ജിൻസി കോരത്

ലണ്ടൻ: യുകെയിലെ ഗിൽഫോർഡ് മലയാളി കൾച്ചറൽ അസോസിയേഷന്റെ (GMCA) ആഭിമുഖ്യത്തിൽ വിവിധ പരിപാടികളോടെ സംഘടിപ്പിച്ച ഈ വർഷത്തെ തിരുവോണാഘോഷം കേരളീയ സംസ്കാരത്തിന്റെയും പാരമ്പര്യത്തിന്റെയും കലാവൈവിധ്യത്തിന്റെയും മനോഹരമായ ദൃശ്യാവിഷ്കാരമായി മാറി.

ഗിൽഫോർഡ് ജേക്കബ്സ് വെൽ ഹാളിൽ നടന്ന ഓണാഘോഷത്തിൽ കുട്ടികളും മുതിർന്നവരുമുൾപ്പെടെ നിരവധി കുടുംബങ്ങൾ പങ്കെടുത്തു. മുൻവർഷങ്ങളിലെപ്പോലെ വ്യത്യസ്തതയാർന്ന കലാ-കായിക വിനോദ പരിപാടികളാൽ സമ്പന്നമായിരുന്നു ഇത്തവണത്തെ ഓണാഘോഷവും.

മനോഹരമായ പൂക്കളമൊരുക്കിയും ആരവങ്ങളോടെയും ആർപ്പുവിളികളോടെയും മാവേലി തമ്പുരാന് ഊഷ്മളമായ വരവേൽപ്പ് നൽകിയാണ് ആഘോഷ പരിപാടികൾക്ക് തുടക്കമായത്. ജിഎംസിഎ ഭാരവാഹികൾ ഭദ്രദീപം തെളിച്ച് ആഘോഷ പരിപാടികളുടെ ഔപചാരിക ഉദ്ഘാടനം നിർവഹിച്ചു. ലോക കേരളസഭാംഗം സി. എ. ജോസഫ് തിരുവോണ സന്ദേശം നൽകി. പ്രവാസി മലയാളികളുടെ ഒരുമയുടെയും സ്നേഹത്തിന്റെയും സമത്വത്തിന്റെയും മഹത്തായ പ്രതിഫലനമാണ് യുകെയിലെ ഓണാഘോഷങ്ങളെന്ന് സി. എ. ജോസഫ് തന്റെ സന്ദേശത്തിൽ പറഞ്ഞു. ജിഎംസിഎയുടെ മനോഹരമായ ഈ ഓണാഘോഷം സ്നേഹവും സൗഹൃദവും പങ്കുവെച്ച് കേരളീയ പാരമ്പര്യവും സംസ്കാരവും പുതുതലമുറയിലേക്ക് പകർന്നുനൽകാൻ ഇടയാകട്ടെയെന്നും അദ്ദേഹം ആശംസിച്ചു.
ജിഎംസിഎ പ്രസിഡന്റ് മോളി ക്ലീറ്റസ് അധ്യക്ഷത വഹിച്ചു. സെക്രട്ടറി നിക്സൺ ആന്റണി സ്വാഗതം പറഞ്ഞു.

പ്രസിഡന്റ് മോളി ക്ലീറ്റസിന്റെയും പ്രോഗ്രാം കോർഡിനേറ്റർ ഫാൻസി നിക്സന്റെയും കലാപ്രതിഭയായ റസിയ സന്തോഷിന്റെയും നേതൃത്വത്തിൽ ചിട്ടപ്പെടുത്തിയ വിവിധ നൃത്തങ്ങളും ആകർഷകമായ കലാപരിപാടികളും വേദിയിൽ അരങ്ങേറി.

കേരളീയ പാരമ്പര്യത്തിന്റെ ദൃശ്യാവിഷ്കാരമായി മാറിയ തീം ഡാൻസ്, തിരുവോണാഘോഷത്തിന്റെ പ്രാധാന്യം വിളിച്ചോതുന്നതിനൊപ്പം കേരളത്തിന് മാത്രം സ്വന്തമായ സാംസ്കാരിക തനിമയും പാരമ്പര്യവും പുതുമയും സമന്വയിപ്പിച്ചാണ് അവതരിപ്പിച്ചത്. കാണികൾക്ക് വേറിട്ടതും അനിർവചനീയവുമായ ദൃശ്യാനുഭവം സമ്മാനിച്ച അവതരണം ഏറെ ശ്രദ്ധേയമായി. കേരളീയ സംസ്കാരത്തിന്റെ വിവിധ മുഖങ്ങൾ കലാരൂപങ്ങളിലൂടെ വേദിയിൽ അവതരിപ്പിച്ചതും പരിപാടികളെ ഏറെ ശ്രദ്ധേയമാക്കി.

ഓണാഘോഷങ്ങളുടെ ഭാഗമായി ജിഎംസിഎയിലെ വനിതകൾ ചേർന്ന് അവതരിപ്പിച്ച തിരുവാതിരയും വേറിട്ട മികവ് പുലർത്തി. നൃത്താവിഷ്കാരങ്ങളും കുട്ടികളും മുതിർന്നവരും ചേർന്ന് അവതരിപ്പിച്ച പുതുമയാർന്നതും വൈവിധ്യമാർന്നതുമായ കലാപരിപാടികളും കാണികളുടെ പ്രശംസ ഏറ്റുവാങ്ങി.

ബിനോദ് ജോസഫ്, സജി ജേക്കബ് , ബിനി സജി എന്നിവർ നേതൃത്വം നൽകിയ കുട്ടികളുടെയും മുതിർന്നവരുടെയും വ്യത്യസ്തങ്ങളായ വിനോദ-കായിക പരിപാടികളും പുരുഷന്മാർക്കും വനിതകൾക്കും പ്രത്യേകം സംഘടിപ്പിച്ച വടംവലി മത്സരവും ആഘോഷത്തിന് ആവേശം പകർന്നു. പരമ്പരാഗത രീതിയിൽ ഒരുക്കിയ വിഭവസമൃദ്ധമായ ഓണസദ്യ എല്ലാവരിലും ഗൃഹാതുരത ഉണർത്തി.

