മലയാള സിനിമാപ്രേമികളെ ആവേശത്തിലാഴ്ത്തി വരാനിരിക്കുന്ന ചിത്രങ്ങളുടെ വമ്പൻ ലൈനപ്പ് പ്രഖ്യാപിച്ച് മോഹൻലാൽ. വിവിധ സംവിധായകരോടൊപ്പം ഏഴ് പുതിയ സിനിമകളാണ് അണിയറയിൽ ഒരുങ്ങുന്നതെന്ന് താരം അറിയിച്ചു. പ്രിയദർശൻ, സത്യൻ അന്തിക്കാട്, ദിലീഷ് പോത്തൻ, ജൂഡ് ആന്റണി ജോസഫ് തുടങ്ങിയ പ്രമുഖരുടെ ചിത്രങ്ങൾ ഇതിൽ ഉൾപ്പെടുന്നു.

വ്യത്യസ്ത പ്രമേയങ്ങളും അവതരണശൈലികളും ഉൾക്കൊള്ളുന്ന ചിത്രങ്ങളിലൂടെ പ്രേക്ഷകരെ വീണ്ടും അമ്പരപ്പിക്കാനാണ് മോഹൻലാലിന്റെ ശ്രമം. കുടുംബചിത്രങ്ങൾ, ത്രില്ലറുകൾ, ഹാസ്യചിത്രങ്ങൾ തുടങ്ങി വിവിധ വിഭാഗങ്ങളിലുള്ള സിനിമകളാണ് പദ്ധതിയിടുന്നതെന്ന് റിപ്പോർട്ടുകൾ സൂചിപ്പിക്കുന്നു.

താരത്തിന്റെ പുതിയ പ്രഖ്യാപനം സമൂഹമാധ്യമങ്ങളിൽ വലിയ ചർച്ചയായിട്ടുണ്ട്. മലയാള സിനിമയിലെ പ്രമുഖ സംവിധായകരുമായുള്ള ഈ കൂട്ടുകെട്ടുകൾ ബോക്സ് ഓഫീസിലും ശ്രദ്ധേയ നേട്ടമുണ്ടാക്കുമെന്ന പ്രതീക്ഷയിലാണ് ആരാധകർ.

കൊച്ചി: സംവിധായകൻ ജൂഡ് ആന്തണി ജോസഫും മോഹൻലാലും ആദ്യമായി ഒന്നിക്കുന്ന പുതിയ ചിത്രം ഒരുങ്ങുന്നു. ജൂഡിനൊപ്പം ഒരു കിടിലൻ സിനിമ ചെയ്യാൻ പോകുന്നുണ്ടെന്ന് മോഹൻലാൽ വെളിപ്പെടുത്തിയപ്പോൾ, “12 വർഷമായി കാത്തിരുന്ന നിമിഷമാണ് ഇത്” എന്നായിരുന്നു ജൂഡിന്റെ പ്രതികരണം. ചിത്രത്തിന്റെ തിരക്കഥ പൂർത്തിയായതായും ജൂഡ് നേരത്തെ അറിയിച്ചിരുന്നു.

‘തുടക്കം’ എന്ന ചിത്രത്തിന്റെ പ്രചാരണ പരിപാടിക്കിടെയായിരുന്നു ഇരുവരും പുതിയ സഹകരണത്തെക്കുറിച്ച് സംസാരിച്ചത്. മോഹൻലാലിനെ നായകനാക്കി ഒരു സിനിമ സംവിധാനം ചെയ്യുക എന്നത് തന്റെ ദീർഘകാല ആഗ്രഹമാണെന്നും അത് ഉടൻ യാഥാർഥ്യമാകുമെന്നും ജൂഡ് വ്യക്തമാക്കിയിരുന്നു.

ചിത്രത്തിന്റെ കഥയെയോ മറ്റ് അഭിനേതാക്കളെയോ സംബന്ധിച്ച വിവരങ്ങൾ പുറത്തുവിട്ടിട്ടില്ല. എന്നാൽ മലയാള സിനിമാപ്രേമികൾ ഏറെ പ്രതീക്ഷയോടെ കാത്തിരിക്കുന്ന കൂട്ടുകെട്ടുകളിലൊന്നായി മോഹൻലാൽ–ജൂഡ് ആന്തണി ചിത്രം ഇതിനോടകം മാറിക്കഴിഞ്ഞു.

