കോട്ടയം ∙ സീരിയൽ നടൻ സിദ്ധാർഥ് പ്രഭു ഓടിച്ച കാർ ഇടിച്ച കാൽനടയാത്രക്കാരൻ മരിച്ചു. കഴിഞ്ഞ ഒരാഴ്ചയായി ചികിത്സയിലായിരുന്ന തമിഴ്നാട് സ്വദേശി തങ്കരാജ് (60) ആണ് മരിച്ചത്. ഡിസംബർ 24ന് വൈകിട്ട് എംസി റോഡിലെ നാട്ടകം കോളജ് കവലയ്ക്ക് സമീപം, കോട്ടയം ഭാഗത്തുനിന്ന് എത്തിയ കാർ നിയന്ത്രണം വിട്ട് വിവിധ വാഹനങ്ങളിൽ ഇടിച്ച ശേഷം റോഡരികിൽ ലോട്ടറി വിൽക്കുകയായിരുന്ന തങ്കരാജിനെ ഇടിക്കുകയായിരുന്നു.
അപകടസമയത്ത് സിദ്ധാർഥ് പ്രഭു മദ്യലഹരിയിലായിരുന്നുവെന്ന് പൊലീസ് അറിയിച്ചു. വൈദ്യപരിശോധനയിൽ മദ്യപിച്ചതായി വ്യക്തമായതോടെ മദ്യപിച്ച് വാഹനം ഓടിച്ച് അപകടം ഉണ്ടാക്കിയതിന് ഇയാൾക്കെതിരെ കേസെടുത്ത് അറസ്റ്റ് ചെയ്തു പിന്നീട് ജാമ്യത്തിൽ വിട്ടയച്ചിരുന്നു. അപകടത്തിൽപ്പെട്ട വാഹനം പൊലീസ് കസ്റ്റഡിയിലെടുത്തിരുന്നു.
പരിക്കേറ്റ് ചികിത്സയിലിരിക്കെ തങ്കരാജ് മരിച്ചതോടെയാണ് കേസിൽ കൂടുതൽ ഗുരുതര വകുപ്പുകൾ ചുമത്താൻ പൊലീസ് തീരുമാനിച്ചത്. സംഭവവുമായി ബന്ധപ്പെട്ട അന്വേഷണം പുരോഗമിക്കുകയാണെന്നും തുടർനടപടികൾ സ്വീകരിക്കുമെന്നും അധികൃതർ വ്യക്തമാക്കി.
Leave a Reply