ന്യൂസ് ഡെസ്ക്, മലയാളം യുകെ
അടുത്ത ശരത്കാല ബഡ്ജറ്റിൽ ചാൻസിലർ റേച്ചൽ റീവ്സ് പുതിയ പ്രോപ്പർട്ടി ടാക്സ് പ്രഖ്യാപിക്കുമെന്ന അഭ്യൂഹം ശക്തമായി. ഇതോടെ യുകെയിലെ ഭവന വിപണിയുടെ വളർച്ച മന്ദഗതിയിലാകുമെന്ന റിപ്പോർട്ടുകൾ ആണ് പുറത്തുവരുന്നത്. ഭവന വില ഉയർന്ന നിലയിലുള്ള സ്ഥലങ്ങളിലെ ക്രയവിക്രയങ്ങളെ പ്രോപ്പർട്ടി ടാക്സ് കടുത്ത രീതിയിൽ ബാധിക്കും. 500,000 പൗണ്ടിൽ കൂടുതൽ വിലയുള്ള വീടുകളുടെ വിനിമയത്തെ ആണ് പ്രോപ്പർട്ടി ടാക്സ് പ്രീതികൂലമായി ബാധിക്കുന്നത്. വില്പനയുള്ള വീടുകളുടെ മൂന്നിലൊന്നും 500,000 പൗണ്ട് കൂടുതലുള്ളവയാണ് എന്ന് പ്രോപ്പർട്ടി വെബ്‌സൈറ്റായ സൂപ്ല പറഞ്ഞു. ലണ്ടനും ഇംഗ്ലണ്ടിന്റെ തെക്കുകിഴക്കൻ പ്രദേശങ്ങളുമാണ് ഈ മാറ്റം ഏറ്റവും കൂടുതൽ ബാധിക്കുകയെന്നും ആണ് പുറത്തുവരുന്ന വിവരങ്ങൾ സൂചിപ്പിക്കുന്നത്.
ഭവന വിപണിയിലെ പുതിയ സാഹചര്യം യുകെ മലയാളികൾക്ക് അനുയോജ്യമാകുമോ എന്നതിനെ കുറിച്ചുള്ള ചർച്ചകളും മലയാളി സമൂഹത്തിൽ ആരംഭിച്ചിട്ടുണ്ട്. യുകെയിലെ പുതിയ പ്രോപ്പർട്ടി നികുതികളെ കുറിച്ചുള്ള അനുമാനങ്ങൾ വീട് വാങ്ങാൻ ആലോചിക്കുന്നവർക്കിടയിൽ ആശങ്ക സൃഷ്ടിച്ചിട്ടുണ്ട്. പ്രത്യേകിച്ച് £500,000-ൽ കൂടുതലുള്ള വീടുകൾക്ക് നികുതി ഏർപ്പെടുത്താനുള്ള സാധ്യതയുള്ളതിനാൽ, വില കുറഞ്ഞ വീടുകൾക്കായി കാത്തിരിക്കാനുള്ള പ്രവണത ഉയർന്നേക്കാം.
മലയാളികൾ ഉൾപ്പെടെയുള്ള കുടിയേറ്റക്കാർ ആദ്യമായി വീട് വാങ്ങുമ്പോൾ വില ഉയർന്ന പ്രദേശങ്ങളിൽ വീടുകൾ സ്വന്തമാക്കുന്നത് ബുദ്ധിമുട്ടായിരിക്കാം. ലണ്ടൺ , കെന്റ് തുടങ്ങി താരതമ്യേന വില ഉയർന്ന പ്രദേശത്ത് നിന്ന് വിലകുറഞ്ഞ സ്ഥലത്തിലേയ്ക്ക് വീടുകൾ വാങ്ങുന്നതിനായി ആളുകൾ മാറാനുള്ള സാധ്യതയും പുതിയ നികുതി നിർദേശത്തിന് അനുസരണമായി സംഭവിക്കും എന്നാണ് വിലയിരുത്തപ്പെടുന്നത്. പ്രോപ്പർട്ടി ടാക്സ് നിലവിൽ വരുന്നത് കാര്യമായി മലയാളികളെ ബാധിക്കില്ലെന്നാണ് ഹോം എക്സ് യുകെയുടെ മേധാവി രാജേഷ് ജോസഫ് മലയാളം യുകെയോട് പറഞ്ഞു. സാധാരണയായി മലയാളികൾ മേടിക്കുന്ന വീടുകളുടെ വില ടാക്സ് പരുധിയിൽ താഴെയാകാനുള്ള സാധ്യതയാണ് ഇതിന് കാരണമായി അദ്ദേഹം ചൂണ്ടി കാണിക്കുന്നത്.
പുതിയ സാഹചര്യത്തിൽ വില കൂടിയ വീടുകൾക്ക് വില്പനക്കാരനെ കണ്ടെത്തുന്നതിന് നിലവിലുള്ളതിനേക്കാൾ രണ്ടര മടങ്ങ് കൂടുതൽ കാലം എടുത്തേക്കാമെന്ന് ആണ് ഈ രംഗത്തെ വിദഗ്ധർ അഭിപ്രായപ്പെടുന്നത്.വില അമിതമായി കൂടിയാൽ വിൽപ്പന വളരെ നീണ്ടു പോകാനുള്ള സാഹചര്യവും ഉണ്ടായേക്കാമെന്നത് ഈ രംഗത്ത് പണം മുടക്കുന്നവരെ പ്രതിസന്ധിയിലാക്കും. അതായത് ഭവന വിപണിയിൽ നിക്ഷേപിച്ചവർക്ക് തങ്ങളുടെ നിക്ഷേപത്തിന്റെ മൂല്യ വർദ്ധനയിൽ വൻ കുറവ് ഉണ്ടാകുമെന്നതാണ് ചൂണ്ടി കാണിക്കപ്പെടുന്നത്.
Leave a Reply