ന്യൂസ് ഡെസ്ക്, മലയാളം യുകെ
എൻ എച്ച് എസിലെ കാത്തിരിപ്പു സമയം എങ്ങനെ കുറയ്ക്കാം എന്നത് പുതിയ സർക്കാരിനും ഒരു കീറാമുട്ടിയാണെന്ന റിപ്പോർട്ടുകളാണ് ഇപ്പോൾ പുറത്തു വന്നിരിക്കുന്നത്. ചികിത്സയ്ക്കായി 18 മാസത്തോളം കാത്തിരിക്കേണ്ടി വരുന്ന ദുരവസ്ഥ എങ്ങനെ ഒഴിവാക്കാമെന്നതിന് വ്യക്തമായ മാർഗനിർദേശങ്ങൾ നൽകാൻ ആർക്കും സാധിക്കുന്നില്ല. കോവിഡ് കാലത്തെ അധിക സമ്മർദ്ദവും പണിമുടക്കുകളും ആവശ്യത്തിന് ജീവനക്കാർ ഇല്ലാത്ത അവസ്ഥയുമാണ് കാത്തിരിപ്പു സമയം ഇത്രയും ഉയരുന്നതിന് കാരണമായി ചൂണ്ടി കാണിക്കപ്പെടുന്നത്. ഇതിനിടെ അടുത്ത ബഡ്ജറ്റിൽ എൻഎച്ച്എസിന് കഴിഞ്ഞ വർഷം ഉള്ളതിലും 4 ശതമാനം വർദ്ധനവ് മാത്രമെ ഉണ്ടാകുകയുള്ളു എന്ന വിവരങ്ങളും പുറത്തു വന്നിട്ടുണ്ട്.
എന്നാൽ എൻഎച്ച്എസിലെ കാത്തിരിപ്പു സമയം കുറയ്ക്കുന്നതിന് സ്വകാര്യ ആശുപത്രികളുമായി ചേർന്ന് നടപ്പിലാക്കിയ പദ്ധതിയെ കുറിച്ച് പലർക്കും കാര്യമായ ധാരണയില്ല. സ്വകാര്യ ആശുപത്രികളിൽ എൻഎച്ച്എസ് രോഗികൾക്ക് ചികിത്സ വാഗ്ദാനം ചെയ്യുന്ന പദ്ധതിയിൽ ആയിരക്കണക്കിന് അപ്പോയിന്റ്മെൻ്റുകൾ ഉപയോഗിക്കപ്പെടാതെ പോകുകയാണെന്ന റിപ്പോർട്ടുകൾ ആണ് ഇപ്പോൾ പുറത്ത് വന്നിരിക്കുന്നത്. ഉടുപ്പ് മാറ്റിവയ്ക്കൽ , നേത്ര ശസ്ത്രക്രിയ എന്നിവ പോലുള്ള ചികിത്സകൾക്ക് സ്വകാര്യ ആശുപത്രികളിൽ ചെയ്യുന്നതിന് എൻ എച്ച് എസ് പണം നൽകുന്ന പദ്ധതിയാണിത്. ഇൻഡിപെൻഡൻ്റ് ഹെൽത്ത് കെയർ പ്രൊവൈഡേഴ്‌സ് നെറ്റ്‌വർക്ക് പറയുന്നത് അനുസരിച്ച് ഇത്തരം സേവനങ്ങൾ നേടുന്നതിലൂടെ രോഗികൾക്ക് അവരുടെ കാത്തിരിപ്പു സമയം മൂന്ന് മാസം വരെ കുറയ്ക്കാൻ സാധിക്കും.
ഇത്തരം സേവനങ്ങൾ സ്വീകരിക്കുന്നതിന് എന്താണ് നടപടിക്രമം എന്നതിനെ കുറിച്ച് പലർക്കും അറിയില്ലെന്നതാണ് യാഥാർത്ഥ്യം. നിങ്ങളുടെ പ്രായമോ നിങ്ങൾ താമസിക്കുന്ന സ്ഥലമോ നിങ്ങൾക്ക് ആവശ്യമായ ചികിത്സയോ പരിഗണിക്കാതെ എല്ലാവർക്കും ഈ പദ്ധതിയിൽ ചേരാൻ യോഗ്യരാണ്. നിങ്ങളുടെ ശാരീരികവും മാനസികവും ആയ ആരോഗ്യസ്ഥിതി പരിഗണിച്ച് ജിപിയുടെ ശുപാർശയോടെ അനുയോജ്യമായ ഹോസ്പിറ്റലുകൾ തിരഞ്ഞെടുക്കാൻ ഒരാൾക്ക് സാധിക്കും. ഇതിൽ എൻഎച്ച്എസ് ഹോസ്പിറ്റലുകൾക്ക്‌ ഒപ്പം തന്നെ എൻഎച്ച്എസിന് സേവനം നൽകുന്ന നിരവധി സ്വകാര്യ ആശുപത്രികളും ഉൾപ്പെടുന്നുണ്ട്. അടിയന്തിര പരിചരണത്തിന് സ്വകാര്യമേഖലയിലെ സേവനം ലഭ്യമാകണമെങ്കിൽ അതിന് തക്കതായ കാരണങ്ങൾ സമർപ്പിക്കേണ്ടതായി വരും. അതായത് സ്വകാര്യ ആശുപത്രി അടുത്താണ് അതുമല്ലെങ്കിൽ എൻഎച്ച്എസിൽ ലഭ്യമല്ലാത്ത ചികിത്സ അവിടെ ലഭിക്കും എന്നീ കാരണങ്ങൾ ഉണ്ടെങ്കിൽ അടിയന്തിര പരിചരണത്തിന് സ്വകാര്യ മേഖലയിലെ ആശുപത്രികൾ തിരഞ്ഞെടുക്കാൻ അർഹരായവർക്ക് സാധിക്കും. ഇത്തരം സ്വകാര്യ മേഖലയിലെ സേവനങ്ങൾ ശരിയായ നടപടിക്രമങ്ങൾ പാലിച്ച് സ്വീകരിക്കുന്നതിലൂടെ രോഗികൾക്കും എൻഎച്ച്എസിനും അധികഭാരം ഉണ്ടാവുകയില്ല. കാരണം എൻഎച്ച്എസും സ്വകാര്യ മേഖലയിലെ ആശുപത്രികളും തമ്മിൽ ഇത്തരം ചികിത്സ നടത്താൻ കരാറിൽ ഏർപ്പെട്ടിട്ടുണ്ട്.
Leave a Reply