ന്യൂസ് ഡെസ്ക്, മലയാളം യുകെ
ബ്രിട്ടനിലെ ഹാംപ്ഷെയറിൽ ശനിയാഴ്ച വൈകിട്ട് കടൽത്തീരത്ത് ചെറുവിമാനം തകർന്നു വീണു. ലീ-ഓൺ-ദി-സോളന്റ്, ഗോസ്പോർട്ട് മേഖലയിൽ വൈകിട്ട് 4.15ഓടെയാണ് വിമാനം കടലിലേക്ക് പതിച്ചതെന്ന് അധികൃതർ അറിയിച്ചു. രക്ഷാപ്രവർത്തകർ സ്ഥലത്തെത്തും മുമ്പ് തന്നെ പൈലറ്റ് വിമാനത്തിൽ നിന്ന് പുറത്തിറങ്ങി തീരത്തേക്ക് എത്തുകയായിരുന്നു. തുടർന്ന് ആംബുലൻസ് സംഘം ആരോഗ്യപരിശോധന നടത്തി. ഹാംപ്ഷെയർ ആൻഡ് ഐൽ ഓഫ് വൈറ്റ് ഫയർ ആൻഡ് റെസ്ക്യൂ സർവീസ് പ്രസ്താവനയിൽ അറിയിച്ചു.
വിമാനത്തിൽ പൈലറ്റ് മാത്രമേ ഉണ്ടായിരുന്നുള്ളൂവെന്ന് എച്ച്.എം. കോസ്റ്റ്ഗാർഡ് വ്യക്തമാക്കി. അപകടത്തിന് പിന്നാലെ പൈലറ്റിനെ ആംബുലൻസ് സംഘം പരിശോധിച്ചതായും അധികൃതർ അറിയിച്ചു. കടലിൽ പതിച്ച വിമാനം തീരത്തേക്ക് വലിച്ചെടുക്കാൻ അഗ്നിശമന സേന പ്രവർത്തിച്ചു. വീണ്ടെടുപ്പ് പൂർത്തിയാകുന്നതുവരെ വിമാനം പൊലീസ് കാവലിൽ വെച്ചിരിക്കുകയാണ്. ഹാംബിൾ ലൈഫ്ബോട്ട്, കോസ്റ്റ്ഗാർഡ് ഹെലികോപ്റ്റർ, എയർ ആംബുലൻസ് എന്നിവയും രക്ഷാപ്രവർത്തനത്തിൽ പങ്കെടുത്തു.
അപകടം നേരിൽ കണ്ട എലി ചാപ്മാൻ സൗതേൺ ഡെയിലി എക്കോയോട് പറഞ്ഞു: “കടൽത്തീരത്ത് നിൽക്കുമ്പോൾ പാറകളിലേക്കൊരു വലിയ ഇടിച്ചശബ്ദം കേട്ടു. തിരിഞ്ഞു നോക്കുമ്പോൾ വിമാനം വെള്ളത്തിൽ ആയിരുന്നു. വാലുഭാഗം നിമിഷ നേരം ഉയർന്ന് പിന്നെ താഴ്ന്നത് മുക്കാൽഭാഗം മുമ്പേ പതിച്ചതാണെന്ന് തോന്നിച്ചു. അപകടത്തിന് മുമ്പ് യാതൊരു ശബ്ദവും കേട്ടില്ല.” പൈലറ്റ് വെള്ളത്തിലൂടെ നീന്തി പുറത്തുവരുന്നത് കണ്ടെന്നും സമീപത്തുണ്ടായിരുന്നവർ സഹായിച്ചതായും അവർ പറഞ്ഞു. സംഭവം കണ്ടവർ ഞെട്ടലിലായിരുന്നുവെന്നും ചിലർ ഉടൻ രക്ഷാപ്രവർത്തനത്തിൽ പങ്കുചേർന്നുവെന്നും ഒരു സാക്ഷി കൂട്ടിച്ചേർത്തു.
Leave a Reply