സ്‌കൂൾ വിദ്യാർത്ഥിയായ ബേസിൽ എൽദോ മാവേലിയുടെ വേഷത്തിൽ ആകർഷകമായ പുഞ്ചിരിയോടെയും പ്രസരിപ്പാർന്ന നൃത്തച്ചുവടുകളോടെയും വേദിയിലെത്തിയത് ആഘോഷത്തിന് കൂടുതൽ മിഴിവേകി. മാവേലിയുടെ വേഷത്തിൽ നിറഞ്ഞുനിന്ന ബേസിലിന്റെ സാന്നിധ്യം കുട്ടികളിലും മുതിർന്നവരിലും ഒരുപോലെ സന്തോഷവും കൗതുകവും നിറച്ചു. തനതായ ഭാവപ്രകടനങ്ങളോടെയും ചടുലമായ നൃത്തച്ചുവടുകളോടെയും ബേസിൽ മാവേലിയുടെ വേഷം അവതരിപ്പിച്ചത് കാണികൾക്ക് ഏറെ ആസ്വാദ്യകരമായ അനുഭവമായി.

പരിപാടികളുടെ അവതാരകയായി എത്തിയ പ്രോഗ്രാം കോർഡിനേറ്റർ ഫാൻസി നിക്സൺ തിളക്കമാർന്ന പ്രകടനം കാഴ്ചവച്ചു. ആനി സാം നേതൃത്വം നൽകിയ സ്റ്റേജ് ഡെക്കറേഷനും എല്ലാവരുടെയും പ്രശംസ നേടി. പങ്കെടുത്ത മുഴുവൻ ആളുകൾക്കും പ്രസിഡന്റ് മോളി ക്ലീറ്റസ് നന്ദി പ്രകാശിപ്പിച്ചു. വിവിധ കായിക-വിനോദ മത്സരങ്ങളിൽ വിജയികളായവർക്ക് സമ്മാനങ്ങളും വിതരണം ചെയ്തു.

ഈ വർഷത്തെ ഓണാഘോഷ പരിപാടികൾക്ക് നേതൃത്വം നൽകിയത് സെക്രട്ടറി നിക്സൺ ആന്റണി, ട്രഷറർ സ്നോബിൻ മാത്യു, ജോയിന്റ് സെക്രട്ടറി ബിനോദ് ജോസഫ് എന്നിവരോടൊപ്പം എക്സിക്യൂട്ടീവ് കമ്മിറ്റി അംഗങ്ങളായ ജിൻസി കോരത്, ഷിജു മത്തായി, മാർട്ടിൻ ജോസഫ്, അനുഷ തോമസ്, ക്ലീറ്റസ് സ്റ്റീഫൻ, സനു ബേബി, എൽദോസ് പുളിവേലിൽ എന്നിവരാണ്.

സമീക്ഷ യുകെയുടെ നാലാമത് ഓൾ യുകെ വടംവലി മത്സരം ഈ വർഷം ബർമിംഗ്ഹാമിലെ
ടിപ്ട്ടൊൺ സ്പോർട്സ് അക്കാദമിയിൽ വെച്ച് ഒക്ടോബർ 18 നു നടക്കും. യുകെയിലെ വടംവലി ടൂർണമെന്റുകളിൽ പ്രഥമ സ്ഥാനത്തുള്ള ഈ ടൂർണമെന്റിൽ യുകെയിലെ പ്രമുഖ ടീമുകളെല്ലാം തന്നെ അണിനിരക്കും. വനിതകളുടെ മത്സരത്തിനും സമീക്ഷ തുടക്കം കുറിക്കുന്നു എന്നൊരു പ്രത്യേകത കൂടി ഈ വർഷത്തെ ടൂർണ്ണമെന്റിനുണ്ട്.

ഈ കായിക മാമാങ്കത്തിന്റെ മാറ്റുകൂട്ടാൻ വിവിധ കലാ പരിപാടികളും വേദിയിൽ അരങ്ങേറും. ഇതിന്റെ പ്രവർത്തനങ്ങൾ അണിയറയിൽ പുരോഗമിക്കുന്നതായി സംഘാടകർ അറിയിച്ചു. പരിപാടി ആസ്വദിക്കാൻ എത്തുന്നവർക്ക് കേരം റെസ്റ്റോറന്റ് ഒരുക്കുന്ന സ്വാദിഷ്ടമായ കേരളീയ ഭക്ഷണങ്ങൾ ആസ്വദിക്കുന്നതിനുള്ള സൗകര്യവും ഉണ്ടാകും. കായിക പ്രേമികളെ ഹരം കൊള്ളിക്കുന്ന വാശിയേറിയ വടം വലി മത്സരവും,
മനസ്സിനു ആനന്ദം നൽകുന്ന കലാ പ്രകടനവും, നാടൻ ഭക്ഷണ ശാലയും ഒക്കെ ചേർന്ന്
ഗൃഹാതുരത്വം നിറയുന്ന ഒരു വേദിയാകും ബർമിംഗ്ഹാമിൽ നിങ്ങൾക്കായി ഒരുങ്ങുക. യുകെ മലയാളികളെ കുടുംബസമേതം ഈ വേദിയിലേക്ക് സമീക്ഷ സ്വാഗതം ചെയ്യുന്നതായി ഭാരവാഹികൾ അറിയിച്ചു.

വടം വലി ഒരു മത്സരം മാത്രമല്ല, ഒരുമയുടെയും കരുത്തിന്റെയും ആത്മവിശ്വാസത്തിന്റെയും പ്രതീകം കൂടി ആണ്. വനിതകളുടെ പങ്കാളിത്തത്തോടെ ഈ വേദിയിൽ കരുത്തിന്റെ, ആത്മവിശ്വാസത്തിന്റെ, ഒരുമയുടെയും ഈ കായിക മാമാങ്കം അവരിലൂടെ ആഘോഷിക്കപ്പെടും. യുകെയുടെ വിവിധ ഭാഗങ്ങളിൽ നിന്നുള്ള വനിതാ ടീമുകൾ മത്സരത്തിന്റെ ഭാഗമാകും. ആവേശകരമായ മത്സരങ്ങൾക്കും മനോഹരമായ
ഓർമകൾക്കും ഈ വേദി ഒക്ടോബർ 18 നു സാക്ഷിയാകും.

