ന്യൂസ് ഡെസ്ക് മലയാളം യുകെ

യുകെയിൽ ആഞ്ഞടിച്ച് ഇഷ കൊടുങ്കാറ്റ്. യുകെയിലേക്ക് വരുന്ന കാറ്റ് മണിക്കൂറിൽ 80 മൈൽ (128 കിമീ/മണിക്കൂർ) വരെ വേഗതയിൽ വീശുമെന്നും ജനങ്ങൾ ഓരോരുത്തരും സുരക്ഷാ സ്ഥലങ്ങളിൽ തുടരണമെന്നും കാലാവസ്ഥ നിരീക്ഷകർ മുന്നറിയിപ്പ് നൽകി. ഇഷ കൊടുങ്കാറ്റ് വൈകിട്ട് 6 മണിയോടെ ഇംഗ്ലണ്ട്, വെയിൽസ്, നോർത്തേൺ അയർലൻഡ്, സ്കോട്ട് ലൻഡിന്റെ ചില ഭാഗങ്ങൾ എന്നിവിടങ്ങളിൽ ആഞ്ഞടിക്കുമെന്നാണ് പ്രതീക്ഷിക്കുന്നത്.

വലിയ തിരമാലകൾക്ക് സാധ്യത ഉള്ളതിനാൽ തീരപ്രദേശങ്ങളിൽ ഉള്ളവർ സുരക്ഷിത സ്ഥലങ്ങളിലേക്ക് നീങ്ങണമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. കഴിഞ്ഞ സെപ്റ്റംബർ മുതലുള്ള കണക്കുകൾ നോക്കുമ്പോൾ യുകെയിൽ വീശിയടിക്കുന്ന ഒമ്പതാമത്തെ കൊടുങ്കാറ്റാണ് ഇഷ. ഞായറാഴ്ച്ച രാത്രിയോടെ കൊടുങ്കാറ്റ് പൂർവ ശക്തിയോടെ ആഞ്ഞടിക്കുമെന്നും ഇത് തിങ്കളാഴ്ച്ച രാവിലെ വരെ പ്രതീക്ഷിക്കുന്നതായും കാലാവസ്ഥ നിരീക്ഷണ കേന്ദ്രം അറിയിച്ചു.

സ്കോട്ട് ലൻഡ്, നോർത്തേൺ അയർലൻഡ്, വെയിൽസ്, വടക്കൻ ഇംഗ്ലണ്ട്, തെക്ക്-പടിഞ്ഞാറൻ ഇംഗ്ലണ്ട് എന്നിവിടങ്ങളിലെ ചില ഭാഗങ്ങളിൽ ഇന്ന് വൈകിട്ട് 6 മണിയോടെ തന്നെ കാറ്റ് ആഞ്ഞടിക്കും. മോശം കാലാവസ്ഥയെ തുടർന്ന് റോഡുകളും പാലങ്ങളും അടച്ചിടാൻ സാധ്യതയുണ്ട്. വൈദ്യുതി മുടങ്ങാനുള്ള സാധ്യതയും ഏറെയാണ്.