വാൽസിങ്ങാം തീർത്ഥാടനം ശനിയാഴ്ച; ആല്മീയ-സംഗീത വിരുന്നൊരുക്കാൻ ചാമക്കാല അച്ചന്റെ നേതൃത്വത്തിൽ 35 അംഗ കൊയർ.

വാൽസിങ്ങാം തീർത്ഥാടനം ശനിയാഴ്ച; ആല്മീയ-സംഗീത വിരുന്നൊരുക്കാൻ  ചാമക്കാല അച്ചന്റെ നേതൃത്വത്തിൽ 35 അംഗ കൊയർ.
July 13 06:48 2019 Print This Article
വാൽസിങ്ങാം: ഗ്രേറ്റ് ബ്രിട്ടൻ സീറോ മലബാർ രൂപതയുടെ നേതൃത്വത്തിൽ ഇംഗ്ലണ്ടിലെ നസ്രേത്തെന്നു വിഖ്യാതമായ വാൽസിങ്ങാമിൽ നടത്തപ്പെടുന്ന മൂന്നാമത് തീർത്ഥാടനം ജൂലൈ 20 നു ശനിയാഴ്ച ആഘോഷമാക്കുവാൻ മാതൃ ഭക്തർ ഒഴുകിയെത്തുമ്പോൾ മരിയഭക്തി ഗാനങ്ങളാലും, മാതൃ സ്തോത്ര ഗീതങ്ങളാലും ആല്മീയ ദാഹമുണർത്തുവാനും, ഭക്തി സാന്ദ്രവും, സംഗീതാൽമകവും ആക്കി മാതൃ സന്നിധേയത്തെ കൂടുതൽ മരിയൻ അനുഭവമേകുവാൻ ഫാ. സെബാസ്റ്റ്യൻ ചാമക്കാലയുടെ പരിശീലനത്തിലും നേതൃത്വത്തിലും വലിയ ഒരു ഗാന ശുശ്രുഷക ടീമിനെയാണ് അണിനിരത്തിയിരിക്കുന്നത്. ലണ്ടൻ റീജണൽ ചാപ്ലൈൻസികളുടെ സഹകാരിയും, രൂപതയുടെ ലിറ്റർജിക്കൽ മ്യൂസിക്  കോർഡിനേറ്ററുമായ ഫാ.സെബാസ്റ്റ്യൻ ചാമക്കാലയാണ് ഈ വർഷത്തെ തീർത്ഥാടന തിരുക്കർമ്മങ്ങളിൽ ഗാന ശുശ്രുഷ നയിക്കുന്നത്. ഈ വർഷം ഗായക പ്രതിഭകളായ കുട്ടികളെക്കൂടി ഉൾപ്പെടുത്തി മുമ്പത്തഞ്ചു അംഗങ്ങൾ അണിനിരക്കുന്ന വലിയ കൊയർ, മരിയൻ ഭക്തിനിർഗ്ഗമിക്കുന്ന ആല്മീയ-സംഗീത വിരുന്നാവും തീർത്ഥാടകർക്കായി ഒരുക്കുക.
ജൂലൈ 20 നു ശനിയാഴ്ച രാവിലെ ഒമ്പതു മണിക്ക് ദിവ്യകാരുണ്യ ആരാധനയോടെ സമാരംഭിക്കുന്ന തീർത്ഥാടന ശുശ്രുഷകളിൽ തുടർന്ന് പ്രശസ്ത ധ്യാന ഗുരുവും,ഡിവൈൻ ധ്യാനകേന്ദ്രത്തിന്റെ ഡയറക്ടറുമായ ജോർജ് പനക്കൽ അച്ചൻ മാതൃ ഭക്തി പ്രഘോഷണം നടത്തും. പ്രഘോഷണത്തിനു ശേഷമുള്ള സമയം കുട്ടികളെ അടിമവെക്കുന്നതിനും, ഭക്ഷണത്തിനുമായിട്ടാണ് ക്രമീകരിച്ചിരിക്കുന്നത്.
