ന്യൂസ് ഡെസ്ക്, മലയാളം യുകെ
യുകെയിൽ 2025-ൽ 300-ലധികം ഭൂചലനങ്ങൾ രേഖപ്പെടുത്തിയതായി ബ്രിട്ടീഷ് ജിയോളജിക്കൽ സർവേ (BGS) പുറത്തുവിട്ട കണക്കുകൾ വ്യക്തമാക്കി. ഡിസംബർ 18 വരെ രാജ്യത്താകമാനം 309 ഭൂചലനങ്ങളാണ് രേഖപ്പെടുത്തിയതെന്ന് റിപ്പോർട്ടിൽ പറയുന്നു. ശരാശരി കണക്കിലെടുക്കുമ്പോൾ, 2025-ൽ യുകെയിൽ ഏകദേശം ദിവസേന ഒരിക്കൽ എന്ന നിലയിലാണ് ഭൂചലനങ്ങൾ അനുഭവപ്പെട്ടതെന്ന് ഭൂകമ്പ വിദഗ്ധർ വിലയിരുത്തുന്നു.
ഈ വർഷം രേഖപ്പെടുത്തിയ ഏറ്റവും ശക്തമായ രണ്ട് ഭൂചലനങ്ങൾ സ്കോട്ട് ലൻഡിലെ പെർത്ത് ആൻഡ് കിൻറോസ് മേഖലയിലെ ലോക്ക് ലയണിന് സമീപമാണ് ഉണ്ടായത്. ഒക്ടോബർ 20 -ന് മണിക്കൂറുകളുടെ വ്യത്യാസത്തിൽ ഉണ്ടായ ഭൂചലനങ്ങളിൽ ഒന്നിന് 3.7 തീവ്രതയും തുടർന്ന് ഉണ്ടായ മറ്റൊന്നിന് 3.6 തീവ്രതയും രേഖപ്പെടുത്തി. ഈ ഭൂചലനത്തെ തുടർന്ന് പെർത്ത്ഷയറിലെ നിരവധി പ്രദേശങ്ങളിൽ ജനങ്ങൾക്ക് ഭൂകമ്പത്തിന്റെ നടുക്കം വ്യക്തമായി അനുഭവപ്പെട്ടതായുള്ള റിപ്പോർട്ടുകൾ നേരത്തെ പുറത്തു വന്നിരുന്നു.
ആകെ കണക്കുകൾ പരിശോധിക്കുമ്പോൾ, സ്കോട്ട് ലൻഡിലെ പെർത്ത്ഷയറും വെസ്റ്റേൺ ഹൈലാൻഡ്സും, വെയിൽസിന്റെ തെക്കൻ ഭാഗങ്ങളും, ഇംഗ്ലണ്ടിലെ യോർക്ഷയർ, ലങ്കാഷെയർ മേഖലകളും ആണ് ഏറ്റവും കൂടുതൽ ഭൂചലനങ്ങൾ രേഖപ്പെടുത്തിയ പ്രദേശങ്ങൾ. യുകെയിൽ സാധാരണയായി ചെറുതായ ഭൂചലനങ്ങളാണ് ഉണ്ടാകുന്നതെങ്കിലും, ഇത്തരം സംഭവങ്ങൾ ജനങ്ങളിൽ ആശങ്ക ഉയർത്തുന്നുണ്ടെന്നും ഭൂകമ്പ നിരീക്ഷണം തുടർന്നും ശക്തമായി തുടരുമെന്നും അധികൃതർ അറിയിച്ചു.
Leave a Reply