കൊച്ചി: രണ്ട് വർഷത്തോളം താൻ നാർസിസിസ്റ്റിക് അബ്യൂസിനും കടുത്ത മാനസിക, ശാരീരിക സമ്മർദങ്ങൾക്കും ഇരയായിരുന്നുവെന്ന് നടി അനുപമ പരമേശ്വരൻ. ധന്യ വർമ്മയ്ക്ക് നൽകിയ അഭിമുഖത്തിലാണ് പങ്കാളിയുടെ പേര് വെളിപ്പെടുത്താതെ ബന്ധത്തിലുണ്ടായ അനുഭവങ്ങൾ താരം തുറന്നുപറഞ്ഞത്. തുടക്കത്തിൽ ലവ് ബോംബിങ്ങിലൂടെ അടുപ്പം സൃഷ്ടിച്ച ശേഷം പതിയെ നിയന്ത്രണം ഏറ്റെടുക്കുന്ന രീതിയായിരുന്നു ബന്ധത്തിലുണ്ടായിരുന്നതെന്നും അനുപമ പറഞ്ഞു. വസ്ത്രധാരണം, സോഷ്യൽ മീഡിയ ഇടപെടലുകൾ, സൗഹൃദങ്ങൾ തുടങ്ങി വ്യക്തിജീവിതത്തിലെ പല കാര്യങ്ങളിലും നിയന്ത്രണം അനുഭവപ്പെട്ടതായും താരം വ്യക്തമാക്കി.

ബന്ധത്തിന്റെ തുടക്കത്തിൽ തന്നെ വിവാഹനിശ്ചയത്തിന് സമ്മർദമുണ്ടായിരുന്നെങ്കിലും താനാണ് പലതവണ അത് നീട്ടിവച്ചതെന്നും അനുപമ പറഞ്ഞു. പങ്കാളിയുടെ അടുത്ത് സമാധാനത്തിന് പകരം എപ്പോഴും ഭയവും ഉത്കണ്ഠയുമായിരുന്നു അനുഭവപ്പെട്ടിരുന്നത്. ആങ്സൈറ്റി മരുന്നുകൾ കഴിക്കേണ്ടി വന്നതായും ശരീരഭാരം കുറഞ്ഞതായും സിനിമകളുടെ പ്രമോഷനും ചില പ്രോജക്ടുകളെ വരെ ബാധിച്ചതായും താരം വെളിപ്പെടുത്തി. ഒരു ദിവസം അതിരുകടന്ന സ്നേഹം കാണിക്കുന്ന വ്യക്തി, അടുത്ത ദിവസം തികച്ചും അന്യനെപ്പോലെ പെരുമാറുകയും പിന്നീട് കരഞ്ഞ് മാപ്പുപറയുകയും ചെയ്യുന്ന രീതിയിലായിരുന്നു ബന്ധത്തിലെ ആവർത്തിച്ചുള്ള ചക്രം. ‘അന്യൻ, റെമോ, അമ്പി’ എന്ന സിനിമാ കഥാപാത്രങ്ങളുടെ സ്വഭാവമാറ്റങ്ങളോടാണ് അനുപമ ഇതിനെ താരതമ്യം ചെയ്തത്.

തന്റെ സോഷ്യൽ മീഡിയ പോസ്റ്റിന് പിന്നാലെ സിനിമാരംഗത്തുനിന്ന് 12 പേരാണ് സമാനമായ അനുഭവങ്ങൾ പങ്കുവയ്ക്കാൻ തന്നെ വിളിച്ചതെന്നും അനുപമ പറഞ്ഞു. ഇത്തരം ബന്ധങ്ങളിൽ കുടുങ്ങിയവർക്ക് അത് തിരിച്ചറിയാനും തുറന്നുപറയാൻ കഴിയാത്തവർക്ക് ധൈര്യം നൽകാനുമാണ് താൻ അനുഭവങ്ങൾ പങ്കുവയ്ക്കുന്നതെന്നും താരം വ്യക്തമാക്കി. ബന്ധത്തിലുണ്ടായിരുന്ന കാലത്ത് കുടുംബാംഗങ്ങളെയും സഹപ്രവർത്തകരെയും പോലും ഭയന്ന് അകന്നുപോയെന്നും ചിത്രീകരണത്തിനിടെ പലപ്പോഴും മാനസികമായി തകർന്നതിനെ തുടർന്ന് വാനിറ്റി വാനിലേക്ക് മാറിനിൽക്കേണ്ടി വന്നെന്നും അനുപമ പറഞ്ഞു. “90 ശതമാനം നെഗറ്റിവിറ്റി നേരിടാനും ഞാൻ 100 ശതമാനം തയാറാണ്” എന്ന നിലപാടോടെ സത്യത്തിനൊപ്പം നിൽക്കുമെന്നും താരം വ്യക്തമാക്കി.

