ന്യൂസ് ഡെസ്ക്, മലയാളം യുകെ
1986-ൽ ബിർക്കൻഹെഡിൽ നടന്ന കൊലക്കേസിൽ കുറ്റക്കാരനാക്കി 38 വർഷം ജയിലിൽ കഴിഞ്ഞ പീറ്റർ സുള്ളിവൻ നിരപരാധിയാണെന്ന് പുതിയ ഡിഎൻഎ പരിശോധന തെളിയിച്ചു. പൊലീസിന്റെ മർദ്ദനവും ഭീഷണിയും മൂലമാണ് തന്റെ മേൽ ചുമത്തിയ കൊലക്കുറ്റം സമ്മതിക്കേണ്ടി വന്നതെന്ന് പീറ്റർ ബിബിസിയോട് പറഞ്ഞു. ചോദ്യം ചെയ്യൽ സമയത്ത് ഒരു അഭിഭാഷകനെ പോലും അനുവദിച്ചില്ലെന്നും, ഭക്ഷണവും ഉറക്കവും നിഷേധിച്ചെന്നും അദ്ദേഹം ആരോപിക്കുന്നു.
ബിർക്കൻഹെഡിന്റെ ഭീകരൻ തുടങ്ങിയ വിശേഷണങ്ങൾ പത്രങ്ങൾ നൽകിയത് കുടുംബത്തെയും ജീവിതത്തെയും തകർത്തുവെന്ന് അദ്ദേഹം പറഞ്ഞു. അമ്മയുടെ സംസ്കാരച്ചടങ്ങിൽ പോലും പങ്കെടുക്കാൻ ജയിലിൽ നിന്ന് അനുമതി ലഭിച്ചില്ല. ജയിലിനകത്ത് പോലും സഹതടവുകാരുടെ ആക്രമണം നേരിട്ടുവെന്നും, എന്നാൽ നിരപരാധിയാണെന്ന വിശ്വാസം ഒരിക്കലും ഉപേക്ഷിച്ചില്ലെന്നും അദ്ദേഹം പറയുന്നു. 2023-ൽ നടത്തിയ ഡിഎൻഎ പരിശോധനയിൽ കുറ്റത്തോട് ബന്ധമില്ലെന്ന് തെളിഞ്ഞതോടെയാണ് കേസ് മാറിമറിഞ്ഞത്.
2025 മെയ് മാസത്തിൽ അപ്പീൽ കോടതി ശിക്ഷ റദ്ദാക്കിയപ്പോൾ സുള്ളിവൻ കണ്ണീരോടെ മോചനവാർത്ത കേട്ടു. 38 വർഷത്തിനു ശേഷം പുറത്തിറങ്ങിയപ്പോൾ പുറത്തുള്ള ലോകം തന്നെ മാറി പോയതു പോലെയാണ് തോന്നിയത്. പൊലീസിൽ നിന്ന് ഔദ്യോഗിക മാപ്പ് വേണമെന്നും, നഷ്ടപ്പെട്ട ജീവിതത്തിന് നീതിയുള്ള നഷ്ടപരിഹാരം വേണമെന്നുമാണ് അദ്ദേഹത്തിന്റെ ആവശ്യം.
Leave a Reply