മലയാളി മെഡിക്കൽ അസോസിയേഷൻ യുകെയുടെ വാർഷിക ലൈവ് വെർച്ച്വൽ കൂട്ടായ്മ ജനുവരി 30 ന് നടത്തുവാൻ തീരുമാനിച്ചു. യൂറ്റ്യൂബിലൂടെയും, സൂമിലൂടെയും സംപ്രേഷണം ചെയ്യുന്ന മൂന്ന് മണിക്കൂറോളം ദൈർഘ്യമുള്ള പരിപാടിയിൽ യുകെയിലും, നാട്ടിൽ നിന്നും ഉള്ള വിവിധ കലാകാരൻമാർ അണിനിരക്കുന്ന ഈ കലാസന്ധ്യയിലേക്ക് ഏവരെയും സ്വാഗതം ചെയ്യുന്നതായി എംഎംഎ യുടെ ഭാരവാഹികൾ അറിയിച്ചു. കലാവിരുന്നിന് മാറ്റു കൂട്ടാൻ എത്തുന്നത് യുകെയിൽ വളർന്ന് വരുന്ന താരങ്ങളായ ഈവാ കുര്യാക്കോസ്, സൗപർണ്ണികാ നായർ, ജിയാ ഹരികുമാർ, ലക്ഷ്മി രാജേഷ് എന്നിവരാണ്. ഇവരോടൊപ്പം പിയാനിസ്റ്റ് മിലാൻ മനോജ്, കോമഡി ഉത്സവം മിധുൻ രമേശ്, ശ്രീകുമാരൻ തമ്പി, മാൻകൊബ് ഗോപക്രിഷ്ണൻ എന്നിങ്ങനെ പലരും പങ്കെടുക്കുന്നു.

കോവിഡിന്റെ പശ്ചാത്തലത്തിൽ കഴിഞ്ഞ വർഷം നടത്താൻ പറ്റാതിരിക്കുകയും, ഈ വരുന്ന ജനുവരി മുപ്പതിന് നടത്താൻ തയാറെടുക്കുന്ന ആന്വൽ സോഷ്യൽ & കൾച്ചറലിന് എല്ലാവിധ ആശംസകളും നേരുന്നതായി കെ എസ് ചിത്ര, നടി നൈല ഉഷ, മിധുൻ രമേഷ് എംഎംഎയുടെ ഭാരവാഹികൾ മുഖേന അറിയിച്ചു. അതോടൊപ്പം ഈ പരിപാടി ഏവർക്കും ഒരു പുതിയ ഉണർവും, ഉന്മേഷവും, ഉത്തേജനവും തരട്ടെ എന്ന് പ്രാർത്ഥിക്കുന്നതോടാപ്പം കോവിഡ് രോഗികളെ പരിചരിക്കുന്ന എല്ലാവരെയും സ്നേഹപൂർവം ഓർക്കുന്നു എന്നും, എല്ലാവർക്കും വേണ്ടി പ്രാർത്ഥിക്കുന്നു എന്നും കെ എസ് ചിത്ര അറിയിച്ചു.

കോവിഡിന്റെ പിടിയിൽ അമർന്നിരിക്കുന്ന ഈ വിഷമ ഘട്ടത്തിൽ ഈ കലാപരിപാടികൾ നിങ്ങൾക്കേവർക്കും, ഒരാശ്വാസവും, ആനന്ദവും പ്രധാനം ചെയ്യുന്നതായിരിക്കുമെന്നും, എല്ലാവരും ഇതൊരറിയിപ്പായി സ്വീകരിക്കണമെന്നും എംഎംഎ ഭാരവാഹികൾ അറിയിച്ചു.

എംഎംഎയുടെ പ്രസിഡന്റ് ഡോ. ജോബ് സിറിയക്, സെക്രട്ടറി ഡോ ആന്റണി തോമസ് വാച്ചാപറമ്പിൽ, ട്രഷറർ ഡോ. സുരേഷ് ചന്ദ്രൻ, വൈസ് പ്രസിഡന്റ് ഡോ. ജയൻ മന്നത് എന്നിവരാണ് എല്ലാ തയാറെടുപ്പുകൾക്കും നേതൃത്വം വഹിക്കുന്നത്.