കൊച്ചി ∙ മോഹൻലാലിന്റെ മകൾ വിസ്മയ മോഹൻലാൽ നായികയായി അരങ്ങേറ്റം കുറിക്കുന്ന ‘തുടക്കം’ മികച്ച പ്രേക്ഷക പ്രതികരണം നേടി തീയറ്ററുകളിൽ മുന്നേറുന്നു. ജൂഡ് ആന്തണി ജോസഫ് സംവിധാനം ചെയ്ത ചിത്രം സ്ത്രീശാക്തീകരണത്തിന്റെ പശ്ചാത്തലത്തിൽ ഒരുക്കിയ ആക്ഷൻ ത്രില്ലറാണ്. പരീക്ഷ കഴിഞ്ഞ് വീട്ടിലേക്ക് മടങ്ങുന്നതിനിടെ ഒരു അപ്രതീക്ഷിത സംഭവത്തിൽ കുടുങ്ങുന്ന മീനുവെന്ന യുവതിയുടെ ജീവിതപോരാട്ടമാണ് സിനിമയുടെ ഇതിവൃത്തം. ആത്മവിശ്വാസവും ആത്മരക്ഷയും പ്രമേയമാക്കുന്ന ചിത്രം തുടക്കം മുതൽ പ്രേക്ഷകരെ കഥയോട് ചേർത്തുനിർത്തുന്നുവെന്നാണ് ആദ്യ പ്രതികരണങ്ങൾ.

ചിത്രത്തിന്റെ പ്രധാന ആകർഷണം മോഹൻലാലിന്റെ അതിഥി വേഷമാണ്. നിർണായക ഘട്ടങ്ങളിൽ എത്തുന്ന അദ്ദേഹത്തിന്റെ സാന്നിധ്യവും ശക്തമായ സംഭാഷണങ്ങളും തീയറ്ററുകളിൽ ആവേശം സൃഷ്ടിക്കുന്നതായി പ്രേക്ഷകർ പറയുന്നു. സംഘട്ടനരംഗങ്ങളുടെ മികവും പശ്ചാത്തല സംഗീതവും ഛായാഗ്രഹണവും ചിത്രത്തിന്റെ ആക്ഷൻ മുഹൂർത്തങ്ങൾക്ക് കൂടുതൽ കരുത്ത് പകരുന്നു. കുടുംബപ്രേക്ഷകരെയും യുവാക്കളെയും ഒരുപോലെ ആകർഷിക്കുന്ന രീതിയിലാണ് സിനിമയുടെ അവതരണമെന്നും വിലയിരുത്തപ്പെടുന്നു.

ആദ്യ ചിത്രമാണെങ്കിലും ആക്ഷൻ രംഗങ്ങളിൽ ആത്മവിശ്വാസത്തോടെ വിസ്മയ മോഹൻലാൽ ശ്രദ്ധേയ പ്രകടനമാണ് കാഴ്ചവച്ചിരിക്കുന്നതെന്നാണ് സിനിമാസ്വാദകരുടെ അഭിപ്രായം. സായ് കുമാർ, മനോജ് കെ. ജയൻ, ആശിഷ് ജോ ആന്റണി, ജാഫർ ഇടുക്കി, കോട്ടയം രമേശ് എന്നിവരുടെ പ്രകടനവും ചിത്രത്തിന് ശക്തമായ പിന്തുണ നൽകുന്നു. സ്ത്രീകൾക്ക് ആത്മവിശ്വാസവും സ്വയം പ്രതിരോധിക്കാനുള്ള പ്രചോദനവും നൽകുന്ന സന്ദേശത്തോടെയാണ് ‘തുടക്കം’ പ്രേക്ഷകരിലേക്ക് എത്തുന്നതെന്നും ആദ്യദിന പ്രതികരണങ്ങൾ സൂചിപ്പിക്കുന്നു.