ഒന്നാമതെത്തുന്നവർക്ക് സമീക്ഷയുടെ എവർറോളിങ് ട്രോഫിയും സ്ഥിരം ട്രോഫിയും 1504 പൗണ്ടും അടങ്ങുന്ന സമ്മാനം ലഭിക്കും. 704 പൗണ്ടാണ് രണ്ടാം സ്ഥാനക്കാരെ കാത്തിരിക്കുന്നത്. മൂന്നും നാലും സ്ഥാനക്കാർക്ക് 304 പൗണ്ടും 204 പൗണ്ടും ലഭിക്കും. അഞ്ച് മുതല്‍ എട്ട് സ്ഥാനം വരെയുള്ളവർക്ക് പ്രോത്സാഹന സമ്മാനമായി
104 പൗണ്ടാണ് ലഭിക്കുക. ജേതാക്കള്‍ക്ക് സമ്മാനത്തുകയ്ക്ക് പുറമെ ട്രോഫികളും കൈമാറും.

ഈ സമ്മാനങ്ങൾക്കു പുറമെ Fair play അവാർഡ് 104 പൗണ്ട്, Upcoming Team അവാർഡ് 104 പൗണ്ട്, വ്യക്തിഗത മികവിനുള്ള അംഗീകാരമായി Best puller, Best Front, Best Back എന്നീ മേഖലയിൽ മികവ് തെളിയിക്കുന്നവർക്കും സമ്മാനങ്ങൾ ലഭിക്കും.

വനിതകളുടെ മത്സരം സമീക്ഷ യുകെ ആദ്യമായി നടത്തുന്നതിനാൽ രജിസ്ട്രേഷൻ പൂർണ്ണമായും സൗജന്യമാണ്. വിജയികൾക്കായി £501, £201, £101, £101 എന്നിങ്ങനെ ആകർഷകമായ ക്യാഷ് പ്രൈസുകളും ട്രോഫികളും ഒരുക്കിയിട്ടുണ്ട്.

ടീമുകളുടെ രജിസ്ട്രേഷൻ പുരോഗമിക്കുന്നു. ഇനിയും രജിസ്റ്റർ ചെയ്യാൻ ആഗ്രഹിക്കുന്നവർ എത്രയും വേഗം രജിസ്റ്റർ ചെയ്യണം എന്ന് ഭാരവാഹികൾ അറിയിച്ചു. കഴിഞ്ഞ മൂന്നു വർഷങ്ങളിലും സംഘാടന മികവുകൊണ്ടും പങ്കാളിത്തം കൊണ്ടും മികച്ചു നിന്ന ടൂർണമെന്റ് ഈ വർഷവും മികച്ച അനുഭവമാക്കാനുള്ള
ഒരുക്കങ്ങൾ നടക്കുന്നതായി സംഘാടകർ അറിയിച്ചു.

രജിസ്ട്രേഷനും കൂടുതല്‍ വിവരങ്ങൾക്കും സമീക്ഷ യുകെ പ്രോഗ്രാം കോർഡിനേറ്റർമാരായ ഷാജു സി ബേബി (07856493330), ദീപ്‌തി ലൈജു (07810229426), അൽ യാസിർ സാദിഖ് (07774476565) എന്നിവരുമായി ബന്ധപ്പെടുക.

യുകെ ഭരിക്കുന്ന ലേബർ പാർട്ടിയുടെ പൊന്നാപുരം കോട്ടയായ ലിവർപൂളിൽ യുകെയിലെ ലേബർ പാർട്ടിയുടെ മലയാളി നേതാക്കളെ ആദരിച്ചു. ലിവർപൂളിൽ വച്ചു നടക്കുന്ന ലേബർ പാർട്ടിയുടെ വാർഷിക യോഗത്തിൽ പങ്കെടുക്കാനായിട്ടാണ് ലേബർ പാർട്ടി നേതാക്കൾ ലിവർപൂളിൽ എത്തിയത്. യുകെ പാർലമെന്റ് എം.പി ശ്രീമാൻ സോജൻ ജോസഫ്, ബേസിങ് സ്റ്റോക്ക് ഡെപ്യൂട്ടി മേയർ ശ്രീ സജീഷ് ടോം, ക്രോയ്ഡൻ മുൻ മേയർ ശ്രീമതി മഞ്ജു ഷാഹുൽ ഹമിദ്,ന്യൂ ഹാം മുൻ കൗൺസിലർ ശ്രീ സുഗതൻ തെക്കേപുര,വിഗൻ സി.ൽ.പി അഡ്വക്കേറ്റ് നവാസ് ബിരാവു,ലിവർപൂളിലെ യുവ നേതാവ് പ്രിയ ലാൽ, മെൽബിൻ ജോസ്, ആർ സി എൻ നഴ്സിംഗ് യൂണിയൻ നേതാവ് ശ്രീ ബിജോയ് സെബാസ്റ്റ്യൻ എന്നിവർക്കാണ് ലിവർപൂൾ മലയാളികൾ സ്വീകരണം നൽകിയത്.

ചടങ്ങിൽ പങ്കെടുത്തവരുടെ നിരവധി ചോദ്യങ്ങൾക്കും, യുകെ മലയാളികളുടെ പൊതുവായ ആശങ്കകൾക്കും എംപി ശ്രീ സോജൻ തോമസ് തൻമയത്തോടെ ഉത്തരങ്ങൾ നൽകി. കൂടാതെ കുടിയേറ്റം,പി.ആർ. തൊഴിൽ നിയമവശങ്ങൾ, എൻഎച്ച്എസ് ആരോഗ്യ മേഖല, സാമ്പത്തിക, വ്യവസായ, ബാങ്കിംഗ്, പാർപ്പിട മേഖലകളെ കുറിച്ചുള്ള ലേബർ പാർട്ടിയുടെ നയങ്ങളെ കുറിച്ചും വിശദീകരണം നടത്തി. യുകെയിൽ കുടിയേറ്റക്കാർക്കെതിരെ വർധിച്ചു വരുന്ന അക്രമ സംഭവവങ്ങളെ കുറിച്ചും , തീവ്ര വലതുപക്ഷ പാർട്ടികൾ ഉയർത്തുന്ന വെല്ലുവിളികളെ കുറിച്ചുമുള്ള ആശങ്കകൾ പങ്കെടുത്തവർ ഉന്നയിച്ചു. ചടങ്ങിൽ നോർത്ത് വെസ്റ്റ് മേഖലയിലെ പ്രബുദ്ധരായ മലയാളികൾ പങ്കെടുത്തു.

