ഷൈമോൻ തോട്ടുങ്കൽ
ബർമിംഗ് ഹാം .ഗ്രേറ്റ് ബ്രിട്ടൻ സീറോ മലബാർ രൂപത ബൈബിൾ അപ്പസ്റ്റോലറ്റിന്റെ നേതൃത്വത്തിൽ നടത്തപ്പെടുന്ന എട്ടാമത് രൂപത ബൈബിൾ കലോത്സവ മത്സരങ്ങൾ നാളെ സ്കാൻതോർപ്പിലെ ഫ്രഡറിക് ഗൂ സ്‌കൂളിൽ നടക്കും. രൂപതാദ്ധ്യക്ഷൻ മാർ ജോസഫ് സ്രാമ്പിക്കൽ രാവിലെ മത്സരങ്ങൾ തിരി തെളിച്ച് ഉത്‌ഘാടനം ചെയ്യും .പത്തിൽ പരം സ്റ്റേജുകളിലായി രൂപതയിലെ പന്ത്രണ്ട് റീജിയണുകളിൽ നിന്നുമുള്ള ആയിരത്തിയഞ്ഞൂറിലധികം മത്സരാർത്ഥികൾ ആണ് വിവിധ വേദികളിൽ മാറ്റുരക്കുന്നത് .
രാവിലെ 8.15 ന് രജിസ്‌ട്രേഷൻ ആരംഭിക്കും. 8 .45 ന് ബൈബിൾ പ്രതിഷ്ഠയോടുകൂടി ഉദ്‌ഘാടന സമ്മേളനത്തിന് തുടക്കം കുറിക്കും . . ബൈബിൾ പ്രതിഷ്ഠ പ്രദിക്ഷണത്തിൽ അഭിവന്ദ്യ മാർ ജോസഫ് സ്രാമ്പിക്കൽ പിതാവിനൊപ്പം മുഖ്യ വികാരി ജനറാൾ റെവ ഡോ ആന്റണി ചുണ്ടെലിക്കാട്ട് , ചാൻസിലർ റെവ ഡോ മാത്യു പിണക്കാട്ട് , ബൈബിൾ അപ്പസ്റ്റലേറ്റ് ചെയർമാൻ റെവ ഫാ ജോർജ് എട്ടുപറയിൽ , മറ്റ്‌ വൈദീകർ, സിസ്റ്റേഴ്സ് അപ്പസ്റ്റോലേറ്റ് പ്രതിനിധികൾ മിഷൻ ലീഗ് കുട്ടികൾ, വോളന്റീഴ്സ് എന്നിവരും അണിനിരക്കും. തുടർന്ന് അഭിവന്ദ്യ പിതാവും മുഖ്യ വികാരിജനറൽ അച്ചനും വൈദികരും സിസ്റേഴ്സും ബൈബിൾ അപ്പസ്റ്റോലേറ്റ് പ്രതിനിധികളും അൽമായ പ്രധിനിധികളും ചേർന്ന് തിരി തെളിക്കും.
കൃത്യം പത്തുമണി മുതൽ വിവിധ സ്റ്റേജുകളിലായി മത്സരങ്ങൾ ആരംഭിക്കും. കൃത്യമായ ഇടവേളകളിലായി മത്സരഫലങ്ങൾ പ്രസിദ്ധീകരിക്കും . മത്സരഫലങ്ങൾ പ്രഖ്യാപിക്കുന്ന സമയവിവരം റിസൾട്ട് ബോഡിലും വെബ്സൈറ്റിലും പ്രസിദ്ധീകരിക്കും. മത്സരഫലങ്ങൾ വേദിയുടെ പലഭാഗത്തായി ക്രമീകരിച്ചിരിക്കുന്ന വിവിധ സ്‌ക്രീനുകളിൽ പ്രദർശിപ്പിക്കും . കൂടുതൽ കോച്ചുകൾ കഴിഞ്ഞ വര്ഷങ്ങളിലേതിനേക്കാൾ എത്തുന്നതിനാൽ കോച്ചുകൾ സ്കൂൾ കോമ്പൗണ്ടിൽ തന്നെ പാർക്ക് ചെയ്യുവാനുള്ള ക്രമീകരങ്ങളാണ് പരമാവധി ചെയ്തിരിക്കുന്നത് . കാറുകളിൽ എത്തുന്നവർ ഗ്രാസ് ഏരിയയിലാണ് പാർക്ക് ചെയ്യേണ്ടത്. സുഗമമായ കാർ പാർക്കിംഗ് സൗകര്യങ്ങൾ ഒരുക്കുന്നതിനായി വോളന്ടീഴ്സിന്റെ നിർദേശങ്ങൾ കർശനമായി പാലിക്കേണ്ടതാണ്. പ്രധാന സ്റ്റേജുകളുടെ അടുത്ത് മുഴുവൻ സമയവും പ്രവർത്തിക്കുന്ന ഹെൽപ് ഡെസ്ക് സജ്ജീകരിച്ചിട്ടുണ്ട് .സ്റ്റേജ് ഒന്നിലേക്കുള്ള പ്രവേശനകവാടത്തിലെ തിരക്ക് ഒഴിവാക്കാനായി കഴിഞ്ഞ വര്ഷത്തേതിൽനിന്നും കൂടുതലായി ഒരു ഹെൽപ് ഡെസ്ക് ഈസ്റ്റ് ബ്ലോക്കിൽ ക്രമീകരിച്ചുട്ടുണ്ട് . ഇവിടെയായിരിക്കും അപ്പീൽ നൽകുന്നതിനും റിസ്റ് ബാൻഡ് രജിസ്‌ട്രേഷനും ക്രമീകരിച്ചിരിക്കുന്നത്. മത്സരാർത്ഥികളുടെ ചെസ്സ് നമ്പറുകൾ ഓരോ റീജിയണുകളിൽ നിന്നും നിർദേശിക്കപ്പെട്ടവർ ഡൈനിങ് ഹാളിൽ സജ്ജീകരിച്ചിരിക്കുന്ന കൗണ്ടറുകളിൽ നിന്നും വാങ്ങേണ്ടതാണ് .
റീജിയണലിൽ നിന്നും നിര്ദേശിക്കപ്പെട്ടവർ രാവിലെ 8.45 ന് മുന്പതന്നെ മത്സരാർത്ഥികളുടെ രജിസ്‌ട്രേഷൻ നമ്പർ കൈപ്പറ്റേണ്ടതാണ്. ഓരോ റീജിയനും നൽകുന്ന കവറിൽ ഓരോ മിഷനിൽ നിന്നും പങ്കെടുക്കുന്നവരുടെ ചെസ്സ് നമ്പറുകളും മത്സരാത്ഥികളോടൊപ്പം എത്തുന്ന മുൻ‌കൂർ രജിസ്റ്റർ ചെയ്തിരിക്കുന്നവർക്കുള്ള റിസ്റ് ബാൻഡും മിഷൻ അടിസ്ഥാനത്തിൽ പ്രത്യകം തിരിച്ചായിരിക്കും വച്ചിരിക്കുക. റിസ്റ്ബാൻഡിൽ കൊടുത്തിരിക്കുന്ന ക്യു ആർ കോഡുവഴി മത്സരങ്ങളുടെ ഫലങ്ങൾ അറിയാൻ സാധിക്കും. രാവിലെ എട്ട് മണിമുതൽ ചെയ്ഞ്ചിങ് റൂമുകൾ ഉപയോഗിക്കാവുന്നതാണ് . ഒരു വലിയചേഞ്ചിങ് റൂമിൽ രണ്ട് റീജിയനും ബാക്കി എല്ലാ ചേഞ്ചിങ് റൂമുകൾ ഓരോ റീജിയനുമായിട്ടാണ് നൽകിയിരിക്കുന്നത് .