പൂർണ്ണമായും യുകെയുടെ പശ്ചാത്തലത്തിൽ ചിത്രീകരിച്ച മലയാള സൈക്കോളജിക്കൽ ക്രൈം ത്രില്ലർ ‘കണ്ടൻ’ റിലീസിന്റെ ആദ്യവാരം പിന്നിടുമ്പോൾ മികച്ച പ്രേക്ഷക പ്രതികരണവുമായി വിജയകരമായി പ്രദർശനം തുടരുകയാണ്.

സസ്പെൻസും ത്രില്ലും നിറഞ്ഞ കഥയും മികച്ച അവതരണവും അഭിനേതാക്കളുടെ ശ്രദ്ധേയ പ്രകടനവും പ്രേക്ഷക പ്രശംസ നേടുകയാണ്. കേരളത്തിലും യുകെയിലുമുള്ള നിരവധി തിയേറ്ററുകളിൽ മികച്ച അഭിപ്രായമാണ് ചിത്രത്തിന് ലഭിക്കുന്നത്. പ്രേക്ഷകരുടെ വർധിച്ച ആവശ്യം പരിഗണിച്ച് ന്യൂകാസിൽ അപോൺ ടൈൻ Cineworld-ൽ ചിത്രത്തിന് അധിക ഷോകളും അനുവദിച്ചിട്ടുണ്ട്. ആദ്യവാരത്തിലെ മികച്ച പ്രതികരണമാണ് ഈ അധിക പ്രദർശനങ്ങൾക്ക് വഴിയൊരുക്കിയത്.

നവാഗതനായ ജിബിൻ ആന്റണി സംവിധാനം ചെയ്ത ചിത്രത്തിൽ ജ്യോതിഷ് ജോസ്, അനന്ത് പത്മനാഭൻ, ഗിരീഷ് ഗോപിനാഥ്, സുബാഷ് കുന്നേൽ,രജീന ഡേവിഡ്സൺ, ആൻ സുനിൽ എന്നിവരുള്‍പ്പെടെ നിരവധി താരങ്ങൾ ശ്രദ്ധേയ വേഷങ്ങളിൽ എത്തുന്നു. ആദ്യവാരത്തിലെ ഈ മികച്ച പിന്തുണയ്ക്ക് ലോകമെമ്പാടുമുള്ള മലയാളി പ്രേക്ഷകർക്ക് അണിയറ പ്രവർത്തകർ ഹൃദയം നിറഞ്ഞ നന്ദി അറിയിച്ചു. മികച്ച അഭിപ്രായങ്ങളോടെ മുന്നേറുന്ന ‘കണ്ടൻ’ കുടുംബസമേതം തിയേറ്ററുകളിൽ തന്നെ അനുഭവിക്കാവുന്ന ഒരു ത്രില്ലർ അനുഭവമാണെന്ന് അണിയറ പ്രവർത്തകർ അറിയിച്ചു.

കൊച്ചി: മലയാള സിനിമാ താരസംഘടനയായ ‘അമ്മ’യിലെ അഡ്ഹോക്ക് കമ്മിറ്റി രൂപീകരണവുമായി ബന്ധപ്പെട്ട ഹൈക്കോടതി കേസിൽ നടി അൻസിബ ഹസനെ കക്ഷി ചേർക്കാനുള്ള ഹർജിക്കെതിരെ പ്രസിഡന്റ് ശ്വേത മേനോൻ രംഗത്ത്. അൻസിബയ്ക്ക് കേസിൽ കക്ഷിയാകാൻ നിയമപരമായ അടിസ്ഥാനമില്ലെന്നും ഹർജി കേസിന്റെ സ്വഭാവം മാറ്റാൻ മാത്രമാണ് ലക്ഷ്യമിടുന്നതെന്നും ശ്വേത കോടതിയിൽ സമർപ്പിച്ച എതിർ സത്യവാങ്മൂലത്തിൽ വ്യക്തമാക്കി.