ലീഡ്സ് :- ഇംഗ്ലണ്ടിലെ ആദ്യകാല മലയാളി അസോസിയേഷനുകളിൽ ഒന്നായ വെസ്റ്റ് യോർക്ക്ഷെയർ മലയാളി അസോസിയേഷൻ സെപ്റ്റംബർ 26-ാം തീയതി ശനിയാഴ്ച ഓണം ആഘോഷിച്ചു. കേരള തനിമയാർന്ന തനതു കലാരൂപങ്ങൾ ഓണാഘോഷ പരിപാടിക്ക് മിഴിവേറ്റി. വെസ്റ്റ് യോർക്ക്ഷെയറിന്റെ വിവിധ ഭാഗങ്ങളിൽ നിന്നെത്തിയ മലയാളികൾക്ക് നാടിന്റെ നല്ല ഓർമ്മകളിലൂടെ കൊണ്ടുപോകുന്നതായിരുന്നു ഓണസദ്യയും വിവിധ കലാരൂപങ്ങളും.

കുട്ടികൾക്കും മുതിർന്നവർക്കും ഒരുപോലെ ആസ്വദിക്കാൻ പറ്റിയ കലാരൂപങ്ങളാണ് വേദിയിൽ അരങ്ങേറിയത്. മെഗാ തിരുവാതിര, നാടൻ കലാപരിപാടികൾ, സംഗീത-നൃത്താവിഷ്കാരങ്ങൾ എന്നിവ കാണികൾക്ക് വേറിട്ട അനുഭവമായി. പ്രത്യേക ആകർഷണമായ മനോഹരമായ ചെണ്ടമേളം ആഘോഷങ്ങൾക്ക് ആവേശവും പാരമ്പര്യത്തിന്റെ സ്പന്ദനവും പകർന്നു. ചെണ്ടമേളത്തിന്റെ താളമേളങ്ങൾ സദസിനെ ആവേശഭരിതരാക്കി. തുടർന്ന് നടന്ന ഡിജെയും ഓണാഘോഷ പരിപാടികളെ ആവേശത്തിന്റെ പാരമ്യത്തിലെത്തിച്ചു.

കേരളത്തിന്റെ സാംസ്കാരിക പൈതൃകം വിളിച്ചോതുന്ന വിവിധ കലാപരിപാടികളിൽ കുട്ടികളും യുവജനങ്ങളും മുതിർന്നവരും സജീവമായി പങ്കെടുത്തു. വർണാഭമായ വേഷവിധാനങ്ങളും കലാപ്രകടനങ്ങളും ആഘോഷങ്ങൾക്ക് കൂടുതൽ ഭംഗി പകർന്നു. കുടുംബസമേതം എത്തിയ നൂറുകണക്കിന് മലയാളികൾക്ക് സൗഹൃദത്തിന്റെയും കൂട്ടായ്മയുടെയും പുതുവേദിയായി ഓണാഘോഷം മാറി.

ഓണാഘോഷ പരിപാടികൾക്ക് എത്തിയവർക്ക് പ്രസിഡൻറ് ജോജി തോമസ് സ്വാഗതം ആശംസിച്ചു. മലയാളികളുടെ തനതായ പൈതൃകവും പാരമ്പര്യവും കാത്തുസൂക്ഷിക്കുന്നതിനും മലയാളി സമൂഹം നേരിടുന്ന വെല്ലുവിളികളെ നേരിടുന്നതിനും മലയാളി അസോസിയേഷനുകൾക്കുള്ള പ്രസക്തി പ്രസിഡൻറ് ജോജി തോമസ് സ്വാഗത പ്രസംഗത്തിൽ ചൂണ്ടിക്കാട്ടി.

സെക്രട്ടറി മാൻസൺ വർഗീസ് പരിപാടിയിൽ പങ്കെടുത്തവർക്ക് നന്ദി അറിയിച്ചു. അസോസിയേഷൻ ഭാരവാഹികളുടെയും പ്രവർത്തകരുടെയും നേതൃത്വത്തിൽ ഒരുക്കിയ ആഘോഷ പരിപാടികൾ വൻ വിജയമായി മാറിയതായും പങ്കെടുത്തവർ അഭിപ്രായപ്പെട്ടു. നാടിനെയും സംസ്കാരത്തെയും ഒരുമിച്ച് ഓർമ്മിപ്പിച്ച ഈ ഓണാഘോഷം വെസ്റ്റ് യോർക്ക്ഷെയറിലെ മലയാളി സമൂഹത്തിന് അവിസ്മരണീയ അനുഭവമായി.

രാജേഷ് നടപ്പിള്ളി, മീഡിയ കോർഡിനേറ്റർ, WMA

സ്വിൻഡൻ : വിൽഷെയർ മലയാളി അസോസിയേഷന്റെ ഓണാഘോഷം “ആവണി 2026” സ്വിൻഡനിലെ സൂപ്പർ മറൈൻ സ്പോർട്സ് സെന്റർ ഓഡിറ്റോറിയത്തിൽ വച്ച്, ഞായറാഴ്ച സെപ്റ്റംബർ 20ന് അതിഗംഭീരമായി ആഘോഷിച്ചു .വിൽഷെയർ മലയാളി അസോസിയേഷൻ പ്രസിഡന്റ് ശ്രീമതി ജിജി സജി അധ്യക്ഷയായും ബ്രിസ്റ്റോൾ മുൻ മേയറും ഇപ്പോൾ കൗൺസിലറും ആയ ശ്രീ ടോം ആദിത്യ ഉദ്ഘാടനം നിർവഹിച്ച ഓണാഘോഷ പരിപാടിയുടെ മുഖ്യ പ്രഭാഷകൻ യുക്മ ദേശീയ അധ്യക്ഷൻ അഡ്വ എബി സെബാസ്റ്റ്യൻ ആയിരുന്നു.

