ന്യൂസ് ഡെസ്ക്, മലയാളം യുകെ
ഇംഗ്ലണ്ടിൽ 22 വയസിന് താഴെയുള്ളവർക്ക് സൗജന്യ ബസ് പാസ് നൽകാനുള്ള പദ്ധതിയിൽ നിന്ന് സർക്കാർ പിൻവാങ്ങി. ഇപ്പോഴത്തെ സാമ്പത്തിക അവസ്ഥയിൽ ഇത് മുന്നോട്ട് കൊണ്ടുപോകാൻ പറ്റില്ലെന്നാണ് സർക്കാരിന്റെ നിലപാട്. ഈ പദ്ധതിയെ കുറിച്ച് ട്രാൻസ്പോർട്ട് കമ്മിറ്റിയാണ് ശുപാർശ ചെയ്തിരുന്നത്. തൊഴിലും വിദ്യാഭ്യാസവും യുവാക്കൾക്ക് എളുപ്പത്തിൽ ലഭ്യമാക്കുക എന്നതാണ് ഇതിന്റെ ലക്ഷ്യമെന്നും അന്ന് അവർ പറഞ്ഞിരുന്നു.
സർക്കാരിന്റെ തീരുമാനത്തിനെതിരെ കമ്മിറ്റിയുടെ അധ്യക്ഷയായ എം.പി. റൂത്ത് കാഡ്ബറി ശക്തമായി പ്രതികരിച്ചു. “ദുര്‍ബല ഗതാഗത സംവിധാനം നിരവധി പ്രശ്നങ്ങൾ സൃഷ്ടിക്കുന്നു അവർ പറഞ്ഞു. യുവാക്കൾക്ക് ജോലി ലഭിക്കാൻ ബുദ്ധിമുട്ട്, വിദ്യാർത്ഥികൾക്ക് ദീർഘയാത്രകൾ, മുതിർന്നവരും വൈകല്യമുള്ളവരും ഒറ്റപ്പെട്ട് കഴിയുന്ന അവസ്ഥ, വ്യാപാര കേന്ദ്രങ്ങൾക്ക് ഉപഭോക്താക്കളുടെ അഭാവം എന്നിങ്ങനെയുള്ള പ്രശ്നങ്ങൾക്ക് പ്രതിവിധിയായാണ് സൗജന്യ യാത്രാ പദ്ധതി വിഭാവനം ചെയ്തതെന്ന് അവര്‍ പറഞ്ഞു. സ്കോട്ട് ലൻഡിൽ 5 മുതൽ 22 വയസുവരെയുള്ളവർക്ക് ഇതിനകം സൗജന്യ ബസ് യാത്ര ലഭ്യമാണെന്നത് അവർ ഓർമ്മപ്പെടുത്തി.
സർക്കാരിന്റെ തീരുമാനം നിരാശാജനകമാണെന്ന് ഒട്ടേറെപ്പേർ അഭിപ്രായപ്പെട്ടു. യുവാക്കൾ ഇതിനകം തന്നെ വിലക്കയറ്റത്തിൽ നട്ടംതിരിയുകയാണെന്നും പലരും നല്ലൊരു തുക മാസത്തിൽ ബസ് യാത്രയ്ക്കായി ചെലവാക്കുന്നുവെന്നും ആണ് ഭൂരിപക്ഷവും ഈ വിഷയത്തിൽ പ്രതികരിച്ചത് .
Leave a Reply