അഡ്ഹോക്ക് കമ്മിറ്റിയുടെ നിയമസാധുത സംഘടനയുടെ ബൈലോകളും നിയമവശങ്ങളും പരിശോധിച്ചാണ് തീരുമാനിക്കേണ്ടതെന്നും, ഒരു സാധാരണ അംഗത്തെ കേസിൽ ഉൾപ്പെടുത്തുന്നത് നടപടികൾ അനാവശ്യമായി നീട്ടാനിടയാക്കുമെന്നും ശ്വേതയുടെ വാദം. സംഘടനയ്‌ക്കെതിരെയും ഭാരവാഹികൾക്കെതിരെയും അൻസിബ ഉയർത്തുന്ന ആരോപണങ്ങൾ വ്യക്തിപരമായ താൽപര്യങ്ങളോടെയാണെന്നും എതിർപ്പിൽ ചൂണ്ടിക്കാട്ടുന്നു.

അതേസമയം, ‘അമ്മ’യിലെ ആഭ്യന്തര തർക്കങ്ങൾ കോടതിവഴക്കങ്ങളിലേക്കും പരസ്യവിവാദങ്ങളിലേക്കും നീണ്ടതോടെ സംഘടനയിലെ ഭിന്നത കൂടുതൽ രൂക്ഷമായിരിക്കുകയാണ്. ഭരണസമിതിയുടെ പ്രവർത്തനങ്ങളെയും നേതൃത്വത്തെയും ചൊല്ലിയുള്ള അഭിപ്രായവ്യത്യാസങ്ങൾ കഴിഞ്ഞ ഏതാനും മാസങ്ങളായി സംഘടനയിൽ വലിയ ചർച്ചകൾക്ക് വഴിവെച്ചിരുന്നു.

ന്യൂഡൽഹി: 72-ാമത് ദേശീയ ചലച്ചിത്ര പുരസ്കാരങ്ങൾ പ്രഖ്യാപിച്ചപ്പോൾ മലയാള സിനിമാപ്രേമികളെ ഏറ്റവും കൂടുതൽ അതിശയിപ്പിച്ച കാര്യങ്ങളിലൊന്നായിരുന്നു ‘മഞ്ഞുമ്മൽ ബോയ്സ്’ ഒരു പുരസ്കാരവും നേടാതിരുന്നത്. കേരള സംസ്ഥാന ചലച്ചിത്ര പുരസ്കാരങ്ങളിൽ മികച്ച ചിത്രമുൾപ്പെടെ നിരവധി അംഗീകാരങ്ങൾ നേടിയ ചിത്രം ദേശീയതലത്തിലും മികച്ച പ്രകടനം കാഴ്ചവെക്കും എന്നായിരുന്നു പ്രതീക്ഷ. എന്നാൽ അന്തിമ പട്ടികയിൽ ചിത്രം ഇടംപിടിക്കാതെ പോയപ്പോൾ ആരാധകരിലും സിനിമാ നിരൂപകരിലും ചർച്ചകൾ ശക്തമായി.

ചിദംബരം സംവിധാനം ചെയ്ത ചിത്രം 2024-ലെ ഏറ്റവും വലിയ മലയാള ഹിറ്റുകളിൽ ഒന്നായിരുന്നു. കേരളത്തിന് പുറത്തും മികച്ച സ്വീകാര്യത നേടിയ ചിത്രം 200 കോടി ക്ലബ്ബിലെത്തിയിരുന്നു. ദേശീയ പുരസ്കാരത്തിനുള്ള മത്സരത്തിൽ ‘ഭ്രമയുഗം’, ‘കിഷ്കിന്ധ കാണ്ഡം’ എന്നിവയ്‌ക്കൊപ്പം ശക്തമായ സാധ്യത കൽപ്പിക്കപ്പെട്ടിരുന്നെങ്കിലും, മികച്ച നടനും മികച്ച ഛായാഗ്രഹണത്തിനുമുള്ള പുരസ്കാരങ്ങൾ ‘ഭ്രമയുഗം’ സ്വന്തമാക്കിയപ്പോൾ ‘മഞ്ഞുമ്മൽ ബോയ്സ്’ നിരാശയോടെ മടങ്ങുകയായിരുന്നു.