ഞായറാഴ്ച രാവിലെ 9 മണിക്ക് ഓണപ്പൂക്കളവും തുടർന്ന് കൊച്ചുകുട്ടികൾ മുതൽ മുതിർന്നവർ വരെ പങ്കെടുത്ത നിരവധി ഓണക്കളികളും ആഘോഷങ്ങൾക്ക് മിഴിവേകി. തുടർന്ന് ബ്രിസ്റ്റോൾ സൽക്കാര കാറ്ററേഴ്സ്റ്റിന്റെ സ്വാദിഷ്ടമായ ഓണസദ്യ നൽകുകയുണ്ടായി.

പൊതുസമ്മേളത്തിനതിനുമുന്നോടിയായി കേരളത്തിന്റെ പുരാതന തനതു സംസ്കാരത്തെ ഓർമപ്പെടുത്തുന്ന സ്വിൻഡൻ സ്റ്റാർസിന്റെ ചെണ്ടമേളത്തിന്റെയും ആരവങ്ങളുടെയും ആർപ്പുവിളികളുടെയും അകമ്പടിയോടെ മാവേലിത്തമ്പുരാനെയും വിശിഷ്ടാതിഥികളെയും അസോസിയേഷൻ ഭാരവാഹികളെയും വേദിയിലേക്കാനയിച്ചു. തുടർന്ന് പൊതുസമ്മേളനവും ഔപചാരിക ഉത്‌ഘാടനവും അതിനെത്തുടർന്ന് കേരളത്തിന്റെ തനത് സംസ്കാരത്തെ വിളിച്ചോതുന്ന വർണ്ണ ശബളിമയാർന്ന കലാമേളയും അരങ്ങേറുകയുണ്ടായി.

അസ്സോസിയേഷൻ സെക്രട്ടറി കൃതീഷ് കൃഷ്ണൻ ഏവരെയും സ്വാഗതം ആശംസിച്ചുകൊണ്ട് സംസാരിച്ചു. അസോസിയേഷന്റെ മുന്നോട്ടുള്ള പ്രവർത്തനങ്ങളിൽ ഏവരുടെയും നിർലോഭമായ സഹകരണം ഉണ്ടാകണമെന്നും ഒത്തുരുമിച്ചു നിൽക്കണമെന്നും ഏവർക്കും ഓണത്തിന്റെ ആശംസകൾ നേർന്നുകൊണ്ട് ശ്രീ കൃതീഷ് കൃഷ്ണൻ ഏവരെയും ഓണാഘോഷ പരിപാടികളിലേക്ക് സ്വാഗതം ചെയ്തുകൊണ്ട് സംസാരിച്ചു.

സ്നേഹത്തിന്റെയും സാഹോദര്യത്തിന്റെയും സൗഹൃദത്തിന്റെയും കൂട്ടായ്മയുടെയും സന്ദേശം പകരുന്ന ലോകമെമ്പാടുമുള്ള മലയാളികളുടെ ആഘോഷമാണ് ഓണമെന്നും. വിൽഷെയറിലെ മലയാളികളെ സംബന്ധിച്ചിടത്തോളം ഹൃദയബന്ധങ്ങൾ പുതുക്കാനും സൗഹൃദങ്ങൾ ദൃഢമാക്കാനും ഉതകുന്നതരത്തിലാണ് അസോസിയേഷൻ പ്രവർത്തിക്കുന്നതെന്നും അതാണ് ഓണം നൽകുന്ന യഥാർത്ഥ സന്ദേശമെന്നും ഏവർക്കും ഓണം ആശംസകൾ നേർന്നുകൊണ്ട് യോഗാധ്യക്ഷയും വിൽഷെയർ മലയാളി അസോസിയേഷൻ പ്രസിഡന്റുമായ ശ്രീമതി ജിജി സജി സംസാരിക്കുകയുണ്ടായി.

വിൽഷെയർ മലയാളീ അസോസിയേഷനുമായും അതിലെ അംഗങ്ങളുമായും ദീർഘകാല സുദൃഢബന്ധം കാത്തുസൂക്ഷിക്കുന്ന മുൻ ബ്രിസ്റ്റോൾ മേയറും നിലവിലെ ബ്രിസ്റ്റോൾ കൗൺസിലറും ആയ ശ്രീ ടോം ആദിത്യ ഭദ്രദീപം തെളിയിച്ചു ഉത്ഘാടനം നിർവഹിച്ചു. പ്രവാസത്തിൽ വളരുന്ന നവതലമുറയിലെ കുട്ടികൾക്ക് ഓണത്തിന്റെ നന്മയും മലയാള സംസ്കാരവും പാരമ്പര്യവും തൊട്ടറിഞ്ഞ് മനസ്സിലാക്കാനുള്ള വേദികൂടിയാണ് ഇത്തരം ആഘോഷങ്ങളെന്നും, ആഘോഷങ്ങളുടെ ആഘോഷമായ ഓണം നൽകുന്ന പ്രധാന സന്ദേശം മാനവസ്നേഹവും ഒരുമയുമാണെന്നും അതാണ് നാം മാതൃകയാക്കേണ്ടതെന്നും അസോസിയേഷൻ രൂപീകരണത്തിന്റെ രജത ജൂബിലിയോടടുക്കുന്ന വിൽഷെയർ മലയാളീ അസോസിയേഷന് എല്ലാവിധ ഭാവുകങ്ങളും നേർന്നുകൊണ്ട് കൗൺസിലർ ശ്രീ ടോം ആദിത്യ ഉത്ഘാടനം നിർവഹിച്ചു.

