ന്യൂസ് ഡെസ്ക്, മലയാളം യുകെ
ഗർഭിണികളോട് പുതിയ വാക്സിൻ റോളൗട്ട് പ്രയോജനപ്പെടുത്തണമെന്ന അഭ്യർത്ഥനയുമായി നവജാത ശിശുവിൻെറ അമ്മ. ആലീസിന്റെ മകൾ ഹെൻറിറ്റയ്ക്ക് മൂന്നാഴ്ച പ്രായമുള്ളപ്പോൾ റെസ്പിറേറ്ററി സിൻസിറ്റിയൽ വൈറസ് (ആർഎസ്‌വി) ബാധിച്ചതിനെ തുടർന്ന് അടിയന്തിര ആശുപത്രി പരിചരണം വേണ്ടിവന്നു. തൻെറ കുടുംബത്തിന് നേരിടേണ്ടി വന്ന അനുഭവം മറ്റുള്ളവർക്ക് ഉണ്ടാവാതിരിക്കാനാണ് താൻ ശ്രമിക്കുന്നതെന്ന് ആലീസ് പറയുന്നു. ആർഎസ്‌വി ഉയർത്തുന്ന അപകടസാധ്യത പരിഗണിച്ച് യുകെ ഹെൽത്ത് സെക്യൂരിറ്റി ഏജൻസിയും വാക്‌സിനേഷൻ ആൻഡ് ഇമ്മ്യൂണൈസേഷൻ ജോയിൻ്റ് കമ്മിറ്റിയും (ജെസിവിഐ) സെപ്റ്റംബർ 1 മുതൽ 28 വരെ ഗർഭിണികൾക്ക്‌ വാക്‌സിനേഷൻ നൽകാൻ തീരുമാനമായിരിക്കുന്ന സാഹചര്യത്തിലാണ് ആലീസിൻെറ ഓർമ്മപ്പെടുത്തൽ.
രണ്ട് വയസ്സിന് താഴെയുള്ള 90% കുട്ടികളെയും ആർഎസ്‌വി ബാധിക്കാറുണ്ട്. ഇത് രാജ്യത്തെ ശിശുമരണത്തിൻ്റെ പ്രധാന കാരണങ്ങളിൽ ഒന്നാണ്. ഒരു വയസ്സിന് താഴെയുള്ള കുട്ടികളിൽ പ്രതിവർഷം 20,000 കുട്ടികൾ എങ്കിലും റെസ്പിറേറ്ററി സിൻസിറ്റിയൽ വൈറസ് ബാധിച്ചതിനെ തുടർന്ന് ആശുപത്രികളിൽ പ്രവേശിപ്പിക്കപ്പെടാറുണ്ട്. പല കേസുകളിലും ഇത് ഗുരുതരമായ ശ്വാസകോശ അണുബാധകൾക്ക് കരണമാകാറും ഉണ്ട്. ആർഎസ്‌വി വാക്സിന് എടുക്കുന്നത് ഇതിനെ പ്രതിരോധിക്കാൻ സഹായിക്കുമെന്ന് പുതിയ പഠനങ്ങൾ കാണിക്കുന്നു.
തൻെറ മകൾ ഇപ്പോൾ പൂർണ ആരോഗ്യവതിയാണെങ്കിലും രോഗബാധിതയായ കാലയളവിൽ അനുഭവിച്ച വേദന മറ്റ് കുട്ടികൾ അനുഭവിക്കാൻ ഇടവരരുതെന്ന് കരുതിയാണ് തൻെറ അനുഭവം പങ്കുവെച്ചുകൊണ്ട് കൂടുതൽ അമ്മമാരോട് ആർഎസ്‌വി വാക്സിൻ എടുക്കാൻ ആലീസ് കുക്ക് രംഗത്ത് വന്നത്.
Leave a Reply