അതേസമയം, ചിത്രത്തിന്റെ നിർമാതാക്കളെ ചുറ്റിപ്പറ്റിയ സാമ്പത്തിക തർക്കങ്ങളും നിയമവിവാദങ്ങളും വീണ്ടും ശ്രദ്ധ നേടുകയാണ്. നിക്ഷേപവുമായി ബന്ധപ്പെട്ട പരാതികളും സാമ്പത്തിക ക്രമക്കേട് ആരോപണങ്ങളും സിനിമയെ വിവാദങ്ങളിലേക്ക് നയിച്ചിരുന്നു. ദേശീയ പുരസ്കാര നിർണയത്തിൽ ഇത്തരം വിവാദങ്ങൾ നേരിട്ട് സ്വാധീനിച്ചെന്നതിന് തെളിവില്ലെങ്കിലും, പുരസ്കാരത്തിൽ നിന്ന് ചിത്രം പൂർണമായും ഒഴിവാക്കപ്പെട്ടത് നിരവധി ചോദ്യങ്ങൾക്ക് വഴിവെച്ചിരിക്കുകയാണ്. കലാമൂല്യവും ജനപ്രീതിയും ഒരുപോലെ നേടിയ സിനിമയ്ക്ക് ദേശീയ അംഗീകാരം ലഭിക്കാതിരുന്നത് മലയാള സിനിമാലോകത്തിൽ ഇപ്പോഴും ചർച്ചാവിഷയമായി തുടരുകയാണ്.

കൊച്ചി: സംഘടനയ്ക്കുള്ളിലെ വിവാദങ്ങളും നിയമപോരാട്ടങ്ങളും തുടരുന്നതിനിടെ താരസംഘടനയായ അമ്മയുടെ ഔദ്യോഗിക പ്രവർത്തനങ്ങൾ വീണ്ടും സജീവമായി. അഡ്ഹോക്ക് കമ്മിറ്റിക്ക് കോടതി സ്റ്റേ അനുവദിച്ചതിനെ തുടർന്ന് ശ്വേത മേനോൻ പ്രസിഡന്റായുള്ള പഴയ ഭരണസമിതിയാണ് വീണ്ടും പ്രവർത്തനം ഏറ്റെടുത്തത്. ശ്വേത മേനോന്റെ അധ്യക്ഷതയിൽ ചേർന്ന ആദ്യ എക്സിക്യൂട്ടീവ് കമ്മിറ്റി യോഗത്തിൽ സംഘടനയുടെ സാമ്പത്തിക കണക്കുകൾ അംഗങ്ങൾക്ക് സുതാര്യമായി ബോധ്യപ്പെടുത്തുന്നതിന് മുൻഗണന നൽകാൻ തീരുമാനിച്ചു.

കഴിഞ്ഞ ജനറൽ ബോഡി യോഗത്തിൽ വരവ്–ചെലവ് കണക്കുകൾ പൂർണമായി അവതരിപ്പിക്കാൻ സാധിക്കാതിരുന്നത് സംഘടനയ്ക്കുള്ളിൽ വലിയ വിവാദങ്ങൾക്ക് വഴിവെച്ചിരുന്നു. 543 അംഗങ്ങൾക്കും വിശദമായ സാമ്പത്തിക കണക്കുകൾ ഈ മാസം തന്നെ ഇ–മെയിൽ വഴി കൈമാറാനാണ് തീരുമാനം. പുതിയ ജനറൽ ബോഡി യോഗം വിളിക്കുന്നതിനുള്ള വലിയ ചെലവ് ഒഴിവാക്കി അംഗങ്ങളെ നേരിട്ട് വിവരമറിയിക്കുന്നതിലൂടെ സുതാര്യത ഉറപ്പാക്കാനാണ് നീക്കം. മാധ്യമങ്ങൾക്കു മുന്നിലും കണക്കുകൾ വിശദീകരിക്കാൻ സമിതി തയ്യാറെടുക്കുന്നുണ്ട്.