നാളികേരത്തിന്‍റെ നാട്ടിലല്ലെങ്കിലും പൂക്കളും പൂവിളിയുമായി ഒരുമിച്ചു ചേര്‍ന്ന് മലയാളികളുടെ ഹൃദയങ്ങളില്‍ നിറഞ്ഞ സന്തോഷം പരസ്പരം പകര്‍ന്നു നല്‍കുന്നതാണ് ഓരോ പ്രവാസികളുടെ ഓണാഘോഷമെന്നും മതേതരത്വത്തിന്റെയും സമത്വത്തിന്റെയും പ്രതീകമാകണം ഓരോമലയാളിയുടെയും ഓണാഘോഷമെന്നും സമൂഹത്തിൽ പാർശ്വവൽക്കരിക്കപ്പെട്ട ആളുകളെ ചേർത്തിനിർത്തി അവരുടെ ജീവിതത്തിൽ പുഞ്ചിരിചൊരിയുമ്പോൾ മാത്രമാണ് ഓരോ മലയാളിയുടെയും ജീവിതം അന്വർത്ഥമാകൂഎന്നും അതാണ് ഓണസദ്യയിലെ വൈവിധ്യങ്ങളായ വിഭവങ്ങൾ ഒന്നുചേർന്ന് കൂട്ടിയോജിപ്പിക്കുന്നതുപോലെ സമൂഹത്തിലെ എല്ലാ ആളുകളെയും അംഗീകരിക്കുകയും ചേർത്തുനിർത്തുകയും ചെയ്യുകയെന്ന വലിയ സന്ദേശമാണ് ഓണം നൽകുകയെന്നും യുക്മ ദേശീയ അധ്യക്ഷനും മുഖ്യ പ്രഭാഷകനുമായ അഡ്വ. എബി സെബാസ്റ്റ്യൻ സംസാരിക്കുകയുണ്ടായി. വിൽഷെയർ മലയാളീ അസോസിയേഷനും യുക്മയും തമ്മിലുള്ള പതിറ്റാണ്ടുകളുടെ ഉഷ്മളബദ്ധത്തെക്കുറിച് അഡ്വ എബി സെബാസ്റ്റ്യൻ പരാമര്ശിക്കുകയുണ്ടായി. യുകെയിലെ തന്നെ ഏറ്റവും വലിയ അസ്സോസിയേഷനുകളിൽ ഒന്നായ WMA യിൽ നിന്നും യുക്മ യിലേക്കുള്ള പ്രതിനിധ്യം റെയ്‌മോൾ നിധീരിയിലൂടെ നൽകപ്പെട്ടതുവഴി യുക്മയും വിൽഷെയർ മലയാളീ അസോസിയേഷനും തമ്മിലുള്ള ദീർഘകാലത്തെ ബന്ധം ഊട്ടിഉറപ്പിക്കുകകൂടിയാണ് നാം ചെയ്തത്. മാത്രമല്ല യുക്മ നഴ്സസ് ഫോറം മെയ്മാസത്തിൽ അന്താരാഷ്ര നഴ്സസ് ദിനാഘോഷത്തോടനുബന്ധിച്ചു നടത്തപ്പെട്ട സമ്മേളനം വൻവിജയമായിരുന്നുഎന്നും അതിനായി നമ്മുടെ വിൽഷെയർ മലയാളീ അസോസിയേഷൻ നിന്നുള്ള യുക്മ പ്രതിനിധിയും നഴ്സസ് ഫോറം റീജിയണൽ ചെയർപേഴ്സൺകൂടിയായ രാജേഷ് നടേപ്പിള്ളി നിർവഹിച്ച പങ്ക് വളരെ വലുതാണെന്നും നഴ്സുമാരുടെ ഉന്നമനത്തിനായി യുക്മയുടെ ഭാഗത്തുനിന്നുള്ള ഇടപെടലുകൾ തുടർന്നും ഉണ്ടാകുമെന്നും മുഖ്യ പ്രഭാഷണം നിർവഹിച്ചുകൊണ്ട് അഡ്വ എബി സെബാസ്റ്റ്യൻ ഏവർക്കും ഓണാശംസകൾ നേർന്നുകൊണ്ട് സംസാരിച്ചു.

അതിനെ തുടർന്ന് ഓണാഘോഷം ആവണി 2026 ന്റെ സന്ദേശം മഹാബലി നൽകുകയുണ്ടായി.

പൊതുസമ്മേളനത്തിൽ GCSC പരീക്ഷയിലും A Level പരീക്ഷയിലും മികച്ച വിജയം നേടിയ വിദ്യാർത്ഥികളെയും വിൽഷെയർ മലയാളീ അസോസിയേഷൻ സ്പോർട്സ് ഡേയോട് അനുബന്ധിച്ചു നടത്തപ്പെട്ട കായികമത്സരത്തിൽ ചാമ്പ്യൻമാരായ ഈസ്റ്റ് സ്വിൻഡനും സമ്മാനദാനം നൽകുകയുണ്ടായി.

പൊതുസമ്മേളനത്തെത്തുടർന്ന് മലയാളത്തിന്റെ പാരമ്പര്യവും തനതു സംസ്കാരവും കോർത്തിണക്കിയ ദൃശ്യവിരുന്ന് വേദിയിൽ അരങ്ങേറുകയുണ്ടായി. ക്ലാസിക്കൽ നൃത്ത ശില്പങ്ങളായ മോഹിനിയാട്ടം തിരുവാതിര തുടങ്ങി വിവിധങ്ങളായ പരിപാടികൾക്കൊപ്പം കൊച്ചു കുട്ടികൾ മുതൽ മുതിർന്നവർ വരെ പങ്കെടുത്ത സിനിമാറ്റിക് ഡാൻസും ഒപ്പം നിരവധി സംഗീതജ്ഞരുടെ സംഗീത പരിപാടികളും ഉന്നത നിലവാരം പുലർത്തിയതോടൊപ്പം യുകെയിലെ പ്രശസ്ത ഡിജെ യും ഗിറ്റാറിസ്റ്റുമായ അഭിജിത് യോഗി യുടെ പ്രകടനം പങ്കെടുത്ത എല്ലാ മലയാളികളെയും അക്ഷരാർത്ഥത്തിൽ ആഘോഷങ്ങളെ അതിന്റെ ഉത്തുംഗശൃഗത്തിലെത്തിക്കുന്നതാക്കിമാറ്റി

WMA യുടെ മുഖ്യ സ്പോൺസർ ആയ INFINITY FINANCIALS LTD ഉം INFI TOURS AND TRAVELS ഭാഗ്യ നറുക്കെടുപ്പിലൂടെ സമ്മാനം നൽകുകയുണ്ടായി.

