്ടികളിൽ ആരോഗ്യ പ്രശ്‌നങ്ങളും കണ്ടുവരുന്നുണ്ട്.