ശിവജ കെ.നായർ
നമ്മൾ ആദ്യമായി കണ്ട നിമിഷത്തെപ്പറ്റി ഒരു വരി കുറിയ്ക്കുമോ ? കവി മുഖപുസ്തകത്തിലെഴുതി.
നീയാദ്യം സൈക്കിളോടിച്ചു പോയപ്പോൾ , ഒന്നാം ക്ലാസ്സിൽ , പള്ളിപ്പെരുന്നാളിന് , ഉത്സവത്തിന്
എന്ന് ചിലർ.
മഹാരാജാസിലെ മരത്തണലിൽ, മീഡിയ അക്കാദമിയിൽ , കവിയരങ്ങിൽ, ഫിലിം ഫെസ്റ്റിൽ
എന്ന് മറ്റു ചിലർ.
അതെന്നെക്കൊണ്ടു പറയിക്കണോ ,എന്ന് കണ്ണിറുക്കിയും പലർ.
കണ്ടിട്ടേയില്ല , കാണും ,
കണ്ടില്ലെങ്കിലും കരളിനകത്തുണ്ട് ,
എന്ന് ഹൃദയങ്ങൾ ചേർത്തു വച്ച്
ഒരു കൂട്ടർ.
ഒന്നു കാണണമെന്നുണ്ട് ,
മുഖമുയർത്തി
ഇടതു വശത്തേക്കൊന്ന്
നോക്കുമോ – വ്യത്യസ്തമായി
ഒരു കമന്റ് വന്നപ്പോൾ അയാൾ ഇടം തിരിഞ്ഞതും കണ്ണിറുക്കി ചിരിച്ചു കൊണ്ടവൾ പറഞ്ഞു,
” ഞാനുമടിച്ചോട്ടെവല്ലപ്പോഴുമൊരു ഗോൾ ” – ഒന്നുമല്ലെങ്കിലും ഞാനൊരു കവിയുടെ ഭാര്യയല്ലേ ”
അവളുടെ കണ്ണുകളിലെ
കടലാഴങ്ങളിലേയ്ക്ക്
അയാളെടുത്തു ചാടി .
കമന്റുകൾ അപ്പോഴും
വന്നുകൊണ്ടേയിരുന്നു , തിരമാലകൾ പോലെ …..! –
ശിവജ കെ.നായർ.
ചങ്ങനാശ്ശേരി കുന്നുംപുറം സ്വദേശിയാണ് , കുന്നന്താനം എൻ എസ്സ് എസ്സ് സ്കൂൾ അധ്യാപിക.
ആകാശവാണിയിൽ കഥ,കവിത എന്നിവ പ്രക്ഷേപണം ചെയ്തിട്ടുണ്ട്.
Leave a Reply