WMA ഒരുക്കിയ റാഫിൾ ടിക്കറ്റ് നറുക്കെടുപ്പിലൂടെ നിരവധി പേർ സമ്മാനാർഹരായി.

ഓണാഘോഷങ്ങളുടെ സുന്ദര നിമിഷങ്ങൾ ഒപ്പിയെടുത്ത് ബെറ്റെർഫ്രെയിംസ് രാജേഷ് നടേപ്പിള്ളിയും വീഡിയോഗ്രാഫി സോജി തോമസും ആയിരുന്നു.

ദൃശ്യശ്രാവണ രംഗത്തെ പ്രഗത്ഭരായ PIXELGLOW MEDIA SOLUTIONS ഒരുക്കിയ ശബ്ദവും വെളിച്ചവും പരിപടികൾക്ക് മിഴിവേകി.

ഓണാഘോഷപരിപാടികൾ മികവുറ്റതാക്കാൻ പ്രവർത്തിച്ച കമ്മിറ്റി അംഗങ്ങൾ: ജിജി സജി, കൃതേഷ് കൃഷ്ണൻ, ബൈജു വാസുദേവൻ, ഡോണി പീറ്റർ, മാത്യു കുര്യാക്കോസ്, ജൈസ് കെ ജോയി, മഞ്ജു ടോം, എബി തോമസ്, ബൈജു ജേക്കബ്, ഡെന്നി വാഴപ്പിള്ളി, റജബിൽ ഹഖ്, അമൽ ജോഷി, വർക്കി കുരുവിള, ഡോ. ഫെബിൻ ബഷീർ, റെയ്‌മോൾ നിധിരി, ജെയ്‌മി നായർ, രാജേഷ് നടേപ്പിള്ളി എന്നിവരാണ്.

പരിപാടികൾക്ക് സമാപനം കുറിച്ചുകൊണ്ട് സെക്രട്ടറി ശ്രീ കൃതേഷ് കൃഷ്ണൻ ഏവർക്കും നന്ദി രേഖപ്പെടുത്തി.

കെന്റ് ഹിന്ദു സമാജത്തിന്റെ (Kent Hindu Samajam UK) ഈ വർഷത്തെ ഓണാഘോഷം 2026 സെപ്റ്റംബർ 26 ശനിയാഴ്ച ആഘോഷിക്കും.

രാവിലെ 10 മണി മുതൽ വൈകീട്ട് 6 മണി വരെ ചാത്തം മാഗ്പൈ ഹാൾ റോഡിലുള്ള ഓൾ സെയിന്റ്സ് ചർച്ച് ഹാളിൽ (All Saints Church Hall, Magpie Hall Road, Chatham, Kent, ME4 5NE) വെച്ചാണ് ആഘോഷ പരിപാടികൾ സംഘടിപ്പിക്കുന്നത്. ശ്രീമതി വാണി സിബി, ശ്രീമതി നിഖിത നായർ, ശ്രീമതി അനീഷ മനോജ്‌, ഹരികൃഷ്ണൻ എന്നിവർ നേതൃത്വം നൽകും.സൂര്യകാലടി മന ശ്രീ ജയസൂര്യൻ ഭട്ടത്തിരിപ്പാട് വിശ്ഷ്ട അഥിതി ആയിരിക്കും

കേരളീയ തനിമയോടെയുള്ള ഓണസദ്യ, കലാപരിപാടികൾ, വിപുലമായ പരിപാടികളാണ് സംഘാടകർ ഒരുക്കുന്നത്. മാവേലിയുടെ വരവോടെ ആഘോഷങ്ങൾക്ക് കൊഴുപ്പേകും.

കൂടുതൽ വിവരങ്ങൾക്ക്:
Tel: 07838170203 / 07973151975 / 07985245890
www.kenthindusamajam.org

മനോജ് ജോസഫ്

ലിവർപൂൾ: ലിവർപൂൾ മലയാളി അസോസിയേഷൻ (LIMA) സെപ്റ്റംബർ 20 ഞായറാഴ്ച ന്യൂഷാം പാർക്കിൽ സംഘടിപ്പിച്ച “ലിമ പ്രീമിയർ കപ്പ് 2026” ക്രിക്കറ്റ് ടൂർണമെന്റ് വൻ ജനപങ്കാളിത്തത്തോടെ സമാപിച്ചു. രണ്ട് മൈതാനങ്ങളിലായി യുകെയിലെ ഏറ്റവും പ്രഗത്ഭരായ 11 കരുത്തുറ്റ ക്രിക്കറ്റ് ടീമുകൾ തമ്മിൽ നടന്ന വാശിയേറിയ ടൂർണമെന്റിൽ വൈറ്റ് വാക്കേഴ്സ് പ്രെസ്റ്റൺ ജേതാക്കളായി. കലാശപ്പോരാട്ടത്തിനൊടുവിൽ റേഞ്ചേഴ്സ് ലിവർപൂൾ റണ്ണറപ്പ് ട്രോഫി സ്വന്തമാക്കി. മൂന്നാം സ്ഥാനം ഹോം 11-നും നാലാം സ്ഥാനം വിസ്റ്റൺ യൂണൈറ്റഡും കരസ്ഥമാക്കി.

രാവിലെ 8.30-ന് ആരംഭിച്ച മത്സരങ്ങൾ കാണാൻ മേഴ്‌സിസൈഡിലെ നിരവധി കായികപ്രേമികളാണ് കുടുംബസമേതം ന്യൂഷാം പാർക്കിൽ എത്തിചേർന്നത്. വാശിയേറിയ മത്സരങ്ങൾക്കൊടുവിൽ വിജയികൾക്കുള്ള ആകർഷകമായ ക്യാഷ് പ്രൈസുകളും ട്രോഫികളും ലിമ ഭാരവാഹികൾ വിതരണം ചെയ്തു. മികച്ച പ്രകടനം കാഴ്ചവച്ച വ്യക്തിഗത താരങ്ങൾക്കുള്ള പുരസ്‌കാരങ്ങളും ചടങ്ങിൽ സമ്മാനിച്ചു. വിസ്റ്റൺ യൂണൈറ്റഡിന്റെ സുനീത് ‘ബെസ്റ്റ് ബാറ്റ്‌സ്മാൻ’, ‘മോസ്റ്റ് വാല്യൂബിൾ പ്ലേയർ’ എന്നീ ഇരട്ട പുരസ്‌കാരങ്ങൾ കരസ്ഥമാക്കി. വൈറ്റ് വാക്കേഴ്‌സ് പ്രെസ്റ്റണിന്റെ ശരത് സതീഷാണ് ടൂർണമെന്റിലെ ‘ബെസ്റ്റ് ബൗളർ’.

