ന്യൂസ് ഡെസ്ക് മലയാളം യുകെ ന്യൂസ്
വിവാദങ്ങളുടെ നീണ്ട പരമ്പരയ്ക്കൊടുവിൽ പ്രധാനമന്ത്രി ബോറി ജോൺസന്റെ പടിയിറക്കം രാഷ്ട്രീയ നിരീക്ഷകർ പ്രതീക്ഷിച്ചതു തന്നെയാണ്. പാർട്ടി ഗേറ്റും അനുബന്ധ സംഭവങ്ങളുമാണ് ബോറിസിന്റെ രാഷ്ട്രീയ പ്രതിഛായയ്ക്ക് മങ്ങലേൽപ്പിച്ചു തുടങ്ങിയത്. ഏറ്റവും ഒടുവിൽ ക്രിസ് പിഞ്ചറിന് ചീഫ് വിപ്പാക്കിയത് അവസാനം അദ്ദേഹത്തിൻറെ രാജിയിലേയ്ക്കും വഴിവച്ചു.
അടുത്ത പ്രധാനമന്ത്രി സ്ഥാനം ഏൽക്കുന്നതുവരെ ഇടക്കാല പ്രധാനമന്ത്രിയായി ബോറിസ് ജോൺസൺ തുടരും . എന്നിരുന്നാലും വൻ സാമ്പത്തിക, നയപരമായ തീരുമാനങ്ങൾ ഇടക്കാല പ്രധാനമന്ത്രിയായ ബോറിസ് ജോൺസനിൽ നിന്ന് ഉണ്ടാവുകയില്ല. അടുത്ത പ്രധാനമന്ത്രിയെ ഉടനെ തന്നെ തിരഞ്ഞെടുക്കണമെന്നും അല്ലാത്തപക്ഷം ഡെപ്യൂട്ടി പ്രധാനമന്ത്രി ഡൊമിനിക് റാബിനെ ഇടക്കാല പ്രധാനമന്ത്രിയാക്കണമെന്ന അഭിപ്രായം ഭരണപക്ഷത്തു തന്നെയുണ്ട്. മുൻ പ്രധാനമന്ത്രി സർ ജോൺ മേജർ ഈ നിർദ്ദേശം മുന്നോട്ടുവച്ചിട്ടുണ്ട്. പാർലമെൻറിൽ അവിശ്വാസ പ്രമേയം അവതരിപ്പിക്കാനുള്ള ലേബർ പാർട്ടിയുടെ ഭീഷണിയും ഭരണപക്ഷത്ത് ആശങ്കയുടെ നിഴൽ വിരിച്ചിട്ടുണ്ട്.
അടുത്ത പ്രധാനമന്ത്രി ആരായിരിക്കും എന്നത് ബ്രിട്ടനിലെ ജനങ്ങൾ മാത്രമല്ല ലോകരാജ്യങ്ങളും ഉറ്റുനോക്കുകയാണ്. കോവിഡും ഇന്ധന വില വർദ്ധനവും തകർന്ന സമ്പദ് വ്യവസ്ഥയിൽ രാജ്യത്തെ ആര് മുന്നോട്ടു നയിക്കും എന്നതിനെപ്പറ്റി ചർച്ചകൾ പുരോഗമിച്ചുകൊണ്ടിരിക്കുകയാണ്. സാധ്യത കൽപ്പിക്കുന്നവരിൽ ഇന്ത്യൻ വംശജനായ ഋഷി സുനകിനാണ് ഒട്ടേറെ പേർ മുൻഗണന നൽകുന്നത്.
Leave a Reply