ന്യൂസ് ഡെസ്ക്, മലയാളം യുകെ
ഇംഗ്ലണ്ടിൽ കുട്ടികളുടെയും യുവാക്കളുടെയും മാനസികാരോഗ്യ പ്രശ്നങ്ങൾ ഗുരുതരമാകുന്നതായി പുതിയ റിപ്പോർട്ട് പുറത്തു വന്നു. 2024-25 കാലയളവിൽ 10.48 ലക്ഷത്തിലധികം കുട്ടികൾ മാനസികാരോഗ്യ സേവനങ്ങളിലേക്ക് റഫർ ചെയ്യപ്പെട്ടതായി കുട്ടികളുടെ കമ്മീഷണർ ഡെയിം റേച്ചൽ ഡി സൂസയുടെ റിപ്പോർട്ട് വ്യക്തമാക്കുന്നു. ഇത് മുൻവർഷത്തേക്കാൾ ഏകദേശം 10 ശതമാനം വർധനയും 2018-19ലെ കണക്കിനെ അപേക്ഷിച്ച് ഇരട്ടിയിലേറെയുമാണ്. രാജ്യത്ത് യുവജനങ്ങളുടെ മാനസികാരോഗ്യ രംഗത്ത് വലിയ പ്രതിസന്ധിയാണ് നിലനിൽക്കുന്നതെന്ന് റിപ്പോർട്ട് മുന്നറിയിപ്പ് നൽകുന്നു.
അമിതമായ ഉത്കണ്ഠ തന്നെയാണ് ഇപ്പോഴും ഏറ്റവും കൂടുതൽ റഫറലുകൾക്ക് കാരണമാകുന്നത്. അതേസമയം സംശയിക്കുന്ന ഓട്ടിസം കേസുകളുമായി ബന്ധപ്പെട്ട റഫറലുകളിൽ 47 ശതമാനവും മറ്റ് ന്യൂറോഡെവലപ്മെന്റൽ പ്രശ്നങ്ങളുമായി ബന്ധപ്പെട്ട റഫറലുകളിൽ 24 ശതമാനവും വർധന രേഖപ്പെടുത്തി. മാർച്ച് 2025 വരെയുള്ള ഒരു വർഷത്തിനിടെ ഏകദേശം പത്തിൽ ഒരാൾ എന്ന നിരക്കിൽ കുട്ടികൾ മാനസികാരോഗ്യ സേവനങ്ങളുടെ പരിധിയിലെത്തിയതായി കണക്കുകൾ സൂചിപ്പിക്കുന്നു.
ആവശ്യം കുത്തനെ ഉയരുമ്പോഴും സേവനങ്ങൾ അതിനനുസരിച്ച് വികസിക്കാത്തതാണ് പ്രധാന വെല്ലുവിളിയെന്ന് വിദഗ്ധർ ചൂണ്ടിക്കാട്ടുന്നു. നിരവധി കുട്ടികൾ ചികിത്സയ്ക്കായി മാസങ്ങളോ വർഷങ്ങളോ കാത്തിരിക്കേണ്ട സാഹചര്യമാണുള്ളത്. മാനസികാരോഗ്യ സഹായത്തിനായി കാത്തിരിക്കുന്ന കുട്ടികളുടെ എണ്ണം ഇപ്പോഴും ലക്ഷക്കണക്കിനാണെന്നും, പ്രതിസന്ധി ഘട്ടത്തിലെത്തുന്നതിന് മുമ്പ് തന്നെ കുട്ടികൾക്ക് ആവശ്യമായ പിന്തുണ ഉറപ്പാക്കാൻ കൂടുതൽ നിക്ഷേപവും സേവന വിപുലീകരണവും അനിവാര്യമാണെന്നും റിപ്പോർട്ട് ആവശ്യപ്പെടുന്നു.
Leave a Reply