പുരുഷന്മാരുടെ ചെയ്ഞ്ചിങ് റൂം ഉൾപ്പെടെ 14 ചെയ്ഞ്ചിങ് റൂമുകളാണ് ഉള്ളത് . താത്കാലികമായി ക്രമീകരിച്ചിരിക്കുന്ന ചാപ്പലിൽ അന്നേദിവസം രാവിലെ ഏഴുമണിക്ക് വോളന്റീർസിനായിട്ടുള്ള വിശുദ്ധകുർബാനയും തുടർന്ന് 10 മണിക്കും 12 മണിക്കും ഉച്ചക്കുശേഷം 2 മണിക്കും 4 മണിക്കും വിശുദ്ധ കുർബാന ഉണ്ടായിരിക്കുന്നതാണ്. ഇടവിട്ട സമയങ്ങളിൽ പരിശുദ്ധ കുർബാനയുടെ ആരാധനയും ഉണ്ടായിരിക്കുന്നതാണ്. . ബൈബിൾ അപ്പസ്റ്റോലറ്റ് വെബ്‌സൈറ്റിൽ കൂടിയും ഡൈനിങ്ങ് ഹാളിൽ ക്രമീകരിച്ചിരിക്കുന്ന വലിയ ടെലിവിഷൻ സ്‌ക്രീനിലിലും ബൈബിൾ അപ്പസ്റ്റോലറ്റ് ജനറൽ ബോഡി ഗ്രൂപ്പിലും റിസ്റ് ബാൻഡിലുള്ള ക്യു ആർ കോഡിലും റിസൾട്ടുകൾ ലഭ്യമായിരിക്കും. മത്സരത്തിൽ പങ്കെടുത്ത ഷോർട് ഫിലിമുകൾ കലോത്സവ വേദിയിൽ പ്രത്യേകം ക്രമീകരിച്ചിരിക്കുന്ന സ്റ്റേജിൽ പ്രദർശിപ്പിക്കുന്നതാണ് .
ഒന്നാം സ്ഥാനം നേടിയ ഷോർട്ട് ഫിലിം പ്രധാന വേദിയിൽ സമ്മാനദാനത്തിന് മുൻപ് പ്രദര്ശിപ്പിക്കും. അഞ്ചേമുക്കാലുമുതൽ സമ്മാനദാന ചടങ്ങുകൾ ആരംഭിച്ച് എട്ടുമണിക്ക് സമ്മാനദാനങ്ങൾ പൂർത്തിയാക്കും. രൂപത ബൈബിൾ കലോത്സവത്തിനുള്ള എല്ലാ ഒരുക്കങ്ങളും പൂർത്തിയായതായി രൂപത ബൈബിൾ അപ്പസ്റ്റോലറ്റ് കോഓർഡിനേറ്റർ ജോൺ കുര്യൻ അറിയിച്ചു. രൂപത ബൈബിൾ കലോത്സവത്തിന് നേതൃത്വം കൊടുക്കുന്നത് അഭിവന്ദ്യ പിതാവിന്റെ അനുഗ്രഹത്തോടെ പെരിയ ബഹുമാനപെട്ട പ്രോട്ടോസിഞ്ചെല്ലൂസ് ആന്റണി ചുണ്ടെലിക്കാട്ട് അച്ചന്റേയും നേതൃത്വത്തിൽ ബഹുമാനപ്പെട്ട ജോർജ് എട്ടുപറയിൽ അച്ചൻ ചെയർമാനായിട്ടുള്ള പന്ത്രണ്ട് റീജിയണുകളിൽ നിന്നുമുള്ള 24 അംഗ കമ്മിഷൻ അംഗങ്ങളാണ് . ബഹുമാനപ്പെട്ട ജോൺ പുളിന്താനത് അച്ചനും ജോസഫ് പിണക്കാട്ട് അച്ചനും ക്രിസ്റ്റോ നേരിയംപറമ്പിൽ അച്ചനും തോമസുകുട്ടി വാലുമ്മേൽ അച്ചനും കലോത്സവ ജോയിന്റ് ഡയറക്ടർ ആയി പ്രവർത്തിക്കുന്നു. മുഴുവൻ സമയവും പ്രവർത്തിക്കുന്ന രൂപതയിലെ സേഫ് ഗാർഡിങ് ടീമും ഹെൽത്ത് ആൻഡ് സേഫ്റ്റി ടീമും കലോത്സവ വേദിയിൽ ഉണ്ടായിരിക്കുന്നതാണ് . കലോത്സവ വേദിയിൽ എത്തുന്നവർക്കായി രണ്ട് കേറ്ററിംഗ് ടീമുകളാണ് ഭക്ഷണം ഒരുക്കുക. കലോത്സവമത്സരങ്ങൾ രൂപത ഫേസ്ബുക്കിലൂടെയും യു ട്യൂബ് ചാനലിലും മാഗ്‌നവിഷൻ ചാനലിൽ കൂടിയും ലൈവ് പ്രക്ഷേപണം ഉണ്ടായിരിക്കുന്നതാണെന്ന് ബൈബിൾ അപ്പൊസ്‌തലേറ്റിന് വേണ്ടി പി ആർ ഓ ജിമ്മിച്ചൻ ജോർജ് അറിയിച്ചു .
Leave a Reply