ഇതിനിടെ ഭരണസമിതി പ്രവർത്തനം പുനരാരംഭിച്ചെങ്കിലും സംഘടന ഇപ്പോഴും പ്രതിസന്ധികളിലൂടെ കടന്നുപോകുകയാണ്. യോഗം ചേരാൻ ആവശ്യമായ ഏറ്റവും കുറഞ്ഞ അംഗസംഖ്യ തികച്ച് മാത്രമാണ് നിലവിൽ യോഗങ്ങൾ നടക്കുന്നത്. ട്രഷറർ ഉണ്ണി ശിവപാലിന്റെ അഭാവവും നേതൃത്വത്തിന് വെല്ലുവിളിയായിട്ടുണ്ട്. അതേസമയം അംഗങ്ങളുടെ പെൻഷൻ വിതരണം, മാസവരി പിരിവ്, ചികിത്സാസഹായ പദ്ധതികൾ എന്നിവ ഉൾപ്പെടെയുള്ള ക്ഷേമപ്രവർത്തനങ്ങൾ വീണ്ടും ആരംഭിച്ചതായി ബന്ധപ്പെട്ടവർ അറിയിച്ചു. വരും ദിവസങ്ങളിൽ കൂടുതൽ യോഗങ്ങൾ ചേർന്ന് സംഘടനയുടെ പ്രവർത്തനങ്ങൾ ശക്തിപ്പെടുത്താനാണ് തീരുമാനം.

‘അമ്മ’യിലെ പ്രസിഡന്റ് ശ്വേതാ മേനോനും എം.എൽ.എയും നടനുമായ രമേഷ് പിഷാരടിയും തമ്മിലുള്ള ഫോൺ സംഭാഷണം പുറത്തുവന്ന സംഭവത്തിൽ നടി ഉഷ ഹസീന രൂക്ഷ വിമർശനവുമായി രംഗത്തെത്തി. യാഥാർഥ്യം മനസ്സിലാക്കാതെയാണ് പിഷാരടിക്കെതിരെ സൈബർ ആക്രമണം നടക്കുന്നതെന്നും അദ്ദേഹത്തിന് സംഘടനയിലെ അംഗങ്ങളുടെയും പൊതുജനങ്ങളുടെയും പിന്തുണ ലഭിക്കുമെന്നും ഉഷ ഹസീന പറഞ്ഞു. ശ്വേതാ മേനോൻ പുറത്തുവിട്ട ഓഡിയോ ആസൂത്രിതമായ നടപടിയാണെന്നും പിഷാരടിയെ പൊതുസമൂഹത്തിന് മുന്നിൽ അപമാനിക്കാനുള്ള ശ്രമമാണിതെന്നും അവർ ആരോപിച്ചു.

വാട്സ്ആപ്പ് കോൾ റെക്കോർഡ് ചെയ്ത് പുറത്തുവിട്ടതും അതിന്റെ ചില ഭാഗങ്ങൾ മാത്രം പ്രചരിപ്പിച്ചതും ഗൗരവമുള്ള വിഷയമാണെന്ന് ഉഷ ഹസീന പറഞ്ഞു. സഹപ്രവർത്തകർ തമ്മിലുള്ള സൗഹൃദപരമായ സംഭാഷണത്തെ വളച്ചൊടിച്ചാണ് വിവാദമാക്കിയതെന്നും വർഷങ്ങളായി പരിചയമുള്ള പിഷാരടി ആരോടും മോശമായി പെരുമാറുന്ന ആളല്ലെന്നും അവർ വ്യക്തമാക്കി. സംഭവത്തെ തുടർന്ന് പിഷാരടി വലിയ മാനസിക വിഷമത്തിലാണെന്നും അദ്ദേഹത്തോട് പൂർണ ഐക്യദാർഢ്യം പ്രഖ്യാപിക്കുന്നതായും ഉഷ ഹസീന കൂട്ടിച്ചേർത്തു.