മരിയ ഭക്തി ഗീതങ്ങളാല്‍ മുഖരിതമായ അന്തരീക്ഷത്തില്‍ പരിശുദ്ധ ജപമാലയും സമർപ്പിച്ചുകൊണ്ട്, തങ്ങളുടെ മാതൃ ഭക്തി വിളിച്ചോതുന്ന മരിയൻ തീര്‍ത്ഥാടനം 12:45 നു ആരംഭിക്കും.
ഉച്ച കഴിഞ്ഞു 2:45 ന് തീര്‍ത്ഥാടനം സ്ലിപ്പര്‍ ചാപ്പലില്‍ എത്തിച്ചേര്‍ന്ന ശേഷം അഭിവന്ദ്യ മെത്രാൻ മാർ സ്രാമ്പിക്കലിന്റെ മുഖ്യ കാർമ്മികത്വത്തിൽ തീര്‍ത്ഥാടന തിരുന്നാൾ കുർബ്ബാന അർപ്പിക്കും. യു കെ യുടെ നാനാ ഭാഗങ്ങളില്‍ നിന്നുള്ള സീറോ മലബാർ വൈദികര്‍ സമൂഹ ബലിയിൽ സഹ കാർമ്മികരായി പങ്കുചേരും.കുര്‍ബ്ബാന മദ്ധ്യേ തിരുന്നാള്‍ സന്ദേശം പിതാവ് തന്നെ നൽകപ്പെടുന്നതാണ്. അടുത്ത വര്‍ഷത്തെ പ്രസുദേന്ധിമാരെ വാഴിക്കുന്നതോടെ തീർത്ഥാടന തിരുക്കർമ്മങ്ങൾ വൈകുന്നേരം അഞ്ചു മണിയോടെ സമാപിക്കും.
മാതൃ ഭക്തർക്കായിമിതമായ നിരക്കിൽ സ്വാദിഷ്ടമായ കേരളീയ ചൂടൻ ഭക്ഷണ വിതരണത്തിന് വിവിധ കൌണ്ടറുകൾ അന്നേ ദിവസം തുറുന്നു പ്രവർത്തിക്കുന്നതാണ് എന്ന് തീർത്ഥാടന കമ്മിറ്റി അറിയിച്ചു.
പരിശുദ്ധ മാതാവിന്റെ മാദ്ധ്യസ്ഥത്തിൽ പ്രാർത്ഥിച്ചൊരുങ്ങിക്കൊണ്ട്  വാൽസിങ്ങാം തീർത്ഥാടനത്തിൽ പങ്കുചേർന്ന്, മാതൃ കൃപയും, അനുഗ്രഹങ്ങളും, സംരക്ഷണവും പ്രാപിക്കുവാന്‍  തോമസ് പാറക്കണ്ടത്തിൽ അച്ചൻ, ജോസ് അന്ത്യാംകുളം അച്ചന്‍ എന്നിവർ ഏവരെയും  ഹൃദയ പൂർവ്വം സ്വാഗതം ചെയ്യുന്നു.
തീര്‍ത്ഥാടനവുമായി ബന്ധപ്പെട്ട കൂടുതല്‍ വിവരങ്ങള്‍ക്ക് ട്രസ്റ്റിമാരായ ടോമി പാറക്കല്‍ 07883010329, നിതാ ഷാജി 07443042946 എന്നിവരുമായി ബന്ധപ്പെടുവാന്‍ താല്പര്യപ്പെടുന്നു.
THE BASILICA OF OUR LADY OF WALSINGHAM, HOUGHTON ST.GILES

NORFOLK, LITTLE WALSINGHAM, NR22 6AL

  Categories:


വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മലയാളം യുകെയുടേതല്ല!

Comments
view more articles

Related Articles