കളിക്കളത്തിലെ ആവേശത്തോടൊപ്പം Green Chilli Restaurant ഒരുക്കിയ സ്വാദിഷ്ടമായ ഭക്ഷണവിഭവങ്ങളും അന്നേ ദിവസം ലഭ്യമായിരുന്നു. ടൂർണമെന്റ് കൺവീനർമാരായ ബിനു വർക്കി, ബ്ലെസൺ രാജൻ എന്നിവർക്കൊപ്പം ലിമ എക്സിക്യൂട്ടീവ് കമ്മിറ്റി അംഗങ്ങളുടെ ഒത്തൊരുമിച്ചുള്ള പ്രവർത്തനവുമാണ് ഈ കായികമേളയുടെ വിജയത്തിനു പിന്നിൽ.

കായികമേള വിജയകരമാക്കാൻ സഹകരിച്ച എല്ലാ ടീമുകൾക്കും, കളിക്കാർക്കും, കാണികൾക്കും, സ്പോൺസർമാർക്കും ലിമ കമ്മിറ്റി ഭാരവാഹികൾ നന്ദി അറിയിച്ചു. മേഴ്‌സിസൈഡ് മലയാളി സമൂഹത്തിന്റെ ഐക്യവും സൗഹൃദവും വാനോളമുയർത്തിയ മികച്ചൊരു കായിക ദിനത്തിനാണ് ന്യൂഷാം പാർക്ക് സാക്ഷ്യം വഹിച്ചത്.

അപ്പച്ചൻ കണ്ണഞ്ചിറ

സ്റ്റീവനേജ് : ഹർട്‌ഫോർഡ്ഷെയർ കൗണ്ടിയിൽ കുട്ടികൾക്കും, മുതിർന്നവർക്കും ഷട്ടിൽ ബാഡ്മിന്റണിൽ പരിശീലനവും , മത്സരങ്ങളും, വേദികളും ഒരുക്കുന്നതിൽ പ്രശസ്തരായ ‘റോയൽസ് സ്റ്റീവനേജ്’ ബാഡ്മിന്റൺ ക്ലബ്ബ് , അഖില യു കെ തലത്തിൽ സീനിയേഴ്സിനായി ഓപ്പൺ ഷട്ടിൽ ടൂർണമെന്റ് സംഘടിപ്പിക്കുന്നു. ഒക്ടോബർ 24ന് സ്റ്റീവനേജിലെ സെന്റ് ജോൺ ഹെൻറി ന്യൂമാൻ സ്കൂളിന്റെ ഇൻഡോർ സ്റ്റേഡിയത്തിലാണ് ടൂർണമെന്റ് നടക്കുക. യു.കെ.യുടെ വിവിധ ഭാഗങ്ങളിൽ നിന്നുള്ള സീനിയർ താരങ്ങൾക്ക് കളിക്കളത്തിൽ മാറ്റുരക്കുവാനും, തങ്ങളുടെ കഴിവുകൾ പ്രദർശിപ്പിക്കുവാനും അവസരമൊരുക്കുകയാണ് ടൂർണമെന്റിന്റെ ലക്ഷ്യം.

50 വയസ്സോ അതിൽ കൂടുതലോ പ്രായമുള്ള വനിതാ-പുരുഷ താരങ്ങൾക്കായാണ് മത്സരം ഒരുക്കിയിരിക്കുന്നത്. സിംഗിൾസ് വിഭാഗത്തിൽ 50 പ്ലസ് പ്രായമുള്ള താരങ്ങൾക്ക് പങ്കെടുക്കാം. ഡബിൾസ് വിഭാഗത്തിൽ മത്സരിക്കുന്ന താരങ്ങളുടെ ആകെ പ്രായം കുറഞ്ഞത് 100 വയസ്സായി നിജപ്പെടുത്തിയിരിക്കുകയാണ്. ആകർഷകമായ പ്രൈസ് മണി സമ്മാനമായി നൽകുന്ന ടൂർണ്ണമെന്റിൽ ആദ്യം പേരുകൾ രെജിസ്റ്റർ ചെയ്യുന്ന കുറച്ചു കളിക്കാർക്കുകൂടി അവസരമുണ്ടെന്നു സംഘാടകർ അറിയിച്ചു. https://forms.gle/4FnAj8PLsBoCPGry8

ബാഡ്മിന്റൺ ഗോദയിലെ പ്രഗത്ഭരായ മുൻകാല പോരാളികൾ തങ്ങളുടെ താര ശോഭ തെല്ലും മങ്ങാതെ, അനുഭവജ്ഞാനവും തന്ത്രങ്ങളും ആവനാഴിയിൽ നിന്നും പുറത്തെടുത്ത് വീറോടെ പോർക്കളത്തിൽ മാറ്റുരക്കുമ്പോൾ, കാണികൾക്കിതു ആവേശത്തിന്റെ നേർക്കാഴ്ച്ചയാവും സമ്മാനിക്കുക.

ഏറെ ആവേശകരമായ മത്സരങ്ങൾക്ക് സാക്ഷ്യം വഹിക്കുവാനും, കായിക താരങ്ങൾക്ക് പ്രോത്സാഹനം നൽകുവാനും എല്ലാ കായിക പ്രേമികളെയും സസ്നേഹം സ്വാഗതം ചെയ്യുന്നതായി സംഘാടകർ അറിയിച്ചു.

കൂടുതൽ വിവരങ്ങൾക്കും രജിസ്ട്രേഷനും:
Lawrance – 07925 916223
Mathew – 07475 686408
Registration: https://forms.gle/4FnAj8PLsBoCPGry8

Venue: St John Henry Newman Catholic School, Hitchin Road, Stevenage, SG1 4AE