മമ്മൂട്ടിയുടെയും മോഹൻലാലിന്റെയും പിന്തുണ തനിക്കുണ്ടെന്ന ശ്വേതയുടെ വാദവും ഉഷ ഹസീന തള്ളി. ‘അമ്മ’യിലെ സാധാരണ അംഗങ്ങൾ കണക്ക് ചോദിച്ചതിനെയാണ് ചിലർ ‘പവർ ഗ്രൂപ്പ്’ എന്ന് വിശേഷിപ്പിക്കുന്നതെന്നും യഥാർഥ പ്രശ്നങ്ങൾ മറച്ചുവെക്കാനാണ് പുതിയ വിവാദങ്ങൾ സൃഷ്ടിക്കുന്നതെന്നും അവർ ആരോപിച്ചു. സംഘടനയിലെ അംഗങ്ങൾക്ക് ക്ഷേമപദ്ധതികളും സഹായങ്ങളും ഉറപ്പാക്കാനാണ് മുതിർന്ന താരങ്ങൾ ഒപ്പമുണ്ടായിരുന്നതെന്നും സഹപ്രവർത്തകനെ ചതിച്ച ഒരാളെ അവർ പിന്തുണയ്ക്കുമെന്ന് വിശ്വസിക്കാനാകില്ലെന്നും ഉഷ ഹസീന പറഞ്ഞു. ശ്വേതാ മേനോൻ ഇത്തരമൊരു നടപടി സ്വീകരിക്കരുതായിരുന്നുവെന്നും പിഷാരടിയെ കുടുക്കി പൊതുജനങ്ങൾക്ക് മുന്നിൽ നാണംകെടുത്തിയതായും അവർ വിമർശിച്ചു.

‘അമ്മ’ സംഘടനയിൽ പ്രവർത്തിക്കുന്ന ചില ‘പവർ ഗ്രൂപ്പുകൾ’ തന്നെയാണ് മുൻ പ്രസിഡന്റ് മോഹൻലാൽ രാജിവയ്ക്കാൻ കാരണമായതെന്ന് പ്രസിഡന്റ് ശ്വേത മേനോൻ. സംഘടനയ്ക്കുള്ളിൽ ശക്തമായ സ്വാധീനമുള്ള ഇത്തരം ഗ്രൂപ്പുകളെ ഒറ്റയ്ക്ക് നേരിടുക പ്രയാസമാണെന്നും, മോഹൻലാലിന് പോലും അതിനു സാധിക്കാതെ വന്ന സാഹചര്യമാണ് ഉണ്ടായതെന്നും ശ്വേതാ പറഞ്ഞു.

‘അമ്മ’യിലെ നിലവിലെ പ്രതിസന്ധിയെക്കുറിച്ച് പ്രതികരിക്കവെയാണ് ശ്വേതയുടെ പരാമർശം. ചില അംഗങ്ങൾ മുൻകൂട്ടി തയ്യാറാക്കിയ അജൻഡയുമായി എത്തിയെന്നും സംഘടനയുടെ നിയന്ത്രണം പിടിച്ചെടുക്കാൻ ശ്രമങ്ങൾ നടന്നുവെന്നുമാണ് അവരുടെ ആരോപണം. പൊതുയോഗത്തിൽ എക്സിക്യൂട്ടീവ് കമ്മിറ്റിക്കെതിരെ കൊണ്ടുവന്ന പ്രമേയത്തിന് ചട്ടപ്രകാരമുള്ള ഭൂരിപക്ഷം ലഭിച്ചില്ലെന്നും, അതിനാൽ അഡ്ഹോക് കമ്മിറ്റിയുടെ രൂപീകരണം നിയമപരമായി ചോദ്യം ചെയ്യപ്പെടേണ്ടതാണെന്നും അവർ പറഞ്ഞു.

മോഹൻലാൽ രാജിവച്ചപ്പോഴും പുതിയ തിരഞ്ഞെടുപ്പ് നടക്കുന്നതുവരെ തെരഞ്ഞെടുക്കപ്പെട്ട കമ്മിറ്റി തുടരുകയായിരുന്നുവെന്ന് ചൂണ്ടിക്കാട്ടിയ ശ്വേതാ, ഇപ്പോഴത്തെ കമ്മിറ്റിയും അതേ രീതിയിൽ തുടരേണ്ടതാണെന്ന് വ്യക്തമാക്കി. സംഘടനയെ ആരും ഹൈജാക്ക് ചെയ്യാൻ അനുവദിക്കില്ലെന്നും, അംഗങ്ങളുടെ ക്ഷേമപദ്ധതികളും ധനസഹായ വിതരണവും തടസമില്ലാതെ തുടരുകയാണെന്നും അവർ കൂട്ടിച്ചേർത്തു.