ന്യൂസ് ഡെസ്ക് മലയാളം യുകെ

ഏറ്റവും പുതിയ കണക്കുകൾ പ്രകാരം യുകെയിൽ 11 ദശലക്ഷത്തിലധികം ജനങ്ങൾക്ക് രണ്ട് ഡോസ് വാക്‌സിൻ ലഭിച്ചതായി എൻഎച്ച്എസിൻെറ കണക്കുകൾ വ്യക്തമാക്കുന്നു. രാജ്യത്ത് ഇതുവരെ 11,192,602 പേർക്കാണ് രണ്ട് ഡോസ് വാക്സിൻ ലഭിച്ചത്. അതേസമയം ആദ്യ ഡോസ് ലഭിച്ചവരുടെ എണ്ണം 33,257,651 ആയി. രാജ്യത്ത് 50 വയസ്സിന് മുകളിലുള്ള 95% പേർക്കും വാക്‌സിനേഷൻ നൽകാൻ സാധിച്ചതായാണ് കണക്കുകൾ കാണിക്കുന്നത്. ജൂലൈ അവസാനത്തോടെ എല്ലാ മുതിർന്നവർക്കും ഒരു ഡോസ് വാക്‌സിൻ എങ്കിലും നൽകാൻ സാധിക്കും എന്ന് ആരോഗ്യ സെക്രട്ടറി മാറ്റ് ഹാൻ കോക്ക് അറിയിച്ചു.

കഴിഞ്ഞദിവസം കോവിഡ് ബാധിച്ച 18 മരണങ്ങളാണ് യുകെയിൽ റിപ്പോർട്ട് ചെയ്യപ്പെട്ടത്. 2729 പേർക്കാണ് പുതിയതായി കോവിഡ് ബാധിച്ചത്. ഇതോടുകൂടി മഹാമാരി ആരംഭിച്ചതിന് ശേഷം കോവിഡ് ബാധിച്ചുള്ള മരണങ്ങൾ 127345 ഉം രോഗബാധിതരുടെ എണ്ണം 4398431 ആയി. അതേസമയം ഏറ്റവും കൂടുതൽ കോവിഡ് ബാധിച്ച 20 രാജ്യങ്ങളിൽ നിന്ന് യുകെ ഒഴിവായി. അൽഷിമേഴ്‌സ്, ഹൃദ്രോഗം മൂലമുള്ള മരണങ്ങളേക്കാൾ കുറവു മരണങ്ങൾ മാത്രമാണ് ബ്രിട്ടനിൽ കോവിഡ് മൂലമുണ്ടാകുന്നതെന്ന കണക്കുകൾ പുറത്തുവന്നു. കോവിഡ് മഹാമാരിയുടെ പ്രയാസങ്ങൾ വളരെയധികം ഏറ്റു വാങ്ങിയ ഒരു രാജ്യമായിരുന്നു യുകെ എന്നാൽ യുദ്ധകാല അടിസ്ഥാനത്തിൽ വാക്‌സിൻ നൽകിയും ലോക്ഡൗൺ നിയന്ത്രണങ്ങളാലും രോഗവ്യാപനവും മരണനിരക്കും കുറയ്ക്കുന്നതിൽ രാജ്യം വിജയം കൈവരിച്ചു. യുകെയിലെ മലയാളികളിൽ ഒട്ടുമിക്കവരും ആരോഗ്യമേഖലയിൽ പ്രവർത്തിക്കുന്നവരാണ്. അതുകൊണ്ടുതന്നെ കോവിഡിനെതിരെ യുദ്ധം രാജ്യം ജയിച്ചത് യുകെ മലയാളികൾക്കും അഭിമാനിക്കാവുന്ന നേട്ടമായി. അധികം താമസിയാതെ കോവിഡിൽ നിന്നും ലോക്ഡൗൺ നിയന്ത്രണങ്ങളിൽ നിന്നും രാജ്യം മുക്തമാകുമെന്ന സൂചനകളാണ് പുറത്തു വരുന്നത്.