ന്യൂസ് ഡെസ്ക് മലയാളം യുകെ
കൊറോണവൈറസ് രോഗവ്യാപന തീവ്രത യുകെയിൽ കുറയുന്നതായുള്ള റിപ്പോർട്ടുകൾ പുറത്തുവന്നു. കോവിഡ് -19 രോഗികളുടെ ആധിക്യം മൂലം എൻഎച്ച്എസിൻ മേലുള്ള സമ്മർദം കുറയുന്നതിൻെറ ആശ്വാസത്തിലാണ് രാജ്യം .ദൈനംദിന മരണങ്ങളും രോഗബാധയും കുറയുന്നതായാണ് കണക്കുകൾ വ്യക്തമാക്കുന്നത്. ഡിപ്പാർട്ട്മെൻറ് ഓഫ് ഹെൽത്തിൻെറ കണക്കുകൾ പ്രകാരം 7 വയസ്സുള്ള ഒരു കുട്ടിയുൾപ്പെടെ 915 പേരാണ് ഇന്നലെ കോവിഡ് ബാധിച്ച് മരണത്തിന് കീഴടങ്ങിയത്. അതേ സമയം 20634 പേർ പുതിയതായി രോഗബാധിതരായി . പുതിയ കണക്കുകൾ പ്രകാരം രാജ്യം കോവിഡിൻെറ അതിതീവ്രതരംഗത്തിൽ നിന്ന് മുക്തമായതായാണ് വിദഗ്ധർ വിലയിരുത്തുന്നത്.
അതേസമയം സ്കോട്ട്‌ലൻഡിനൊപ്പം വെയിൽസും ഫെബ്രുവരി 22-ന് സ്കൂളുകൾ തുറക്കാനുള്ള നടപടികളുമായി മുന്നോട്ടു പോകാൻ തീരുമാനിച്ചു . വെയിൽസ് ആരോഗ്യമന്ത്രി വോൺ ഗെത്തിംഗ് ആണ് ഇത് സംബന്ധിച്ച് അറിയിപ്പ് നടത്തിയത്. സ്കോട്ട്‌ലൻഡും വെയിൽസും സ്കൂളുകൾ തുറക്കുന്നത് പ്രധാനമന്ത്രി ബോറിസ് ജോൺസനുമേൽ ഇംഗ്ലണ്ടിലെ സ്കൂളുകൾ തുറക്കാനുള്ള സമ്മർദ്ദം ഏറും എന്ന് രാഷ്ട്രീയ നിരീക്ഷകർ വിലയിരുത്തുന്നു. മാർച്ച് 8 – ന് ഇംഗ്ലണ്ടിലെ സ്കൂളുകൾ തുറക്കാനാണ് ബോറിസ് ജോൺസൺ പദ്ധതിയിട്ടിരിക്കുന്നത്. ഇത് ഇംഗ്ലണ്ടിലെ കുട്ടികൾ മറ്റു സ്ഥലങ്ങളിലെ കുട്ടികളെക്കാൾ തങ്ങളുടെ അധ്യയനത്തിൽ പുറകിലാകാനുള്ള സാധ്യയുണ്ടന്ന് വിമർശകർ ചൂണ്ടിക്കാണിക്കുന്നു.
Leave a Reply